Tulai in nu bangzahhiamte apan houlimna, mou neih ding lau pawl, huphulh a, mou neih ding gal-lau-a-lau nu tampi omta hilehang kilawm. Mou i chih chiang in lamdangpi a ngai a, galdou ding bangzen a kisakhawl pawl bang omta bang hi. Tekpi, Tekpu nei namte i hihman in, moute tekpi it ding leh kem ding in theihtawp suah in i kihilh uhi. Hiaibang i hihtakman in moute bangchi kep ding chih bangleng nakpi a kihilh tuak hong suak ka sa hi.

1. Mou Senior: Tekpi kichi direct a tekpi kichi a om kei a, mou hong hi ua, nu hong hi ua, taten zi leh ta hon neih chiang un ‘Tekpi’ i chi hi. Mou apan tekpi honghi ahihziak un “Mou Senior” ahi mai uhi. Mou thak ahih lai a, tekpi in hiai bang in hon hihleh chih toh tekpi tan hong tung ahi uhi. Himahleh, mou ahihlai uh mangngilh pawl om khanak a, moute toh kituak theilou tampi ki-om ahi ding. Tekpi khat in – “Mou ka hih lai in tekpi maivilna in ka tawl mahmah a, tuin tekpi ka hong hita a, moute maivilna in ka tawl zel a, tawlngak hun om kei” a chi hi. Hiai nu’n kituahna ding lampi thei ahi ding. Kimaivil tuah lehang apiang khat zaw om ding ahi. Kei tate, tute mi deih theih a a om uleh mi mou hi ding ua, a tekpi, tekpu un kei it bang in na it uhenla, na kem le uh chih deihtek kihi chiat ahi. Tuabang ahihlai a, mi tate mou a i neih leh ‘Mou senior’ ten i hihdan ding theihpah ding hileh kilawm maw! Hinapi a, moute toh kikem theilou, a hoihlou teng i mou tangsak a, ei ahoih teng kitangsak, i hoihleh bang ding a i mou kem theilou? Mou in i en a, ta bang in i en kei a ahi ding. Mihing hoihkim dek suailou i hi. I mou haksatna ding theihpih a, a hoihna ding a panlak tuh mou senior (tekpi) mohpuak leh napi ahi peuhmah hi. Mihing bel zohngeu, zusa man ding mah bang a, mi hoihna lam mu theilou, kimuh khembawl khanakte i om a, tua in i mou toh hon khen ahi. Mi kihou thei hetlou i chihte a kibang hinuam mahmah hi.

2. Kipahtawi ding ahi: Mihing eimah khom a hoih kisa chiat i hi ua, kipahtawi, i hoihna lam kigentuah kiza nuam mahmah chiat hi. Kuamah insak inkhang i hoih luatna ding hon deihsak tuntun tawm mahmah hi. Hinapi in, i mou, i tekpi hoihlou i saknate mi kiang a gen kal ngaklah in, i tangkou khasek uhi. I gen tam peuh leh miten ahimah vele maw, nou mounu tel zaw hon chi ua, kipaktak in damlou Doctor ki-ensak khin na hoihlua hon chi ua inlam i pai bang in vualzou pai in inlam i kik namnam hi. I mounu’n leng ka tekpi lawmlawm tel chi a a hoihna gen ding himhim theilou khop a kuahiam kiang a va tangkou nawn, a genna nu in sawt le na om ngap kon sa, ana chi zomah, thumu kisa lua a inlam mou hoih pai a hong pai zel, ahoih tuaktuak kisual panpah zel!! Tekpi khat in ‘Ka mou hoihdan, hon hehpih inchin nei fuh kisalua ka hi’ chi a a gen ziak a a mounu toh hoih kituh a, a kihou theihdan uh etton huai ka sa hi. Upaten baang in leng bil nei a chih uh diklua ahi, mi zaklouh ding chi-a i lawmte kiang a i gen saihsaihte mi’n ‘na zazel uh ahi chih theih ding ahi’. I kiang a mi hong gensiasiaten ei leng mi kiang a hon gen siasia ding uh ahi chih mangngilh hetlouh ding a hoih ahi. Vualzou a i kingaihnate miten hon simmohna phet uh eive, ei a haksatna leh buaina hon tuntu – Pilvang ni.

3. Vangpha i hihna phawk ding ahi: Mi tampiten ta deih mahmah, nei theilou, sum tampipi seng a ta neih theihna ding ngaihtuah a buai kitam hi. Hichibang ahih lai a, Pathian in ta hoih pipi hon pia a, i tanu, i tapate bang mi deih theih hong hih uh ei hihtheihna khen ahih phawk le kipahhuai petmah hi. Mi tampiten gunda ding ahihtak leleng khat bek hon peleh chi bang leng ki-om hi. Hiai kia leng hilou in, ta nei napi a, mi bang zoulou, mi deih theih ding hilou chih leng omthei lai hi. Ei deihdan a bawl theih hilou hiven. Ka Nu damlai in nupi thum hong houlim ua, ta leh nau neihdan hong kikum ua vangpha leh vangphalou kisakna hon gen khawm uhi. A lak ua khat in ken tapa khat ka nei a, zawl leitawi ka chimtak lua hon chi hi. Khat pen in tapa thum ka nei a, nungak hel uhenla, mi tate khat bek zawl leitawi theihna ding hon sukha le uh chi hi. Himahleh, ka tapaten nungak heldan le theilou, mou neih ding, tu neih ding gen phak hikei chi in mite a endan hon gen hi. Hiai nupi houlimte apan in enleng zil ding om in ka mu hi. Pathian in tapa hoih pipi hon pia a, mite tanu hoih pipite etlah theih ding hon piak vangphathuai ahihdan hon musak hi. Tapa nei napi a, mi deihtheih louh ding ta neih theih ahih lai a ei ta mi deih theih hong hih chi a kipahthu gengen tuak ahi. Mou neih i chih ahi ding mah dan a i koih ziak a kipak theilou i hi kha ding, mi deih theihlouh ziak hiam, sihna ziak a mou neih louh theih hilai ahi.

