1Johan 3:9-10 “Kuapeuh Pathian a kipan a suak in, a sung a Pathian chi om ahihman in, thil ahihkhial den thei kei hi; Pathian a kipan a suak ahihman in thil ahihkhial nilouh thei kei hi. Hiai ah Pathian tate leh Diabol tate ahong kilang hi: Kuapeuh diktatna hihlou tuh Pathian a suak ahi kei, huan, kuapeuh a unau itlou leng Pathian a suak ahi kei hi.” THUMASA:
I sepna ah, i insung leh mimal hinkhua a kisinsakna poimoh lai, diktatna a kilam thak zou nailou i hi chileng i chi khial law lawm lawm din i gingta kei hi. Diktatna i chih hong kipatna ding mun tuam, gamtuam, pawlpi khat hiam, ahih keileh saptuam bing khat hiam, inkuan bing khat a hong kipan ding hilou in, mimal chih hinna lungtang sung a hong kipan ding hi. Huaiziak in, tutung in “Mimal a Khrist diktatna a kilamthakna” chih thupi Laisiangthou pansan in kikum leng i chi hi. DIKTATNA KICHI BANG AHIA? Laisiangthou ah “Diktatna” chih a gen chiang in Pathian hihnate lak a khat genna ahi, “Kuapeuh lungsim ngaihtuahna siangthou leh tang, Pathian Danthu limsakna leh niteng a hinkhua a zuite mi diktat chihna ahi”. “Diktatna” chih thumal Hebru ah “sedge,” Greek thumal ah “dikaiosyne” ahi a, huai tuh “dik (right) hiam, siamtang (just) chihna ahi. Dictionary ah “Diktatna” tuh “gamtat thilhih a dik leh thil ahiding bang a hihna ahi” a chi hi. Pathian Diktat apan suak in  diktatna a nei ngeingei ding a, Pathian apan suak hilou in hiai diktatna a nei kei ding. Laisiangthou in “Hiai ah Pathian tate leh Doimangpa tate a theih theih hi. Kuapeuh thildik hihlou hiam, a unau itlou tuh Pathian a suak ahi kei (1Jn.3:10)” a na chi hi. Gingtu, piangthak diktak zaw diktatlou in a om kei ding. Pathian apan suak mi kuapeuh thil hihkhiial nilouh a omkei, bang ziak hiam i chih leh amau ah Pathian mizia a om a, Pathian tuh a Pa uh ahih ziak in, a khial nilouh thei kei uhi (IJn.3:9). Khelhna hih a lungkim, bangmah kisiam louhna lungtang a nei lou, huai a nuamsa tuh Doimangpa ta ahi chih kichetna ahi, Johan in a na chi hi (1Jn.3:10). Hiai bang mite tuh Jesun, “amaute a gah un na thei ding uh, louling nei a kipan grep gah a kilou ngei ahia? Ahihkeileh, lenling a kipan in theipi a kilou ngei ahia? Huai bang in, sing hoih in gah hoih a suang a, singsia in gah sia a suang hi. Sing hoih in gahsia a suang thei kei a, sing sia in leng gah hoih a suang thei kei hi, ana chi hi (Mat.7:16-17). Mundang gelh ah “Mihoih in a lungtang goubawm hoih a kipan in thilhoih ahon suah khe zel a, mihoih lou in a lungtang hoihlou a kipan thilhoihlou a hon suah khe zel hi. Lungtang a dimval kam in a genkhe zel ahi ngal a (Lk.6:45) a na chi hi.
