“Huan kihehpih chiat a lainatna nei in om unla, Pathian in Khrist a nou a hon ngaihdam bang in, noumau leng kingaidamtuah chiat un.” (Ephesate 4:32)

Pathian in heutute tungtawn a tu kum 2021 thupi Ngaihdamna chih pansan a article gelh ding a hamphatna a hon piak ziak un, Pathian tung leh heutute tung ah kipahthu ka gen masa hi.

Ngaihdamna Pathian akipan ahi a, (Daniel 9:9; Neh. 9:17; Sam 103:3,8-13; 130:4 Matt.9:2, 6; Luke 7:48). Aman mihingte a itna ziak in, vanzat poimoh mahmah in hon zang hi, (John 3:16). Mihingte zattheih ding a a hon luikhiak, ken leng 1981, June 14, nitak 11 pm vel in, P. Munlian khua ah, ka khelhnate tengteng Pathian in Jesu Khrist Kros a a sihna tungtawn a hon ngaidamta ahi chih leh, kilemna honna bawlpih khinta ahi chih ka phawkkhia a, ka muangngamta hi. Huai ni a kipan in, hiai ngaihdamna mah ka hinpih a, ka sihpih ding leng ahi.

Laisiangthou, Hebrute 9:1-28; 10:1-39 na sung ah Pathian in ngaihdamna nasep Thukhunlui leh Thukhun thak a a sep dante i muh thei a, huan hiai ngaihdamna in atup leng Pathian leh mihing kal a kilemna ahi chih Romte 5:10,11 leh Kolos 1:20-23 ah chiangtak in i mu thei hi.

1. Ngaihdamna Thukhunlui Ah

Thukhunlui ah Ngaihdamna thumal a gelh chiang un Hebru pau in “Kapar” a zang deuh ua, huai in a gen tuh Liahkhuh chihna ahi. Huan thumal “nasa” leng a zang ua, huai tuh Pua, Lakhia chih genna ahi.

Israel mipite lak a Pathian a om ut ziak in Kihoupihna Puanbuk bawl dingdan nguntak in Mosi kiang ah nguntak in a hilh chih Exodus 25 akipan in muhtheih a, a zat dan uh Levitikas 16 akipan in muhtheih nawn hi. Hichibang in:

1.1. Siampulian Aaron in amah ate pa leh a innkuanpihte ate pa in khelhna khuhna a bawl masa ding, (Levi 16:6,11-14).

1.2. Huan Mipi ea pa Khelhna khuhna, (Lev.16:15-30).

Hichibang a, khelhna khuhna abawl chiang un, Israel te leh Pathian in leng nopsa mahmah ding in ka gingta hi. Kumpi David inleng “a tatleknate ngaihdam a om a, a khelhna khuh a om in, nuam a sa hi,” a na chi hianhian hial hi (Sam 32:1,2). Himahleh, hiai ngaihdamna nasep in kum khat vuak adaih a, huai ziak in kum teng in tatna kithoihna abawl gige uh akul hi, aziak tuh Bawngpate leh Kelte sisan in khelhnate lamang thei vual ahih louh ziak in, chi in Laisiangthou in hon hilh hi, (Heb. 10:3,4). Huan, hiai Siampu Aaron Kithoihna nasep zaw ataktak ahi kei. Ataktak Kithoihna sem ding in Pathian in Siampu lian thak Jesu Khrist a hon sawl hi, chih Laisiangthou mah in a hon hilhchian hi (Heb.10:1, 5).

2. Ngaihdamna Thukhun Thak Ah.

Thukhunthak ah Ngaihdamna a gen chiang un, Grik pau in “charizomai” thumal a zang ua, huaituh chitna, hehpihna genna ahi. Huan “aphiemi”= huai tuh Nusia, sawlkhia, chihna ahi a, huan “aphesis”= huaituh maisak, khahkhia, zalennna, genna ahi. “Pathian in khovel a it mahmah a, huchi’n a Tapa tang neihsun a pia” (John 3:16).

Hiai atung a thumal i gen tengteng Jesu hong pianna, (Luke 2:11; John 1:1,14; Phil. 2:5-11). 2. Jesu Kros a hong sihna, (Romte 5:8,10; Romte 3:25; 1John 2:2). 3. Jesu Thohnawnna, Matt. 28:5,6 & 18-20; Romte 10:9) Tanchinhoih (1 Kor. 15:3, 4) in atuun khawm vek hi.

Hebru laibu gelhtu in hichi in gen: Jesu Siampulianpen ding a hongpai in, khut a lamlouh biakbuk thupizaw leh bukimzaw sung ah a lut hi. Amah sisan mahmah tawi in, khatvei setden ding in munsiangthoupen sung ah a lutta hi. … tun ah Pathian ma ah i sik ua ding diing in van ah a lutzawta hi’ chi in hon na hilhchiang hi, (Heb. 9:12, 24). Jesu’n “na khelhnate ngaihdam ahita, thou inla, na lupna la inla, na inn ah pai in, kon chi” a chih mipan nop a sak dingdan leh a kipah dingdan thupi lua hi (Matt.5:23,24).

Hiai ziak in, Jesu Khrist tungtawn a khelhna ngaihdamna/kithoihna pen, Israelte pa vuak hinawn talou in, Leitung mite, a gingtate tengtengte pa leng ahong hita hi, (Romte 1:16).

