Thupatna: Pentecost Day kichi lou a gahmsate latna toh kisai, nidang laia a Moses hun a Judate ankuang luina khawmpi poimoh, kalte ankuang hiam gahmasa ankuang leng ana chih sek uh ahi (Eks 23:16; Num 28:26). Egypt gama paikan belamnou a nekni ua pan ni 50 ni a kibawl khawmpi ahi. Israelte’n Egypt gama paikan ankuang dia belamnou a thah un I Toupa Jesu Pathian belamnou in kalvari khros a hong thuak ding etsakna ahi. Huai ziak in, Bible in “I paikan ankuang luina ding Khrist latkhiak in a omta hi” a chi hi (1Kor 5:7). Pathian thilgel a tangtun theihna ding in Jesu Khrist hong sih hun toh Judate’ paikan ankuang lui hun hong kituak geih hi. Jesu Khrist hong sihna pen khelhna leh sihna vuimangna hiam ahih keileh, haichi lei a akiakna (haichi tuhna) bang in a kigen hi (Jn 12:24). Pentecost Ni pen Judate’n buh min masa a latni uh ahih bang in Jesu Khrist in sisan (sihna) a a leikhiak saptuam dinkhiak patni ahi hi.

Pathian thilhihtheihna tunni ahi: Thukhunthak Pentecost Ni thupina tuh hotdamna a Pathian thahatdan hong kilatna ahi. Nasepte 1:8 ‘thilhihtheihna’ kigen dunamai in a gennop tua thahatna mah ahi. Khelhna thuk pen a saltangte suaktasak thei hotdamna, mikhial phapen leng hondamzou, setan thubawl a khelhna sal a tangte athawn a ngaidam zou hotdamna ahi. Thukhunlui hun a mite’n ana theih ngeilouh uh “mit a muh ngeilouh, mihing lungtang a lut ngeilou, Pathian in Amah itte adia a bawl” tuhun a mite hamphatna ahi (1Kor 2:9). Hiai thil hihtheihna kichi leitung mite theihdan a gamkhat tung a kumpi khat thuneihna bang ahikei, military dictator te thilhihtheihna hiam, mihausaten migentheite tung a thuneihna a neih uh bang ahi kei.

Hiai thilhihtheihna tuh pianken lui deihdan leh lunggulhnate tung a vualzoh theihna thilhihtheihna ahi. Mi ngaihdam zohlouh neilou thilhihtheihna, mi zehuat tentunte ithuai suaksak thei, phuba lak ut giugiau lungput sitheilou pen ngaidamsak thei thilhihtheihna ahi. Insung kitamkhamsa itna toh khuimat thei thilhihtheihna, mou leh tekpi kikal kingaidamsak zou, hun paisa a hon bawlsia (abuse) te ngaidam zou thilhihtheihna, khelhna zongsatte tawpsan zohna thahatna ahi. Tua thilhihtheihna Khrist ah oma huai ziak in, Paul in “A hon hihhatpa Khrist ah thil tengteng ka hihthei hi” a chi hi (Phil 4:13).

Thopna ngahna Ni: Pentecost ni tuh gingtu masate ading in alian lua chih omlou nna gol sepkhiakna dia thopna a ngah ni uh ahi. Aziak tuh Sawltak Paul in “a thohnawnna thilhihtheihna” (Phil 3:10) chi a a gen atak a hong tunna ahi. Khovel muh a phoulak taka hongtunna hi ahihman in saptuam pawl khenkhat in vana kipan ging huihpi nung bang a, leite meikuang bang a kihawm chihte, paudang a hong pau chihte naktak in a gen uang khasek uhi. Bible thugen hoihtak a i ngaihtuah leh Pentecost ni zaw adang hilou in gospel tangkouna leh khamangthang matna dia thopna a ngah ni uh ahi (Nas 2:14, 37, 38, 41).

