Paul in “Pathian vangletna” ana chih huai Tangthupha i na muhna kum 111 bang ching theita a, hiai kumte sung in muhtheih leh muhtheihlouh in Pathian vangletna in kikhekna gensenglouh hon tun hi. May 7 pen Tanchinhoih honglut ni a chiamteh in “Missionary Day” chi a i zat bang in, Missionary Day chibai ka hon buk hi! Hiai Tanchinhoih zatu leh hamphatpihtu hihna ban ah pesawntu hithei ding a Toupa’n hamphatna a hon piak man in i kipak mahmah hi. Maban zel ah mengmuhna toh sep ding i sawm bang in Toupa hon pina hi a thei in 2030 tan a i tangtun ding a ngimte hiai bang in i taklang hi.

BACKGROUND: Pathian hon pina dingzui in saptuam sung a mission lunglutna chi kituh baih mahmah hi a theih ahi. Saptuam in convention dan a pangkhawm a mission i sepkhawm ma in mimal ban ah tualsung saptuamte kalsuanna chiamteh ding na omkhinta hi. Hiai bang a hong paitou zel in 1967 a Hiangtam Lamka Tualsung Saptuam in unau Meiteite lak a kalsuanna a neih uh, saptuam khawmpi in 1968 a pompihna a neih toh kiton in pangkhawm in convention in hiai nna i na sem pan hi. Hiai hun toh tu kikal in Pathian ompihna toh saptuam mi tampite’n tha leh zung ban ah sum leh pai tampi na seng in tuni dong i sem zom thei hi.

KIBULPHUHNA THUBULTE: Mission nasepna pen saptuam mite thusawm mai hilou in saptuam neitu Toupa Jesu Khrist in sep ngeingei dia hon Nagot Thupi “Kuan unla, namchih apan nungzuite bawl un” chih kithalawptak a thumanna ahi. Huai dungzui in saptuam in i tup-le-ngim ah hiai bang i nei hi [Kiphuhkhiakna dante 2005, Article 3.2.]. “Saptuam tup leh ngim khatna Tanchinhoih puanzakna nasep ahi. Tua nasep tualsung ban ah kim-le-kiang leh leitung a namte lak a Khrist Tanchinhoih puanzakna ahi. A biik in, leitung a namte lak a Tanchinhoih puanzakna (Global Missions) pen pangkhawm a napi a neih ding ahi.” A omdan ahihleh, ei tualsung saptuamte’n pangkhawm a napi a neih ding in Saptuam neitu Jesu’n “Nagotna Thupi” a hon piak leitung a namte lak a Tanchinhoih puanzakna (Global Missions) pen pom a nei saptuam i hi hi.

Hiai pen kichian sem a i neih theih nang in, Kibulphuhna Thubul Genkhiatna (Policy Statement) hoihtak hiai bang heutu masate’n na gelhkhia uhi. Mengmuhna [Vision]: Jesu Nagotna Thupi sepkhiakna ding a Tanchinhoih gen a, Mission field a amah khe a ding thei Missional Saptuam phuhkhiak ding. Tup Genkhiatna [Mission Statement]: Saptuamte missions a kihel ding, Field thak zong ding, a thum ding, a thoh ding, a kuan ding zong a Saptuam bing leh partnership hihhat ding. Poimohngaih Pen [Core Value]: Mission nasepna ah kha mangthangte Jesu Khrist kiang a pi sang a poimohzaw thildang a om kei chih ka gingta uhi.

Atung a kigen bang i tangtunna dia i kalsuanna ah hiai paidante neih ding missions manual leh field handbook-te ah i nei hi. (a) Missions lungputnei sawltu saptuamte [Missional Sending Churches] hih ding: EBC tualsung saptuamte theihpihtu hi ding, mi sawlkhe ding, thumsak ding leh thilpiak a nasepna phungvuh dia tokthou ding. (b) Leitung pumpi mission – a zalou/zatawmte lak a nasepna [Global Missions – Reaching the Least Reached] sep ding: Laisiangthou a Paul gen bang a, “midang suangphum tung a lem ka hihlouhna ding in, Tanchinhoih Khrist min lohkhitna mun a genlou in” (Rom 15:20) chih toh kituak a kalsuan ding. (c) Laisiangthou sinsakna sung ah, a mite tawndan dungzui leh amau khe a ding theih dia saptuam phuhna [Contextual, Indigenous and Biblical Church Planting]: Field mun a nasepna ah leh saptuam dintheihnate ah sepna mite’ tualsuak thilte zahtak kawm leh Bible sinsakna toh kituak a sep ding (Contextualization). Tualsuak saptuamte mahni khe ading a- amau a kimakaihthei, amau a kichawmthei, amau a gensawnthei ahih ding uh (Indigenization) chih ahi. Huaite ban ah, saptuam pen Bible sinsakna bang a Pathian bia, Kithuahkhawm, Khamangthang man, Khrist sinsaknate a nungzui bawl leh Nna hoihte sem ahih ding ahi (Biblical). (d) Sikha-makaihna leh semtu kikepna [Servanthood Leadership and Member Care] neih ding: Laisiangthou sinsakna bang kimakaihna zui a sikha lungput toh kipi ding (1 Pet 5: 1-4). Nasep pen hoihtak leh gahsuang dia a paitouhzel na ding a, semtute thopna, taksap awnghukna leh thapiakna paitoutou a neih ding. (e) Mi toh sepkhawmna chidam leh phatuam [Sound and Synergic Partnership] neih ding: Ginna a kinaihpih saptuam leh pawl tuamtuamte toh zazaw leh gahsuangzaw ding a pangkhawm a kithuahkhawm ding ahi.

