2 Timothi 2:15

Hun leh kumte’n lenmual ahon liamsan zelzel lai in, kumte hong pai liam zel a, a haksa, anuam, kipahna leh lungkhamna hunte ah; Toupa’n honpii tou zel in kum 2018 September ni 03 – 06 sung, Engedi Retreat Centre Geljang khawkhang a dam tui kichinna mun ah, EBC Lamka North Division sung a semtute Renewal Camp neih in om hi. Athupi in “Pathian pomtak nasemtu muanhuai” 2 Timothi 2:15 pansan in kipak tak leh lohching takin kinei zou hi. Hiai hun a thugentu Rev. Kh. Khaizakham leh Rev. S. Vung Minthangte hi uhi. Amaute hon thugenna apan semtute adia zat ding thu tampi ka na muhte, kei ading mahmah a hon gensak uh ahi diam ka chih ka phattuampih mahmah hi a ka theihte a nuai ah a laktom in ka hon gelh khia hi.

Toupa’n muanhuai honsa a, A na sem dia ahon seh/ahon koih ziak in hampha ka kisa mahmah a/i kisa mahmah uhi. A phamta Rev. Pu Lalngaisang in a chih bang in, Kei kher-kher ami-dit ani. Mipil, misiam, laithei atam-tam maizen utoh, Toupa’n kei se-se ahon deih/ahon zat nop kipaklua in lamdang ka sa hi. Pathian pomtak nasemtu muanhuai i chih lailai in pomtak louh nasemtu muan huailou chih leng ki om thei ding eive maw ka chi a lungsim hon khoih in hon lawng kha mahmah hi. Sawltak Paul Testimony a kigen chiang in, tuni tan in a thak gige lai hi. Tuni’n nang a bang achita a, bang a chilai dia? ap gawp dia kisa ahi hia, meivu tu khinta hia bang chi? Paul in a zuih Jesu Khrist nung muanhuai leh ginomtak, siangthou tak a a zuih ziak ahi ding ka chi hi. Na Khristian hinkhua ah nang leng suang (stone) chi tuamtuam in miten a hon deng sek ding uhi. Huai suang kichi bang suang hi ding ahia? huai suang chu maw, Muhsitna, Engbawlna, Gensiatna, Demna, Hazatna, Simmohna leh a dangdang tampi om ding hi. Sawltak Paul a in, a etna adik ziak in suang lian pipi a den in om mahleh, tunglam a Pa a et gige ziak in a theisiam in a kipak thei mahmah hi.

Toupa gamna ka sepna/i sepna ah leitung khovel thilte lam enlou in, tunglam en a mailam nawt in hangsantak in kal i suan zel ding uhi. Toupa gam nasepna thathou leh thanuam tak a i sep theihna ding in pianthakna diktak leh kipiak zohna taktak (commitment) kichian tak na neih kei a, ka neih kei leh na tuah teng ah na kipak kei ding a, na pianthak taktak in chu nuam na sa dia, na lungkim dia, na thathou in na thanuam gige ding a; kipaktak in leng nasepna ah na om thei ding hi. Sawltak Paul, hoih tak in a kipan a, hoihtak in a zou thei hi. “Beginning well and finishing well.” Jesu a Kros puakpih ding in Simon Kurini khua a om man uhi. Na hinkhaw zatna ah Pathian pomtak nasemtu muanhuai hi taktak di’n na kimuang ngam na hia? Director Education of Mizoram a sem, Dr. Lalnuntluanga, kitawp in India gam tawp pek ah, Missionary school a sem ding in saptuam sawl in kuan hi. Eite leng tua i sepna mun/i omna mun ah poimoh mahmah i hi chih mangngilh keini.

