Eph. 6:3; Sam 127:5

Thupatna: Nu-le-pa i leitung pathian ahihman un nu-le-pa zahtak mi Pathian in amah zahtak in pom hi. Tate adia Pathian thupiak poimoh “Toupa ah na nulepate uh thu mang un” chih ahi (Eph. 6:1). Hiaia “Toupa ah” kichi “Toupa na zahtak a, a thupiakte zui a, thumanna hinkhua a na pahtawi bang in” chihna in a lak theih ding hi.

Tulai hun a khovel khantouhna hat mahmah in hon nawkkha in hon tonpih in, apil leh siam zaw kichite’n mimal zalenna uang sem a tangkoupih in, aneu-alian mi khatpeuh hinkhua tung ah midangte’n thu neihkhum theih hilou ahi chih thu tawisang in nei uhi. Hiaiziak tak in, tate thununna dia nu-le-pate’n amau tunga thuneihna neilou bang a kikoih in, tate ah nulepate thumanna taksapna hong lian semsem a, Inkuan sung kivaipuakna kisia leh chimgawp hong tam semsem hi. Khristian Inkuan sung nangawn ah hiai bang siatgawpna muh theih in hong tamta a, poi mahmah ahi chih louhngal i gen theih omlou hi.

Pathian in i Pa ding a hon piak, bangzahta a mawl in, kizen lou in, ginalou in, chitlahna tampi nei mahleh, i Pa ahihman in, zahtak leh pahtawi ding in thupiak khauhtak hon pia hi (Paun. 23:22). Pathian thupiak mang a, Pate zahtakna in gah khamuanhuai thil kipahhuai tampi tun ahi chih Laisiangthou ah chian tak in kimu hi. Tua kia hilou in, tate ading mahmah a zong gah khamuanhuai leh manpha mahmah tun ahihdan Sawltak Paul in Ephesa saptuamte kiang a deihsaktak a ana gen ngiatngiatte kikumkhawm lehang chi i hi!

1. Pate adia vualzawlna donna ahi:
Sam 127:5 ah “… kipak in a zahlak kei uhi” chi in gen hi.

1.1. Pa Kipakte ahi uhi: Tapa pil in Pa kipak a bawl...(Paun.10:1). Tapa in Toupa a zahtak leh a thuman bang a, Pa a zahtak chiang in tapa pil ahi a, Pa lungkim in kipaksak a, Pa chidam, thahat leh khamuang hisak hi.
Pate zahtak lou Tapa hai in a Pa lungtang a na sak a, hehna leh thangpaihna tun in, Pate adi’n kipahna muh ding tawm mahmah hi. Pa hingal a, kipahna ding himhim nei lou a, Inn leh Gam a lungkham a maimialtak a omte tuh Pa zahtak lou tapa thumang lou leh hai neite ahi nak uhi.

1.2. Pa Lungmuangte ahi uhi: Inn leh Gam ah vualzawl in na om ding uh (Diut.28:3,6). Pate zahtak Tate koimun peuh ah – Nasem, Siamsin, Khualzin, et. – a om unleng, Pate lungmuang in tawldam uhi. Inn a om chiang un Pate khamuang ua, gam a a pawt chiang unleng lungmuang veve uhi. Muhphakna leh muhphak louhna mun a a om un zong, Pate tawldam leh navak tak in inn ah ana ihmu hithit thei uhi.
Pate zahtak lou Tate Inn a om chiang un, Pate bit kisa lou in, patau in a galmuang kei ua, dipkua leh lungtang kitamkham in a om uhi. Gam a a vakkhiak chiang un, midangte adia buaina tuntu leh thil hoihlou ahihkhak ding uh lauthawng in, thawmhau in a patau zel uhi. Koipeuh a Tate a om unleng, lungmuanna leh tawldamna a nei kei ua, a chidamna un a thuak loh zel a, khakham vei in genthei tak in a khosa uhi.

1.3. Pa Minhoihte ahi uhi: … a zahlak kei ding uh (Sam 127:5c). Pate zahtak Tate ziak in Pate midangte laka a omkhak chiang un leng, zawn leh hauh ziak hilou in, pil leh hai ziak hisam lou in, tate ziak in midangte’n a zahtak ua, a min hoih uhi. Amau bangmah in kingai kholkei mahle uh, midangte’n ngaisang in pahtawi tak sa uhi.
Pate zahtak lou Tate ziak in, Pate’n minsiat tawpkhawk tuak in, ui ekkhu bang a omna lamlam a mite houlimna leh nuihsan in om uhi. Inn leh gam leh koimun peuh a om mahle uh, zumna a dim in, mite lak a kihel nangawn haksa a sa uhi.