3. Pathian in hon ngaihdam chiang in

Pathian in Jesu Khrist tungtawn a i khelhnate hon ngaihdam chiang in, Amah toh mihingte kal a kimelmakna apan kilemna a tapa Jesu Khrist tungtawn a hon na bawlpih a na hi gige hi, Romte 5:10,11. Huan hiai kilemna in tangtawn daih ahi, (Heb.9:12). Aman i khelhnate; A koihmang, A nulmang, meipi hihmang bang in A hihmang, A theigige nawnkei, chih i Laisiangthou in hon hilh hi, (Sam 103:12; Isai 43:25; 44:22; Jer. 31:34). Huai ziak in, Pathian hon ngaihdamna leh kilemna hon na bawlpih pen i muanngam ding, lungkim tak a i om ding ahi chih thei ni. Hiai ngaihdamna neikhate tengteng in midangte leng i ngaihdam ding, i kilempih ding i mohpuakna ahi chih Laisiangthou mah in hon hilh hi.

4. Midangte i ngaihdam dingdan.

Pathian ngaihdamna tangkhaten, midangte i ngaihdam chiang ua, thuluite pholhsuah suah nawnlou a, kingaihdam vengveng ding ahi chih laisiangthou in hon thupiak dan ahi. Huai tuh: 1. Ngaihdam gige ding (Matt. 18:21,22, 35), 2. Ei leh ei kithaloh toh kibang a ngaihdam ding, (Matt. 6:14; 7:12), 3. Pathian thumanna ahi chih thei kawm a ngaihdam ding (Eph.4:32), 4. Pathian in a tapa Jesu Khrist tungtawn a hon ngaihdamna pansan a kituahnawnna thu hon kemsak ahi chih leng i phawk tinten ding ahi (2 Kor.5:18,19).

Kum 1965 apan in Dr.Graham Stuart Staines, Australia Christian Missionary in India gam Odisa (Orisa) state ah a zi leh tate thum toh phakte etkolna na hongsem uhi. Nikhat a tapa 2 te (Philip & Timothy) toh ministry a pailai un, Hindu fundamental group, Bajrang Dal kichiten mei in, a gari sung ua a luplai un va hallum uhi (23 January 1999, Graham Staines-Wikipedia). A zi Gladys Staines leh a tanu Esther Staines-te bel a suakta uhi. A zi in, a pasal hallupsak mite Jesu Khris min in ngaidam ka hi a chi. Jesu Khrist in hon ngaihdam bang in, ka ngaidam a chih in India mipite leh khovel pumpi phonghalh hi. Hiai ngaihdamna in tualthat tute leh a damlai a zite nuta a kituak sak nawn a, huan Odisa mite ban ah India mite leh Australia mite kimelma thei ding lai, kilemna, kituahna a tungsak hi.

5. Ngaihdamna amanphat dan.

Ngai in, unaute kituak (kingaidam) diamdiam a omkhawm anak hoih in, anuam mahmah hi! (Sam 133). Nupa leh Lawmta lel leng i kingaihdam tuah leh nuam mahmah themtham a, i kihehsan chia thului pipi khawng i pholh chiang a zaw, kihi gualgual a, nop hetlou hi.

Innkuan sung ah leng; Nu leh Pa, Pi leh Pute kingaidam tuah siausiau thei zel a i om chiang in, i tate, tuten nuamsa lua in, vangam a na chi hial mah ua, chihtuak lua a na hi ahi. Huchi hilou a, insung a han hatlua bang i om chiang in, innsung leng Innsung bangzou nawnlou in, Han sung abang thei hi.

Pawlpi sung bang leng makaite kingaidam leh kituak diamdiam a, kilemtak a a hong om chiang un, mipiten nop i sa mahmah ua, heutute vaihawm siam i sa ua, namsung bang leng khangtou hulhul in i kithei uhi. Himahleh, kikalhtuah, ngaihdamna zang ut omlou, kihansan tuah, kimelma tuah a ahong om chiang un, Pawlpi sung bangleng, pawlpisung bangzou nawnlou in, Hanpi sung abang thei hi.

Huaiziak in, Pathian Ngaihdamna tang khinsaten Pathian toh i kilemtak bang a midangte toh leng kilemna neih ding chih ahi. Hiai zat ding a apoimoh laitak a leng i zat ut hetlouh chiang un, aneikhaloupi khat, i hi hiam? chih kidot tuak hi. Aziak tuh “Pathian in Khrist a nou a hon ngaihdam bang in, noumau leng kingaidam tuah chiat un.” a hon chih ziak in, (Eph.4:23).

6. Thukhitna

Pathian ngaihdamna i zat theihna ding in; Pathian in Jesu Khrist a hon ngaihdam a Kilemna honna bawlpih khinta ahi chih i gintak masak ngai ahi. Huai i neih nung a midangte tung a i zat ding atup thupipen ahi. Huai i zat theihna ding in; i deihdan a thil apailouh chiang bang aleng kidek teitei a kul hi. Huan, chillum toh i valh zelzel ding bang leng atam mahmah sek hi. Ngaidam i chih chiang a thukkiklou chihna leng hipah ahi. Huai in ki-ittuah i hi chih a gen a, Jesu Khrist nungzuite i hi chih a taklang hi (John 13:34, 35).

EBCC Songtal in dated 3rd January 2021, Pathianni masa zingkal 6:00 Am in Departmental Join Devotional Prayer Fellowship leh makai leh makaite kikal a hihkhelhnate kingaihdam tuahna hun zang uhi. Huai ni mah Mipi Biakna kikhop 10:00Am hun in Saptuam makai teng mah in Mipite kiang ah Kumlui a hihkhelhnate tengteng Jesu Khrist min in hon ngaidam un chi in mipite kiang ah ngaihdam ngetna bawl ua, mipiten leng ngaidam chi in kingaihdam tuahna Pastor thumsakna toh hun manphatak zang uhi.

Ngaihdamna in atup, Pathian ngaihdamna gingtate khat-le-khat kingaihdam tuah ding ahi chih thei in, Ngaihdamna manphatak-a zang chiat thei ding in Khasiangthou in simtute hon vualzawl hen. Ka kipak.