THUMAPI:
Hipi lauhuai COVID-19 ziak a mipi biakkhawmna neithei lou in a tamzawte hun haksa ah i om lel uhi. Inkuan tamtak Hipi thuakta, thuaklel leh maban ding theilou a mangbang a i omlai in lehlam ah, Pathian in hon vehkhiakna hun hikha ding hi. Hiai hun ah inkuan ki-enchian thak ding leh Pathian’ thu mahmah a kikem a, insung bawl lemthak chiat ding in kisa ni. Tu kum June kha thupi ding a piak “Insung a kingaihdamna” sepsuahna ding hun lemtang in zang ni. Tu bang hun ahia chih na thei ua, ihmu khanloh a hun mah mah ta…(Rom 13:11) chi a Paul in a gen bang in, Inkuan sung a kituahlouhna ding om thei nawnlou hun nanung a ding hikha ding i hi. Jesu Khrist ah Pathian toh na kilemta hiam, a ngaihdamna na tangta hiam? Nupa kal lemlou, Pa leh tate kikal lemlou, Nu leh Tate kal lemlou, Tek leh mou kal lemlou leh Tanau lak a kitoutuah a, phulak sawm a, unau kal kilemlouhna om tengteng mangngilh a kingaihdamna tamlua omlou semsuah chiat ding in kisa ni. Mihing in a uttan leh hoih a sak zah tan mai a sepkhiak sang a thuk zaw, mikhial kuapeuh ngaidam zou teitei itna leh kingaihniamna Jesu Khrist a om lungput a kibulphuh (Phil 2:6-8), ngaihdamna ching in kingaidam ni. Mihing a ngaihdamna om zaw, Peter in a gen bang in, “Ka unau in bangzahvei ahia ka tung ah hihkhial leh ka ngaihdam ding?” (Matt. 18:21-22) Tamvei ngaihdam ngapchi lou hi. Jesu’ dawnna ­sagihvei mun sawmsagih ngaihdam ding ahi; tua ngaihdamna in atuun zohlouh ding kuamah omlou hi. Jesu’n, “Pa, amau ngaidam in, a thilhih uh a thei kei ua ahi” (Luke 23:34). Ngaihdam a om dingte sang in a ngaidamtu ding lam kimansa a omna i mu hi.

NGAIHDAMNA, INKUAN SUNG A AKIPAT DING AHI:
Inkuan i chih chiang in kua teng uap a gen ding hiam chi leng gendan tuamtuam om maithei. Thukhunthak a Pathian in inkuan’ mohpuakna a hawmna ah Pa, Nu leh Tate minloh hi. (Kol. 3:18-21) Nute ni i zangkhinta ua, Pate leh Tate (Naupangte Nibik) tukha in i zang ding a, hiai Nibikte tungtawn in mohpuakna – sep ding leh seplouh ding theihsuah nawn i lamen hi. Ngaihdamna insung a piangsaktu ding in amau teng mah poimoh gige uhi. Nu le pa kikal a chidamlouhna neu chikchikte lianpi hong suak in, tate lak hon pehsawn chiang in, Unau-sanggamte lak zelsuak pah pah hi. Ngaihdamna mun ding teng kihehsanna mun hongsuak sek hi. Tuabang insung a kipan hong gahkhia khotang, gamsung, Saptuam leh nasepna mun tuamtuam ah siatna tun hi. Huaiziak in, khat le khat ki-iplahtuahna, neu chikchik ziak lel khawng a kitheihsiamlouhna hong gahkhe zel a hi. Hiai bang thil hoihloute bawldik ding in mahni Insung chiat ah Khrist ngaihdamna koppih in Pate, nute, leh taten eimah hihna leh dinmun chiat ah ngaihdamna semkheta ni chi in i kingen hi. Na insung ah kuahiam in hon sepkhiak ding ngak thoh mai lou in, nangmah kipan inla, hehna, thangpaihna, lungkimlouhna lunggimpih na neih tengteng Jesu Khrist ngaihdamna ah ngavek in. Huchiin, na insung mite lak ah ngaihdamna thumanpha