Pharisai ten Jesu kiang, kou Abraham tate ka hi ua, Pathian ka pa uh ahi a chih lai un, Jesu’n Abraham tate hile uchin hon thah na sawm kei ding uh, Abraham in zaw hichibang a hih kei, Pathian na pa uh hileh kei non it ding ua, ka thu na ngaikhe ding uh.  Nou zaw na pa uh Dawimangpa tate na hi ua, na pa uh deihdan a gamtat na utlam uh ahi. Amah zaw atung a kipan tualthat ahi. Thutak ah a om kei, amah a thutak a omlouh ziak in, zuau a gen chiang in, amah pianken dungjui a gen ahi, amah lah zuauthei, zuaute pa ahi ngal a, chi hi (Jn.8:39-45). Diktatlouhna, zuautheihna, thutaklouhna i chihte ahihleh abawltute, ahihtute’n amau pianken hihna ahih man in a lamdang hilou ahi. Pathian apan suak ahihlouh ziak uh ahi. I kam in piangthak diktak ka hi chi chi mahleh gamtat hinkhua a diktatna nei hetlou i hihleh eimah kikhem lel i hi, i lungtangte bukpan i gamtat leh thilhihte hon mupa’n nitawpni chiang in “ka hon thei ngei kei, nou thil gilou hihte aw, ka kiang a kipan in paimang un” a hon chih ding i hi kha diam? kivel ni (Mat.7:21-23). DIKTATNA HONG OMDAN:
1. Ginna ziak in diktat a sim i hi: “Toupa’n inn pawlam ah Abram a pawt khiak pih a, Vanlam en in, daktou inla, aksite en in, simdek him dih, na sim thei na hiam ah, hichibang tuh na suante hi ding uh ahi,” achi hi. Huan, Abram in TOUPA a gingta a, huai tuh TOUPA’N a diktatna in a sehsak hi (Gen.15:5-6). “Ginna in Abel in Kaina sang in kithoihna hoihzaw Pathian kiang ah a laan a, a ginna ziak in midiktat hih alohta hi”(Heb.11:4). Nasep ziak hilou, thilhoih hih ziak hilou, thilpiak ziak leng hisam lou himahleh Pathian muang zaw mi ginna tuh a diktatna a seh ahi.  Pathian in diktat a a seh mi tungtang David in hichi in na gen hi, “A tatleknate uh ngaihdam a om a, a khelhna uh khuh a omte tuh mi hampha ahi uhi. Toupa’n khelhna nei a a sehlouhte mihampha ahi uh” chi hi (Rom.4:5-8). 2. Jesu Sisan kia hi i diktatna : Mi teng teng mikhial, khelhna man sihna i tan ding ahi (Rom.3:23; 6:25). Himahleh “Aman zaw thil a hihkhial ngei het kei a, a kam a kipan zekhemna pawt kuaman a za ngei kei uhi…Khelhna lam a sikhin a, diktatna lam a i hin theihna ding in, amah mah in sing ah a sapum in, i khelhnate a pota a, amah vuakna golhte ah hihdam in na omta uhi” chi hi (1Pet.2:22,24). “Amah a Pathian diktatna i honghih theihna ding un, khelhna neilou Khrist tuh Pathian in eite jiak in khelhna nei in a bawlta hi (2 Kor.5:21). I pilna, i diktanna, i siangthouna, tatkhiakna Khrist sisan kia ahi (1Kor.1:30).
DIKTAT DING A SAP IHI: “Nou hon sampa Pathian a sianthou bang in; nou leng na omdan tengteng uah hong siangthou zaw un, Laisiangthou in, “Noute na siangthou ding uh ahi, kei ka siangthou ngal a” a chih bang in (1Pet.1:15-16) “Pathian in sianglou ding in a hon sam ngal kei a, siangthou ding in a hon sam zaw hi. Huaiziak in, hiai nial in mihing nial ahi kei a, Pathian, a Kha Siangthou nou hon pepa nial ahizaw hi (I Thes.4:7-8). “Na vek un vak tate leh sun tate na hi ngal ua, Jan a mi hiam, mial a mi hiam i hikei uhi (I Thes.5:5). Vak tate i hihman in Paul in “Na sahiangte uleng gitlouhna vanzat ding in khelhna kiang ah pephal kei un, ahihhang in sihna akipan a hingsak nawnte bang in, Pathian kiang ah