1.4. Pa Navaktak a khosate ahi uhi: … Navak in na om ding (Sam 128:2c). Pate zahtak Ta thumang omna Inkuan sung ah Pate navak tak leh tawldam tak in khosa uhi. Navak in a gen bel, kina-kisual omlou, nekding-takding tasam lou, damlouh-hitan a sukbuai a omlou, kituahlouhna leh kituambawlna omlou, hinkhua tawldam leh nuam gen ahi.
Pate zahtak lou Ta thumang lou omna ah – Inkuan sung ah kinakna, buaina, kivuak leh kisatna om a, ulenau leh insak-inkhang tanpha toh kal ah kitheihsiam louhna, kimelmakna leh kigensiatna om gige hi. Niteng leh hunteng in buaina leh chimtakhuai hinkhua muhtheih in om gige hi.

Pate zahtak Tate tungtawn in Pate’n Salam leh khalam vualzawlna tampi dong uh ahihdan thei in, Pate’n a damsung tomkha ua salam leh khalam a vualzawlna tamsem a donna ding ua Pathian vanzat hi chiat ding in theihtawp suah in Tate’n panla thak ni chiin i kichial hi.

Na nu-le-pate kipak, chidam, nuamsa leh navak hen chih na deihsak taktak leh amaute zahtak in, anuam a haksa ah leng a thu uh mang gige in. Amaute’ thu mang lou a, simmoh leh musit a na om leh, amaute lungkham, mangbang, beidong leh haksa thuak uhen na chihna toh kibang ahih ban ah, Pathian thangpaihna mulkimhuai sapkhiakna ahi behlap ding hi.

2. Tate adia vualzawlna donna ahi:
Ephesate 6:3 ah “… nu-le-pa zahtak/pahtawi thupiak chiam nei masapen ahi …” chi hi. Thupiak zuite adia hamphatna thuchiam ngah ding a chihte, Vangam a tuate poimoh lou ding ahihman in, leitung damsung ading ahi vek hi. Huaiziak in, Pate zahtakna tungtawn a Tate’n Pathian vualzawlna dong a, hamphatna thupi tak tang ding i hihdan phawk manpha mahmah ding ahi, hon chisak hi.

2.1. Damsawtna (Eph. 6:3): Hiaiin a gen tak “lei ah nunnuam in na damsawt ding” chih ahi. “Nunnuam” chih in, buaina, lungkhamna leh lohsapnate nawkbuai a omlou a, lungkim tak leh kipak tak a hinkhua chidam zatna, gen ahi. Lungsim leh hinkhua a kipak gigete chidam ua, damsawt uhi.
Tulai khangthakte lak ah Pate zahtak louhna lian hiaihiai in, tuabang hinkhua in gitlouhna, tatsiatna, thilchin hoihlou chinna, lungsim leh khalam tanpha sukha siatna tun in, naupang chikchik a sih baihna tunta hi.

2.2. Hoih ding: “… huchiin nanga ding in a hoih ding …” (Diut.5:16). Koimun peuh a khosa in, bang nna peuh semta lechin, Pathian vualzawlna leh hoihna in nang hon zui den ding a, mihing adia thilhoih leh hoihpente nang a ahi ding, chi ahi. Hiai in salam leh khalam tanpha a vualzawlnate uap khawm vek hi.
Pate zahtak lou tuailai tampite’n, a omna mun peuh uh, a nasep peuh uleh a thilhih peuh ua lohsapna, buaina leh haksatna tuak in, a kalsuanna lamlam uah nawngkaina leh mavan louhna tuak khanak uhi.

2.3. Min hoihna leh zahtakkaina: “… lu adia lutang zem leh ngawng vial ding khainiang hi ding …” (Paun. 1:9). E.g. Lutang zem leh Ngawngvial chih in – Siamsinna, nektak zonna, chidamna a Pathian leh mihingte deihsakna tang a lohchinna – gen ahi. Lohchinna in manglukhu hon khusak dia, vualzawlna in na ngawng suangmanpha khi in a vial dia, midangte zahtakna hon ngah sak ding ahi, chih hitel dan ahi.
Piankhiakdan a a siam, a neizoute leh a hatte apan piangkhia hinapi, hinkhua hoihlou leh kisia a hing a, gensiatna chituamtum abanban a tuak a, minsiatna tawpkhawk tuak tate tampi ki-omta hi. Tuate ban ah, tate ziak in nu-le-pa tamtakte tanpha in minsiatna leh simmohna tuahloh ua, poi petmah hi.

