Rom. 13:8 “Ki-ittuahna loungal, kuamah bangmah ba kei un; amau mihinpih itpa’n dan a zuikimta ngal a.”

Thupatna: Heututen Independence Day message gelh dia deihsakna hon piak ziak un kipahthu ka gen masa hi. Britishte ukna nuai ah India kum sawttak na om hi. Huchi’n zalenna ding sual in makai tuamtuamte’n pan hon la tou in British khut akipan in Independence 1947 in hon mu ta uhi. Tu’n India zalenna kum 75 chinna nasatak a lawm ding in India Solkal kisingsa lel hi. Hiai lopna ding a vaiguan sepsuah ding Project tuamtuam guang in gamsung sianthouna, khantouhna, ki-ukna hoih, technology, Green Country Campaign leh adangdangte nei uhi. Hiai toh kiton in ki-ukna bangzahta a poimoh a, mipite’n bang mohpuakna nei i hi uhiam chih enkhawm le’ng ka chi hi.

Ki-ukna i chih mihingte khelhna gah a hongpiang ahi chile’ng i khial lawmlawm kei ding hi (Gen. 3). Pathian in Noah hun ah Ki-ukna ana pan, Genesis 9 ah mihingte kivaihawmna gelh i mu hi. Ki-ukna gina omlouhna ah buaina om hi (Vai.17:6;21:25). Vaihawmtute Pathian seh a om ahi (Rom.13:1—2). Thukhunlui hun in Ki-ukna chi tuamtuam piak in ana om hi. Pathian deihna bang nasemte kia ding zou ua, Pathian deihdan lou a sepkhak chiang un paih in om uh. Pathian thei himah le uh a deihdan a semloute peuh paihkhiak in om uhi. Pathian in amah sik-le-tang a mihingte uktu ding pia zel hi (Rom. 13:3). Huchibang mite piangthak i chihna leng ahi pah kei a, Pathian in vanzat dia a neih nopte ahi uh.

Mohpuaknate: Marxist-ten kivaipuakna dik leh mite hoih mai ding gintakna a nei uhi. Mihingte khelhna toh a piangte i hi uh (Sam 58:3). Ki-ukna Dante hoih mahleh lungtang a kikhekna om keileh hoih tuanlou ding hi. Kumpite nasepna a poimoh mahmah khat, Dan bawl a, tuate etkai leh kepbit ahi (Rom. 13:2–3). Hiai Dan kepbitna mimal kiang hilou Vaihawmtute kiang kia a piak ahi. Leitung vaihawmtute tangtawn daih hilou ua, mipite hoihna dia vaihawm ding ahi.

Kumpi’n a mite leh a gamsung kepna ding in siah khon theihna nei hi (Mk.12: 17; Rom.13:7). Hiai siahte ginom leh chitak a i piak ding uh i mohpuak uh ahi. Hiai siah kilate gamsung khantouhna dia zat ding mah ahi. Vaihawmtuten siangthoutak a siah a don ua, diktattak mah a sunlut ding ahi. Diktak mah a siah piak a, diktak mah a gamsung khantouhna dia zat ding ahi. “Lak ding a seh val laklouh a, mahni loh chiat a lungkim ding ahi” (Luke 3:13&14).

Solkal, mihoihte pakta in kipahpih dia mansa ahi (Rom.12:3-4). Solkal in lam chi tuamtuam in panpihna hon pia hi. Kumpi’n a khua-le-tuite it a mi khempeuh kibang a a et ding a, khua-le-tuiten leng zahna piak a Kumpite thupiak zuih ding ahi. Paul in Nero Kumpi gumtak Vaihawm lai in leng Khristiante’n Kumpi thupiakte zui a zah ding ahihdan ‘na gen hi. Pathian in thilhoih hihding a hon siamte i hi uh (Eph. 2:10).

Kumpi’n khua-le-tuite khentuam neilou a bitna leh khantouhna a tut ding a mohpuak ahi. Jawlnei Amos in a tangkoupih neih-le-lam, nek-le-tak leh azawng-ahaute kal thu ahi. Jakob Laikhak in le ahah gen mahmah hi. Mihing nuntakna ahoihzaw tun theihna ding Kumpite mohpuak ahi (Num.26:52—56; Diu. 15:11). Hiai Ki-ukna ah gingtute a bawlhoihtu ding leh lampi dik laktu ding a Chi leh Khawnvak a pan ding ahi (Matt. 5:13-14). Paul in Khristiante thumang a ginom ding i hihdan a genchian mahmah hi (Rom. 13). Thumanna, ginomna in nasepna leh diktatna agen, Siah leh Leiman piak ding, zahtak leh lauhdan siam ding chihte ahi (Rom. 13:7). Khristian hinapi a piak ding sang a muhna ding lam kia zong mi’n thil hoih a sem kei. Paul in “laksang in piak in lukhawng aneizaw” a chi (Nasepte20:35c). US President John F. Kennedy in “Ka gam in bang hon hihsak thei hiam chi ke’nla, Ken ka gam ading in bang ka hih thei hiam” chi zaw in a chi hi. Khristiante kumpite ading a thum ding ahi (I Tim. 2:2). Kumpi vaihawmtu hoih leh hoihlou, Khristiante thumna tam leh tawm ah kinga ahi a chi hial uh.