TULEL A I LOUTE DINMUN: Mission i sepna a heutu masate kalsuanna Toupa’n vualzawl a, tuni tan in i loumunte lak ah a lianpha i neih thum matun a, intuan thei ding dinmun a om i hihman in kipahhuai i sa hi. Karbi Anglong Mission Field pen 1977 a i pat kum 43 bang i sep nung in 2020 kumbul in intuanna i neitheita hi. I zakkik dan in saptuam in kiamlam hilou in punlam nawt ua kipahhuai mahmah hi. Manipur Field leng tua bang ding in 2021 apan lemgelna nei in, kum 62 bang i sep nung chiang in kum 2029 in MEBC min a intuanna neih ding chih ahi. Tuabang mah in, Nepal missions field ah kum 48 bang i sep nung chiang in, i sepna sate, a biik in Nepal simlam a omte kum 2030 chiang a NEBC min a intuan ding chih ahi. Toupa hon makaihna toh tuate intuanna i neihtheih chiang in, i loute amun, alim leh mel kikheng mahmah ding a, tua dungzui in i sepdan leng kikheng lou theilou ding hi. I saptuam in hun paisa a Mission 2020 chi a i na neihte leh i tulel dinmun ban ah Toupa hon makaihdan enkawm in, maban ding mukhol a Toupa leh a Thuchiam muanna toh lemgelna nei a kalsuan ding pen a-lou-theilou hi in a ngaihtuah theih hi.

MISSION 2030 VISION: Hiaite a chiangzaw in EBC Mission Manual ah Road Map toh kikoih hi.

