“Na mazawn khua uah vahoh unla; huai ah na luttung un sabiltung nou kikhih, kuamah tuan ngei nailouhna, na va mu ding ua, huai honphel unla, honkai un. Huan kuapeuh in ‘bang dia phel?’chi a a hondot uleh ‘Toupa’n a deih ahi,’ ” chi un, a chi hi. [Lk.19:30-31]- Jesu Khrist

I deihthoh leh ngaihnat mahmah Khristian Thukizakna simtute tengteng Palm Sunday chibai ka hon buk hi. Kum 2021 a Palm Sunday kipahhuaitak hon musak Toupa Pathian kiang ah kipahthu gen in thupina sangpen amah i pia hi. Huan Palm Sunday message gelhthei ding a hamphatna honpia Pathian leh heutute tung ah kipahthu ka gen hi. Hiaibang hunhoih i muhna in eite Amah ading in muanhuai zoukei mahlehang amah eite ading in a muanhuai in a ginom a, a itna a hon sam in a dohzohna toh hon enkol ahi chih a chiang mahmah hi. Huan nang leh kei kichi hiai khovel a omnawn lou khathei i hihlai in tuni a hiai thugelh simkha na hihna ah nang kichi Pathian in khovel a hon omsak lai ahihman in mi hampha mahmah khat na hi hi. Pathian in deihna khat honneih lai ziak a hon damsak hi ding in i gingta hi. Bangmah ding honchi nawnlou hileh chiklai peuha i hinna lathei amah ahi. Huaiziak in Toupa hon deihna bang a i om ding poimoh mahmah hi.

Palm Sunday kichi Jesu Khrist leitung a hongpai lai a khatvei sunsun vualzou a Jerusalem khopi a lutni leh huai theihgigena a kumteng a i zatzel ahihman in ei Khristiante tengteng a ding a ni poimoh mahmah khat ahi. A ziak mawltak in gen lehang Palm Sunday pen Good Friday leh Thohnawnna ni (Resurrection Sunday / Easter Sunday) ma nipini (Sunday) a omkhak ziak hikha ding hi. Jesu sihna leh thohnawnna poimoh lua ahihman in a naseptaktak dingte a sepkhiatma a a honna (opening ceremony) hikha ding hi. I Laisiangthou a Tanchinhoih li teng bang ah leng hiai thu kigen hi. Zekaria 9:9 ah leng hiaithu ana kigenkhol hi.

Palm Sunday tampi vei zangta thugen leh thugelh tampi simkhata leh ngaikhe ta i hihman in Palm Sunday a Message a kigelh ding simlouh in leng athutun theihsa tampi om ding ban ah i behlap ding leng tampi thei ding in i kingaihsun hi. Tutung in leng hiai Palm Sunday hun a dinmun poimoh mahmah ana nei sabiltung toh kisai deuh in message gelh lehang i chi hi.

A. JESU TUANNA DING A SABILTUNG NOU NEITUTE KIPHALNA
I Laisiangthou ah hiai sabiltungnou neitute kuate hiam chih leh amin uh bang hihiam chihte kimukhalou hi. Himahleh i muhtheih chiang mahmah bel amaute’n a neih uh a ganvulh uh Jesu ading a phaltak a a piak thu uh ahi. A sabiltung nou uh kikhih ahihman in Jesu’n khihsa in ana koih un chia a genkholhsa ahihkeileh bel banghiam ding a a deihziak uh leh tup a neih ziak uh ban ah banghiam a deihna uh om ziak a khih uh hi peuhmah ding hi. Kou hiai ding a ka chih uh hive aw, a nou lai ahih toh chihte omsaklou in a deihpa Toupa tuanna ding in bangmah genlou in phalpah mawk uhi. Jesun sabiltungnou neite toh kihoumasa a tua ding a a gelsa (arranged) ana hihta lehleng Toupa adin a phal veve ua itlou in a sabiltung uh a noulai ahi chituanlou in a pephalpah uh ahi chih i muthei hi. Tua bang in eiten leng i neih leh lam te, ei ading i chihte leh zatna ding omsa i chihte i Toupa’n deihna a neih leh i piak phal ding ahi. Etsakna ding in i Saptuam in Pathian ading a i van neihte, inmun hiam gam hiam leh thilkhatpeuh hi taleh deihna a neih leh kiphaltak a i piak ding Toupa’ deihlam a hingei ding chih hon ngaihtuah sak mahmah hi.

Ganvulh dang tuantheihna ding tampi omlai a Jesu tel pen geih sabiltungnou ana neihkhak khelkhel uh en-huai uh ka sa mahmah hi. Tuantheihna ding, chilsiamsa ganhing dang a hatzaw tampi om lawtel ding ahihban ah sabiltungnou amau a lou leng om ding ahihlai a, Jesu deihpen ana vulhkhak/ neihkhak chitchiat uh hampha uh ka sa mahmah hi.