A lamdang leh thupi ka sak nawn mahmah tuh Mr. Rothangliana, IAS a hihna kitawp in missionary nasem in kuan a, hinkhua niamtak in KHRIST min in khawsa hi. Diphu ah a seplai in a tate school kai ding saikal in va khasek hi. Huailai in a mel theih mahmah Karbite a lawm IAS mah in leng gari in a tate khasek hi. Hiai missionarypa a muhtak chiang in, lamdangsa lua in bang ziak a hiai mipa saikal a tai mawk ade aw chi hi. A ngaihtuahna ah, What happened why, what happened why this man? bang ziak, bang ziak hiam? hiai mipa chi in lamdangsa tak in om a, nidang a Ambassador car a tai gigepa hilou hia? chi hi. Jesu Khrist nung i zuihna ah miten lamdang asak ding khop hial in i omdan in langsak zou leng, Toupa kipahna hi kha zaw ding hi. Tuni in nang leh kei i sepna poimohlua ahi. Midangten bang hon chi muh ding ua, “Khrist mel toh ahon mu ding uam/kuva haisan, meikhugim nam, khovel gimnam peuh in ahon za/ahon mu ding uam?” miten bang ziak a tua pa/tua nu Thutakna, Siangthouna, ka mu/ka thei ahon chih theih ding uh poimohlua hi. Sawltak Paul in Korin khaw mite kiang ah “Khrist nasemte leh thuguk kemte in miten hon thei uhen” chi in IKor. 4:1 ah na gen hi. Lawm aw, nang bang na chi a? mi theih ding lau kuva hai/ raja muam/ laizial tep in nunglam a sel simsim lah kimu thousi. Tuni a Pathian pomtak nasemtu muanhuai i hihtheihna ding ua poimoh ka sak mahmah chu, na Pathian theichian inla, na Hotdamna chian thak nawn inla, na Bible theichian inla, na Jesu chian in, na mipite/na beram kepte (saptuam) theichian sem inla, midangten nang bang hon chi theih ua, bang hon chi muh ua? chih ahi. Pathian tellou/panglou a nasep, thil bawl himhim ah lohchinna taktak omlou, lohsapna ahi chih mangngilh ngeikei ni. Khristian kichiten niteng hinkhua i zatna uah, i lungsim in a hon zohna lamlam ah i puk/i awnmai sek uhia? Khovel lam ngaihnatna liantak ah i puk mai uhia, semtu tampi Khristiante koimun ah na ding a? Khrist Lalgam nasemtute i kingaihtuah thak uh kul ka sa mahmah hi.

Saptuam mi khenkhatte kikhamisak mahmah in, biakin ah lam deuh gige himahleh, kiteel hun, election hun, a hongtun chiang in tha-it thei mahmah in i kidaihlah sek thei mahmah uhi. I leibat uh hileh kilawm, Nupi khat amin theilou, gendah mai ni kiteelna (election) hun in 36vei vote khia in pangzou chi tel uhi (amah khat kia hi-a maw?). Kingaihniamna hin khua hi makaitu/heutu loh chinna bulpi khat ahi. Bible sim na thadah mahmah leh na khalam dinmun a keniamsa ahi. Mi’n bangchi bang in hon thei gige le-uh chih i deih a, kikhek lamdanna a piangsak thei makaitu/pitu i hi hia? I sepna mun ah i lungkimna hia, i sep khawm pihte toh i kituak na uhia? USA gam a Kompani khat ah nasemtute kithutuak law mahmah ua, mun dang a sem dia ava zot chiang un leng semtute (staffte) kuamah a pai khenuam omlou uhi. Aziak tuh amau lak ah ki-itna leh kithutuahna, lungsim mun khat a sepkhawmna, khat-le-khat kitheihsiamtuahna, akal ua (transparency) lianpi a om ziak ahi. Khrist itna ziak in sem in, bangkim paw le’ng a haksa ding bangmah omlou hi.

Naupang khat in a sanggampa pua a, mikhat in bang ziak a, tua puakgik na puak hiam chi in dong a, naupang in puakgik hilou in ka sanggampa ahi ka puak chiin dawng hi. Na sepna mun ah itna taktak toh nasem hia, bang toh kihel in na sem a, kingaihtuah thak kul ka sa mahmah hi kei tel in. Sam no. 100 chang 2na ah, “Kipak kawm in TOUPA nna sem unla” chi hi. Jesu’n a Kros puakpih ding in ahaksa, anuam, lamsuk, lamtou, i paina, i omna peuh ah Nang leh Kei a hon deih in a hon it mahmah lai hi.

Beginning well, Continue well, finishing well,

Hoihtak a kipat, Hoihtak a sutzop, Hoihtak a zohsiang ding.

“If you hate, you will have no time to love; If you angry, you will have no time to laugh” Na huat a leh it theihna hun na nei kei ding, Na heh aleh nuihna hun ding na mu kei ding Simtute Toupa’n hon vualzawl chiat hen.