THUMAPI:
Khristian thugin kibulphuhna tengteng lak ah Toupa Jesu Khrist thohnawnna thu sang a doudalna khauhzaw om lou ding hi. Toupa Jesu Khrist thohnawnna thu selmang na ding in dangka kizang in ahinna ua ding a lauhuai tanpha in zuau thu phuaktawm ua, thu diktak thei zenpi zuau gen teitei ding a hanchiam pawl om hial hi. Hiai ten thohnawnna bangchitel a poimoh a, melma Satan ading a bangchi tel a huathuai hi hiam chih hon ngaihtuahsak hi.
JESU KHRIST THOHNAWN SELSAWMTE:
Toupa Jesu Khrist A thohnawn phet in athohnawnna selmang dia panlakna kipan ngal hi. Hiai selmang nading ah sepaihte, siampu liante leh upate kigolh in apoimoh zahzah dangka leh zuau bawl ding in thukimna bawl uhi (Matt. 28:11-15). Hichibang sepkhiakna ding in zuau tampi kigen a, huaite lak ah tamlou anuai a bang ahi.
1. Han theikhial uhi: Jesu Khrist a sih khit in kros a kilhlup a omte paihna guamkuak ah a luang pai ua, han vaveh chiten leng atheihkhelh uh ahi chi pawl om uhi. Himahleh Laisiangthou in Joseph Arimathai in a luang puan malngat a tuam in, ama hanthak suangkhuak kuak ah sial in Mari te han mazawn ah tu uh chih leh sepaihten a han veng uh chih chiangtak in kigelh hi (Matt. 27:57-61, 66).
2. Nungzuiten a luang va gu uhi: Matthai 28:13-15 ah ka ihmut kal un nungzuiten a luang hong gukhia uh chi ding in dangka in ki leikhia uhi. Himahleh Rome sepaih atawmpen a mi 16 ten aven uh hansuang sel 1500-2000 vel a gik aguk a khukkhiak vual hilou hi. Sepaihte a duty lai un ihmu le uh hallup hiding ahihman un ihmut ngam ding vual hilou hi.
3. Sibup lel ahi: Khenkhat in Jesu tuh a si hilou in sibup lel ahi a, hankhuk a a sial khit ua halhkhia in Amah a paikhia ahi chi uhi. Himahleh Athohnawn in nungzuite kia hilou in vengmi sepaih ten leng thei ua, a sibup leng sepaihte hizaw uhi (Matt. 28:4, 14).
4. Khalam thohnawnna lel ahi: Jesu Khris salam a thounawn hilou in khalam a tunung chiang a thounawn ding hizaw in A taksa bel muatmang ahi chipawl leng om uhi. Himahleh athohnawn nung in mitampi kiang ah ni 40 sung kilak khin ahihman in athugen uh diklou hi (Nas. 1:3).
5. Khonung phuahtawm ahi: Mi khenkhat in Jesu Khrist thohnawnna belhchian dawllou thu phuahtawm, Jesu Khrist sihnung hun sawtpi a ki khonung gen ahi chipawl om uhi. Himahleh a sih nung hun sawtlou chik in Dr Luke in ni 40 sung mi tuamtuam kiang ah kilak chi a, Paul in leng AD 56 vel in Amah mu mi 500 val om ahihdan gen khin hi (Nas.1:3; 1Kor.15:6).
JESU KHRIST THOHNAWN POIMOHNA:
Saptuam thugin dangteng sang a bangziak a Toupa Jesu Khrist thohkikna huchi tel a Melma in zadah ahi dia? Aziak gensenglouh a tam omte lak ah apoimoh mahmah bangzah hiam hiaite ahi.
1. Saptuam Kiphutkhia: Lei ah hen theihna leh khah theihna, van-gam chabi leh misi khokulh kongkhak zou ding thilhihtheihna nei Saptuam i Toupa Jesu Khrist thohnawnna suangphum pansan a lamkhiak ahi. Thohnawnna thu sermon masa pen in Saptuamte mi 3000 bang in kibehlap ngal uhi (Nas.2:14-47).
2. Nipini Biakna: Juda kulmutten Sabbath ni a biakna a neih uh Toupa Jesu Khrist thohnawn lopna in nipikal a ni masa a khek in om hi. Josh McDowell in “Jesu Khrist thohnawnna loungal kum khat a 52 vei kilawm ka thei ngeikei” chi in gen hi (Nas. 20:7).
3. Saptuam Thusehte: Toupa Jesu Khrist i khelhnate ziak a asihna, i thulimlouhnate toh vuikhop a om, leh i siamtanna ding a kaithoh in om hi. Saptuam Thuseh Baptisma leh Toupa Nitak annkuangte alangtang a thohnawnna puankhiakna leng ahi (Rom.4:25; 5:4; 1Kor.15:3-4).
4. Hinna Kikheng: Thohnawnna thilhihtheihna leh thohnawn lametna ziak in Jesu Khrist nungzui dawilok mahmahte kikheng in sihtanpha a hangsan in Toupa gum ngam uhi. Tuni tan in leng gingtuten thohnawn lametna ziak in Toupa Jesu Khris gum in sihpih lai hi (Matt.26:56; Mk. 14:50, 66-72; Jh. 18:25-27; 20:19; Nas. 4:13-21).
5. Gingtu Hinkhua adia Suangphum ahi: Toupa Jesu Khrist thohkikna tuh gingtute adia suangphum poimoh mahmah ahi (1Kor. 15:12-19). Thohnawnna ziak in i thugen leh ginna in gen nei a (v14); khelhna apan suahtakna (v17); leh lametna hing honpetu ahi (v19).
6. Adam Hihkhelhte Bawldikna: Adam khelhna ziak a si ten Khrist thohnawnna ziak in hinna nei ding uhi. Melma Satan tung a alangtang a vualzoh puankhiakna ahih ban ah melma nunung, sihna, leng thohnawnna ziak in hihmang in om ding hi (1Kor. 15: 22, 26).
7. Lei Sapum apan Van Sapum a Khekna: Toupa Jesu Khrist thohnawnna ziak in lei sapum apan van pumpi luahtheihna hamphatna kinei hi. Huai tuh – muatthei apan muat theilou, pahtawilouh apan thupina, hatlou apan thilhihtheihna, leh sapumpi apan kha pumpi luahtheihna ding kong honna ahi (1Kor. 15:40-44).
THUKHUPNA:
Toupa Jesu Khrist thohnawnna tuh alangtang a melma tung ah vualzohna puankhiakna ahihman in melmapa Satan ading in azakdah huai pen leh ei gingtute ading in thukipahhuai pen hong suak hi. Huaiziak in Toupa Jesu Khrist thohnawnni apan tuni tan in hiai thohnawnna leh thohnawnna lametna melma in atheihtawp suah in dal gige hi. Thohnawnna thilhihtheihna nei mite misi khua nasan in dalzoulou leh su lungnem zoulou ahihman in gingtute hatna thuguk tuh thohnawnna lametna neih ahi. Thohnawnna thilhihtheihna in nang hon lawngkha ta hia, ahihkei leh athilhihtheihna mubanlou in akim-le-kiang buaipih maimai na hi hia?
EASTER SUNDAY MESSAGE