(Missions Opportunities)

Simtute tengteng i Toupa Jesus Khrist min in Chibai!

Ina tuah ngeilouh, tuahkhak phut Covid-19, Hipi suukpi khatna kia hilou, a huphulhhuaizaw, nihna ziak in haksatna tamtak tuak mahle hang, Toupa Gam nna sepna a i kihelkhaknate uh khaktan bikbek a omlou lai! A hi, Grace Bible College tungtawn a A gam nna i sepkhawmna uh leng paitou thei zel, A khut muanhuai a Hon pi, i biak Pathian kiang a kipahthu gen in thupina Amah kia i pe masa hi.

GBC tungtawn a i nasepna uh hiaitan i tun theih, mimal kuahiam ziak hilou in, Toupa hehpihna ziak a i pankhawmna uh: Head Quarters, Divisionte, Saptuamte (local saptuamte), Department tuamtuam (Missions/Dorcas etc), Thumpawl tuamtuam, Inkuan leh mimal tamtakte’n kithuahpihna khut non piakte uh ziak ahi. Sum-le-pai, tha-le-zung, na sente uh Toupa’n noulam ah zong a vualzawlna tamsem muhna hon suaksak leh chih ka thumna uh ahi.

GBC a sintute lungput a vek hilou, a tangpi hong kikheng mahmah muh theih om saptuamte lak a kup kal bang ngaklahhuai zawzen om tuh bang dang hilou in, Missioanry nasepna a kihel lunggulhna, nidang sang in hong lian zaw in, a kuankhia ut/a kuankhia pah ta ding kia hilou in, a kuankhe thei ta leng hun dang sang in hong tamzaw mahmah hi a theih ahi. Halleluijah, Pathian, i missionary Pathian min phat in om hen.

Missions lungput/Missionary Nasep lunggulhna, i tuailai tamtakte lak a hong om in Missionary Nasepna toh kisai Thukup gelh utna (phurna) hon piak luat man in tutung in i Thukizakna tungtawn in i saptuam pawlpi hi in, mimal hitaleh Missionary Nasepna a kihelkhak theihna, hamphatna i neihte point bangzah hiam kikum leng i chi hi:

1. Gingtu khempeuh missionary hi uh.
Belampute’n Jesu a va muh khit un, a tanchin a paina peuh uah gen thang uh (Lk. 2:17). Ei leng Jesu mu a neite i hi ua, i paina/omna peuh ah Jesu thu genthang tu i hih ding uh ahi.
Jesu kamsuak mahmah a sawl a omte i hi ua, kei tellou chihtheih hilou hi (Joh. 20:21 cf Mar. 16:15; Nas. 1:8).
Paul in, hehpihna a tan ziak a ‘bat ka nei’ (Rom. 1:14) a chih, huai hehpihna tanpihte i hi ua, bat nei i hi uh.
Omna mun leh kiangnai a Ginglou om peuhmah ei mohpuak, i mission field ahi uh. Amang khate hotkhiak na nna a kihellou Christian/saptuam tuh — a mangthang saptuam hi a hi.
# Reinhard Boonke in hiai a na chi hi- “A church that does not save the lost that church is lost itself”.

2. Thumna tungtawn a missonary nasepna a kihelna.
Missionary nasepna a pan theihna dia hamphatna i neih poimoh mahmah khat tuh “thumna” a hi. Mimal, inkuan leh saptuamten hihthei vek hi (Lk. 10:2).
Amin maimai a thumna hi lou, veina taktak toh lungsim mitkha a mangthangte mu a, hotkhiakna a ngah na’ng ua thumsak. (Adeihthusam huai: Khitui toh an-ngawl a thumna).
Niteng a hun sehtuam nei a thumna hun zangthei bangzah hiam omta. Hiai bang pan thei nailou i hihleh panta ni. Van ah i kipahman ding – i Toupa’n hon koihsak hi.

3. Thilpiak, sum-le-pai tungtawn a missionary nasepna a panna.
A gam nasepna adia latkhiak a, phal leh kipaktak a pe mi hih ding ahi. Pathian it a om i ut leh i hihtheih tawk in thilpiak ah aw... “Pathian in kipaktak a pemi ahi a it” (2 Kor. 9:7b).
Macedonia saptuamte ettonhuai mahmah uh — amau hihtheih tung ah pia uh. A theihpihtu, Paul in hiai chi hi: “...a neih sang ua thupizaw in leng a pia uh” (2 Kor. 8:3).
Piak zah sang in piakna ziak (motive) poimohzaw hi. Mite pahtak utna ziak a pia ki-om sek!
Piak ding a i chiam leh semsuah teitei ni, Toupa thupina mu ding i hi ngal ua.
Muhdan diklou a muhte hilou, muhdan dik a muhte mah piak vualzawlhuaizaw hi.
A nei tawm in tawm i pe dia; a neitam in i pe tam ding uh.

4. Mahni taksa mahmah a Kuankhiakna:
Carl F.H Henry thugelh hoih mahmah tuh, “The Gospel is only good news if it gets there on time” Tanchinhoih /thu hoih hi ngal, a zekai luatleh a thu hoihna manlouh suakthei — khate honkhe manlou ding i hi uh.

Piangthak hoihtak, ginna a piching, gammial veina nei mite i kizekaisak kei ding uh.
Pathian apan, Missionary dia sapna, Missionary sapna chiangtak neih a poimoh (Nas. 13:1-4).
Abram bang a nutsiat ding omte nuse ngam – ginna leh kipiakna kiptak nei mi (Gen. 12:1).
Khutsiamna, laisiamna, leh hihtheih dangdangte Amah khut a i piak leh a zatna ding a bawlpan nak theihlua hi. (Toupa’n Mosi kiang ah, “Na khut a om bang ahia?” chi hi (Ex. 4:2).

