Khovel a khang masate apan a leng na omta, tukhang a leng om tou zel, “KINGAIHSIATNA” i chih kuapeuh in chiklai peuh a leng i neih theih vek uh ahi. Aziak leng a kibang kei chiat ding, himahleh omdan gamtat bel a kibang tampi om ding hi. Mi tampiten a phut paisuak lai un tampi mah in a na sihlohta hi. Gingtu khristiante leng hiai thang ah tampi mah awk in suakta zou lou leng om lai hihang.
Africa gam a sazukten sahang hat pen pen sang a a tai hat zawk kei uleh a sih ding uh ahi chih a kithei uhi. Sahang in leng sazuk hatlou pen bek a makhelh zoh kei leh nek mulou ding ahi chih a kithei hi. Huai ziak in sazuk hi in sahang hitaleh a tai him him uh a ngai tuak hi. Khat bitna ding a, a tai lai in khat bel nekmuhna dia tai ahi. Hiai tak tuh ahi melma toh niteng a kidelh, leh kitang tuah i hihna.
Khristiante’ melmapa Diabol tuh Humpinelkai humham bang in nektheih ding zong in a vial vak vak hi. Bang hiam poimohtak sem ding a kisakkholh lai leh lohchin/lohsap nung zek khawng in mat leh khempuk i baihlam diak uh chih thei in hiai hun a suam sek hi. A hon matna ding in thang hoih tak “KINGAIHSIATNA” thang a hon zang pah pah sek hi. Pathian kamsang Jawlnei minthang leh Pathian mi zat mahmah ELIJA zong hiai thang ah na awk ngei khat tanchin i sut khawm ding uh:
ELIJAH TANCHIN TAM LOU:
Jawlnei Elijah hun tuh Israelte tung a kumpi Ahab in vai a hawm lai ahi. Kumpi Ahab in namdang numei khat Jezebeel kichi ji in a nei a, a nih un Baal pathian bia in a nna a sem ua, Israelten leng a zui uhi. Pathian sawl in Elijah in Ahab va kimuh pih hi. Karmel tang ah bawngtal nih Elija ading khat, Baal Siampute ading khat, semnen in maitam ah a koih tuak ua, amau Pathian chiat sam in, mei a hon dawng Pathian pen Pathian hihen chiin Baal bia Ahab leh a siampute toh Jawlnei Elijah hong kitou uhi. Elijah maitam hong kang in vualzohna hon ngah a Baal jawlnei 450 te leng a that vek hi.
Kumpinu Jezebel thangpai mahmah a, Jawlnei Elijah thah ding in a vau a, Elijah in leng lau in gamdai ah a tai hi. Tawl leh bah tak in Juniper sing lim nuai a tu in “Hunta hi Toupa aw, tuin ka hinna la in, ka pute sang in lah ka hoih zaw tuan kei a” chi in sih ngen in a thum ta hi.Tua sing nuai a a ihmut lai in, Angel in hong khoih a, nek ding tanghou leh dawn ding tui pia in, a lampaina ding sau dan a hilh hi.Tua ne a a dawn khit in ni 40 leh zan 40 pai in Pathian tang Horeb a tung hi. Kokhuk khat a va tung a huai ah a om ta hi.
Huai mun ah Toupan “Hiai ah bang na hih a Elijah ?” chi in dong a, aman “Sepaihte Pathian ading in phatuam ka ngai mahmah zel a, Israel suan ten lah na thukhun a lehngat san ua, na maitamte chimsak in na jawlneite namsau in a sat lum ua, a omlai lah kei kia ka hi, ka hinna honlak sak a tum uhi” a chi a. Pathian in khatvei a dong nawn a, aman leng a kibang mah in a dawng zel hi. Huaitak in Pathian in Israel gam ah Baal ma a khukdin ngeilou leh amah tawp ngei lou mi 7000 kei adin ka sit hi chih a hilh ban ah, Damaska khua zuan ding in hilh hi.Na tun chiang in Suria kumpipa din Hazael thau na nilh ding a, Israel kumpipa din Nimshi tapa Jehu thau na nilh ding a, na sik a jawlnei hi ding in Abel meholah khua a mi Shaphat tapa Elisha thau na nilh ding ahi, hiai mi thum ten Baal biakna a hih chimit ding uh chih leng a hilh hi.
Karmel tang a Israel mipite mitmuh a, Baal siampute tung a vualtungtuanna thupitak a ngah nung zek in, sih ut hial khop a kingaisia leh lau in a taimang hi. KINGAIHSIATNA melmapa Setan van zat thang lau huai tak ahi, huai pel thei ding leh suakta ding in pilvang tak in i pai ding uh.