tungsaktu na hi thei ding hi. Ngaidam un, huchiin, ngaihdam in na om ding uh (Luke 6:37). Lemna bawlte a hampha uh, Pathian’ tate chih ding ahi ngal ua (Matt. 5:9). Koi gam leng amah kidou a mangthang nak; koi khua hiam, inkuan khat leng amah kidou, a khosuak kei ding hi (Matt. 12:25). Unau sanggamte toh kikal lemlou om hiam- Jakob suan Joseph leh a unaute tanchin ah - Joseph unaute’n a pa uh sih a ngaihtuah ua, Joseph in hon mudah dia, a tung a i thilhihkhelh tengteng phuba i tung uah kim sipsip in a hon la kha ding e, chi in unau ngaihdamna lungput bei Joseph sanggamte’n hun paitasa a a hihna diktak uh hon genkhia uhi. Tuin, Joseph kiang ah mi a sawl ua: “Hehpih in na unaute tatlekna leh a gitlouhna uh ngaidam in, na tung ah thilhoihlou a hihta ngal ua, tuin hehpih in na pa Pathian sikhate tatlekna ngaidam in.” Joseph dawnna tuh: Nou zaw ka tung ah thil gilou hih lungsim na pu ua, himahleh, tuni in mi tampi hing leh dam a humbitna dia thilhoih suahsak Pathian lungsim ahi zaw hi. Lau kei un, nou leh na taneu chikchikte uh kon vak ding. Huchi in, amau a lungmuan a, kamsiamtak in a houpih hi (Gen. 50:15-21). Joseph’ Ngaihdamna a unaute’n a ngahna ding un amau lam a thilhih diklou omte phawksuahna, ngaihdam ngen ding a kimansa hinkhua hon nei uhi. Eite lak ah leng hiai Josheph unaute lungput poimoh masa pawl om kha ding hi. “Ngai in na sikhate ka hi uh” A lungsim uleh a paukam masa uh zaw huham lawtel hi ven! Huai tuh: En un, mangneipa a hongpai, hong un i that ding ua, kawkhuk khat ah i khe ding uh, gamsa gilou in a ne, chi na ni, kichi uhi (Gen. 37:19). Tuin amau leng kingaidam ding a thupukna bawl theita dinmun ah hong om uhi. “Laukei un”, chi in Joseph in a unaute adia khamuanhuai kammal zang in a ngaihdamna in zou hi. Inkuan tampite lak ah lungput chidamlou a om chiang in ngaihdamna taktak dinmun insung mite lak ah om thei lou in Inkuan tuh Setan’ vanzat kidouna munpi leh lauhthawngna mun suak thei maimah hi.

KITOUTUAHNA, PHUBA LAKNA INSUNG A OMLOUH DING AHI:
Insung chiat velchian thak nawn leng; Khrist Jesu a ngaihdamna koppih inkuan chidam bangzah i om thei a? Pa’ lungput, nu’ lungput, tate’ lungput, tanaute’ lungput. A lehlam ah, sa’ lungsim leh sual gilou ngaihtuahna toh tonkhawm gige hinkhua - huai tuh melmapa kipahlam tak lungsim nei hihkhak ding lauhuai mahmah hi. Kuapeuh in kua tung ah leng thubuai nei hile uchin, kithuakzou chiat in kingaidam tuah unla, Toupa’n a hon ngaihdam tak bang in kingaidam tuah chiat un (Kol. 3:13). Insung mi ngaihdam theih louh ding khop kuahiam na neih zenzen om leh Toupa’ ngaihdamna na muhna Khros enkik inla, nang hon ngaidamtu pansan in na unau na ngaidamta in ! Na om didan a om khalou, na ngaihtuah ding lou lam ngaihtuah hi zaw kha ding na hi. Ngai in, unaute kituak diamdiam a omkhawm a nak hoih in a nuam mahmah hi. Lu a thau manpha tak, khamul a luangkhia, Aron’ khamul a luangkhia a, a puan-ak tual mong a luangkhia bang