kipezaw unla na sahiangte uleng diktatna vanzat ding in Pathian kiang ah pezaw un. Khelhna in na tung ua thu a neih nawnlouh ding ahi (Rom.6:13,14) a chi hi. Paul in “Na sapumte uh Khrist sahiangte ahi uh chih na thei kei ua hia? Sapum tuh huukna thanghuai a zat ding ahikei a, Toupa’ nnasepna dia zat ding ahi zaw. Khrist sahiangte la in kizuaknu sahiangte di’n ka bawl dia hia leh? Bawl lou hial ding. Ahihleh midiktatlou te’n Pathian lalgam a luah kei ding uh chih na theikei ua hia? Khem in om kei un; numei-pasal kaal a thanghuaite hiam, milimbete hiam, angkawmte hiam, pasal leh pasal kingaite hiam, tokawhukte hiam, gutate hiam, mihuaihamte hiam, zukhamhatte hiam, mikousiat hatte hiam, lepgute hiam in Pathian lalgam a luah kei ding uhi (IKor.6:15, 13, 9-10) a chi hi. Hiai bang diktatlouhna hihte’n Pathian lalgam aluah kei ding uhi chih Pathian thugen ahi. Diktatna ngaidau mah lehang Pathian in ngaidau hetlou ahi chih i mu hi. DIKTATNA DELH DING A THUPIAK I HI:
“Himahleh nang Pathian mipa aw, hiai thilte taisan inla, diktatna…delh in (ITim.6:11). “Valnou sa-utnate khawng taisan inla, lungtang siangthou a Toupa min lou peuhmahte toh diktatna, ginna, itna leh lemnate delh in (2 Tim.2:22) “Diktatna delh in” a chih in mihingte diktatloute i hih lai lai un diktatna ngah sawm/neih sawm tei tei un a chihna ahi. Diktatna thilhihna ah alianpi a kilangte ban ah thil neuchik chikte ah diktat poimoh hi. Diktatna kichi pen khatvei nasep a kizou thil hilou in niteng, hun teng a diktatna i suah poimoh ahi. Himahleh mihingte pen bukimlouhna toh kidim mihing i hi uh chih mangngilh kei ni in, himahleh diktatna mah delh chinten in pang ni. SUM-LE-PAI A DIKTATNA:
Laisiangthou in “Dangka sum deihluatna tuh gilou chiteng bul ahi ngal a, huai tuh khenkhat te’n a deih mahmah ua, ginna a taimangsan ua, lungkhamna tampi in amau leh amau akisun let tetok uhi” (1Tim.6:10) a chi hi. Sum-le-pai toh mihingte kikhen thei lou i hi. Huchibang ahihlai in sum muhna adik a azatna leng adik ding ahi. Pathian ta, gingtu diktak in diktatna a nei ngei ding ahi. Diktatna neilou Pathian a suak ahi kei Johan in a na chi hi (1Jn.3:10). Sum deih luatna ziak in akilawm leh kilawmlou leng khual lou in sum muh theihna ahih nak leh chi in diklou tak a sum muh leng poisak louhna alian mahmah hi. Amuhna diklou tuh azatna lam ah leng a hong dik kei a, khamtheih, zu leh drug hihna tuamtuam ah a hong lang a, lungkhamna leh siatna tampi’n a hong gah hi. Khenkhatte lah sum amau khut a om a, sum a sai khak nak ua leh bangzah hiam nek ding, eukhiak teitei sawm awm hi. Toupa’n tawmchik tung a ginomlou tuh tampi tung ah a ginom kei a na chi hi. Tuni a cheng khat cheng nih a diktat a poimoh mahmah hi. Chengkhat tung a diktatlou tuh cheng sawm kem dia muanhuai lou ahi. Diktatna i chih kuamah hon muding a omlouh lai a, diktatna ahi. Juda Iskariot bang in dangka bangzah in na Toupa na khawng a? Election hun a vote piakna dia dangka lak diktatlouhna ahi. I vote eimah thu a zalen tak a i khiak ding ahi. Mi vote va khiaksak chihte diktatlouhna ahi. Hiai bang hihlou dia kivauna hiam, booth capture chihte khelhna/diktatlouhna ahi. Sum a i kikhot ziak in, lampi hoih leng i khosung ah i nei nawn kei a, lampi sia leh kuak tektok lak ah i pai uhi. “Dikloupi a muh sum tampi neih sang in, diktattak a muh, tawmchik neih ahoih zaw” Mipil pen Solomon in a na chi hi (Pau.16:8). NEKTAK ZONNA LEH SEPNA A DIKTATNA:
