Tukum EBC in thupi a i zat NGAIHDAMNA chih thu etlawm leh nalhtak mai in i biakin chiat uah i tak ua, huai in dai dide in thugen den hi. Hiai ngaihdamna in salam leh khalam ah gen lianpi nei a, mihingte hinkhua adia ni teng leh hun teng ban ah tangtawn ading a leng thu poimoh ahi den hi. Tu kha thupi Tanau kal a kingaihdamna chih ahi a, huaite i Bible sung mah a tangthute pansan in i ensuk ding uh. Ngaihdamna kichi apoimohlou kuamah ki-omlou. Kei ka poimoh diak chitheite hampha. Ngaihdamna i chih chiang in mi nih kigenkhawm kha zel hi. Ngaihdamna tangtu leh Ngaihdamna petu. Poimohna lam thu ah leng anih un apoimoh ua, Hamphatna ah leng anih un a hampha khawm lai uhi.

Hiai ngaihdamna gengen in sasa mahle hang, atak a i hinpih keileh i gensiam thu, i saksiam thu in gahsuah lou ding hi. Huaiziak in kuapeuh in poimohngaih diak in neithei lehang a chihhuai mahmah hi. Salam ah ngaihdamna in khat-le-khat kal ah lungnopna, kipahna, hamphatna, deihsakna leh adang tampi hon tun a, vualzawlna tampi toh hon omsak hi. Ngaihdamlouhna in bel hiai teng lehbulh a, hamsia, kideidanna leh kihuatna, hindan noplousakna leh a hoihlou lam tampi hon tun hi. Huaiziak in Ngaihdam kichi a manpha in, mantam a, kuapeuh in a tamthei lam i zat ding uh ahi chih hon musak hi.

Ngaihdamna Poimohna ziakte —

1. Pathian thupiak zuihna ahih ziak in.

2. Mikhial, Pathian hehna sung a om a, a itna huang a i lutkik theihna din.

3. Pathian ngaihdamna pansan a midang ngaihdam ding i mohpuak ahi.

4. Pathian in i hinkhua a lemgel a neih sepsuah theihna din.

5. Mihing lam ah khat-le-khat kal a kilemna om theihna din.

6. Ngaidamtu leh ngaihdam a ompen kikal a zalenna omna din.

7. Ngaihdamna kan a suahtakna ding lampi dang omlou.

8. Ngaihdamna tellou a masawn ahaksat ziak in.

9. Ngaihdamna tamna mun ah thil a pai hoih/zang ziak in.

10. David in Jonathan tapa Mephiboseth a pu Saul gamteng piakik, Saul hihkhelhna ngaidam… melma ngaihdamna ding hon sinsak.

11. Paul in Philemon kiang ah a sikha Onesima ading in ngaihdam ngetsak a ngaihdam ahi. Midangte adia ngaihdamna palai hithei i hih chih hon sinsak ziak in.

12. Barabba migilou a khelhna ngaihdam in om, himahleh a tanchin kitheizui lou, lamdang!! Ngaihdamna i tan nung natawm a le pawngpaw-hin chih omthei chih hon sinsak hi.

Ngaihdamlouh apoinate —

1. Suahtakna omtheilou, huatna, hazatna, hehna omden.

2. Bible a Kaina leh Abel bang a tualthahna hon tun, Phuba lakna gahsuah (Gen.4:8).

3. Esther Laibu a Haman in Mordekai thah a sawm amah tung tukik (Esther 7:10).

4. Kumpinu Vasti kisaktheih ziak in a dinmun apan kia (Esther 1:12).

5. Kumpi Saul in David a delh den a, a ngaihdam theihlouh ziak in gimloh.

6. Saul leh David kidouna ah Saul sepaih lian Abner om a, David lam a hong kiktak in gingta zoulou in David sepaih lian Joab in a na that maimah a David in kahtam alou hial hi (2 Sam. 3:33-34).

7. David tapa Absalom sanggamnu Tamar, Amnon in a sualluih ziak in Absalom in ngaidam theilou in kum nih nung in a sanggam pa Amnon a that hi (2 Sam. 13:23-32).

