“I tatlekna tengteng hon ngaidam a, batna lai thupiak a gelh i tung ua om eimah hondou gige a nulmangta hi. Huai ngei kros a kilhlum in a lamangta hi” (Kol 2:14).

I. THUPATNA

Amasa in buai theihna khovel lak ah damna hon pia Pa Pathian min ka phat hi. Message gelh dia deihsakna hon pia heutute leh Pa Pathian tung ah kipah thu ka gen hi. I thupi uh, “Ngaihdamna” kichi i Laisiangthou sung ah thumal poimoh mahmah khat ahi. Ngaihdamna kichi bang hiam a kisiat hun, kituah louh hun, ngaihdan kibat louh hun, leh muhdan/deihdan ki batlouh hun chiang a zat ding ahi. Pathian in a Tapa Jesu Khrist tungtawn in kros ah ngaihdamna thupitak hon bawlsak a, eiten sihna a kipan tangtawn hinna i ngah uhi. Pathian in itna lianpi toh a hon ngaihdam tak bang in eite leng khat leh khat kingaidam tuah ding a sinsak in i om uhi. Huai mah i Khristian hinkhua a manphatna ahi. Ngaihdamna toh kisai anuai a bang in saulou in ensuk ni —

II. JESU KHRIST TUNGTAWN A NGAIHDAMNA

1. Pathian toh Kilemna

Huan kros ziak a nihte pumpi khat a Pathian toh hon kilemsakna ding in kimelmakna a hihbeita, (Eph 2:16). I Laisiangthou in ngaihdamna toh kisai a hon sinsak, etton ding tampi i nei hi. Jesu Khrist kros ah khai a a om lai in, miten si ding a mohtansak in, theihpihtu dik lou a pang in, amah thatsak ding in kikou mahle uh, Pathian Tapa Toupa Jesu khelhna neilou, si ding a kros a a kikhai lai in, “Pa, amau ngaidam in; a thilhih uh a theikei ua ahi,” chiin ngaihdam ngetsak hi (Lk 23:34).

Kros tung a kikhai Toupa Jesu ngaihtuah mah dih! Huchi a a kikou lai in leng, kuamah kisik lou ua, mipiten nuihsan ua, hamsiat ua, nuihza bawl zaw mah uhi. Israelte kumpi, kros apan amah leh amah ki hondam ding in enghou uhi. Pilate in a khut silsiang hi. A sih in, Juda makaite leh amah thattute kipak uhi. Kuamah in ka hihkhial chi lou uhi. Himahleh, i Toupa Jesu Khrist mah in kros tung ah amaute a ding in ngaihdam ngetsak hi. A kros sisan a lemna na bawl in amah ah bangkim amah toh a kilemsak hi, (Kol 1:20).

Melma i hihlai a bawn a Tapa sihna ziak a Pathian toh na kitam khin i hih ngal un tuh, kitam a i omkhit nung un a hinna ziak in hotdam in i omsem ding uhi. Huchi kia leng ahi kei a, kitamna tua hon musakpa i Toupa Jesu Khrist ziak in Pathian ah leng i kipak ahi (Rom 5:10, 11). Himahleh bangkim Pathian kiang akipan a pawt ahi a; aman Khrist ziak in amah toh kituak in hon bawl a kituahna nasepna a honpia hi; Huchi in Pathian in Khrist ah khovel amah toh kituaknawn in a bawl a, a tatleknate uh tatlekna a sehsak lou in, kituahnawnna thu hon kemsak ahi (2Korinth 5: 18,19). Huai ziak in Pathian toh kilem in i omta hi. Toupa min phat in om hen.

2. Mihinpihte toh Kilemna

I Laisiangthou in “Kuapeuh in kua tung ah leng thubuai nei hile uchin, kithuakzou chiat un, kingaidam tuah unla Toupa’n a hon ngaihdam tak bang in kingaidam tuah chiat un,” (Kol 3:13). Mi a tatleknate uh na ngaihdam uleh, na Pa uh van a om in leng a hon ngaidam sam ding hi. Himahleh mite tatleknate na ngaihdam kei ngal un, na Pa un na tatleknate uh a ngaidam sam kei ding hi, (Mat 6: 14-15). Ni khat Peter in Jesu kiang ah bangzahvei ahia ka tung ua khialte ka ngaihdam ding uh (Mat 18:21-35) chiin dong hi. Jesu in,”Sawm sagih mun sagih vei,” chi hi. Huai tuh khelhna tampi leh lungsim suna tampite ngaihdam theihna ahi.

Hiai hih hihtheihlouh di bang mah leh i Toupa Jesu’n “Ngaidam un, huchi in ngaihdam in na om ding uh,” chi hi (Luke 6:37c). Phil 2:3, 4 in “Kikhenna ding leh kithupisakna ziak in bangmah hih kei un; lungsim niamlak in michih in amah sang in midang hoihsa zaw hen. Na lak uah kuapeuh in amah ading kia enlou in, midang a leng en sam hen,” chiin hon sinsak hi.

Hiai lai ka gelh lai in, lungsim a hong lang mahmah tuh, migitna a hi. Mi khenkhatte a ding in, midangten na tung a thil a hihte ziak a naktak a sukliam khak a om, hon dou ua, dikloupi a gensiatna, nawlkhinna, engbawlna, haibawlna, kizahlaksakna, maban ding dal theih zah a dalna bang leng na thuak kha thei. Hiaite i thuakzohna ding in eiten i lungsim i khauhsak zel uhi. Himahleh huai khauh pai in aw nem tak a Kha Siangthou houpihna zak haksa i sa hi. A aw i zak theihna ding in lungsim nem tak a migitna i poimoh kha thei hi. Mark Twain in, “Ngaihdamna kichi thilnamtui a kigawizan dimdem chiang a hong namkhia toh kibang ahi,” chi hi.

