Toupa chitnate ziak a hihmang a omlou in, a lainatna thupitak in zingsang teng a i hinna a thaksak zel ziak in kipahthu gen in Amin thupi pahtawina i pia hi. Munchih mualchih a om Dorka pihte Dorcas’ Day leh Nute Nipini zangte tengteng Hondampa Toupa Jesu Khrist min in itna chibai k’on buk hi.

Kum paisa a hipi leeng ziak in niteng nasepna nawngkai leh biakna tanpha neithei lou a i omdante ngaihtuah kik chiang in hiai bang NI thupi leh kipahhuai, a biik in numeite tantuan zangthei kei mah lehang tukum in Pathian hoihna leh a hehpihna kiningching tak a kepbit a om in, zangthei ding dinmun a hun thoveng tak a hon muhsak ziak in i kipak mahmah hi. Tukum i thupi uh ‘Ngaihdamna’ kichi michih ading a poimoh, ngaihdam a om leh ngaidamtu in amah hinkhua a a hamphatpih leh vualzawlna tamsem a tanna ding a kalbi masapen ahi. Huai ziak in Nu hihna ah inkuan khosakna, nektak bawlna, ta-le-naute kepna, pasalte toh kikepna, insung mite toh kikepna leh sep-le-bawl a mohpuaknate, a nuam leh haksa kihelhtou ngitnget ahihman in, ngaihdamna bawm lian, setheilou, a poimoh hunteng a zang dia mansa a om ding ahi. Tuabang zatkhiak theihna ding in ‘NU, Pathian Ngaihdamna tangkhin’ hih a poimoh ding a, huchi’n ngaihdamna ei hinkhua a ompen pansan in i kisai khakpihte kiang ah langsak thei ding i hi. Ngaihdamna hinkhua i zatkhiak theihna ding munte:

1. Nupa kal a kingaihdamna: Nupa kal kilemtak a om a nop mahmah lai in kilemlouh hun hong om khanak hi. Tampite dikzaw leh hoihbawl zouzaw kisa a kiniamkhiak ding utlouh ziak in nupa tampite kikhenloh in insung keksia in i saptuam leh gamsung pumdim hi. I nupa kal kilemlouhna ziak chituamtuam, midangte ngaihdan a houchik leng hikhathei ahihlai in en thupibawl lua in insung nuamding lai gawtmun suahloh i hihkhak ding pilvan huai mahmah hi. Pasal khenkhatte’n a zite uh toh a kisel khak chiang ua, numeite’n a kidiksakna thu uh hehtak leh aw ngaihdeuh a a gen uh inkim a omte zak di a utlouh man ua, i daihsan leh maban sawn theilou unchin, huchih hunchiang in vualzou kisa in a lungkim uh chi uhi. Numei bangzahhiamte hiai dinmun toh kituak ding in a gintakhuai hi. I Laisiangthou in, ‘Zite aw, Toupa kiang a na kiniamkhiak bang un, noumau pasalte kiang ah kiniamkhiak un. Khrist amah ngei pumpi hondampa hi a, saptuamte lutang a hih mah bang in pasal zi lutang ahi’ (Eph.5:22-23) a chi hi. Pathian mai a thumna tungtawn a biakna i neihchiang in ‘Toupa kei mikhial, a chinglou’ chi in Amah chitna leh hoihna i tante ziak a kingainiam tak in phatna leh biakna i pezel hi. Tuabang a Toupa kiang a kiniamkhiak lungtang bangbang toh pasalte kiang a kiniamkhiak ding chihna ahi. Midangte’n hon theipih batlouh uh i siamdan leh siamlouhdan, fel leh fel louhnate leh i mihinzia tuamtuamte ei nupa kitheitel lua i hihman in, a bawldikthei leh lemthei tuh ei tegel mah i hi chih thei a Khrist in a honngaihdam bang a ngaidam masa ding a lungsim bawl fel pahpah numei/zi hihding tuh nupa kingaihdamna ding a poimoh ahi. Nupa kitheisiam tuah leh kingaidam a omte’n ngaihtuahna chidam, khat-le-khat ki-it in lungsim nuam, insung nuam a hon tun hi. Huai in tuh khatna, hehna leh phubalak utnate, lungsim natnate delhmang in, migitna, thuaktheihna toh, itna a kithuakzou chiat in lemna Kha a kipumkhatna vom chinten a omtheihna honpia hi (Eph.4:2). I numei pih Abigail in a pasal Nabal hihkhelh ziak a a inkuan ua sihna tuak ding a hihlai un, kintak in David ma a kun a khupboh in, ‘Kei mahmah in thulimlouhna ka khu ding … Na sikhanu tatlekna hehpih in ngaidam in’ chi’n ngen hi (1 Sam. 25:22-28). Pathian in Khrist a hon ngaihdamna tangta NU in tua ngaihdamna pansan in a pasal a ngaidam thei ding hi. Huan, ‘Pasalte aw, na zite uh it un’ chih a hinawn hi. Amah zi itpa amah ki-it ahi chih ahih bang in, nupa ki-it tuahna in akal uh lemlou kilemsak a, khat-le-khat kingaihdamna tun hi.

