NGAIHDAM A OM (Forgiven) chihlouh thudang ka hantung ah ka sih chiang in gelhkei un chi in Pastor Theodore Williams, IEM heutu in a damlai in gen chi uhi. Leitung maikaih ah thumal poimoh mahmah thum gen ding kichi taleh a telkha ngeingei dia gintathuai tuh itna, hehpihna leh ngaihdamna hi ding hi. Itna lou in hehpihna a omthei kei ding a, itna leh hehpihna neilou in tuh a ngaidam kei hial ding hi. I gam sung in tulaitak a i poimoh bang, chi in kidong zual taleng, Revival i chih gintathuai hi. Bangchi bang revival maw? Diktatna leh kikhekna i chi maithei, poimoh lua, himahleh ngaihtuahna a hong lut mahmah tuh “Ngaihdamna Revival” ahi i poimoh uh chile’ng gen khial ding in kikoih kei hang. Pathian ngaihdamna revival leh khat-le-khat kingaihdam theihna revival poimoh i hi uhi. “Pathian in Khrist a hon ngaihdam bang in, noumau leng kingaidam tuah chiat un” (Eph.4:32). Pathian ngaihdamna tang kichi ei gingtute’n ngaihdamna ngai thupi in, tawisang in manpha ahihdan gel vengveng in hinpih chiat ding in i kichial hi.

NGAIHDAMNA LEH A BULPI: Ngaihdamna kichi Pathian lungtang tawng akipan, Pathian hihna sukha ahi. Diktat Pathian, khelhna ngaizamlou leh gawtlou theilou ahihlai in, itna Pathian ahihna mah toh ngaidam teitei hi. “Kei, kei mahmah, keimah leh keimah ziak lel a na tatleknate uh nulmangzel-pa ka hi; na khelhnate u’leng ka theigige kei ding” (Isai 43:25) a chih ban ah “Na tatleknate uh meipi hihmang bang in ka hihmang ta a, na khelhnate uh mei hihmang bang in ka hihmang nalai hi” (Isai 44:22). Hiaite apan et in ngaihdamna tuh lungkimna, theinawnlou a nulmangna ahi. Ngaihdamna bulpi tuh Pathian ahi hi.

NGAIHDAMNA OMZIA: Ngaihdamna toh kisai taklat theihdan leh hilhchetdan tuamtuam om tham ding hi. Manpha lua ahihman in ngaihdamna omzia saulou in sutkhawm ni.

1. Ngaidam (forgive): Ngaidam kichi tuh Pathian in a thu manglou, a Dan bohsia, takhial a omte a ngaihdamna genna ahi. Ngaihdam chih gaih tuh baihsam bang mahleh sepkhiak ding thunamai hilou hial hi. Pathian in a ngaidam chih leh mihingte kingaidam chih kibang leh kikim a zat mawk theih hilou hi. Mihing kingaidamte tuh a ziak om sek ahi a, Pathian apan ahih lebel aziak-asan gen omlou (unconditional) a ngaidam ahi hi. Huai tuh Jesu Khrist hong thuakna pansan a Pathian in hon ngaidam ahizaw hi. Ei mihingte ngethat ziak hiam a Pathian in hon ngaidam ahi zenzen kei hi. Eite’n ngetna chang leng i theikei a, ngen ding in leng i phukei himahleh Jesu Khrist in “Pa, amaute ngaidam in” (Lk. 24:34a) chi in hon ngetsak hi. Ei nget siam hilou napi in a lungkimna a tapa, a thu ngai un (Matt. 17:5) hon chihna pa ziak lel a Pathian in hon ngaidam hilel hi. “A tatleknate uah zah ka ngai dia, a khelhnate uleng ka thei gige nawnta kei ding” (Heb. 8:12). C. Lalzarmawia in “ka khelhna khempeuhte hi, mite’n theiden zel mahleh, Pa aw nang ka khelhnate, na mangngilh zel hi” a na chi hi. Pathian in a ngaihdam chiang in ngaidam in mangngilh hi (forgive and forget). Pathian in nang hon ngaidamta hia?

2. Ngaihdam a om (forgiven): Kumpi David in kei tangtel banglel, thulimlouhna a suktuah a om, khelhna a nu gilsung a pai a chi namah a ei mihingte i kisathei dek sekna a zaw i hihna tuh Pathian thangpaihna ta, gul suante, Jesu Khrist in na pa uh diabol a chih kihilim ve aw. Pathian mitmuh a i hihna utuh lungtang ninpu, i luzang akipan khetaw tan a meima nai a dim, Isai in kei mukninpu a chih i hi lel hi. Pathian mai a ding dia chitna nei hetlou, hoih i kichih sunsun leng a mai a puansia bang kihi lel hi. Sawltak Paul in kuamah midiktat omlou, khatlel leng omlou, khelhna ziak a Pathian thupina tang zoulou (Rom. 3:10, 23) i hi a chih bang in Pathian omna akipan paihkhiak i hi uhi.

Ka hihna teng a mikhial ka na hi, khovel et in chitna ka neilou. Etna chiteng a ka et chiang in zong, chitna ka neilou nang ading in (Bounglienkung) kichi mihingte tuh koi a bangchidan a Pathian ngaihdam a om thei mahmah ding i dia aw chih in om hi. Hiai bang i hihlai in Pathian hon itna, hehpihna, lainatna a lamdang in a thupi hi. “TOUPA’N, Hong pai un, ngaihtuah khawm dih ve ni! Na khelhnate uh san-au bang in om mahleh, vuk bang in a ngou ding; sandup bang in san khin mahleh belam mul bang in a om ding” (Isai 1:18). Pathian in hon ngaidam chih leh ngaihdam a i omna ding in amahmah in batna lai thupiak a gelh i tung ua om hon dou gige thaimang in, kros a kilhlum in a lakheta hi (Kol. 2:14). Ngaihdam a om chih tuh a lamdang ngei, i hih ngeilouh ding leh tanlouh ding ei a suak. Ngaihdam a om manphatna tuh Khrist Jesu ziak in amahmah ah maingalna leh hangtak a Pathian kiang a lut theihna i nei hi. Na nei mah ngut hiam?