KINGAISETE NGAIHTUAH KHENKHATTE:
1. Hun paisa a hoih lou leh hihkhelhte:- Bawl thak theih nawn louh hun paisa leh hihkhelh khakte ngaihtuah tuah. Elijah hun in Kumpi Ahab leh a ji Jezebeel ziak in Israel ten Baal bia uhi. A khang thu uah Pathian paisanna thupitak a om chih leh siatna a tuahte uh ngaihtuahtuah in hin ngap nawn lou hi. A hinna amah kilak bel tum lou in “A hunta hi, Toupa aw ka hinna la in” chi in Toupa ngen hi.
A ngaihtuah khak louh, Israel khangthu a Pathian kipaksak mahmah Noate, Abrahamte, Mosite, David te khawng ngaihtuah leh a tawl dam ding, a lung nuam ding, a tha hat ding hinapi, a langkhat a hoihlou lam kia ngaihtuah ahihman in hin ngap lou in sih ding ngen hi.
2. Mahni kia kimuhna:- Jawlnei Elijah in amah lam, ‘ka’ ‘kei’ chihte bek en ngetngut hi. ‘Ka’ pute sang in ‘Ka’ hoih zaw tuan kei, Pathian ading in phatuam ‘ka’ ngai mahmah a, a omlai ‘kei’ kia ‘ka’ hi, ‘ka’ hinna hon laksak a tum uh” chi in amah kia leh a vuallelhna lam kia kimu in pau pau hi.
Karmel tang a Pathian ompihna leh Kishon lui a Baal jawlnei 450 a thah lai khawng nai chik hilai ngal hi a, huai hun a leng amah kia mah hi a, mi 450 zoupan numei khat lau a sih ngen hi mawk hi.
3. Maban ding sau mu lou:- Kumpinu Jezebel launa kia in pumtuam in buai mahmah a, Pathian in bang hih sawm hiam chih gel pha het lou hi. Pathian in bel Israelte kumpipa dia Jehu thaunilh ding, Suriate adia Hazael thaunilh ding leh amah thakheng dia Elisha thaunilh a, hiai thumte tungtawna Baal biakna hih chimih ding a na hi zaw hi. Toupa Pathian in hon piansak, tua i dinmun a hon dinsak, bang tum ahi diam chih lunggel ngeilou i hih khak leh kingaituah thak ni.
4. Midangte hektu apang:- Unaute hekpa tuh Setan ahi. Elijah in leng a chipihte hek in, “Na thuKhun a leh ngat san ua, na maitam a chimsak ua, na Jawlneite namsau in a sat lum ua, ka hinna hon laksak a tum uh” a chi hi. Mosi leh Nehemiah in bel a chipihte uh chitlouhna ngaihdam ngen in a thum uh, Elijah in tuabang a sawm kei a, a hektu in a pang zaw, ei a bang in i pang a kivel ni.
5. Vuallelsate zoh a om (Defeat from the defeated). Kumpinu Jezebel in Elijah a vau lai in Baal min zang in a vau a, tua vauna lau in Elijah taimang zaw mah hi. Tua vauna a muh ma zek in Baal pathiante, Pathian tak tak ahih louh dan, thumna a dawn theihlouh dan uh ama mit mahmah in Karmel tang ah a mu hi. A vualzou Pathian’ jawlnei hina piin a vuallel pathian’ sikhanu lau in tai duai duai hi.
KINGAIHSIATNA MAITUAH DINGDAN:
1. Na lungkhamna Toupa kiang tun in: Na gen het louh tengteng toh a thei vek Pathian kiang ah na buaina, na puakgik, na lungkhamna ahi bang bang in tun in, nang na lelh mahmah himahleh amah adin a haksa om lou ahi. Ka lungkhamna teng Jesu kiang gen ning, hiai buainate kei kia’n ka zou lou; Jesu a lawm hoih i neih dan … Toupa kiang thumna’n gen in… Lungmuanna tua’h na mu ding. Semgim leh puakgik pawte ka kiang ah hong pai un chi pa’n hon limsak gige ziak in, i mang batna tengteng uh amah tung ah nga vek ni. A kingaihsiat lai pen in le Elijah hinna pepa Pathian kiang ah thum hi.
2. Mohpuakna hon kipete semkhia in: Lungkia, kingaisia leh thadah ngawi ngawi a na omlai tak in zong, na inkuan, tanau lainate leh midangte tung ah gen ding, sep ding leh hih ding na neih bang bang semkhe teitei in, nang ziak a midangte abuai louhna ding un. Elijah in sih ding a ngetlai a si hitaleh Suriate leh Israelte kumpi ding thaunilh a om lou dia, ama thakhektu ding ngei leng thaunilh a om lou dia, Baal biakna hihchip louh a om dia Pathian thilgel tangtung thei lou ding hi. Poimohna nei a Pathian in hon bawl na hih lam mangngilh ngei ken, huai semkhe din Toupa ah kihihhat zaw in.