Nekzonna leh sepna a diktat ding ahi. Nezonna mun leh sepna mun kuapeuh kibang vek lou ding hi. Himahleh, Pathian in i nek muhna ding a nna a honpiak ah lungkim in diktat tak in sem ni. Solkar nna, mission nna hi in private nasem hitalehangle, Pathian nasem bang a sep ding ahi. Pathian nasem bang a kingaihtuah louh ziak a nasepna a diktatlou i hi kha diam? Nasepna leh dinmun toh kituak a loh nei hinazenpi bang hiam piak zek om keileh koihdap masa in mite piakbeh ding ngakbawl in, piak zek om kei leh semlou; tagah meithaite neksik tansik teng neksak; a muh ding uh kimtak a piakkhiat theih hinazenpi eukhe chitchiatse chihte diktatlouhna ahi. Hiai bangte Christian te’n i chiin het louh ding ahi. Baptistpa Johan in siah dongte kiang ah “Hon sehsak sang ua tamzaw dong kei un” (Lk.3:13), Sepaihte kiang ah “kuamah sum sut kei unla, dikloutak in kuamah hek sam kei un. Na lawh uah lungkim un” (Lk.3:14). Alek-aval a thilpiak; kaisanna ding deihna ziak a heutute golhguk chihte Pathian deih dan ahi kei hi. Na nekzonna ahihkeileh na sepna mun apan khatvei na khawl ngeingei ding a, huai hun chiang in mite’n bangchibang a hon gen a hon theih det ding uh na ut a? NUMEI-PASAL  KAL  A  DIKTATNA:
Leitung a mihingte lak a diktatlouhna aletna mahmah tuh numei pasal kal khelhna ah ahi chileng kikhial lawmlawm lou ding hi. Ang na kawm ding uh ahi kei chih tuh Toupa thupiak ahi (Exo.20:14). Toupa huat leh deihlouh mahmah, a hehna leh vaihawmna samkhetu tuh numei pasal kal a diktatlouhna ahi. Noah hun a tuichim a gawtna leh Sodom leh Gomora khuate, van apan mei leh kat a halsiang a omna ziak numei pasal kal a thanghuaina/diktatlouhna jiak ahi. Nupa hi’n nupa lou hitaleh chihtaklouhna uang mahmah ahihdan miteng theih ahi. Kitenna omlou a nupa banga omkhawmna tuh khelhna ahi. Pasal nei/zi nei hinapi a midang toh awmkhawmna tuh angkhawmna ahi. Numei Pasal kal a chihtaklouh man in Nupa kal kisia, kibal tampi omta a, tualthahna, mahni kithahna tanpha tung tampi om hi (Pau.6:27-29). Tua ahihman in numei pasal kal ah diktatna, chihtakna toh pang a ma lak kisam mahmah hi. Adiak in nupa hitate’n diktatna hinkhua nei in, tu-le-tate sinsak in, kipanthak leng numei pasal kal hong hoih thei ding hi. Thukhitna:
Diktatna hinkhua i chih Pathian a pan suak, mite’n Pathian ta i hi chih a theih theihna omte lak a khat ahi. Diktat teng teng piangthak vek uh, adiktat ziak ua, piangthak ahi uh i chihna leng ahi kei hi. Khristian narante sang a khalam pianthakna neilou midiktat tampi muh ding atam hi. Diktatna diktak Jesu, khelhna neilou, tatna sisan jiak kia in Pathian mai ah diktang i hi. Mial apan diktatna vak a hon pilut tu in, mimal a diktatna a hing din a honbawl hi (Eph.2:10). Niteng hinkhua, nektak zonna leh nasepnate ah, numei pasal kal ah, sum-le pai i zonna leh zatdan ah diktat tak a kumthak a pan lathak ding in i kichial ahi.  “Adik leh tang a gamtat tuh Toupa adin kithoihna saang in apomtak zaw hi” (Pau.21:3). Toupan simtute teng teng hon vualzawl hen.