3. Ngaihdamna (forgiveness): Ngaihdamna om ziak bang hi ding a dia aw chih i ngaihtuahkik zualleh i tan ngeilouh ding tangkha i hihlam hon kiphawksak hi. Pathian in hon ngaidam a, ngaihdam a om i hi chih chiang tuh kithei chiat hi. Himahleh ngaihdamna koi a hong kipan, bangchidan a Pathian in hon ngaidam thei mawk hiam chih kidot tuak mahmah hi. Ngaihdamna, Pathian in hon ngaidam chihmawk tuh chihummul thou thei hial ding khop a lamdang ahi. Ngaihdamna hon piak theihna ding san hi a theihtheih tuh amah hon siampa ahi a, hon thei lumlet hi. Hiai pen hon ngaihdamna dia hun mah ahi diam? Hon ngaihdamna ding in tuh aman eite dinmun hon theihpih, hon thuakpih, hon phawkpih in hon puaknatpih (empathy) hizaw hi. Aziak tuh ei huhtu ding neilou panpihtu bei (helpless) te bangziak a i khelhnate hon puaksak mawk ding ahia? Khrist in hon puaksak lel hilou in Pathian in eite thulimlouhna lasuan a Jesu Khrist a puaksak ahi. Eimah bang a lam tuamtuam a thuakna hon theihpihtu siampulian (Heb. 4:15) nei i hihman a ngaihdamna om thei ahi. Angkawmnu a man ua Jesu mai a tut uh angkawmnu dinmun toh kibang geih i hi uhi. Huai laitak a panpih bei si dia moh tangsa himahleh Jesu Khrist in ngaihdamna a puang hi. A ngaihdamna ding ziak omloupi, himahleh ngaihdamna pe thei Pathian ahi a, numeinu panpihtu bei lungtang khasia leh kisik ahihlam thei ahihman in numeinu’n ngen hetlou hinapi in lainat in hehpihna toh itna in ngaidam a, numeinu’n ngaihdamna tang ahi mai hi. Huai ahi ngaihdamna, Pathian ngaihdamna ngei. Ngethat thu hilou Khrist a hon ngaihdamna ahi. Nang ading in na sang thei diam?

NGAIHDAMNA MANPHA: Hiai i chih utna pen tuh Pathian’ ngaihdamna tuh mantam, thupi, lamdang leh i kipahpih a i tawisang (treasured forgiveness) ding ahihman ahi. Ngaihdamna manpha ahi i chih theihna leh i chih utna san kikum lai ni.

1. Ngaihdamna poimohna thei ni: Mihing teng in i dinmun khahsuahsa i tankik theihna ding in ngaihdamna kipoimoh hi. Pathian in hon neihkik theihna ding in ngaihdamna, ahon ngaihdam poimoh hi. La ah i sa sek uhi “Eden leh Salemthak kizom” i chi uhi. Hiai gel zomkhawmtu tuh ngaihdamna ahi. Melma hon kilemsaktu, thangpaihna heimangtu, lungkimna tuntu, ta hon suahtu tuh ngaihdamna ahi hi. Na hinkhua ah ngaihdamna poimoh hi in na kithei hia?

2. Ngaihdamna i khosakpih ding ahi: Ngaihdamna i neih ding chih hiphet lou in ngaihdamna i hinpih a niteng a i khosak dingdan hizaw ahi (forgiveness should be a Christian life style). Ngaihdamna tuh zongsat (habit) a i neih ding ahi. Toupa hon sinsak thumna mitsisa a i gen theih “ka khelhna uh hon ngaidam in, kou leng ka tung ua khialte ka ngaihdam bang un” i chihsek ngaihtuah mah dih. Thumna mah hia? Thumna khenlam ah i sepkhiak ding, i hinpih ding, i khosakpih, i hih zongsat ding a kichiam i hi uhi. I vek un kivelchian ni, i khosakpihna hiam, ngaihdamna?

TUA BANG LOHTA DING? Ngaihdamna tuh baih liailou hi. A sukkhak thupi in mantam hi. Pathian in hon ngaihdamna ding in a Tapa hilhial toh a kikhen uh a ngai hi. Ngaihdamna a tangtunna ding in Jesu Khrist in a hihna leh a hinna a pekhia top mai hi. Ngaihdam a om a ngaihdamna i sanna ding in KEI leh KA i koih khiak a ngai hi. Pathian in Khrist a kon ngaihdam zelzel bang in a chikei a, kon ngaihdam sipsip leh thunung-thuma gen ding om nawnlou a kon koih bang in nou leng na damsung un ngaihdamna nei unla kingaidam un a chi hi. Hiai ngaihdamna manpha ahihna ding in Pathian in hon ngaihdamna a ngaihdamna i neih ding ahi. “A tatlekna ngaihdam a om a, a khelhna khuh a om in, nuam a sa hi. Mi, Toupa’n thulimlouhna nei a a seh louh a, a kha a zekhemna himhim om lou in nuam a sa hi” (Sam 32:1-2). Pathian hon ngaihdamna ah kingaidam tuah chiat ding in Toupa Kha in hong veh chiat hen aw.