2. Tate toh kal a kingaihdamna: Pathian in vualzawlna tanu tapate honpia a, amaute khalam leh salam a apoimoh uh suktuahsak ding, Toupa deihna bang a Amah thuzohna leh hilhna a kemding a mohpuakna honpiakte i hi. Tuabang a i hong kikep zelna ah ei ngaihdan leh a mau ngaihdan kibatlouh hun omthei zel a, nu-le-pate’n ei hoihsakdan kia a makaih i sawm chiang in amaute toh kal kigamlapi a omtheih ahi. Huchibang hun a omleh a ziak zonkhiak a nu hiam, pa hiam in ngaihdam nget a poimohna mun a pan la in tate toh kal a kilemna bawl pahpah ding thil deihhuai a hi. Kumpi David tapa Absalom, a pa akipan a taimang lai in , kumpipa sikha Joab in ngetna a bawl dungzui in Jerusalem ah pikik in om mahleh Kumpipa’n, “Ama inn ah pai henla, ka mel hong mukei hen” a chi hi (2 Sam. 14:24). Absalom ama inn ah a pai a, kumnih sung vingveng a pa, Kumpipa mel muthei ding in hunlem bawlsak a hikei hi. Maimah aw, khasiathuai petmah ei! A maban utuh, pata kilemlouhna – tapa Absalom in a pa kumpi hihna tuh ut in hong hel a, Kumpi David lunglau mahmah kawm in Jerusalem a pawtkhiaksan maimah ta hi. Hiaite pata bangbang in tulai Khristian inkuan sung a khosa, nu-le-pa thawmhau, tate lah thawmhau, mahni hihna tuak a dik kisa a hinkhua kochiktak a om in, insungkhat a tengkhawm theilou a hunzang tampi ki-om ta hi. Ta in, ‘Pa/Nu, ka hihkhial, honngai dam in chi henla, Pa/Nu in leng, Bawi, ka hihkhial honngaidam in’ kichituah in hihkhial zaw hih kituh le zaw vengpah mai di hiven maw! A thu a gen leh midangte sepkhiak ding a vagenpih tuh thilnuam pi ahi, himahleh ei hinkhua a ataktak a sepkhiak ding ahih chiang in haksa kisa ngoihngoih sek hi. Hun hichibang i tuah hunchiang in, Nu in ngaihdamna bawmlian hong a, kilemloute kilemsak ding, tate hihkhelhnate leng Toupa mai a kiniamkhiak in tate lainat mahmah i hihdan taklang kawm a ngaihdam ding ahi chih mangngilh kei ni. Kumpi Solomon hunlai in nupi nih naungek hing a kituh lai un, ‘Naungek hingpen nu in a ta a lainat mahmah ziak in kumpipa kiang ah, ‘Aw ka toupa, naungek hingpen amah pemai in, that mahmah ken’ a chi hi (1 Kum.3:26). A ta ngeklai khothei nailou a thawn sih tel sang in a nu taklou in a kep ding phalsak zaw hi. Tulai khang a nute’n leng tate lainat mahmah ziak in mualphounate, haksatnate, lungkhamna leh beidotnate hun tamtak a tuak in, lawmte lak leh insak-inkhang kiang a nuihmel pu zoulou in omsek mah lehang Pathian in hon ngaihdamna tungtawn in kingaidam zel hi. Tuabang a ngaihdamna hong om chiang in tate toh kal hong kichimat a insung nuam hongsuak zel hi. Huai ziak in NU hihpihte aw, hatna in i kawng uh gak in, khutte hatsak thak a Khrist a ngaihdamna i tan pen tate tung a a hamphatpih theihna ding un i niteng hinkhua ah langsak ni. Tua hileh mihing gelphaklouh, Pathian in ei muhlouh lam ah a vualzawlna hon tungsak zel ding hi.

