THUMAPI:
Tuni a i thupi uh ‘Ngaihdamna’ kichi khovel in a poimoh gige ahi. Khovel mihingte tuh bukim loutak leh ngaihdam ngai ngen i hi uhi.Huaiziak in hiai thupi in kuahiam tup tuambik leh khei tuambik a nei kei a, nam makai leh khotang makaite, saptuam heutu leh michih kuapeuh inleng i poimoh uh ahi gige hi. Paul in Kolosa 3:13 ah “Kuapeuh in kuahiam tung ah leng thubuai neile uchin, kithuakzou chiat in, kingaidam tuah unla, Toupa’n a hon ngaihdam tak bang in kingaidam tuah chiat un” a chi a. Toupa’n a hon ngaihdam bang a kingaihdamtuah chiat ding chih ahi. Mihingten ngaihdamna i neihlouh chiang in kho khat tuikhat a tengkhawmte, inkuan khat a khosakhawmte leng i kisia ua. Nupa kal leh tate toh kal buaina, tekpi tekpu leh mou kal ki chimat louhna, namsung leh khotang ah buaina liantak a piangsak zel hi. Huaiziak in ngaihdamna ding a poimoh masa leh Pathian ngaihdamna pansan a kingaidam tuah ding i hih dante kikum leng ut huai i sa hi:

NGAIHDAMNA DIA KALBI POIMOH MASATE: Khovel mihingte i kingaihdam tuah theihna ding a poimoh kalbi masa tuh Kolosa 3:5-15 sung ah kimu thei hi. Paul in Kolosa te kiang ah lemna leh ngaihdamna dia poimoh thilthum a gen hi. Khatna ah “That un” (Kol 3:5-7) chih ahi. Nou a leilam thil deihnate, kingaihnate, nitnate, hukna leh utna giloute sihsak ding chih ahi. Nihna ah “Koih mang un” (3:8-11) a chi nawn a, huai tuh hehna, thangpaihna, huatna, gensiatna leh zuau kihilhtuahnate koihmang ding in a sinsak nawn hi. Thumna ah “Kivan un” (Kol 3: 12-14) a chi a, kivatna ding a gente lainatna, migitna, kingaih niamna, thunuai lutna leh thuakzohna a kivat ding chih ahi. Tuabang zel a ei lam a sihsak ding omte sisak a, koihmang dingte leh kivatna ding achihte a kivan hileng gentam ngailou in ngaihdamna hong piangmai ding chihna ahi. Koimun hiam apan “peace mission” hongpai ding ahikei a, michih sung a kipan ding chihna ahi.

Kolosa 3:13 ah “Kuapeuh in kuahiam tung ah leng thubuai neile uchin, kingaidam tuah unla, Toupa’n hon ngaihdam tak bang in kingaidam tuah chiat un” a chi hi. Mihing lungsim tak a gen in ngaidamtu hih tuh thil haksapi ahi a, kuahiam ei siatna ding a hon hih chih i theih ngoihngoih ngaihdam ahaksa mahmah hi. Himahleh “Toupa’n a hon ngaihdam tak bang a kingaidam tuah chiat un” a chih sese tuh apoimoh na laitak ahi a, baihlamtak a hon ngaidam sak theitu ahi. Ngaidamtu hih theihna ding in Pathian ngaihdamna a kichet masak a poimoh a, Pathian ngaihdamna a kichian lou mite ading in zaw thil hi theivual ahikei ding hi. Papi khat camp lut a piangthak a, Pathian ngaihdamna a kichianglua ahihman in “ka zi in ang va kawmleh ka chi, ka ngaidam nuam lua” a chi hial kichi hi. Pathian ngaihdamna a chiangloute ading in zaw kam in gengen lehleng thil haksapi ahi. Laisiangthou i sim zomzel leh “Huan, huai tengteng tung ah Itna silhthuah un; huai in bangkim a gakkhawm ahi” (Kol 3:14) a chi nalai a. Tua bangbang a i hih maizen in tuh ngaihdamna tuh automatic a hong om ding ahi chih hon musak hi.