8. Shimei in kumpipa David a hamsiat, David in a ngaidam hi (2 Sam. 16:5-14).

9. Kumpi David in a tapa Absalom in a kumpi hihna tuh a, nasem himahleh, a it in a ngaidam a, ahihhang in a sihloh veve hi (2 Sam. 18:14).

Huaiziak in, ngaihdamna zaw poimoh petmah a, huai in thil tampi lamzangsak, phatuamsak a lohchinna ding a leng kalbi khat ahi. Saptuam sung hi’n Pawlpi sung hileh kingaihdamna omlouhna ah buaina leh kiselna, kihazatna chihte lian a, mahni angmasialna leh midangte bangmah lou a koihna lianse hi. Ngaihdamna tamna mun ah mite kituak in, kihou thei ua, omkhawm miten nuamsa in haksatna tawm deuh hi. Ngaihdamna poimoh kisalou i om khakleh i hihkhial kha ding, i vek un i poimoh ua, i vek un ngaihdamna lou in ma kisawn thei taktak lou ding hi.

TANAU/UNAU KAL KINGAIHDAMNA POIMOH LUA – A tung a i gensa teng apoimoh bang in i tanau kal ah hiai ngaihdamna kichi poimoh diak hi’n i thei hi. Tanau kal i chih chiang in inkuan khat, a kipaithei ding hilou, unau khat, nuta-pata kal, sungta-putu kal leh inkuan sung adia anaipente genna ahi bang in, huaite kal a kisiatna hong om chiang in lep-hak in buaihuai diak hi. Khovel koimun peuh ah pai mahle hang lungmuan/lungkimna om lou ding hi. Huaiziak in tanau kal ah kisiat kibal chihte a om hetlou ding adeihhuaipen ahi gige hi.

Hehna, kisiatna hong omkhak inleng ngaihdamna mah pibawl chiat in, huai mah in kikhuikhawm lehang i kal hoih nawn pah ding a lungmuangtak in i khosa khawm nawn ding hi. Unau kal/Tanau kal kisiat zaw khopi laksang in a haksa zaw (Pau. 18:19) a chih bang in kisiat vanglak leh lepnawn thil baihlam lou ahi chih phawk in kisiat louh teitei sawm ding ahi.

Ngaihdamna i chih Pathian a kipan ahih bang in Jesu’n, Kros a a melmate tung ah ngaihdamna a puan in amah nungzuite tengteng in leng huai zui theileh chih a deihpen ahi gige hi. Stephen suang a den a om lai in alamdang tuh suang a dengte mulou in van kihong ka mu chidaih mai hi thupi maw! (Nasepte 7:55). Hon gensia, hon kou, hon musit, hon hua leh hon melma bawlte kia i buaipih leh kikhang/piching ngeilou ding ahihman in a suang enlou in van lam en lehang i lungkim zaw kha ding hi.

I Bible a unau kal kisiate kingaidam leh kingaidam lou kal a thiltungte i en ding —

Esau leh Jakobte unau kimuhna. Gen. 33:1-20 – Hiai kikal a Esau leh Jakob-te unau kimuhtuahna i simleh atawldamhuai in, alungkimhuai mahmah mai hi. Kum tampi kihou theilou a kitaisan nung un hong kimutuah ua, kingaidam tuah in hong ki-angpom ua, kapkawm zen in a ki-itna thu uh hong gen uzaw zaknop hina maizen e… maizen, i Laisiangthou sim thanophuai in lungkhoih huai hinatel e. Hiaite unau kimutuah lungkim dingdan mai, i suangtuahsak chiang in hampha uh sak mahmah in om hi. Hiai a i muhtheih tuh — Ngaihdamna in thilhihthei hina maizen e maw — Unau kihua, hehna, thangpaihna in kum tampi atuam, phuba lak utna lungsim nei a kum tampi hinkhua na zangta, tua ngaihdamna ziak a huaite tengteng huihpi mutmang bang a lengmang, kihuatna sik a ki-itna, hehna sik a ngaihna, phuba lak utna sik a thilpiak piak utna chihte a thop a omta, bangzahta in anop dia? Bangzahta in a lungmuanhuai dia? I ngaihtuahsak chiang in hampha uh i sa a, ngaihdamna thilhihtheihna zaw a manpha in a mantam hi. A zangkha tamtam hampha ahi pen. Unau en dih na unau in na kiang a a hihkhelh hon gen ngamlouh a dawi kiikiai a omlai in na ngaihdamna thu zasak mah dih bangzahta in a kipak tel dia, khovel a lungmuanna leh kipahna zaw unau kal a ki-itna in gen lianpi nei hi.

