Khristian Thukizakna simtute tengteng i Toupa Jesu Khrist min in Naupangte Ni chibai!

Gam tuamtuam in Naupangte Ni (Children’s Day) zatdan tuamchiat in zang zel uhi. India ah November 14, Prime Minister masapen Pandit Jawaharlal Nehru pianni, Naupangte Ni in kizang zel hi. United Nations in World Children’s Day chih minvuah in November 20 khovel pumpi a Naupangte Ni ding in chiamteh uhi. EBC saptuam in June kha a Pathianni nihveina Naupangte Ni in kizangzel hi. Ahi a, gam a tuam dungzui in a kizat ziak leng tuamzel hi. USA ah 1856 in Rev Dr Charles Leonard in naupangte baptisma tanni bik hi ding in Naupangte Ni na bawl hi. EBC in ahihleh naupangte ziak leh amaute tungtawna Pathian kiang ah kipahthu genna leh pahtawina ni in i zang uhi. Hiai pansan in tualsung saptuamte’n i hihtheih bang chiat un naupangte toh biakkhawmna hun manphatak i zangzel uhi. Thu kipahhuai leh saptuamte adia Pathian maipha muhna thu khat ahihleh Naupangte Ni i zatchiang un Tanchinhoih puanzakna leh naupangte Khrist nungzui dia chilna hun in kizang gige hi. Zatdan zia tuamtuam neizel mahlehang naupangte Khrist khebul a pi ding tuppen in i nei gige uhi. Hiaibang lungput mansuahlou saptuam leh Naupang Pawl i hihlai man un Toupa min i phat uhi. Naupang tamtak khalam a piching leh Khrist theihpihtu muanhuai hi ding in Toupa’n hon seksakta hi. Huchi ahihlai in, tukhang leh tuhun ah khangnou tamtak lamhaih leh khelhna sal a tang in om ua, kiamlam sang in punlam manoh ding in kilang hi. Naupang piangthak in i lungsim a tawldamsak a, naupang mangthang in i lungsim a nasak mahmah hi. Saptuam in i paidan khek a naupangte lamdik a pinawnlou chihlam ahikei a; khovel paidan kikhek naklua ahihman in naupangte’n Tanchinhoih a etdan uh kikhek ahizaw diam chih ahizaw hi. Khovel huihnung dan et in Tanchinhoih ading in mun neu deuhdeuh ding in kilanga, Khrist nungzuihna kichi leng thil zumhuai leh valna khat hong suakding hi. Ahitak in mun leh gam tamtak ah hikhin leng ahita hi. Huchi ahihman in, tuhuna naupangte khankhiatna khovel ah i thutawi un mun neinawnlou thei ahi chih theikawm in saptuamten bangchi bang in pan i lathei dia chih ngaihtuahle uthuai i sa hi. Kum 20 zoh chiang in i gam ah Naupangte Ni bangchin a zang di ua? Tanchinhoih genna om hetloua zat hun hong tungthei hi. Thildang ah changkang leh khangtou mahmah a khalam ah niamkiat hiaihiai theih hi. Tutung Naupangte Ni in i khovel toh kituak in naupangte Khrist khebul ah pizou ding in saptuam in theihtawp suahthak a, lampi thak sialtheih om hiam chih zong ding in i kichial uhi. Saptuamte muhkholhna kichiantak Toupan hon pia ahi chih theikawm in lauthawnglou a kalsuan ding in i kihanthawn uhi.

Naupang 18,000 tunglam neithei saptuam i hi ua, hiaite lak ah kumteng in 800 hu khawng piching a lutzel uhi. Huaiban ah, BCD nuai a omlaiteng naupang chi in avek un i chiamteh ua, a kimkhat sanga tamzaw teenager/khangnou ahi uhi. Teenager i chih chiang in mahni deih leh duh kizon thei, mahni deihdan a khosak sawmtate ahi uhi. Huchimah bang in khalam vai toh kisai in lunglutna taktak leh thawmhauna neitheite ahi uhi. Naupang chi a i “naupang” bawl lai un i khovel uh kikhek lawta ahihman in amaute naupang kisa nawn hetloua pichingte bang hai honsa leh a lungsim uh manbanlou honsa na hi ut mahmah uhi. Ahitak in naupang kum 4 apan kum 12 te tanpha leng a khovel uh tuam mahmahta hi. Kum 30 paita a naupangte toh tuhuna naupangte ngaihtuahna leh lungput kibang nawn hetlou hi. Kum 30 paita a naupangten sappau kichi piching leh laisiamte kia in a zattheih kisa a, tuhun in bel kum 3-4 te leng sappau in kihoutheita uhi. Kikhekna huih thupitak nung lellel ahi. Pichingten bel a huihnung toh kiton in kalsuandan leh paididan i geel theia, naupangte ahihleh hiai huihnung in ahihna pumpi uh sukha in lungput leh ngaihtuahdan tuamtak neihloh uhi. A paina ding lampi uh kawkmuh ahihkei uleh huihnung in a pina lamlam ah pai ding uhi. Pathian leh Tanchinhoih kichi kikhek ngeikei mahleh naupangte etdan leh sandan kikhek thei hi. Huai kia hilou in, Saptuam leh Naupang Nipini Skul tanpha a etdan uh kikhek thei hi. Sapten post-modernism a chih uh ngaihdan kikhekna thupitak khat genna ahi. Hiai ahihleh a phuahtawm uh hilou in tuailaite khovel etdan kikhek naklua pen genna ahi. A gennop pen bel khovel leh miteng in a pomdan tangpite uh gintaklouhna leh muanlouhna ahi. Thudik chih a omkeia, thudik kichi a entu in a etdan zil ahi chih ngaihdan ahimai hi. Etsakna in, “zi ding tuh numei mah ahih ding; pasal ding tuh pasal mah ahih ding” chih thu kum tamlou chik paisa a mitengteng pomdan ahi. Post-modernism in bel “zi ding tuh a utleh pasal ahi dia a utleh numei ahi dia, a neitu deih dandan ahi” chih hong hidaih maimah hi. Hichibang ngaihtuahna tuhun a naupangte lak ah paidan ngeina hong hi ding ahi. Huai ziak in saptuam in kikhekna huihnung douzou ding leh naupangte mutmang saklou ding a panlak a loutheilou ahi. Hiai naupangte lah denchiang a saptuam leh gamsung a makai leh vaihawmtute hong hi ngeingei ding uh ahihman in. Tanchinhoih naksem in i puangzak ding a, Khrist nungzui i bawl ding uh. I thugin bulpi leh tup a kikhek ngeikei, himahleh i sepkhiat dan leh i panlakdan a khan touh zel poimoh hi.