Tulai in Rocket lian pipite leitual apan akapkhesek uhi. India-te Rocket gik pen hilai GSAT-11 kichi a gikdan kg 5,854 lei a kipan KM 36,000 a sang ah a leng hi. Akigen dan in tuabang rocket thupite a kapkhiak chiang un akim-akiang lei aling dup dup zou a, second khat sung lel in leng a thautui litre asang-asing a kangtumte’n vak thupi leh ging ngaihtak apiangsak uhi. Tuin ngaihtuah mah dih; Rocket kapkhiakna a ging ngaih thupi tak, meivak thupi, leh zinling bang khop a lei ling te pen Rocket kg 5,854 a kikapkhiak ziak ahi. Lei ling leh vakthupi leh ging ngaih takte Rocket kapkhiak in a omsak (impact), India ISRO te lunglutna thil tuamtuam a zat theih ding tua Rocket ahi.

Jesu’n “mangthangte zong a hondam ding in mihing Tapa a hongpai ahi him hi” (Lk 19:10) a chih pen semsuah dia gingtute thopna pe dia Kha Siangthou Pa thilchiam hong tun masakna ah thawm gingte, lei meikuang bang a kihawm te, paudanga paunate a om hi. Sapten cause and effect a chih uh, thil peuhmah a omsaktu leh agah a om bang in, hiai a a omsaktu Kha Siangthou ahi. Hiai Kha in gingtute a hihdim tak in Kha in a pausak bang in a pau chiat ua, Peter in mipi hong taikhawmte kiang ah Tanchin Hoih a gen a, mite lungtang sut bang a na sakna leh pianthakna thupi a tung hi. Pentecost thiltuah thupi pen hiai ahi. Hiai Kha Siangthou na tang ta hia? Kha Siamgthou pen Toupa Jesu nasep ban semkhe ding a hongpai ahihbang in hotdamna toh kisaiin thiltuah thak bang na nei a? Na mimal tektek in Jesu Khrist a ngaihdamna leh hinna thak na tang ta hia? Tua hinna thak pen van gam kai theihna chang chang di hilou, hinna lunglet, midangte kiang a theihpihtu dia hotdam nahi. Tua thiltuah na tuak khata hia? Sa leh sisan deihdan hindan lui apan na suakta ta hia? Saptuam ah chidam taka Toupa gam nasem nahi hia, or zat taktak theihlouh, thumoh bawl sek, Toupa pumpi liamsak sek na hi hia? Na kim-nakiang a khalam bah leh nguite na panpih thei hia? Pathian gam nasepna leh khamangthang matna ah na telkha hia? Kha Siangthou pen hiai i gente nang tungtawn a semkhe dia hong pai ahi.Tua i gente toh kisai gen ding neilou na hihleh Pentecost nang adia tung nailou ahikha ding e, kivel in.

Thukhitna: Tangthu phuahtawm khat sinlai hoihtak nei kigen om hi. Mupi khat a lawmte sang a len hatzaw om hi. Len hatlou zaw mupi khat in tua alenghat mupi haza mahmah in lungkim theilou hi. Nikhat gamvak mi khat tuakkha in “huai mupi leng kapkhe thei lechin ka ut e!” chi hi. Gamvak pa’n thaltanga thuah di mul na neihleh kon kapkhiaksak ding chi hi. Huaitakin mupi in a khamul botkhepah hi. A kap tak in amupi pen sanglen lua ahihman in, kapkha banlou hi. A khamul a boh beh zel a, a kap zel a, a tawp in a khamul tam botkhe lua ahihman in leng thei nawnlou hi. A tawp in Gamvakpa kihei in tua mupi that ziau hi. Hiai mupi gilou bang a mihuatna leh hazatna a dim na hihleh midang adia siatna hilou ding a nang adia siatna hilel ding hi. Tutung Pentecost Day i zat na ah tukum a saptuam thupi ngaihdamna toh suikhawm a poimoh hi. Pentecost pen Pathian ngaihdamna mihing te laka atak taka tangtungsak ding a Kha Siangthou hong tunna ni ahi. Mi dem utna lungsim toh kidim na hi hia? Ngaihdam theihlouh na nei hia? Lungkim thei mahmah lou, hehna selguk na koih khinkhian hia? Zankim-zankhang in na mi muhdah te siatna ding ngaihtuah in ihmu moh in hon bawl hia? Pentecost Kha Siangthou pen hiai melma lauhhuaite apan hon suaktasak ding leh Amah vanzat dia hon zang dia hong pai ahi. Na hinna sungnungpen ah Jesu Khrist vai hawmsak in.