Sapte thupil in ‘No one’s Perfect’ ‘kuamah bukim omlou’ a na chi ua, a dik mahmah hi. Bukim i omlouh ziak mah un, hih khelh, bawl khelh i nei zel ua i hihkhelhte ua kipan kingaihdamna kipoimoh ahi.
Pathian tung a khelhna i mihinpihte tung a khelhna ahi. Mathai 6:9-15 “ka tung ua khialte ka ngaihdam bang un koumau khelhna zong hon ngaidam in” chiin i thum uhi. I tung a khialte i ngaidam taktak uh hia? I tung a khialte ngaidam utlou in, Toupa ngaihdamna lamen zel chih thil omtheilou ahi. Mi kuahiam i ngaihdam utlouh chiang in i ngaihdam utlouh pa/nu hiam sang in, mi ngaidam utloutu pen a thuak tu ahi zaw gige ahi.
NGAIHDAM LOUH IN PATHIAN BIAKNA NAMTUILOU SAK THEI HI: Mathai 5: 23-24.
Mi huat mahmah nei kawm kawm a mi ngaidam thei hetlou leh mi toh kilemlou pi a Pathian kiang a thumthum khawng uh Pa Pathian nna i sep khawng uh Pathian ngaih a namtui hetlou a na hithei ahi.
TOUPA NASEP SEPSAKNA AHI: Rom. 12: 19.
Miten na tung ua thil ahihkhelh ua, hon pampaih, nelhsiah, hon simmoh chiang un leng, phulak ding Pathian awn zaw un a na chi hi. Phulak himhim Toupa Pathian ading ahi chih THUKHUN LUI Deutoronomy ah leng chiangtak in a kigelh hi.
Hiai pen zuih haksa i sa chiat sek ua/kisa mahmah chiat a, i tung a khialte thuk theihna di hun lemtang i muh chiang un i thuk kha sek ua, hiai in Pathian Toupa nasep dingte dalsak kha kisuak a Toupa deihlouh dan hih kha kisuak ahi hi.
KHASANGTHOU LUNGKHAM-SAK THEIH AHI: Ephesa 4: 3-32.
Ngaihdam theih louhna in Khasiangthou hih lungkham ahi, tuaban ah Galatia 5 na a khagahte, itna, kipahna, lemna, thuaktheihna, migitna, hoihna, muanhuaina, nunnemna leh kidektheihna chihte neilou ki-om thei ding ahi.
THUKHUPNA:
Bible kia hilou in leng leitung misiam Doctorte, Psychologist-ten leng mi ngaihdam theihlouhna CANCER a damthei nawnlou natna toh a na tehkhin uhi. Mi ngaihdam theihlouhna in hehna leh thangpaihna, ngongtatna kumlui tun a, taksa a dia thil hoihlou tun hi. BLOOD PRESSURE hihsang a lungtang leh IMMUNE SYSTEM nasepna hihsethei chi uhi. Ngaihdam theihlouhna in kingaihsiatna DEPRESSION sangsak a lungtang natna HEART DISEASE leh zunkhum natna tunthei hi.
Alehlam ah ngaihdam theihna in lunggimna STRESS LEVEL hihniam a, mihing damtheihna a dia phatuam mahmah ahi. Jesu Khrist hon thuhilhna bang in i poimoh uh kingaihdam tuahna ahi.
I GAMSUNG, i namsung a buainate atamzaw kingaihdam louhna ziak ahi chileng kikhial lou ding hi. Nu-pa kal, nu leh pa – tate, mou leh tekpi-tekpu, lawmta kal, sepna office, saptuam, khotang ah leng i mihinpihte i ngaihdam uh i mohpuakna chiat ahi. Toupa Jesu hon thuhilhna leng a hih ban ah, khalam leh taksa lam aleng damtheihna ahi hi.