5. Mimal kitoudelh a nasepna (tent making ministry)
Khrist doudalna gamte ah hunbit a sem, missionary dan a luttheih hi lou hi.
A gamte:
China, Russia, Cambodia, North Korea — Missionary lutphal louh, kong khak ahi.
Muslim gam, Afghanistan, Saudi Arabia, Iran, Iraq, Egypt, Libya, Sudan gamte ah Missionary lut theihlouh gentak louh in, Pathian thu-awi mawngmawng omsak louh ding chih ahi. Tua gamte a i Christian pihte un thuak nak thei mahmah uh.
Lubuk phal a Tanchinpha va hilhte hiai bang min nei in kuan uhi:
Doctor/ Nurse bang in, Teacher bang in, Businessman bang in, Tourist bang in, Student bang in, Footballer bang in, Sammettu bang in, Khedap bawl bang in, etc.
Dr. K. N. Nambudripad, mi’n a nasep a dot ualeh hiai bang in gen hi, “Ka nasep tuh mite tangthupha hilh ahi a, ka nekzonna ahihleh doctor nasep ahi”
Hihtheih lam (tempaina) a neihte uh zang in missionary nasep lohching mahmah uhi.
Hiai hi — Tulai hun toh kituak missionary nasepna, khovel ah kipibawl mahmah hi.
EBC in leng, i tuailaite khovel gam tuamtuam a kikapkhiak ding tup a nei in, pan naktak in i la lellel hi.

6. Midang toh sepkhawmna (Partnership)
Ministry in partnership with others, poimohdan kiphawkkhiak beh zel in tulai in hahbawl mahmah in om hi. Alunglutte ading a kong kihong gige hi.
Hiai hi, ei sen ngailou a, mi’n hon sensak ding chihna hilou hi.
A gam ading a, i lunglutna dan a semkhawm ding chihna ahi.
Missionary nasep theihdan tampi om a, saptuam khat in tuabang septheihdante sem khin thei veklou ahihna ah midangte toh sepkhawmdan a siam poimoh mahmah hi.
Tulel a EBC in Partnership a i sepkhawmpih pawldangte:
a. SIM (Serving in Missions)
b. OMF (Overseas Missionary Fellowship)
c. WEC (World Evangelization for Christ)
d. FMPB (Friends Missionary Prayer Band)
e. IEM (Indian Evangelical Missions) etc.

Chouna & Thukhitna:

“Thil khat kia hiai leitung a i hih theih; Van a i hihtheih louh ding om hi, huai tuh Tangthupha puanzak ahi”. – George Whitefield

Tu hun nanung lam mahmah a omta i hihna ah, i Pa Pathian, Missionary Pathian in, A nna sep ding awlmoh lua lai ahihman in i ma ah kong lianpi hon honsak lai hi in i thei hi. “En in, na ma ah kuama’n a khaak theihlouh kongkhak honsa ka koih hi” (Kil.3:8).

Kumteng in tuailai secular leh theological graduate kibehlap tou zel in, missions nasep lunggulh tam hun kuamtak Toupa’n hon pia hi. Huchih kal ah Unemployment Problem chi khat i saptuam pawlpi ah zong hong piangkhia hi. En lah guai seng lou, a maban ding uh lah kawkmuh senglou a i om louhna ding in, khodak in, dapkual in, kongkiu in, maingal deuh leh i khovel ngamthoh deuh in, hih tuntun deuh leng i chi hi. Pathian in eilou leng midang nana zang thei mahmah hi. “Hiai hun a bangmah himhim gen lou a, na daih dide leh mundang akipan in Judate ding in panpihna leh lakkhiatna a hong om ding... hun hichibang adia hong lal na hihmel kuan a thei a? (Esther 4:14).

Mi tamzawte’n Pathian nasepna ding in hun neilou, siamna omlou, hihtheih neilou, chih khawng i suanlam ahi gige hi. Toupa’n Mosi kiang ah “Na khut a om bang a?” chi hi (Eks. 4:2). Mosi in “Chiang” chiin dawng hi. Hiai chiang hi, “chiang na-ran” hi kha ding hi. Hinapi in “Pathian Chiang” chih in om hi (Eks. 4:20). Pathian in vanzat lamdangtak in a zang a, Tuipi san khetzakna, suangpi apan tui luangkhesaktu leh adangdang ah zat in a om hi (Eks. 14:16; 17:6).

Toupa’n “Na khut a om bang a?” hon chi hi. Toupa apan thilpiak i neihte zonkhiak a, talent i neih bangbang zang a kipat hun/ dinkhiak hun Toupa’n hon bawlsak hi in i thei uhi. Kal suankhe theiloute leng kidamlou in, i khut a chiang om (i septheihte) Toupa khut a lankhia in, i zang ding ua; mun dang/gam dang a kalsuan khe ut taktakten leng Toupa apan thilpiak i neihte uh mah: siamna, hihtheihna tuamtuamte (professional or tentmaking ministry) toh kuankhiak theih phet hilou in mi bangzah hiam kuankheta uhi.

Aw Pathian’ Saptuamte, Khrist’ Sepaih hangsante bang in kihakchiam ni! Khrist leh A gam ading in i septheih om hi. Hiai hamphatna ngaihsaklou a, zattheih dia i om keileh ei a taan i hi ding ua, Toupa’n midang zang lel ding hi. I kisik kha ding!

GBC SUNDAY MESSAGE