Huai ding in nu-leh-pate leh saptuamten mohpuakna i liangkou uah i pawkhawm uhi. Saptuam khangthu i etkik chiang in kikhekna leh khantouhna ahunhun in Toupan tungsakzel hi. Ahi a, mun kibang leh mi kibang zang in a tungsak gige kei a; tualsung saptuam tuamtuamte zang in bang, mimal tuamtuamte zang in bang a tungsak zel hi. Tuhun in nang hon zangtheia, kei leng hon zangthei hi. Huai ban ah, ahun in hon puakkhiat ziak a aloutheilou a kikhek ngai hun leng hong tungthei hi. Ahitak in, muhkholhna hoihtak neia, hun in hon phutma a kikhekna neihtheih pilvanhuai leh khantouhhuai pen ahi a, buaina leh haksatna tampi pelhtheihna ahi. Tuhun huchibang muhkholhna neih leh sepkhiat hun laitak ahi. Nu-leh-paten i tate i kepna uah bang, saptuam in naupang pawl i etkolna ah bang, sinsaktuten naupangte i sinsakna ah bang – i paipih ngeinate ban ah bangchi bang in naupangte Khrist it ding leh nungzui ding in i ching thei dia? EBC sung mah apan etsakna la zual le; hunkhat lai in naupang pawl in ei tualsuak sinlaibu i neikei ua, tuin bel ei bawl mahmah sinlaibu hunkhop i neita hi. Hunkhat lai in mi phuahsa la ngen i sa ua (hoihlou chihna hilou in), tuin bel ei phuah mahmah lasak ding tampi i neita hi. Hiaite khawng na ngaihtuah a na semkhelou hilehang tuin naupang kepna lam bangtan tunglel di i hi a chih ngaihngam huailou hi. Huchimah bang in tuhun ah leng lam tuamtuam ah kalsuanthak nading omngei ding in i gingta hi. BCD Naupang pawl tup leh ngim naupangte Khrist khebul a pi ding leh Khrist batna a khansak ding chihteng in a tunkhin hi. Hiai sepkhiatna ding in bangteng poimoh masa a, bangteng poimohlou ahia chihte athak in ngaihtuah lehang uthuai i sa hi. Melmapan i buaipih masak ding thei mahmah a, huaite buaipihloua a poimohlou zaw thildangte buaipih ding in hon khemsawm gige hi. Tuhuna khovel kikhekna huih nung lelte leng melmapan i muhding leh buaipih ding hon dal ngei ding hi. Naupangte khovel in nawmvalh henla khalam thil himhim lunggulh nawnlou in om le uh chih a deihpen ahi. Huaite ban ah, kikhekna teng leng a deihhuai kim kei hi, melmapa a kipan kikhekna leng a omthei tham hi. Laisiangthou kia a kibulphuh tup leh ngim i neihte sepkhiatna a hon lamzangsak leh lohchingsak dingte ahi i mitsuan ding.

Hebrewte 3:12-15 sung ah hiaibang in kigelh hi: Unaute aw pilvang un, huchilou in zaw Pathian tawpsan ding in na lak uah kuapeuh sung ah ginlouhna lungtang gilou a hongom kha ding hi. “Tuni” a chih lai un niteng in kihanthawn tuah zaw un, huchi a na lak ua kuamah khelhna khemhat ziak a hihkhauh a na omlouhna ding un, i ginna kipatna pen a tawptan a kiptak a i vomhoih phot leh, Khrist a tanneite i hita uhi. “Tuni in a aw na zak chiang un a hellai bang un, na lungtang uh khauhsak kei un’ a kichih lai teng. Unaute, tukum 2021 Naupangte Ni in tuhuna kikhekna huih nung lak ah bangchin saptuam in naupangte lamdik ah i pithei dia chih dotna i bawl hi. Khrist Jesu i belh chinten a amah adia i muanhuai leh i lamhaih kei ding. Lungtang khauhsak lou leh ginglah loua A hon pi utna lampi i muhchet a, huai zui dia kal i suan leh Toupan ahon lohching sak ding. Tualsung ah hi in a lianzawte ah hitaleh, naupangte etkolna ah “tuni” a kichih sungteng kihanthawn tuah ding in Toupa min in i kichial uhi. Toupa deihlam thei napi a lamtuam a kalsuanna zaw Pathian tawpsanna ahi. Khrist ading kia a kalsuan i hi chih thei gige kawm in naupang pawl a paina ding dik ah paipih ding in a pichingta saptuamten Toupa Jesu Khrist min in hanchiam thak ni.