Nu-le-pa zahtakte tuh damsawtte ahi uh; Damsawtte mi damtheite ahi uh; damtheite tuh nektak hoih leh lim ne zou, damdawi lei zou leh kikem zoute ahi uh; damtheite taksa kithuzohte, kidektheite leh Toupa laute ahi uh; Toupa laute mipil, nu-le-pa zahtaka pahtawite ahi uhi. Hiai gah khamuanhuai tuh sun/zan khat thua neih ahi kei hi. Thupil in, ‘Rome khopi nikhat thu a lamkhit ahi kei’ a chih bang ahi a, a gah lou ding in tuailaite’n pan i la ngap taktak kei hi. Pathian lamet bang a panla ngapte’ ading in lam chiteng ah hoih a, nunnuam in, damsawtna a vualzawl in om uhi.

Mihingte’n i zon leh deih teng – kipahna, navakna, damsawtna leh kiningchinna – kibulphuhna tuh tate’n nu-le-pa zahtakna leh pahtawina ah ahi masapen chih phawk thak lehang chih i deih tuntun hi. Hiaibang hamphatna Pathian in hon deihsak in, tate thupiak hon pia ana hi zaw ahi.

3. Pate zahtak louh a mulkimhuaidan:
3.1. Kuapeuh a Pa nuihsan leh a Nu musit guam Vaakte’n a tawm ding (Paun. 30:17). Inlum a it leh deihthoh tak a kep leh etkol khak dia omlou a, singnuai gammual a kuamah muhphak louh a sih sia a si a, a luang gamsate nek thang a om, sihdan mulkimhuai mahmah a sihna genna ahi.

3.2. Kuapeuh a Nu hiam, a Pa hiam hamsiat, zan khomial penpen a khawnvak hekmit ahi ding (Paun. 20:20). Zan khomial lak ah khawnvak zang lou a mi a pai chiang in, paina ding lampi kichian mu theilou a, guamkuak, singbul-suangbul pawng, lamkawi leh kensia a kipalpuk in buaigawp hi. Hiai bang a hinkhua buaigawp, adik-atang leh asia-apha leng khenkak theilou khop a hinkhua kisegawp leh ngaihtuahna mialgawp mite genna ahi.

3.3. ... Tapa phengphi leh helhat … suang in a denglum ding uh (Diut. 21:18-21). Mosi zang a Pathian Dan thupiak ah tapa thumanglou leh helhat suang a denlup ding himai hi. Pate thu manglou, phengphi leh helhatte Pathian ngaiha a hing taklou ahi ua, si zaw le uh amau adia hoihzaw ding ahi, chih genna ahi.

3.4. Kuapeuh a Nu hiam a Pa hiam vua leh hamsiat sih sak ngeingei ding ahi… (Exod.21:15,17). Nulepate Pathian sikletang a i leitung pathian ahi uhi. Nulepa simmoh a, vua kichi himhim Pathian in amah simmoh a ngai a, a zakdah tawpkhawk thilhih ahi a, hing taklou ahi a, a sih ngeingei ding ahi, chih Pathian thupiak hitel dan ahi.

Nu-le-pa zahtak louhna hinkhua Pathian in nak zakdah lua in, tuabang hinkhua nei mite a thangpaihna mulkimhuai taktak thuak sak hi. A hindan uh kisia in, natna hoihlou chiteng vei in, a kigintak louh sung un, mulkimhuai tak a khansih in pul zungzung uhi.

Thukhitna: Billy Graham in, Pa hoih tuh pahtawi khak louh, phat khak louh, phawk khak louh ahi a, ahihhang in i khotang adia Gou Manpha penpente laka khat ahi, a chih nial vuallouh thudik ahi. Huaiziak in, tukum a Pate Ni i zat lai in, sa leh kha a eite hon kem a, khoilian a hon khotuahtu, i Pate hoihna, itna, thupina leh kipiakna thupidan phawk thak in, pahtawina ni a zang chiat in, i kampau leh hindan ah zahtakna langsak thaknawn in, Pathian thupiak bang in duat tak in kem lehang, i Pathian lungdam mahmah ding hi. Huchiin, i saptuam, inkuan, leh khotang ah kiitna leh kilemna in vaihawm ding a, nu-le-pa leh tate nunnuam, navak leh chidam hi ding hi hang. Hiaibang Pathian vualzawlna tangkhate hithei ding in Tate’n panla thak chiat ni chiin Toupa min in i kichial hi.