ahi. Hermon daitui chim, Zion tangte a ke zel bang ahi. Huai ah Toupa’n vualzawlna thupiak a pia a, tangtawn a hinna ding ngei (Sam 133:1-3). David in, Abraham, Isak leh Jakob suan unaute lak a omkhawmna, kituahna leh kiittuahna bangchik hun in leng kipumkhatna tung a kilamtou gige ding deih thu na gelhkhia hi. Huai unau ki-itna tuh namte siampulian Aron thaunilhna manpha luanglet a Lu a kipan a puan-ak-tual mong a luangkhia khalam vualzawlna masapen bang in a gen hi. Jordan luitui nak Hermon tang a vukkhal tui kang ngeilou toh kizomtuah bang in Unau kituak diamdiam, nak hoih in nuam a manpha mahmah chi hi. Pathian omna Insung leh kingaidam tuah mite omkhawmna inkuan nak hoih in nuam mahmah, David in chi hi. Nang leh na insung mite bangchi bang in na om ua? Neih-le-lam, innmun-lougam thu peuh a kitoutuahna, phuba lak nopna, lungsim sual leh chidamlou neikha i hihleh kisugim sawt maimai hikha ding i hi, ngaidam in. Unaute haw napi a, vak ah ka om chi mi tutan in leng mial ah a om gige hi. A unau haw mi bel mial ah a om a, mial ah a khosa a, mial in a mit a tawtsak ziak in a paina leng a thei thei kei hi (1 Johan 2:9,11). Hiai bang mi bangchi tuk in a buaihuai in bangchi bang manphatna insung adi’n a nei mahmah dia? Mi’n Pathian it chi in a unau haw leh amah zuauthei ahi; a unau a muhsa bawn a it ken, Pathian a muh ngeilouhpi bangchi’n a it thei dia? ( 1 John 4:20). Sanggamte leh unaute ngaidamtu hihchiat sawm zaw ni.

KINGAIDAM THEI INKUANTE’N INSUNG NUAM A NEI:
La phuaktu in, ‘Insung nuam vangam naipen ahi, Pate a di’n lalgam, nute a di’n thupina, tate adi’n Paradise’ chi hi. Insung mite lak a kingaihdamtuahna a vualzoh lai teng insung nuam leh tawldamna mun hi gige ding hi. Tuabang insung lunggulh in delh chiat ni. Laisiangthou in, khelhna, khelhna in thuk kei unla; salhna, salhna in thuk sam kei unla, vualzawl zaw un, Hiai vualzawlna tang ding a sap na hi uh. Gilou nungngatsan in thilhoih hih hen, kituahna zong in delh zel hen chi hi (1 Pet. 3:9,11). Khristian gingtu leh sadan a unau sungkuan khat hihna kia ah leng ginglou mite sang in a kingaidam thei pahpah insungkuante i hihlam mangngilh louh ding ahi. Khenkhatte’n ngaihdamna kitaksap luat man in kipak leh khamuang tak a damsung nite zatna mun ding insung mun haksa leh gamkeu mun suaksak uhi. Insung nuam bawlkhetu in pangchiat ni.

THUKHITNA:
Insung mi kituak mahmah, i muan simte leng thil thupi lou chik, hou maimai a kipan piangkhia – kinakna, kisiatna, kihehsanna, kituahlouhna leh kimelmakna inkuan buai suak thei hi. Setan’ lalgam kekliantu, insung adia siatna leh kinakna tun theite Pa, Nu, tate leh insung mite pang khawm in kingaihdam tuahna lampi ah tonkhawm ni. Hehna leh lungkimlouhna hon bawlsiate Jesu Khrist ah sungkhawm ni. A ngaidam zou teitei Pa, Nu leh tate insung in poimoh hi. Ngaihdam zohlouh khop a thusia a om in zong, Khrist ngaihdamna in zohlouh neilou hi. Simtute Pathian in hon vualzawl chiat hen.