Jakob in a u Esau kiang ah kipahman pia — Hiai in a u tung a a hihkhelh kum tampi nung himahleh a lungsim a si theilou ahihman in thilpiak tampi pia hi. Hiai ah Jakob in a u Esau maituah ding lin mahmah ahi chih a chiang hi. Thil i hihkhelh chiang in i paunak ah guta delhlouh in a tai chih bang in a guk in kitaisia nak hi. Hiai ah leng Jakob a guktaisiat ahipen mai hi.

Esau itna thupi — A u pa Esau in a nau a itna lian in a hehna teng daisak zou a, itna liantak mai toh anau a na maituah in na angpom hi. Anau thilpiakte ziak ahi kei, amah lungsim a ngaihdamna omkhin ahihman in, thilpiakte sang in anau a itna lianzaw hi. Upen hihna a chin mahmah a, ahih dingtak leng a hihkha hi. Upen in naute hihkhelh bangteng himahleh itna, deihsakna toh ngaihdam a lemna, kituahna a delhpih gige ding ahi. Unau kihua thei leh kikhen thei hilou hihdan lah ding ahi.

Joseph in a unaute ngaidam. Gen. 45:1-15 — Joseph hinkhua gen mangmoh ahi gige a, a thuakna thupi in lian mahleh amah Pathian lam a kipiakzohna in a thuakna neusak zou hial a, vualzawlna mutaak mah a na hi chih in om hi. Joseph in a unaute a muh in a thuaknate mangngilh in ngaihdamna nasep lam ah awnzaw a, thilhoih sem din kimanzaw a, ngaihdamna puang in abanban in kawi a kahkhum vek tel hi. Thupi in lamdang lua… Pathian, a masa a koih ziak mah ahi ding phuba lak ding himhim ngaihtuah selou in ngaihdamna bawl in a itna sulang zou vek hi. Lampi ah kina kei un aw… a chih hiathiat bang thupilua hi. Mihing khat ding in tuh lamdang chih louh ngal gen ding a om kei hi. Pathian nei taktakte gamtatna zaw thuakna tunglam pek ah vualzawlna in vukzel hi maw!

Joseph dinmun adia i kikoih leh phuba lakna hun lemtangpen leh hoihpen ding ahi, himahleh Phuba chihte lungsim a le neilou bangmai a gamtang i chih chiang in ettontham in a enhuai mahmah hi. Joseph hinkhua zaw khovel omsung gen mangmoh a omden ding ahita hi. En leng i unau kal ah bang suangphuh i bawl a??

Abraham in a naupa ta Lot kem in kizuisak. Gen. 12:5 — Abraham ading in Lot pen a paneu Haran tapa ahia, amah ading in tatak hikei mahleh a duat in hoihtak in enkol a, a paina mun a kizuisak in Pathian sapna zui a kalsuan lai in nusia lou in kizuisak den hi. Abraham ading in Lot pen buaihuai hun om sek mahleh duattak in makaih a, a hoihlouhna om inleng ngaihdamna toh kem den hi. Thupi mahmah hi. Na unau kep ding omte itna leh deihthohna toh na kemzel na hiam Abraham etton in nei ni.

Abraham in Lot deihtelsak masa. Gen. 13:9 — Abraham in a tapa toh a gan neih uh hong tam a, a nasemte uh kal a kisiatna tungthei ding dinmun a omlai in Pa hihna dinmun siamtak in zang a, a tapa a deihtelsak masa in koilam na zuan dia, na pai louhna lamlam ah ka pai ding a chi hi. Pata ki-itna, kideihsakna leh kilainatna liantak hon musak hi. En leng i kep ding a omkha i u leh naute ta hita leh Pathian deihna bang a khentuam hetlou a kep ding ahi chih hon musak hi. Abraham ading in ngaihdamna a neihtam ziak in Lot a kep sung in Lot adin buaina a om kei hi.

