Mihingte hinkhua adia poimohpente lak a khat tuh ngaihdamna ahi. Pathian leh mihing kal a, a poimoh bang in mihing leh mihing kal ah a poimoh hi. Inkuan a ngaihdamna a om keileh inkuan nuam a om theihlouh bang in inveng leh khua-le-tui kal a ngaihdamna a omlouh chiang in kizopna diklou in lemna leh muanna om theilou hi. Ngaihdamna omlou a gingtu diktak hihtheih louh bang in mihinpihte ngaihdamna omlou in kituaktak a tenkhawmna leh nasepkhawmna om theilou hi. Mi tengteng in ngaihdamna kideih chiat a himahleh mi tengteng in midangte ngaidam theilou uhi. Ngaihdamna pen Pathian apan a hong kipan ahihman in kuapeuh Pathian neite’n midangte ngaidam thei uhi.

MIDANGTE: Mihingte tengkhawm, khosakhawm leh omkhawm dia Pathian in hon bawl ahihziak in mahni kia a omlou in kizopna chi khat nei chiat in i omkhawm uhi. Atuung a mihing khat kia om pen Pathian in midang khat in a behlap a, nih a hong hi ua, omkhawm a suan-le-pak nei a, Pathian toh kithuah dia bawl ahi uhi (Gen. 2:18). Mihing a hong punzel chiang in tengkhawm leh khosakhawm in khua a hon dinkhia ua, a khua zil in tam leh tawm in i omkhawmta uhi. Huchi in michih kipoimoh tuahchiat in, mihing khosakkhawmna ah veng-le-pam a mite tuh midangte i chih ahi.

NGAIHDAMNA: Ngaihdamna omdantak tuh aziak leh san omlou a i tung a lungput, kampau leh nasep a khialte tung a lungsim siangthou neihsak a, kampau leh nasep a leng a dik-le-tang a omsakna ahi. Lohsuah hiam, ngiat teiteina leh bangmah sem khial nawnlou dia kichiamsakna toh ngaihdam i chihmawk hilou hi. Ngaihdam hon ngen hiam ngenlou hitaleh lungsim, kampau leh nasep a hoihna muhsak ahi. I Toupa Jesu Khrist in, “Pa amau ngaidam in a thilhih uh a theikei ua ahi” a chih in mipite`n ngaihdam a nget ziak uh a hikei a, a poimoh ziak ua ngaidam ahi. Khristian hinkhua a laigilpen itna ahi a, itna gahsuah tuh NGAIHDAMNA ahi. Ngaidam thei ding in ngaihdamna neitu leh angaihdam theihna bul (sources) Pathian neih ngai hi. Amah itna taktak toh a sinsakna zuih utna lou in midangte kingaidam theilou himhim hi. Mi khial Pathian in a ngaihdam hihna kitheihchetna toh Jesu Khrist neitu diktak in mite ngaihdam theihna nei a, tua tungtawn in midangte ngaihdam ding a mohpuak ahihna ah semsuah ngam hi.

DAMSAKTU HI IN: Veng-le-pamte toh i kisukhapen a, theih leng i kitheipen a, i ngaihdan, muhdan, kampau leh nasep ah i kikalh munpen uhi. Tulai khovel ah midangte toh i kal siatdan gen ngailou a i theihsa ahi. Awlmohdan khat leng i nei chiat uhi. Laisiangthou ah veng-le-pam toh omdan ding kichiantak in sinsakna a om hi. Paunakte laibu ah veng-le-pamte toh kisai a lungsim put dik leh nasep – thilbawl manpha hih ding a gen tam a, taksapna a piak ding nei a piak phallouh, atung ua lungsim diklou neih, amau toh kisai a mohpuakna neilou bang a om, a hoihlouhna phoulak, muhsit, a siatna ding uh ngaihtuah, zi leh tate enlah leh suksiatsak, leh veng-le-pam gensiat louh ding kizopna dik toh veng-le-pam hoih hih ding chihte i mu hi (Pau 3:28,29; 6:1; 6:29; 11:9; 12: l2, 26). Thukhun Thak ah it leh kilemtak a om a kitungding tuah a, veng-le-pam adia mi hoih leh damsaktu hih ding i mohpuak ahi. (Matt. 7:12; 25:40; Lk.10:33-34; Pau. 24:28; Eph 4:25-32). I tenpih mite toh kituaktak a i hong tenkhawm chiang in Pathian ompih i hihna kilang ahihman in “Atheih liaileh, noumau lam bek, mi tengteng toh kituak in om un.” (Rom 12:18; Heb 12:14) chia nget leh “Gilou nungngat san in thilhoih hih hen; kituahna zong in delh zel hen” (1Pet. 3:11) chih a omte i hi.