KHOVEL POIMOH NGAIHDAMNA AHI: Ngaihdamna tuh khovel poimoh ahi a, hiai ngaihdamna a omlouh chiang in inkuan kibalkham, nupa kal ah buai na piangzel hi. Huan nam leh gam in naktak in a thuak a khantouhna a om theikei hi. Huaiziak in khovel poimoh tuh ngaihdamna ahi gige hi “Toupan hon ngaihdam tak bang in, nou leng kingaidam tuah chiat un” (Kol 3:13) a chi hi. Gen taksa bang a mi kuahiam i siatna ding a honbawl te ngaihdam a haksa petmah hi. Himahleh “Toupa’n a hon ngaihdam tak bang a..” chih ahih sese tuh a baihlamna ahi. Keimah phaktawk in i nam sung bang ka na enzel a, i pu leh pa hun apan nam chitak leh kituak a mite theih himah leng, i tulel dinmun uh et in zaw gen ding a vang mahmah a “ I potham paidan uh thuk tak ahi ” ka chikha zel ahi. A nam zawng leh inkuan zawng hiam, mimal zawng hiam inleng chiklai peuh in kingaihdam tuahna i poimoh gige uhi.

Toupa Jesun “Mi a tatlekna uh na ngaihdam uleh, Na pa uh van a om in nou leng a hon ngaidam sam ding hi” (Matt 6:14-15) a chi a. A uangzaw sem in “maitam a thilpiak na latlai in. Na unau in na tung a lung hihlouhna a neihleh, pai inla, na unau kilempih phot in. Huai zoh chiang in na thilpiak lan in” (Matt 5:23-24) a chitop mai hi. Kuahiam kilempih ding leh ngaihdam ding nei napi a, tuate ngaihsak lou a maitam a thum, thilpiak lat kichi om zebei bang hial in a gen hi. Tulai in bel Jesu sinsakna toh kilehbulh in maitam leh pulpit tuh kuahiamte kapna, kua hiamte kheina mun lemtang din i zang zawsek uh hilou hia? Khelhna genlouh ding chi i hikei uh, himahleh a mi kawk zawng lam kia a gen i hikha ding uh. Michih in hoihna lam i neichiat ua, ei hoihna leh midang hoihlouhna buktuah in ei hoihpen kisak khak ding pilvan huai mahmah hi. Mihing bukim lou ngen om khawm i hih man un “Toupa’n a hon ngaihdam tak bang a khat leh khat kingaidam tuah chiat ni” chih i gen utdan ahi.

Philip Yancy in a laibu gelh “What’s so amazing about grace?” ah Spain gam a pa leh a tapa tanchin a gelh in lung khoih mahmah hi. Pa in a tapa inn apan a hawlpawt a, tapa leng duaibik lou ahihman in pa leng kon chi nawn kei dia, k’ong kik nawn kei ding chiin apawt kheta hi. A nunglam in pa’n a tapa ngailua ahihman in sapkik ut mahleh tulai bang a communication a hoih kei hi. Huchiin “El Liberal News” ah hichiin “Paco, meet me at the hotel Montana at noon on Tuesday. All is forgiven. Love- Papa” sapna bawl hi. Pa in a tapa mu din Hotel Montana lam a va zuan a, sun dak 12:00 (noon) a pelh chiang in. Inn taisan pa ngaihdam ngai ka hi chi tuailai 800 valtak a paikhawm uhi.Tuni’n hiai khovel in a poimoh ngaihdamna ahi a, inkuan leh mimal ban ah, i nam in apoimoh tuh ngaihdamna mah ahi gige hi.Toupa’n a hon ngaihdam tak bang a khat leh khat i kingaidam tuah thei chiat diam, unau?

JESU’N NGAIHDAMNA A GENDAN: Ngaihdamna om theihna ding a Jesu sinsakna kheng khe zou ding sinsakna thupizaw dang a om kei hi. A mualtung thugen kichi Matt bung 5na ah “Lungsim a gentheite a hampha uh; vangam amau a ahi ngal a. Lungkhamte a hampha uh; khamuan a om ding ahi ngal ua. Thunuailutte a hampha uh; leigou luah ding ahi ngal ua” chiin hon sinsak hi. Matt 5:9 i simzom leh “ Lemna bawlte a hampha uh; Pathian’ tate chih a om ding ahi ngal ua” a chinawn hi. Pathian tate chih a omte tuh makaite hiam, sawma khat petamte hiam hilou in lemna bawlte chih ahi. Mahatma Gandhi in “Satyagraha philosophy” i chih “Non-violence movement” tuh hiai Jesu thugen a kipan a developed hiin kigen hi. Huan Jesu’n “Mi’n na tung ua ahih ding uh na deih bang un, nouleng mi tung ah hih sam un” (Matt 7:12) chiin hon sinsak nawn hi. Tulai in ei tung a hih dia i deihlouhte mi tung ah i hih ua, a lehzawng in i zuikha uh ahikei maw? Gingtu masate tuh Khristian leng kichi lou in “Pathian’ thu-awite” ana kichi ua. A zak bangbang uh awi in, sinsak a om bangbang a pawm ua, khawlni in chiangkang khat leng kuaitan ngamlou khop in Pathian’ thu a awi uh hi.