3. Insung mite toh kal a ngaihdamna: Innkuan chih kibang kimlou hi. Numeite’n i pasal neihna ah a insung mite toh kilemtak a i omtheihna ding in amau inkuan paidante awl a sin a thunuailut tak a zuithei dia kisin poimoh ding hi. Tuabang a i om theihna ding in amau toh kichimat a lungsim a kiman ding a lunggel masak ding ahi. Tua ban ah mihing ngaihdan kibang gige lou a hihna ah, Pathian in hon ngaihdamna mah pansan a thuman ding haksa i sak hun a leng a hoihzawkna ding ahih nakleh a thu uh zui dia mansa a om in kilem theihna ding lampi zon gige ding ahi. ‘Lemna bawlte a hampha uh; Pathian tate chih ding ahi ngal ua (Mat. 5:9) chi’n Pathian thu in hon hilh hi. Pathian ta hih utlou kuamah lah i om ngal kei ua. Numei khat ziak a teekpi leh sanggamte toh kina, kisel a om in, khat in thilhoih gen mahleh lakawi teitei a inkuan dalhzak a tengkhawm theilou tampi i khotang ah omta hi. Phetlou in nupa ta nih-le-thum bang neita hialte leng kikhen in tagah loudingte tagahsak in inkuan lungkham huai pipi kitam ta hi. Pathian ngaihdamna tangta NU i hihna ah, i pasal’ nu-le-pate leh a sanggamte ading a mou hoih, tate ading a nu hoih, Pasal ading a Lallukhu hithei ding in pan lathak le a uthuai mahmah hi. I niteng khosak khawmna ah ngaihdan kibatlouh hun a omtham ding, himahleh Pathian hon itna ngaihtuah thak in Laisiangthou in hon hilh thute zui a i hinkhua a semkhe ding in pang ni. Na lei tuh gilou lak ah veng hoih inla, na muk khemna thu genlou ding in veng hoih in. Gilou paisan inla, thilhoih hih in; lemna zong inla, a delh in delh in (Sam 34:13-14). A nuam leh haksatna mun a leng insung mite ading a hoihna leh vualzawlna tuntu, sepkhelh bawlkhelh a neih ua leng ngaidam gige ding a lungsim kithuzoh ding tuh nu nasep thupi a hih ding a hi. Sawltak Paul in Timothy kiang a, ‘…kuapeuh in amah mite ading a ngaihtuah sak kei a, a ma inkuante kholhouh a ngaihtuahsak kei leh, ginna a zuausan a, gingloumi sang in a gilou zaw hi (1 Tim.5:8) a na chi hi. Ginna kiptak a len tinten Khristian gingtute insung mite toh kal a kilemna leh ngaihdamna tuntu hih sawm ni.

4. Thukhitna: Joseph a unaute’n a tung a thil hoihlou tungsak in, lungsim gilou pu in zuak mang mahle uh, a hihkhelhna uah thuklou in ngaidam hi. Ama’n a unaute kiang ah, ‘Nou zaw ka tung ah thil gilou hih lungsim na pu ua; himahleh tuni in mi tampi hing leh dam a humbitna dia thilhoih suahsak Pathian lungsim ahi. Huai ziak in, tuin lau kei un. Nou leh na ta neu chikchikte uh ka honvak ding’ chi a lungmuan in kamsiam tak in a houpih hi (Gen.50:20). Pathian ngaihdamna Joseph in tang lou hileh zaw… phuba lak theihna hun fuh mah hiven! Pathian in Khrist Jesu a ngaihdamna hon bawlsakta, Amah a om lungput kilainatna leh hehpihna tungtawn in nupa kal ah, tate toh kal ah leh insung mite toh kal ah manphatak in zangkhe chiat ni. La hoih leh dik mahmah, a sak leng nuam, a chiam khate adia khiaklahhuai tuh, ‘Leitung a vangam nopdan a nai penpen, tuh insung kituak a tenkhawm ahi’ chih la ahi. Hiaibang insung a omding leh a chiamkha i hihtheihna ding in kingaihdamtuah louh ngal a lampi dang omlou hi. Kingaihdamtuahna hinkhua zangkhethei chiat ding in Toupa’n abiik in NUTE leh simtute hon vualzawl hen.