Theih chet ding: Khovel Ki-ukna ah Pathian lunglut a, Amah theiloute tan in a thunuai ah om sak (Isai. 45:1). Vaihawmte hih tengteng Pathian lemsak ahi kim kei. Kivaihawmna (State) Pathian tunkhiak ahi a, enkoltu ding amah deihtelna zang thei hi. Lucifer, Pathian seh himahleh Amah tung ah kilik sawm mawk (Isai14:12,13). Pathian dan kalh a na sem a, siah khawn leh zatdan dikloutak a zat, thangtatna leh mihinpihte sawina a zat ahihleh Pathian deihdan kalhna ahi. Hiaibang hunte ah Khristianten mihing thu sang in Pathian thu ahi ka man zawk ding uh chih theih ding ahi (Nasepte 5:29). Pathian thumanna leh diktatna ahizaw.

Khristiante double citizenship nei i hi uh. Pathian leh Kumpite lak ah mohpuakna i nei uh (Matt. 22:21). Pathian leh kumpite khua-le-tui ginom i hih ding ahi. Kumpi Dan banglou a Pathian gupna om theih hun a om hi (Esther 4:16). Thudik a i gam Dan in hon phalsak chiang leng i zat ngam ding uh ahi (cf. Acts 22:11). Khristiante na dik lou pen diklou chih ngam a, Gul bang a pil, Vakhu bang a nunnem ding ahi. Toupa Jesu gupna ahih nakleh Kumpi leng taihsan ngam ding ahi (Luke 14:33). Laisiangthou hon sinsak bang a din ngam ding ahi.

Simlei vai ki-ukna Party: Gamsung Ki-ukna hoih zawkna ding in party neih ahoih, ahihhang in Khristian peuhmah in Pathian tellou a vaihawm party kithuahpih a dik kei. I gam Democracy leh Secular Govt ahi, hiai in Biakna leh Sahkhua zalenna hon piak ziak in i kipahpih. Khristianna toh kiton a Politics siangthoutak a sai ding ahi. Himahleh politics a saitute ziak in a sianglou bang a et in om. Tuisiang dawn ding omte mi’n a suknit bang deuh ahi. Rev. T. Jamkhothang in hiai nna poimohtak Pathian in sai ding a i khut a thuneihna leh mohpuakna a hon piak ahihman in siangthoutak a sai ding ahi ana chi hi. Party system a i luttak lehleng party paidan mumal, kivaihawmna, Dan mumal leh thiltup leh ngim sepdan mumaltak neih ding ahi. Diktatlouhna, zuautatna, sum-le-pai thahatna, thagum thatang a kumpi hihtheihna ding delhna in gam khantouhna hon tun kei a zahlakna leh kikhenna a hon tun hi. Huchibang Kumpi kitelna ah Pathian deih hilou mihing deihtel in om a siatna hon tun hi. Tulai i gamsung ki-ukna i saidan leh i Biakna kigamla mahmah hi. Politics sai a Biakna ngaihsak lou mite ah kingakna ding a om kei.

Vaihawmtu hoih i neih theihna ding in:

Khatna — Diktatna toh pilvangtak a vote khiak ding ahi. Secret ballot ahihziak in kuamah theih kul lou ahi. I tel ding pen ahihna leh a thiltupte kichiantak a theihtel a Vote ding ahi. Mahni deihtelna lou in Vote khiaksak theih ahi kei.

Anihna — Solkal nasemte in ginom leh diktatna toh sep ding ahi. Nasepna leh mohpuaknate Pathian nasepna ahi (e.g., Joseph’ life). Gamsung khantouna leh kivaihawmna enkoltu dia Pathian in mohpuakna hon piak ahi a, diktat ding ahi. Khut nasep a ginom lou, Office nasepna a ginom lou zongzawtak a nasemte Pathian kihta leh zahtak chih a om thei ngeikei hi (1John 4:20). Bible siamten Missions nasepna kia hunbit a Pathian nasepna ahi kei a, special ministries ana chi zaw uhi. Daniel leh a lawmte bang in Kumpi na i sem ding uh (Dan. 3:17&18,30).

Athumna — Mihing leh gamsung hoihzawkna ding a Dan kibawlte zahtak a zui dia panlak ding ahi. Dan pel a gamtatna khempeuh khelhna ahi chih theih ding ahi. Diktatna in nam a tawisang hi (Prov. 14:34).

Zalenna leh Gingtute — Paul in na zalenna uh noptalna in zang kei unla Pathian Dan a lutna in zang un a chi hi (Gal. 5:1). Gamsung Dan in zalenna deihtel theihna hoihtak a hon piak bang in Gingtuten mahni deihtelna siangtak toh gamsung vaihawmtu ding i tel ding uh ahi. Huai mah Laisiangthou deihdan ahi. Kitelna ziak a na mi leh sate a kikhenzak leh na kihelna a siangthou zou kei chihna hi ding a, i tel pen leng Pathian deih hitheilou ding hi. Zalenna piak a i om pen gingtute bek in zat khelh louh sawm ni.

Pathian kithuahpihna lou in political goal i sai piching uh ka lamen kei hi. Vaihawmna Inpite a Khristianna tawisang thei ding mi i sawlkha ta uhia? Pathian kihta leh lau, ginom leh diktat i deih mahmah hi.

Thukhitna: India in Independence 75na lawm a gamsung khantouhna leh ki-ukna hoihzaw neih asawm panlakna aneih toh kiton in Ei Christian circle sung a vaihawmtuten leng Veng-le-pam, khosung leh gamsung, mi-le-sate lak a khantouhna, lemna tuntu leh ngaidam theitu ding khop a mihangsan hi ding in Toupa’n hon vualzawl hen aw. “Ahihtheih liaileh noumau lam bek miteng toh kituak in om un…. Phu kila tuah kei un…. Gitlouh zoh in om kenla, hoihna in gilou zouzaw in” Rom 12:18–21.