Gingtu masate bang a laisiangthou sinsak bangbang zui in, mi’n ei tung a ahih ding ua i deih bangbang, en midang tung ah hih chiatleng automatic in lemna leh ngaihdamna hong tungmai ding ahi. Huan “Mit sik in mit, ha sik in ha, a kichi chih na zata uhi. Ken zaw kon hilh ahi, na biang langkhat beng tuh a langkhat leng doh zaw un, mel khat paidia honphut kiang ah mel nih paisak un” (Mat 5:39, 41) a chih behlap lai hi. Mi tampi ten biang langkhat doh sang in a nak zawsem a betthuk i ut nak uhi. Ahia, mi’n i deihlouh dan a hon bawl hial ua lehleng itna-a thukkik dia lamette i hi uh. Mahatma Gandhi in “The weak can never forgive, forgiveness is the attributes of the strong” a chi a. Mi hatlouten a ngaidam theikei uh, ngaihdamna tuh mi hatte hinkhua kilawmna ahi, a chi a. Na hat leh hatlouh theih baihlam na pen tuh ngaihdamna hauh leh hauhlouh ah a teh theih ding hi.

THUKHITNA: Thukhitna ding in hiai ka gen nuamlai hi. Peter in Jesu kiang ah “Toupa, ka unau in bangzah vei ahia ka tung a akhialh leh ka ngaihdam ding? Sagih veitan in ahi diam? (Matt 18:21-22) a chi a. Jesu’n a kiang ah “Sagih veitan in kon chikei a, sagih vei mun sawm sagih tan, kon chi zaw ahi” a chi hi. Huai hunlai in Rabbi-te sinsakna tuh mi kuahiam in thumvei tan a ngaihdamleh siang bang a ngaih ahi. Peter in thumvei lehnih (gukvei) sang a tamzaw deuh sagih vei tan in ahi diam? a chi a, ama ngaih in tam huntawk mahmah a hikha ding hi. Himahleh Jesun mathematical term in a na multiply sak a, sagih vei mun sawm sagih (7x70=490) tan in kon chi ahi a chih khumdaih mai hi. Huai zah vei ngaihdam ding a om chit-chiat kholkei maithei. Himahleh a case serious leh serious louh thu tuam hileh, ngaihdam na kichi chiangtan neilou (limitless) ahih ding, tamvei lawta chih omlou a ngaihdam touhtouh a poimoh dan genna ahizaw hi.

Toupan a gam nasepna ah experience lamdang taktak hon phusak zel hi. Field a kum-3 vel paisa in native worker -4 ten loh khan ding deih in office ah hong kitomkhum kha ngei uhi. Semtu leng ka hi nawnkei uh peuh a hong chi ua, kamnem a genpih theih ahihlouh man in na kitawpna uh FS in kon pawmsakta chiin lai ka pia a, semtu ahihna uh bei ahita. Himahleh Pathian lemsak ahi ngei di’n ka gingta, hiai kum bul ah tuate lak a khat “Mr. Ajoy Narah leh a zi in, Sir ka hihkhial lua a Pathian min in hon ngaidam in, tu’n khe-naa in ka om a Pathian ka tung a heh hi ding ahi” chiin honglut uhi. Ngaihdamna chih thupi a i neih kum ahih dungzui in ka thumkhawm ua, tuni tan Pathian biakna ka zangkhawm thei nawn uhi. Toupa min phat in om hen.

Huai hunlai a a kampau uleh, hon bawldante uh et in hehhuaipi bang mahleh, “Toupa’n hon ngaihdam bang a kingaidam tuah chiat un” chih in lungsim a hon zou mahmah hi. Saptuam sung a ngaihdamna amuh keileh koimun mah a muhna ding a om kei ding hi. I saptuam thupi ngaikhia leh zate kia hilou in azuitu leh semkhetu hi ding in Toupan hon vualzawl leh ka chi petmah ahi. Huchi ahihkei leh tunung chiang in i mit uh hong vak hun a omsam ding a, i kisik ding ua, khangthak hong omlai ding ten hon mohsa kha ding uh ahi. Toupa’n hon ngaihdam bang a khat leh khat i kingaidam tuahchiat ding ua, huai tengteng tung ah itna silh thuah i sawm chiat ding uh aw. Toupan hon vualzawl hen. Amen.