Thumanna i chih chiang in thu zom, thu zaak leh ngaihkhiak bang a hih, sawl a om bang a sem, thupiak bang a sai lohching, thupiak pen taimangsan lou, chihnuamtak a om, chih khawng in a gen fiah theih mai awm e. Thukhunlui a thumanna pen Pathian leh Israel-te kikal a kizopna genna din zat ahi taangpi. Pathian chu zawlneite zang in thu-le-aw zang in a kipuang sek. Huchibang Pathian thu tung pen zaak leh theihtheih a puan ahi a, puansuah a zaak uh chu zom leh zui dia chih ahi uh. Thu-le-aw zang a puan khiak a zuih chiang un vualzawlna in a zui a, a man louh chiang un haksatna in a zui sek. Thukhunlui sinsakna chiang mahmah ahihleh Pathian thuman pen ‘vualzawlna,’ Pathian thuman louh pen ‘hamsia’ chih ahi. Pathian thu a man ding uh Thu Sawm Piak leh adang zawlneite tungtawn in Pathian in theisak sek a, Pathian thu a man chiang un a gam uh agalmuang in nuam a sa ua, Pathian thu a man louh chiang un a genthei ua, hih duhdah ahi ua, sal a pii in a om sek uhi. Huchi’n, thumanna chu Abraham in Pathian thu a manna, a tapa tung a a latsak bang leh, Toupa Jesu’n a Pa thu a manna Kros lek a a latsak bang in, thumanna in kichimatna sunggil pen atak in a namkip a; thuman louhna in bel kichimatna a bottat hi. Pathian apan hon gamla sak a, hon gammang sak thei hi.

Tuni a i thupi uh ‘thumanna’ I Samuel 15:22 pen, Pathian leh Saul kikal thu, Pathian in a zawlnei Samuel’ kam zang a a puankhiak apan a laksawn ahi. Toupa’n Israel tate Aigupta apan a a pikhiak in Amalek miten a na doudal ua, huchia A mite a na soisak uh leh suk duhdah uh Pathian ngaih theih louh lamtak ahi a, a chiamteh tinten hi. Huchi in Israelte kumpi hi ding in Saul chu Samuel thau a nilhsak hi. Amalek mite teng khatmah siit neilou a thah chimit vek di’n leh a neih-le-lam tengteng uh laksak vek di’n a hilh hi. Himahleh Saul in Amalek kumpi man mahleh hing hawi a, a ganhonte uh Belam leh Bawng hoih leh thau tatate inn hon tut a, huai phet in Samuel in Saul kiang ah, “Bang achia Toupa thu zomlou a, gallak thilte a boh a na boh a, Toupa mitmuh a thil hoihlou na hih mawk?” chi in a hon phuulta hi. Aman Samuel kiang ah “E, Toupa thu ka zui vo-oi, Toupa hon sawlna lam ah ka hoh a, Amalek kumpipa Agag ka hon man a, Amalek mite ka hihlum vek vo-oi. Ahihhang in mipite’n bel gallak thil belam leh bawngtalte hihman ding lak a a hoihhoih Gilgal khua-a Toupa na Pathian kiang a kithoihna ding in a hon tawi ua,” chi hi. Kumpi Saul dawnna bel Toupa ngaihdan ahi hetkei a, huchi’n Samuel in, “Toupa’n Toupa thu zuih a pakta bang in halmang thillatte leh kithoihnate a pakta ahia? Ngai in, kithoihna sang in thuman ahoihzaw a, belamtal thau sang in a thu zuih ahoihzaw hi…” chi in Saul a vauhilh hi.

Saul hihkhelh bang a? i hon chih chiang in Pathian thu man mai sang in Pathian biak lungawi a tum a, ‘thah vek ding’ chih thupiak zui lou in Amalek Kumpi Agag a hinghawi hi. Pathian in kithoihna himhim a deih/a ngaisang hi a a theih ziak in ‘ganvulh ganta thah chimih vek ding’ chih thupiak a bohsia a, Pathian maipha zong in ganvulh thauthaute inn a hon kaitung hi. Hihhoih kisa in Samuel kiang ah, “Toupa’n hon vualzawl hen, Toupa hon thupiak bang in ka hih hi,” chi phangphang hi. Huchi bang lungput chapou, fel kisakna pen Pathian ngaih theihlouh lamtak ahi hi. Pathian nna i sepna lungput ah mahni chiat i ki-etthak uh ngai khamoh lou ding hi. Pathian ngaih theihlouh lamtak leh mit dongtak in, kihisaktak in i pau in i gamtang sek uhia, ki-enthak chiat ni hang.

Khovel lal leh thuneitute maipha zonna leh biak lung-awi na’ng a i thilneih hoihhoih ganta leh sum/khuttawi lian pipi i piak bang in Pathian bel huchi bang a suklungkim theih hilou hial ahi. Thukhunlui kithoih na’ng a gan piang masapen, melhem lou, a thau hoihhoih tawi a Pathian kiang a a hlat chiang un, Pathian kipakta law di’n Saul in ngaihtuahna nei hi. Himahleh huai ganta melhem lou leh athau hoihhoih in a etsak thumanna, siangthouna, itnate sunggil lam a a poimoh zawkna Saul in man fuh lou a, hihthei kisa in belam leh bawngtal thauthau Pathian adin a hon tawi zawta mai hi. Pathian in a deihzawkpen zaw Saul thilpiak belam thau taktakte saang in amah Saul ahi zaw. Saul in Pathian thu a mang hiam? Muantaak ahi hia? A mite kumpi di’n a ching taktakna hia chih ahizaw hi. Thilpiak piaklouh ding chihna bel hilou in, thilpiak i hon tawi eem-uum sang in Toupa’n a deihpen zaw a petu ahizaw. Pathian in a ngaih poimohpen zaw amah toh i kizopna ahoih hia chihlam ahizaw. Bawngpa leh belam thau taktak sa ne nuam hilou in Amah thu i manna a ngai poimohzaw hi. I sum neih le-lute sang a a etlah zawk zaw amah i itthuk leh a thu i man ahizaw hi. Huchi bang lungpu mi zong in khovel pumpi ah a mit a vakkual in, a dangtak hi.