4. Akap ding eimah i hi: Ei kal kituak in nuam leh mi kipak leh hampha hilel ding i hi. Ei insung akituah louh chiang in i veng i pam leh miten honna thei mahmah ua, hiai nu a mounu kem theilou, hiai nu tekpi toh kihou theilou chih i lohtak hilel a, i nunglam a akhut tal ua hon kawk zuizel uh ahi chih mangngilh louh ding ahi. Khotang a i lohchinna ding insung khosak in mohpaw lawtel ahi. China te thupil in “i nuih leh khovel in hon nuihpih a, i kah leh ei kia in i kap” a chi hi. Ei kah ziak a mi kaplou ding a, akap ding eimah i hi. Kina kawmkawm a anlim nekna insung sang in, kihou dialdial kawm a ankhing keu nek ahoih zaw (Paunakte 17:1, BIIS).

5. Pathian theihna in i mou, i tekpi a batphak ding ahi: Thugentu khat in khua khat ah “limsang pawl khami mahmah chi nih om ua, kihou thei mahmah lou uh bang kha tang ahi ding uam” a chih ka za kha hi. Khristian lou chih ding inkuan i tawm ta ua, himahleh khristian hinkhua muh ding tawmlua abang hi. Laphuaktu in “Nang kon it, nang kon it na thei, nang kon itna ka nasep in gen ding hi” a chi hi. Mou lah khami, tekpi lah khami, lah kituak thei hetlou a kisukkhak chiang ua meikuang, bang loh ding? I khamitna in i mou, i tekpi a batphak ding ahi. I Khristian hihna leh khamitna in koi chiang ban ahimah ale chia kingaihtuah zel poimoh hi. Ding a kingaihtuah tuh pilvang hen, huchilou in zaw a puk kha ding (1 Korinthte 10:12). Puk theih ahi. Mihing hoih bukim i omkei a, hoihna leh hoihlouhna nei chiat i hi; i hoihlouhna sang in i hoihna lam kigen lehang kipaklou ki-omlou hi. Na hong hoih ngei, chih bangle ni khat om noptuamsak hi. Ka mou a hoihkei chih sang in kou mou mahmah hoih, kou mou ding mah a Pathian in hon piak ahi chi lehang a hoihna i gen ana zaksawn chiang a ka tekpi leh ka inkuanten hoih hon chi uh chi-a, hoih hon sawm ding ahi. Hoih i kichih chiang a hoihlam manoh a, hoihlou i kichih chiang a hoih sawm sang a hoihlouh lam manohte kihi khanak hi.

6. Tekpi leh Tekpu ‘Min’ mi vangphate tantuan ahi: Tekpi le tekpu hihna min ngaih mahmah, mi vangphate tantuan ahi a, tapa neite kia tan theih ahi. Huaiziak in, mou nei thei hihna dinmun i tan theih pen Pathian vualzawlna ahi. Sepna neiten promotion a muh uh bang ahi. Tekpi leh tekpu ten i theih ding ua deihhuai tuh hiai min ngaihtak i mounu omlou hileh i tan zohlouh ding ahi. Insung a hong lut mou tuh mou hihna leh tanu hihna tekpi leh tekpu tanvou ahih ziak in Pathian vualzawlna leh hamphatna ahi. Hiai mou neih ziak a i chi hong pung a, i khanggui hong kisim zom ding ahi. I hinkhua tomchik i neih sung a nu leh pa dinmun sangpen i neih uh tekpi leh tekpu hihna ahi i chi a manphatak a i zat ding uh ahi.

7. Haksatna kitheihpih ding ahi: Nuten pasalte sang in numeite haksatna a theizaw tham uhi. Mou hi ngeilouten mou haksatna leh thiltuahte theilou uhi. Naupai ngeilou in, naupai lai a haksatna, duh leh ngaih a neihte uh theilou uhi. Nupi khat in “Naupai lai a thil duh a natdan — i omdan hong kikhek, himahleh kigen ngamlou kap kawm a kithuak mualsuah zel ahi” a chi hi. Tuabangte tekpi in ana theihsa a tuahkhaksa vek ahi, hinapi in a mou haksatna theihpih nuamlou ki-om khasek, bangchi in a mou a kipak ngei dia? Pastor zi khat in, “Sa ka duh lua a, loh lak chiang in lei ni chi a, loh lak a leilou, laknawn chiang a leilou zel a, atawp in hichi’n ka ngaihtuah – Pastor bel a paina, a hohna a mite’n meh limlim bawlsak ua, aman bel sa nene, kei duh leh ngaih hon phawkpihlou chiin aguk in ka kap” a chi hi. Tua mah bang in, mou senior in mou thak ahihlai mangngilh khanak a, a mou haksatna theinapi theihpih theilou om khanak hi. Hiai in mi’n na tung ua ahih ding uh na deih ding bang zel un mi tung ah leng hih sam un (Luke 6:31) chih mangngilh khak theih ahi. Itna i taksap luat ziak mah zaw hiveh aw maw!! It zou peuhle lainatna hong om mai ahi. Toupa, mou nei thei ding in non bawl a, ka phulou ahi, kipak lua ing chia kikoukhiak dia hoih ahi. Itna loungal bangmah ba kei un, Itna kibatuah lehang apiang khat hong om dia, Toupa mel dawk ding hi. Toupa mah poimoh hi, i kal ah Toupa vaihawm sak ni. Toupa’n pha a sak bang in hon vualzawl sak hen aw.