TOUPAN Toupa thuzui bang in halmang thillatte leh kithoihnate a pakta ahia? Ngaiin, kithoihna sang in thuman a hoih zaw a, belamtal thau sang in a thuzuih a hoih zaw (ISam 15:22). THUMASA:
Haksatna tampite kal a kumlui 2016 hon zohpih a, kumthak 2017 bul hon patpih, kum leh kha, ni leh hunte tung a thunei i biak Toupa min phat in om hen. Khristian Thukizakna simtu tengteng na vek un KUMTHAK CHIBAI. Kumthak i muh teng a hong lang sek, mimal, innkuan leh saptuam hiam pawlpi hiam in i hih ding a hoih tampi omte lak a khenkhat saulou in kikum leng chi i hi: I. KIPAHTHU GENNA LEH THUPHATAWINA:
Hun leh ni ei i kibawl theihlouh, damtheih utlou kuamah omlou hinapi a i kipiak theihlouh Toupan a thawn a hon piak, azawng ahau khen lou, apil leh asiam khen lou, thahat leh zawngkhalte akibang a hon piak, kumlui hon zohpih ban a, kum thak hon musak kipahthu gen ni. Tuaban ah, i gen chiang a gen khial, i sep chiang a zong sem khial thei zelte, leh i gamtat khohei a zong Toupa lungkham sak kha sekte i hihman in thuphatawi in ngaihdam ngen ni. II. NUNGLAM ETKIKNA:
Maban leh hun hong tung ding a bangchi panlak ding, bang bang sem ding, bangchi sep ding chih i bawl theihna ding in hun paisa leh i nunglam etkik louh theih hi lou. Huan i lohsapnate leh aziak, i lohchinnate leh i panlak dan, sutzop tuak bangzah om, tawpsan dia hoih bangzah, leh i hihkhak nailouh pat tuak bangbang om chihte kivel ni. I Toupa Pathian in ut hileh ni khat thu a zong thil tengteng siam zou ding hina pi, a siamsate hoihtak a en, hoih hi a chih chiang a aban sunzom zel, ni guk sung nasem, ni sagih ni a khawl pan hi. Kumthak i kalsuan na ding ah nunglam etkikna toh panla leng chih deihhuai i sa hi. III. KIMANGNGILH SAKNI:
Leitung mihingten i tup leh deih hihetlou, himahleh i pelh theihlouh buaina, lungkhamna, dahna kahna, natna satna, minsiat mindai, lohsapna chi tuamtuam hon nawkkha zelte ziak a kingaisia in, lunglel lungkia in om kei ni. Tuni a mithupi, mi minthang leh mi lohching i chihte zong haksatna atuak ngeiloute, lungkhamna athei khaloute leh a lohsam ngeiloute hilou in, huaite tengteng ahoih lam a sang a, Toupa bel a, panla thak zelte ahi uh. Nang leh ken zong i tuah thilte tung a vualzohna hon peding in Toupa bel ni. IV. TUP-LE- NGIIM KICHIAN BAWL IN:
I sepna khempeuh ah tupna leh ngiimna kichian om kei leh lohchin luat omlou pah hi. Buh hauh tum ten lou lian vat pah ngai, aziak tuh lou neuchik a buh tampi lak chih om thei lou ahihman in. Kumpi nasem, saptuam a sem, Company leh Private a semten zong sep ding kichian, tha lut ding zah, sum bei ding zah leh hun poimoh zah hoihtak a tuat in na guang zel uhi. Salam khosakna leh khalam hinkhua ah poimoh tuaktuak, tup leh ngiim kiteltak, bawl a huai dan a paina in lohchinna hon tut-ngei lam en hang. V. HAKSA THUAK DING IN KIGING NI:
Kum khat paltou nawn ding i hihna ah, khua pha gige lou ding, ni sa gige lou ding ahi chih thei kawm in, huihpi vuahpi hong om hun, khuaniim ni leh vuahzuk ni ban ah damlouh zawngkhalna, taksap lungzinna, leh lohsapna zong hongtung ding ahi chih thei in kiging khawl ni. Khalam ading zong Laisiangthou sim in niteng thumna hinkhua ah kalsuan in hon hihnok thei omte hemkhe zelzel leng. Tuamah bang in salam ading zong khelhna ziak a lungsim liam gawp thei ahihman in nuamtatna, noptalna leh sa utna thanghuaite taikhiak san in, sum leh pai deihtakna, duh leh deih a khemna leh zolna hong tungte nang ngam ding in kiging chiat ni. VI.TOUPA THU NGAIKHIA IN:
Maban ding khualna toh tha-itlua in Laisiangthou sim manlou, thum man lou, biakin kai manlou, Saptuam kipawlkhawmna leh Toupa min a kalsuannate nangawn ah ka mankei i chih khak ding kiven huai mahmah hi. Niteng a Laisiangthou sim a thumna toh hun na zat manlouh chiang in, na tel leh na delh buaina ten nang hon subuai semsem ding ua, thang-awk bang in na peksuah zou kei kha ding chih kiveng in. Kumpipa Saul galdou ding a a kuan in Toupan a hihding dan hoihtak in hilh a, va vualzou ding ahihdan leng hilh hi. Amun leh hun ahong tun chiang in Toupa chihdan lou deuh, thilhoih hithou khat a hon mukhia a, huai a hon zuita. Toupa’n a hoihthou mahve a chih pih kei a, A siampu Samuel zang in galzou a hong pai kumpi Saul tuh Toupan a na sal ekek tamai a, kumpi ahihna apan leng lakkhiak in hong om maimahta hi. Kumthak i patna ding ah, thilhoih leh thil kilawm tampi i khosakna adia hoih dan a kilang, khalam adia le se lawmlawmlou dan a theih zang a melmapa setan in doudan siamtak a hon dou ding ahihman in LAISIANGTHOU A PATHIAN IN BANG GEN chih mah a kibulphuh in niteng THUMNA hinkhua zang ding in Toupa min in i kingen hi.