Itna diktak in zaw piakthuk a phut kei a, piakthuk lametna toh na invengte thil va pe lechin a dongtu adin kipahhuai lou hial ding hi. Saul bang a Pathian vualzawlna muhkik lamen a thilpiak i piakleh vualzawl louh chiang a Pathian lak a vui mai ding i hi chihna hi ding a, hoihlou hial ding hi. Khenkhatten Saul bang deuh a Pathian maipha zon na’ng a nekguk sum, muhna diklou a laklut sumte Pathian ma-a i hon tawi chiang in Pathian leh a Saptuamte kipak di’n i ngaihtuah hi. Ahi kei hial, Pathian in a deihpen zaw a thu i manna, a lak a i ginomna leh amah i itna ahizaw. I thilpiak belam thau leh pawisaten a etsak zawkpen zaw Pathian chu i Pa ahih ziak a a thu i manna, a lak a i ginomna, hon it ziak a i itthukna ahih zawk ding ahi. Ta thumanglou, luhlul, helhat in tam thamtak a piak sang in, Pa thumang ginom in tawmzaw deuh a piak ah Pa a kipak zawtham ding hi. Hiai thudik thei siam lou leh a lungtang a Pathian thumanna tellou a ganta thau leh hoih mai a lat ziak in, Pathian in Saul pen a Laltutphah laksak in a lungsim bang pu mi David a pe zawta hi. Kumpi David bang a Pathian lungsim bang pu mi, Pa thumang i inkuan, Saptuam leh khotang in poimoh a, huchi bangmi zong in Pathian in a mit a vakkualsak dundun hi.

I gam a gingtu masate Pathian thu-awi a na kichi uhi. Tulai a piangthak kichi tamtakte sang in Pathian thu a mang/a awi hoihzaw mai d’uam aw chih in om hi. Khristian State/Khristian District hi mai lou in Pathian thumang State/ District hithei leng bel ginglouten i thugen a gingta theizaw ding ua, Khristian sahkhua a dalhzak baihzaw ngei ding. Khatvei mipi tamtakte lak a Jesu’n thu a gen lai in a nu leh a sanggamten amah muh a tum ua, “Na nu leh sanggamten on mu ut uh,” chi’n a hong hilh ua, aman hichi’n a na dawng hi: “Hiai Pathian thu thei a, mangte ka nu leh sanggamte ahi uh,” chi’n a dawng daih hi. Pathian thu mangte Jesu unaute i na hi maimah chih hon theisak hi. Pathian thu mang silou a, kithoih tluk-tluk, thum ngutngut, hamphatna deih ziak a thilpiak tungtawn a Pathian maipha zon chihte Pathian kipahpih louh lamtak ahi. Huai chet ahi Saul in a hihkhelh. Thukhunlui a Siamputen Belam leh Bawngtalte a a kithoihna uh Pathian in a zadah kei a, a piak utna lungsim uh a siangthou ziak in a na pom mai ahizaw. Thukhunlui a kithoihna ahih ziak mai a pom hilou in, Amah a kihtakna uh, zahna leh thumanna ziak a thilpiak pia leh kithoih sek ahih ziak un a na pom sak mai ahizaw. Kaina kithoihna sang a Abel kithoihna Pathian in a kipahpihna ziak huai geih ahi. Tulai a Saptuamte kithoihna thumna, thilpiak, kikhop, nataang, phatna lasak, Komiti leh kikhawmpite Amah thu i manna, zahna leh itna i latsakna ahih nakleh Pathian kipahpih lamtak ahi ding. Himahleh Kumpi Saul bang a maipha zonna, mai phiatsiang tumna, tuitum utna, hamphatna leh mahni masial ziak lel mai ahih lebel, a thaunilh Saul ngei adim lou bang in eite leng a hon dim bikkei hial ding.

I khawmpi vaihawm leh komiti vaihawmte ah Toupa tungnungpen in i koih hia? Pathian zahna leh thumanna apat in vai i hawm in i komiti sek hia? Ki-enchian in kivelthak lehang i chi hi. Pathian thumanna dohkan apat a vaihawm i hih lebel, Paul bang a dan thei pil leh khami tatate Pathian leh Saptuam adia pangkai ahi uh chihbel i mangngilh louh ahoih hi. Biakin sung a Pathian thu manmeltak a lang, pawlam ah bel Pathian sang a khovel lam thumang nawn daihsi, akoi lamlam thumang tuah thei i hih lebel, Saul bang in i thuneihna leh rawngbawlna/nasepna ahon lakkhiaksak teimai kha ding chih lauhuaitak ahi. Huaiziak in, “Kithoihna sang in thumanna ahoihzaw a, belampa thau sang in a thu pom a hoihzaw hi,” chih i vek un zilkhiak tum chiat ni hang. Huchi a thumanna toh Toupa adia i kithoih a, Toupa thu mangtak a a na i sep theihna’ng in Toupa’n i vek un hon panpih hen... AMEN.