CHIDAMNA DING IN PANLA IN: Midangte toh kal chidamtak a i om theihna ding in “Gilou paisan inla, thilhoih hih in; lemna zong inla, a delh in delh in” (Sam 34:14) a chih bang in, mite ngaidam a, kingaihdam tuahchiat ding ahi. Toupa hon sinsak thumna ah “Ka tung a khialte ka ngaihdam bang in ka khelhna hon ngaidam in” chi’n i thum hi. Midangte damna dia ngaihdamna tuh gingtute niteng hinkhua ding ahi. Hebru Laikhak ah, “Mi tengteng toh kituahna leh siangthouna delh un, huai siangthouna lou in kuamah in Toupa a mu kei ding uhi” (Heb 12:14) chih a om hi. Khelhna ahihleh huat ding mah ahi a (Sam 97:10; Rom 12:9), himahleh bawldik a lemna zon tuh i mohpuakna ahi. Invengte it, kituahna zon leh pukte phawng dia sinsak a omte (Gal. 4:14, 15; 5:25, 26; 6:1) i hihman in sepkhiak ding ahi. Lemna bawl ding in a man piak a ngai a, taan ngai tampite taanngam ngai ahihna ah ngaihdamna tangsa lou in a man pe ngamlou hi. Nang a neisa tuh a chinpen na hi. Khrist ziak a hindan thak a khosakna pen ngaihdamna lou a manna bei ahi. “Pathian mi tel, misiangthou leh deihtakte bang in lainatna lungtangte, migitnate, kingaihniamnate, thunuailutnate, thuakzohnate in kivan un.” (Kol 3:12). Hoih deihna, khelhna saina leh bukimlouhna ziak in mi’n hon haw thei uh a, amaute tuh huat thuklouh ding ahi. I mihinpihte kia hilou melmate tanpha hawlou a it ding a sawlte i hi. Leviticus 19:17–18 ah “Na insak-inkhang na taihilh ngeingei ding ahi, a gitlouhna a na hulna ding in. Phu na la ding ahi kei, na chipih suante muhdahna na pai ding ahi sam kei, nang na ki-it bang in na insak-inkhang na it ding ahi zaw: Kei TOUPA ka hi” chih ahi. Khelhna, khelhna mah a thuklou a hoihna a thukzaw dingte i hi (Rom 12:17, 24). Mi hon hawte thuklou ding a hoihna ding uh sem ding leh it dia Pathian in hon deihte i hi. (Mt 10:22; 24:9; Mk 13:13; Lk 6:27; Lk 21:17; Jn 17:14). Midangte damna dia na ngaihdam keileh, nang leng na dam tuankei ding huaiziak in a panlatu hi ni aw.

MAHNI KIKAWK HUN AHI: Tulai khovel ah mahni kimulou a midangte kawkkawk thei i tamta hi. I kampau leh thugen/suahte in a taklat bang in mite hoihlouhna ngenngen mu i bangta uhi. Huaiziak in i chidam kei ua, lungmuanna leng i nei kei ua, kuamah leng muanzohna i nei nawnkei uhi. I ngaihdan toh kituaklou a omzek chiang in i mihinpihte hoihlouhna tengteng i genkhe ziahziah mai ua, Gingtu i hihlam uh muhna ding mun himhim a omkei hi. Midangte dinmun leh hihna hoihna chituam khat a neih uh muhsuah sawmlou in eimah ngaihdan leh deihdan zuilou peuhmah tuh i melma et uhi. Hiai in damna hon tunlou in siatna apan siatnawn semna ah hon pilut in segawp dimdem i hita ua, i lak uah Toupa mel liah in a omzouta hi. Huaiziak in Pathian mai leh mihing mai ah mahni kimuhsuah a kikawk hunta hi. Midang kawk a dam ding hileng inkuan leh khotang chidam i neihna sawtta ding, mi khuttal a i kawk lai a ei khutzung thum in ei hon kawk ahihna mangngilh kei ni. Mihingte’n hon suangtu Adam leh Evi bang in mahni khelhna leh diklouhna kimuthei mahmahlou, Pathian inlah eimah kimukhia a A kiang zuan ding in hon chial hi (Isai 1:18,19). Eimah kimuhna apan gahsuah kingaihniamna leh Pathian a pan ngaihdamna tungtawn a kingaihdamna leh kitundingtuahna poimoh mahmah hi.

