Thumasa:

Halleluiah, nunnuam in pahtawi ni, Thangvan Mang Jubili, Bethlehem leh Kalvari tang tung ah, Salsuahna dak a ging, … Sheol nuai a Mansoul khawpi,salsuahna dak ging na za uhiam; Nou ading in Vanmang Vontawi ngei, sisan a kithuam in; Dougal khawpi a sim… a chih bang in i Toupa Jesu’n amah kilhlumtu te’ di’n ngaihdamna a ngetsak a ngaihdamna i tangta hi. Khrist ngaihdamna tang taktak te’n ngaihdamna kichi piakkhiak haksa sa lou uhi. Khelhna a khotsa mihing leh a bukimlou Khovel ah zaw ki-ngaihdamna lou in kalsuanna leh masawnna ding om kei. Kingaihdamna zat zihzeh mai a kul hi (Mt.18:22).

i. Ngaihdamna kingakna :

Ngaihdamna kingakna (base)) tuh tanchinhoih ahi. Pathian in hon ngaihdam tak bang in “kihehpih chiat a lainatna nei in om unla, Pathian in Khrist a nou a hon ngaihdam bang in noumau leng kingaidam tuahchiat un (Eph.4:32) chih ahi.

II. Ngaidam ding a chialna kikoukhia:

Bethlehem leh Kalvari tang tung ah suahtakna dak a gin tak toh kiton in ngaidam dia chialna dak EBC Biakin teng ah a ging hi.

Tukum, EBC biakin teng ah i thupi ahih dungzui in muhlouh ding vual hilou in laimal goltak leh kilawmtak in NGAIHDAMNA chih i takchiat hi. Kingaidam tuahchiat un chi a, maitang a ngaihtak a kikou bang in ka ngaihsun hi. Bangzah in dawnna i peta a ? Bangzah in hiai ngaihdamna i zangkhia in i hamphatpih ta a unau ? Bang kikhekna hon tun a ? Ngaidam ding a chialna leh ngetna ngaihtak a hong kikoukhia pen kum a bei toh kiton in lakkhiak in hong om dia, hon mualliamsan ma in phattuampih in, kingaihdamna in khat-le-khat, pawl-le-pawl kal ah hon sem henla, gahsuang leh i chi petmah hi. Hichitel a chialna thupi ngeingaih keileng bangchi’n ahia ma i suan tak ding ?

III. Ngaihdamna Mihing pianken Hilou:

Khelhna a khotsa mihingte lak ah, ki-saktheihna leh ki-thupisakna te’n ngaihdamna i piakkhiat ding hon dal hi. Ngaihdamna i-ngah, i piakkhiak theihna ding in hiai hon daltu te tualsiah poimoh masa hi. A huchih keileh “Kisaktheihna siatna ma ah a pai a, lungsim ki-uangsak pukna ma ah” Laisiangthou in a chih bang in pukna naichik ah om hi. Mihing pianken lunggel ah ngaihdamna kichi haksa himahleh Pathian hehpihna thilthawnpiak ziak in Toupa’n baihlam a suak sak hi. Amah zui a, Amah min a kilou mi khempeuhte lak ah kingaihdam tuahna a lamen hi. Lemna na kiang uah om hen (Rom.15:33;i Kor.1:3).

IV. Ngaihdam theih louh a poina:

1. Salam ah: Misiam te’n ngaihdam theihlouhna in ‘Stress’(tawlna) hontun in huai stress in Immune system (natna doutu) sukiam in natna khatpeuh piangsak mengmeng in a diak khol in lungtang natna, BP hoihlou, sungna, kingaihsiatna, luna, nungzang na piangsak baih mahmah chi uhi. Mel le-puam suvuai in kilawmna in hon taisan hi.

2. Khalam ah: Khalam chidamna subuaitu khalam hipi (plague) ahi. Hinna ading in Cancer natna ahi, saptuam siatna tuntu leh khalam hinna muihsaktu ahi. Huatna, hehna, thangpaihna in khelhna tamsem piangsak in mihing khat leh khat kal ah, gingtu leh gingtu kal ah, Mi-nam ah, semkhawmte lak ah, inkuan ah, nupa kal ah, huntawk chih neilou in kilang khia hi. Pukna bul ahi. Ngaihdam theihlouhna tuh hun lemtang a phulak utna ahi a, Pathian dinmun tuhna ahi (Heb.10:30). Lohchinna ding daltu leh lungsim mialsaktu ahi.

Kizopna, kichimatna kipawlkhawmnate dalhsak in i lim leh mel – vakna susia in bangmah lou hon suah hi. Muhdahna, huatna, khaatna, ngaihdam theihlouhna tuh mihingte’ salam khalam hinna ah siatgawpna tuntu poizon ahi.

Nelson Mandela suangkul apa’n a pawtkhiak ding kuan in kongkhak bul ah “hiai bukhum a ka omna suangkul apan suakta mahleng, huatna, khatna leh thangpaihna ka nutsiat kei a leh, kei leh kei suangkul a kikhum ka suak hi” chi’n politiks a, a kikhinpite ngaihdamna jail kongkhak bul ah puang malam hi. “Huatna leh thangpaihna tuh zusalou mihing in inek a, zusa ana sidia i gintak toh kibang ahi” (Anne Lamott)

Ngaihdamna in a tuamdam louh huatna, Khatna, thangpaihna tuh nang ading in supna/ bahna ahi. Sutna chiangzum tuan toh kibang in a tehkhin theih mai kei dia hia (Nas.26:14). Ei leh ei poizon kitulh nilouh i hi kha hiam unau!

V. Ngaihdam a manphatna:

Carl Menenger, Psychiatrist minthang in “Psychiatrist ward a omte (lungsim a buaina neite) ngaihdamna pekhia hiam sang ding hiam a na thuzoh (convince) zoh leh huaini mah in 75% (za laka sawmsagih leh nga) damsiang in a kik ding uh a chi hi.

Ngaihdamna in Khrist a ki-unauna a tungding a (2 Cor. 2:7–10), Khalam a ki suksiangna ahi (Jac.5:15,16). Toupa’ ngaihdamna poimoh gige mihingte’n ngaihdamna i ngah theihna ding tuh enleng ngaihdamna i piakkhiak ahi (Neh. 9:17; (Lk. 11:1). Jesu Khrist itna taklatna leh a thu sinsak zuihna ahi (Matt. 5:39-41; 6:14-15; Col. 3:13), Na navakna ding in, nang leh nang ki-itna ziak in ngaidam in. Ngaihdam tuh vuallelhna hilou in Pichinna leh Thupina ahi (Pau.19:11, Rom. 12:20).

VI. Toupa thupiak ahi:

Khatna, thangpaihna, hehna, hanna, gensiatnate leh gitlouhna tengteng tawpsan in om hen. Huan, kihehpih chiat a, lainatna nei in om unla, Pathian in Khrist a nou a hon ngaihdam bang in, noumau leng kingaidam tuahchiat un.

I minam, inkuan leh mimal damna ding in kingaihdamna mun awn ni, kuapeuhmah lah mikhial ngaihdamna tasam ngen i hi ngal a, Toupa’n tua ding in hatna hon pia hen !