Tua bang deuh in Pathian leh Saptuam in i neih khat deih ahi chih i theih pen ei hamphatna thupitak a hi zaw, huaiziak in i neihte deih a om ahi chih i theih chiang a kiphaltak a i piakpah ding ahi. I neihte deih a om ahi chih i theih chiang a it dedeuh maimah i hih khak di bang lauhuai ka sa hi. Pathian ading in Saptuam ah pekhe ngam lehang i hinkhua ah vualzou in amah a kumpi hihna toh hong lut thei ding a tua tungtawn mah in eileng a gingtu vualzou hinkhua nei i hi ding hi.

B. SABILTUNG NOU VA PHEL A HON KAI DIA SAWL A OMTE THUMANNA
Bethphage leh Bethani khaw kiang, Olive tang a pan sawl a om nungzui mi nihte min bang hihiam chih Laisiangthou ah kigelh chet kei mahleh, i Toupa sawlna bangmah genlou a thumangtak a a zuipah na uh thupi mahmah sak in om hi. Na mazawn khua uah vahoh unla; huai ah na luttung un sabiltung nou kikhih, kuamah tuan ngei nailouhna, na va mu ding ua, huai honphel unla, honkai un. Huan kuapeuh in ‘bangdia phel?’ chi a a hon dot uleh ‘Toupa’n a deih ahi,’” chi un, a chi hi. [Lk.19:30-31] Sabiltung nou kikhih a neitute’n bangteng ana gen ding hile uh leng Toupa’ kammal khat (Toupa’n a deih ahi) masuan a kuan khe ngamte ahi uhi. A thumanna uh leh a hangsanna un a nasepna (ministry) uah lohchinna tunding mah ahi chih in om hi. Amaute bang in eite leng sawl a i omna mun a thumang leh kipe zou tak a i kuankhiak a Jesu kammal te mah masuan a i pai ngam poimoh mahmah hi.

C. JESU KHRIST ZIAK A SABILTUNG NOU HAMPHATNA
Sabiltungnou pen akikhihlai phelkhiak in om a Jesu kiang ah hon kai uh hi. Jesun vualzou a Jerusalem a lut lai a a tuanna ding in ana telkhalou hileh sabiltungnou tanchin tua i genzah in ki genkhalou ding a phawk khak luat a leng omlou ding ganhing khat ahi.

Jesu a tung a a tuan ziak in sabiltungnou paina ding lampi ah mihingte puante nasan phah in om hi. Jesu a tung a tuanglou hi zenzen leh kuamah in huai sabiltung nou va phawkphalou ding a a kikhihna mun a om maimai ding ahi. Jesu’n deih a a tel ziak in munkhat a khihtang a om maimai ding pen phelkhiak in a om a, a hinkhua a atuah ngeiloh ding mihingte pahtawina hon tangkha hi. Sabiltungnou hiai hun lai in khat kia omkhollou ding hi. Sabiltung tampi omte lak a hiai Jesu tuanna pen hampha leh en-huai i sa mahmah hi. Sabiltungnou pen a kikhih ahi ki chi a, huai in munkhat a hoihtak a om chihna hithei hi. Kholak peuh a khatpeuh mansuk gawp lou in a kikhihlai pen i Toupa’n tel hi. Kikhih ding chih pen Jesu’n a theisa hikha ding hi. Himahleh Jesu’n va phel unla honkai un chi hi. Huai bangdeuh in eite leng khih a i omna apan kiphel khia a Jesu vanzat ding a amah i tung a i tuansak ding kisam mahmah hi. Amah i tung a tuang chih chiang in eithu hizaw lou in amah i tung tuangpa thuthu a i om ding chihna ahi.

D. JESU KHRIST ZIAK A NANG LEH KEI HAMPHATNA
Nang leh kei leng i Toupa Jesu’n a vanzat hi ding a hon zangnuam a hontel ziak in i hampha petmah hi. Jesu Khrist in Kros a i koltanna apan honphel a hon tellou hileh i omna leh i dinmun a manphatna bangmah nei lou a khelhna toh kikhih den mai ding i hihlai in aman hon sam a sabiltungnou tungtawn a kumpi thupina leh a vualzohna a lahkhiak bang in, ei tungtawn in leng a thupina puangkhe ut a vanzat ding a hon zang ut ahihman in i hampha petmah hi. Sabiltungnou Jesu ziak a pahtawi a aom bang in, nang leng Jesu Khrist ziak a hamphatna na tante sut mah dih unau..! Jesu Khrist ziak a leitung a hamphatna leh kipahna teng kia tang ding i hi kei a avan khua leh tui hihna tang dingte i hi lai hi (Phil 3:20).

Jesu Khrist Jerusalem a vualzou a a lut bang in nang hinkhua ah leng vualzou in lutnuam hi. Amah a ding a sitneilou a kipephala, a thupiakte zui leh mang a, i tung a a thuneihna toh i tuansak poimoh mahmah hi. Amah Jesu Khrist na hinkhua ah Toupa hih a ut gige hi.

Simtute Toupa’n hon vualzawl hen.