Tapa Taimang kiknawn thu. Luka 15:11-20 ah tapa taimang tangthu i mu hi. Hiai tapa taimang, thumang lou leh nu leh pa sulungkham a, neih-le-lamte suthelthang pa hong kiktak in itna toh duattak in a pa’n na vaidawn chih i mu. Hun paisa a a hihkhelhte genpih a sawm kei a, kitheilousak in ngaihdamna liansakzaw in vaidawnna bawl hi. Pata kal ki-itna, nuta kal ki-itna, bangchi tuk in khial in taimang mahle hang ittu Pa pen in mangngilh lou a kik hunhun a na vaidawn dia mansa na hi gige ahihman in i hampha mahmah hi. Hiai kan a ngaihdamna thupi i phuvuallouh i tangkha nawn kei ding hi. Pa in hon ngaihdam bang in enleng i pata, nuta kal kideidanna, kihuatna chihte omleh koihkhia in ngaihdamna mah koih lianpen in nei ni.

Kaina leh Abel kal a siatna. Gen. 4:1-16 — Hiaite unau kisiatna hi, thillat thu ahi a, Pathian biakna thu ahi. Insung khat, unau khat, tengkhawmte kal ah leng biakna thu ah kituahlouh theih luat a na hi chih i mu thei hi. A deihhuai pen tuh insung khat apante bek tuh i biakna kibang thei vekleh chih deihhuai hi. Biakna kibat louh chiang in insung vaihawm a nawngkai in a buaihuai ban mahmah hi. Insung maitam bawl bang lem taktak theilou hi. Hiai in lungsim tuam hon pawsak a, ngaihtuahna kibanglou in hon koih a, kituahlouhna a baihlamsak tuan mahmah hi. Kaina leh Abel in a thillat uah kituak bang in lang mahle uh a result hong suah in huatna hon suahkhia a unau ki-it zohlouhna, tualthahna mulkimhuaitak hon tuntel hi. Unaute itna ah khang chiat sawm ni.

Absalom in a unaupa Amnon that. 2 Samuel 13-19 — Absalom in a sanggamnu Tamar a sualluih ziak in kum nih vingveng apailiam nung in leng ngaidam lou a phuba la in Amnon a that hi. Poi mahmah, insung ah kimelmakna, kihuituamna, kideidanna, kihuatna chihten vai a hawm chiang in phuba lak utna tun in a tawp ah thilhoihlou piang hi. Huaiziak in unau na tung a na unau in thil a hihkhelh leh a kum kum in lunggimna’n neihloh ken, ngaidam mai, in na suakta zaw ding hi.

Barabba ngaihdam a om, a tanchin kiza nawnlou. Luka 23:18-25 — Hiai kikal i sim leh Barabba tanchin i mu, amah suamhat, gilou leh khotang ading a dongkholh ahih ziak a mat a om, khailup ding a thutanna bawlkhitsa, ahun ding ngak lel ahita. Himahleh, zan khat thu in thil kikhek a, ngaihdamna a tang a, a suakta maimah hi. Ngaihdam a om sapsap din a hinkhua maban theih ahinawn kei zela lamdang mahmah hi. Ngaihdamna ziak a suakta hinkhua tuh i suangtuah chiang in kipak lua ding a, hinkhua hoih leh etton tham a hing ding, nasep hoih tampi leng sem ding a lamet ahi. Ahihziak in, a tanchin zak ding a om nawn kei. Pathian leh mihingte ngaihdamna i tan khitnung in, mawk tut maimai a, ommuang ding a ngaihdam i hikei, hinkhua kikhek a, Pathian leh i mihinpihte adia thilhoih hih a nasephoih sem ding lamet i hita hi. Unau nang bang na chi a?

Thukhitna — Tanau kal a ngaihdamna kichi a manpha in apoimoh mahmah hi. Huaiziak in kuahiam tanau kal a ngaihdam ding nei i om a, tunitan na kidiahsak lai i om khakleh kivel thak ni. Toupa’n hon ngaihdam bang in eite leng i kingaidam ding uh. I tanau kal bek i kingaihdam theih keileh i tanchinhoih kep pen tanchinhoih dang Bible in a sinsaklouh hikha thei hi. Toupa’n gahsuah din hon vualzawl chiat hen.