KALSUANNA MASATE: Mission 2030 taksuahna ding in a kum sim a kalsuan ding om a, tuate ban ah kum hiai tan i sepna apan i sinkhiat, i field dinmun kikheng tampi om ziak leh maban etna a kalsuan masa tukum 2020 a kineilel leh kinei dingte i taklang ding hi. (a) Mission Manual leh Field Handbook: Mission nasepna a pilpi a i kipuakna ding vai deih dia kibawlsa Manual puahthakna neih ahi. Tua bang in 2006 a heutu masate na bawl loumun a kimakaihna leh sepna ding a poimoh Handbook leng puahthakna kineita hi. Hiai dungzui in, ni dang a i na hihdansa kikheng om a, hiai in inlam a saptuamte leh field mun a semtu leh saptuamte hon sukkhakna om ding hi. (b) Mission Thilpiak Hihdan Thak: Hiai pangkhawm a napi i sepna ah tup kikhat, ngim tumta leh sep sawm dan kichian nei a sep i sawm dungzui in, mission fund hihdan leng a kikheng om hi. Tua ding in, i saptuam’ mission nasepna ding a i kaihkhawm mission fund tuamtuamte i piakkhawm dan kibang loulua, a khen in 20% vel sunglut i om lai a 100% sunglut bang om chih pen zetang in 90% sunglut ding chi in EBC Kumsim Khawmpi in thupukna bawl hi. I saptuam in nasep tuamtuam i neihte leh tuate sepna ding a committee leh thilpiak i kaihkhawmte lak ah, a dang teng i tualsung saptuam a mite adia a kizang/ding ahih lai in i “napi” mission adia i bil-at pen leitung a namte lak a Tanchinhoih puanzakna (Global Missions) ding leh hiai nasepna hatsakna ding a zek ding i thiltup ahi hi. A tak gam ah, hiai napi i sepna ding a i zek zah, tualsung, division leh headquarters ah gawmkhawm in tuat leng 18% vel i napi adia kizek hi ding a, a dangteng eisung a i zek hikha ding in a tuattheih hi. Headquarters a i sunkhawm kia i et in leng 21% val zek hi. Sum lou ah en leng, committee i kilepdan leh i thapiak dan ah tehtheih hileh mission adia i senna per cent tawmzaw lai kha ding hi. Missional lungput kichi “ei sang a midangte masa zaw a koih theihna” [Phil 2:4-7] chih thudik ahihleh mission a i kalsuan behna ding leng omlai kha ding hi. (c) Guwahati Mission Centre: Maban a i loute omna mun leh missionaryte kikawmtuahna ding (international tel in) etna in “the gateway of North East India” chih a om Guwahati (Airport kim) ah i saptuam mite tungtawn a Pathian vualzawlna hong luanglut pansan in bigha nih a lian mun i lei hi. Hiai mun pen missions nasepna zazaw ban ah kikepna leh kivaipuakna lemtangzaw ding gelna ahih bang in Pathian in i poimohna thei a nikum 2020 pandemic ziak a ngeina dan a sum i zattheihlouh lai a, ngeina sang a tamzaw a lamdangpi a hon vualzawlna a hon piina leng a chih theih ding hi. 2020-21 sumkum ah missions thilpiak (project-based fund toh sim in) 14.5% in khangzou hi! Toupa’n a ginomna leh a muanhuaina hon chiansak hi! (d) Missionary thak lakna: EBC field a sem ding missionary thak ding in mi nga screening masa ah paisuak in intern missionary dan training (NECTAR leh OTI) leh field exposure in pai uhi. Amaute: Kaisuanlal, Nangsonlian, Lianbiakmawi, Jamkhanlian leh Ginkhanjam. WEC toh partnership a associate missionary a kuan ding mi 20 vel September 2021 a WEC tawn a lakna neih ding a ngimna leng i nei hi. (e) EBC Field Thak: Tulel a Himalayan Mission Field nuai a i sepna Sikkim leng field piching ding a ngim ahi. I sepna West Sikkim District ban ah, East Sikkim a survey i bawlna lak ah Pakyong ah i lut panta hi. Nepal sung ah leng suahlam pang a i sepna ban ah Nepal lai-lam ah field thak ding survey kibawlte lak ah Gaur ah i lutta a, Kapilavastu ah leng lut pahta ding a ngaihtuah ahi. Tualou in, North East India ah leng Assam a district thum ah louma thum i panta hi- Goalpara, Dima Hasao leh Hojai ah. (f) Partnership and Collaboration: Mission nasepna ah sepkhawmpih hoihtaktak Toupa’n hon pia hi. Tuate lak ah, Tangsa Baptist Churches Association (TBCA) toh sepkhawmna 1986 a kipan, 2006 apan hunchiam nei a i sepkhawmna pen March 2021 ban kisunzom nawnlou hi. Amaute lak a evangelist 2-4 chawmna i piaktouh zel ban ah, school nasepna leh music nasepna a i kalsuanna pen matun dan nei a kithei i hi hi. India sung ah: FMPB, IEM, MVM; International ah: OMF, WEC, SIM ahi deuh hi. Ei sang a pawl dan a paidan kiphutkip zaw leh mission nasepna zatak a semte ban ah, a bik in i saptuam mite malakna, ei panpih poimoh omtheite khualna in Collaboration a sepkhawm theihna kong leng kihong thak hi. I saptuam mi missions nasem a pawl dang a kuante leng hanthawnna piak a, a poimoh bang a kithapiakna neih ding a ngim ahi. (g) Urban Missions: Hiai pen pandemic ziak in kalsuanna taktak omthei kei mahleh, a lemtang hun a malakna neih ding a tuat ahi. Abik in, nekzonna dohkan pulpit a zang ding leh hih peuhmah Jesu min a hihna tungtawn a mission nasepna lam sukha ding a kalsuan poimoh sak ahi. (h) Missions hatsakna leh Mission-Tuailai 2020: Mission toh kisai paidan thak field lam leh inn lam sukha, indigenization project, manual, handbook, sumvai, missionary lakna, tent-making leh thumna tan a hatsakna ding in kalsuanna tuamtuam nei in, Mission-Tuailai 2020 December 7-10, 2021 sung a kinei ding ah khaikhawm sawm ahi.

Hiai bang tangtunna ding a kisakkholhna, kalsuanna leh gahsuanna peuhmah buhnei pa thuthu ahi a, aman ngen un a chih bang in i nget ding poimoh hi. Thumna ah lan in, aman mihingte zang a sem a huai dia EBC leng hamphatna hon pia ahih bang in amah muanna leh a pina en gige kawm in theihtawp suah in sem ni.