Sawltak Paul in: “Huan kihehpih chiat a lainatna nei in om unla, Pathian in Khrist-a nou a hon ngaihdam bang in, noumau leng kingaidam tuahchiat un,” (Eph 4:32). Peter in (ngaihdamna manphatna theichiang mahmah) a laithon masa ah hichiin na gen hi, “Bang dang teng sang in phatuamngai tak in ki-ittuah chiat unla; itna in gilou tampi a khuhzel hi,” (1Pet 4:8). Ei Jesu nungzuiten hiai bang lungsim i nei thei ding uam? Ei hon su na, zahlak sak, hon engbawl leh hon simmohte tung a ngaihdamna i ngetsak sak ding ahi. Ken Sande in a laibu “Peacemaker: A Biblical Guide to Resolving Personal Conflict,” ah “Khovel ah khristiante ngaihdamna ngahtam pente ahih ziak un midang ngaihdam theihna nei tampen a hih ding uh ahi,” chi hi.

3. Ngaidam ding a sapte i hi uh.

“Huai ziak in noute sap a na omna utoh kikhom a khosa ding in kei Toupa a hentapa in k’on ngen hi. Kingaihniamna leh migitna tengteng, thuaktheihna toh, itna a kithuakzou chiat in, Lemna Kha a kipumkhatna vom chinten ding in,” (Eph 4:1-3).

Kingaihniamna kichi kiletsakna toh kilehbul a hih dungzui in ngaihdamna lungtang i neih theihna ding a poimoh mahmah ahi. I tung a giloute i ngaihdam theihna ding in migitna lungtang i neih poimoh hi. Hon khemtute tung ah ngaihdamna i neih theihna ding in thuaktheihna poimoh hi. Itna a i kithuakzoh chiatna ding in midangte khelhnate ngaihdam theihna poimoh nawn hi. Lemna kha kipumkhatna i vom chinten theihna ding in ngaihdamna lungtang mah poimoh gige hi.

Hiai apan lungsim put ding thum: Kingaihniamna, migitna leh thuaktheihna ahi. Hiai tungtawn a i sepkhiak dia poimoh nihte: gospel toh kizui a kithuakzou tuah chiat ding leh kipumkhatna vom chinten ding chih ahi. Eite ngaihdam khit a i om mah bang in, ngaihdamna i neih ngeingei ding ahi. Toupan a hon ngaihdam tak bang in kingaidam tuah chiat ni. Kingaihdamna in Khrist kros lam sulang thak nawn zelzel ahihman in manpha mahmah hi. Kros lam etkikna in midang ngaihdam theihna hon pe thei a, kros ah, a ngaihdamna thupi i mu thei hi. Huai ngaihdamna eiten leng midangte tung a zang ding a sap i hi uh. I ngaihdam ding ahi, “Pathian in eite hon ngaihdam bang in, Pathian hon ngaihdam khit zahzah in, eiten leng i ngaihdam poimoh hi. Ngaihdamna nei ding a sap i hihna mangngilh kei ni.

III. THUKHITNA

Ngaihdamna kichi Khristian hinkhua zatna a optional dan hilou ahi. Gingtu i hihna ah poimoh mahmah hi. Toupa Jesu zuiten, ngaihdamna i nei ngeingei ding ahi. Pathian in hon ngaihdam tak bang in eiten leng a taktak a ngaihdamna i neih ngeingei ding ahi. Hehpihna lianpi a hotdamna/ngaihdamna i tan mah bang a eiten leng midang ngaihdamna i neih kul hi. Toupa Jesu thugen, “Na melmate it unla, a hon sawite thumsak un,” (Mat 5:44). Naktak a hon suliamte, Pathian vualzawlna ngetsak thil haksapi ahi. Kipiakna sangtak ahihman in Pathian tellou a ahithei himawk lou hi. Smedes in, “Ngaihdamna kichi thillamdang (miracle) chi hi. Ngaihdam theihna bukim kichi Pathian thillamdang hih ahi. Ngaihdamna Khristiante hoihna diktak ahi,” chi hi.

Eimah mimal ngaihdam a i omna i theihkhiak zahzah a i ngaihdam ding ahi. Ngaihdamna hon neisak thei tuh Pathian in bangzah tak a hon ngaidam hi hiam chih theih khiak ahi. Na khelhna bangzah a tam hon ngaidam ahi hiam chih ngaihtuah in! Tangtawn gawt a om ding lai Pathian hehpihna ziak a ngaihdam a om na hihdan ngaihtuah mah dih! Jesu in, “… Himahleh ngaihdam tawm in, neuchik in a it,” chi hi. Mi na ngaihdam utna in nang mah bangzahtak a ngaihdam a om na hiam chih gen khia hi. Ngaihdamna dia kul leh poimoh pen tuh lungsim tawng apan thupukna lak ahi. Huai ziak in, Khrist in a hon ngaihdam tak bang in eite leng khat leh khat kingaidam tuah chiat ni. Simtu tengteng Toupan hon vualzawl hen aw.

GOOD FRIDAY MESSAGE