3. Pathian gen bang in hih in: Elijah in Pathian sawlna bang in sem kim zou kei mah leh amah tha kheng dia a thaunilh Elisha in Suria leh Israel kumpipa ding mi nihte thaunilh in lallukhu hon khu tuak uhi. Israel kumpi a hong pang Jehu in kumpi Ahab, a zi Jezebel leh a inkuante that bei a Baal siampute leng that chimit in Israel gam apan Baal biakna hihmang vek hi. Elijah in Pathian sawlna thumte lak a khat kia subuching mah leh tua pansan in Pathian in a thiltup hih piching veve hi.
PATHIAN THOIHDAMNA:
1. PATHIAN IN HON KEM HI: Elija poimohte Pathian in suktuah sak hi. “A mideihtak ihmut a penak”(Sam 127:2)chih gelh bang in, Elija in sih ding a nget lai in a ihmusak zaw hi. Thatawl lua khawl tawldamna poimoh ahi kha ding. Tua sung mah in taksa adia poimoh tanghou pei leh tui a thawl in a va pe lai hi. Elijah in a nget het louh himahleh Pathian in a poimoh thei in a pia hi.” Amah na ngetma un na Pa un bang bang ahia na khok uh a thei gige ngal a.” I nget teng kia hon pia Pathian hilou ahihlam phawk ni. Hon kepna, hon khotuahna leh hon etkol dante apan Toupa hoihna sinkhe thak zel zel ni hang.
2. AMAN HON THEISIAM HI: Pathian in theisiamtak in Elija kem hi. A haksatna leh a dinmun diktak gensak in Pathian in ngaikhia hi. “Hiai ah bang na hih a Elijah ?” chiin nihvei ngut dong a, dawnna kibang ngen in dawng hi. Baal bia Israel siampute lak a tangkhat lua kisa ahi chih Pathian in a thei a Baal biakna hihchimittu ding thaunilh dia a sawl ban ah, Baal ma a kun ngeilou mi 7000 om ahihdan a hilh hi. Na lawm leh vual lak bang, seppihte lak bang, beh leh phung lak bang ah tang khat kisa nelhsiah leh tuam bawl a om na kisak hun om tham kha ding hi, Lawm hoih pen Jesu bel in aman hon it hi.
3. PATHIAN IN TUNGDING HI: Lungkia leh kingaisetak a om himahleh Pathian in Elijah tungding nawn hi. Lauthawng a, a taimang ma a van a kipan meikuang a sapkhiak bang in, van akipan mah in meikuang nihvei tak samkhe lai a, huai hun in sepaih heutu nih leh sepaih sawmnga (50) tuak toh a vek un kangtum sak hi. Lunglel leh kingaisepi himahleh Pathian toh a kigamlat louh man in tun ding nawnna manpha tak Elijah in tang nawn hi. Lunglel, lungkiate tungdingtu Toupa phat in om hen!
4. PATHIAN IN THUAM HI: Lampaina ding sautak neilai ahi chih thei in, thahatna a neih nawnna ding in Pathian in tanghou leh tuithawl va pesak hi. Taksa lam kia hilou in lungsim lam ah leng a poimoh bang zel in thuam hi. Khamuanna leh thathak mu a, a kihansansak theihna ding in Baal biakna doupihtu ding mi a bawlkholh sak ban ah, Baal ma a kun ngeilou 7000 om ahih dan a hilh hi.
THUKHITNA: Paunak khat in “Ni tumna lam kia na et leh ni suah na mu ngeikei ding” a chih bang in ngatna lam khen hun, ngaihtuah khek hun leh khodak khiak hun neih zel zel tuh tawldamna (recreation) ahi. Heb. 11 sung a kigen GINNA A MIHANGSAN tampite lak a khenkhat “Hatlouhna akipan hatthakna a bawl in om uhi”. Bangziak a huchi thei? “Ka hehpihna nang din a hun hi, ka thil hihtheihna hatlouhna ah ahi hihkim a a om” chitu Pathian khut a mihingte a kituklut chiang in David khut a suangnou bang in thilthupitak ahih thei hi. Lunglelhna, lungkiatna leh kingaihsiatna mi tengteng in i neih theih vek uh ahi, hiai hun tuh Pathian thil hihtheihna thupitak hong latna dia hun lemtang bang a zang siam ding in, A Khasiangthou pawlna, ompihna leh makaihna donna hong hita hen.