APAISA SIATNATE NGAIDAM IN: Hun paisa a mite khelhna i ngaihdamlouh ziak in thiltung khatpeuh a hong om hun in i sung a khaatna (bitterness) om pen hong puaksuah in thagum suahna thupitaktak i tuak uhi. Ngaihdamna pen i nuntakna a tensak a i tung a khialsate ngaihdam ding, a hon hihkhelh nawn chiang ua leng ngaihdam zel ding ahi. I tung a khial midangte in a hon hihnatna leh huaiziak a thangpaihna chi i lungtang a gaklop a om, i hehna pen sunbuak teitei leh a hon hihtu pen suk nat teitei utna i neih pen in niteng in i lungtang a hon nasak gige hi. I va sepkhiak chiang bang in tuh Pathian in phu kei lak ding a chih suhsak i hihman in lungmuanna vang mahmah hi. I gam tuabang dinmun ah ki-omlel ahi. Himahleh hiai natna pen ngaihdamna tungtawn in khahkhiak theih hi. Ngaihdamna na piakkhiak leh hiai thangpaihna, asun-azan a nang hon thuneihkhum gigetu a pan suahtakna na muthei hi. I sa leh sisan in theigige mahleh hiai natna pen a paisa a koih a, i tung a hihkhialtu toh kipaktak a tenkhawm leh khosakkhawm theihna tuh ngaihdamna ahi. Huaiziak in hun paisa pen tu hun kithunun sak ken aw.

NGAIHDAMNA IN AW, NGAIDAM IN: Midangte ngaidam theilou in tuh amah ngei in a tot ding leilawn a hihsia. Adam suan a piang tengteng ngaihdamna poimoh vek i hi. Pathian kiang i thilpiak pom a omna ding, Pathian ngaihdamna i muhzelna ding leh i thumnate dawn a omna ding in ngaihdamna alou theilou ahi (Matthai 5:23, 24; 6:14-15; Mark 11:25). Mite kiang a ngaihdam ngen ngeilou, amah inleng midang ngaidam theilou chih kitam mahmah hi. Ngaidam theite tuh mi hat ahi a, Ngaihdamna ngen ngamte leng mi hangsan ahi uhi. Huaiziak in ngaihdam i ngen ngam dia midangte leng i ngaihdam ngam ding ahi. Tuamah Pathian hon deihdan ahi.

Pathian in alua chih omlou in mikhialte hon ngaidam thei a, en leng midangte alua chih omlou a i ngaihdam ding ahi. Thugen minthang D.L. Moody in, “Hiai theigige in Pathian Kumpigam kongkhak na lutdek chiang in ngaihdamna na totkhak a ngaih ziak in leitung ah ngaihdamna, na sepkhiak ding ahi” a chi hi. Jesu Khrist itna thupi leh A ngaihdamna thupi i tankhakna pen midangte i it leh i tung a khialte ngaihdamna ding in a huntawk mahmah ahi. John Ryle in “Ngaidam nuamloute tuh Vangam lut dia chinglou (Unfit) te lak ah tel thei gige ahi uh” a chitop mai hi. Paul ngei inleng amah mikhial pumlum Khristiante soisatu himahleh Pathian ngaihdamna a hon theihchet taktak chiang in ngaihdamna toh Pathian na hon sem in khamangthang tampi a hon man hi. Sam 133:1 ah, “Ngai in, unaute kituak diamdiam a om khawm anak hoih in, anuam mahmah hi!” i chihlai in mahni mihinpihte ngei ngaidam utlou a, dou bawl gige a, huat bawl a, ensawi gige i hihleh kingaihtuah hun ahi. I pianthakna in eilam ah gahsuahlou chihna ahi a, ei sang a midangte hoihzawkna ding ngaihtuahna i neikei chihna ahi (Phil. 2:3). Huaiziak in Piangthak i kichih ngal leh, midangte ngaidam in aw, ngaidam in. Toupa’n hon vualzawl hen.