Huan kihehpih chiat a lainatna nei in om unla, Pathian in Khrist a nou a hon ngaihdam bang in, noumau leng kingaidam tuah chiat un (Eph. 4:32),

Hipi huaisetak lak apan kumlui hon zoh pih a kumthak hon muaksak i Toupa Jesu min manpha toh Kumthak chibai. Kumthak nopna leh vualzawlna na tuang uah om ta hen. Kumthak mel i muhna ding in kha 12, nipikal 52, ban ah ni 365 bang hong bei phot kul hi. Tua hun sung a i tuah haksatna, buaina, natna, satna, taksap lungzinna tengteng hon palkai pih Toupa thupina pia in a min i phat uhi.

KIPAHTHU GENNI:- Kum 2020 bultung lam apan leitung mun tuamtuam hipi thupitak in hon nuai a mi tampite hinna lak mang a om, tampi mah in tutan zong thuak tou zel lai himah lehang, hun leh kumte a pai ngei a pai a, kumthak lungdam huai hon muhsak nawn tak man in kipahthu i gen uhi. Ei theihna leh muhna dan khawng a bel hiai tan tan le lamen ban lou i hih lai ua, Toupa hoihna leh a hehpihna ziak liau liau a dam leh bit a i om khawng thupi in manpha lua mahmah ahihna toh lungdam kou ni.

KUMLUI NUNTAKNA ENTHAK IN: Pathian tuh a sepsa, a bawlsa thilte vel a, enkik tawntung Pathian ahi (Gen.1:31). Pathian in thil siamte a siam lai in, a zoh ma teng sem tou mai lou in, ni khat bawl in, a sepsa enkik zel hi. Hoih hi a chih chiang in a ban zom tou pan hi. Tua bang a niguk sung a bawl khit in ni sagihni in khawl pan hi. Kumlui sung na nuntakna enkik dih le:- Na kampau, na gamtat, na sep na bawl, na khualzinna, na gamvakna, na sum zonna, na lawm polhte, na nek na dawnte enkik mah dih. A etlawm a maban ah leng kisun zom thei leh na chih bangzah a om a, Pathian mit ah leng se ken teh na chih ngam teng sunzom inla, midang muh ding a leng na deih louh, Pathian in leng hon awi ding a na gintak louh te paikhe ngam in. Hiai ding a Toupan kumthak hon musak hilai maithei ahi.

HAKSATNA THUAK DING IN KIGING IN:- A lungdam huai kumthak/ Happy new year chi a i muak chiat uh himahleh khenkhatte ading a sih kum, nat kum, zawngkhal kum, liam kum, bai kum mah hong hi thou thou ding hi. Himahleh mi khenkhatte ading a bel kiten kum, sepna muh kum, kaisang kum, sum leh pai zonna, louma a tuahphat kum, chidam kum, nopsak kum leh lohchin kum hong hi ding hi. Huaiziak in kum khat sung in nopna bekbek hong tung lou ding a, haksatna zong hong tung thei gige ahi chih thei in, a tuak ding in zong kiging khawl zaw leng ki khial lou ding hi. Paunak in “A hoih pen ding gel inla, a sepen tuak din kiging khawl in” chi hi. A nuam lam kia tuak ding a na kingaihsut leh haksatna hong tun chiang in na puk ding a, haksatna thuak ding a na kigin leh a hong tun chiang in zong na pang zou ding hi. Paul in (Phil.4:12-13) “Zawn dan ka siam a, hauhdan leng ka siam, thilchih leh thil teng teng a gilvah leh gilkial a om theihna leh niang leh tasam a om theihna thuguk ka thei kheta hi. A hon hih hatpa Khrist ah thil teng teng ka hih thei hi.” a chih bang in Paul hihhatpa Khrist Jesu mah in nang leh kei zong hon hih hat thei, hon hih dam thei, hon hih hau thei ahih man in amah bel ni.

KIMANGNGILH BAWL IN MALAM SAWN IN:- Sihna manna, taksap lungzinte, buaina leh lungkhamna, inkuan, lawm leh vual, saptuam leh khotang a simmohna, nuaisiahna, tuambawlna leh a dangdang na tuahte teng teng sial sial nawn kenla, kimangngilh bawl in, midangten zong a na tuahsa vek uh ahi. Tuate na sial sial leh na khase sem sem ding a, na tha hong nem dia ma na sawn zou kei kha ding hi. Kanan gam zuan Israel mite zong lampi ah tampitak si in, makai lian Mosi mah leng hong si hi. Gilkial, dangtakna, natna satna leh buaina tuamtuam zong tuak uh, tua teng toh phun phun chiak chiak lou thum thum tau tau lou in, a dam lai ten chiamsa Kanan gam mitsuan in kalsuan uhi. Melmapa Setan dou ngai, inkuan ading daikaih ngai, nek ding dawn ding ngaihtuah ngai, u leh nau kal sai ngai, mimal kikep ngai saptuam leh khotang ading panlak ngaihna teng teng ah hun paisate sang a tam sem zou zaw ding, thupi sem khe zaw ding in Toupa hatna muang in theihtawp suah a pang din kisa zaw ni.

THIL HOIH SEP SAWM IN: I zongsat thil hoih loute, a hoih louh dan thei a i nutsiat chiang kia toh mi hoih mipha kihi zou nai lou a, thil hoih sep tupna toh i kipat a, thil hoih thil pha tampi i hon sep theih chiang in mi hoih mi pha ki hi pan ding hi. Nang a tupna leh lunggulhna om kei leh kumthak hun thak ten hon khek ngei lou ding hi. Toupan i tung a thil hoih ahihte, ahon itna ziak a i phulou pi vualzawlna hon piakte, hoihna ziak a i lohkhiak leng hilou hamphatna tuamtuam i tante gel inla, Toupa kiang ah bang ahia na piak thuk sam ding. Lungsim hoih pu in na hoih sem leng, Toupa lungkim ding a, inkuan leh ei toh kisai kha kuapeuh zong heh lou ding uhi. Huai tuh ahi Toupa i tung a a hoihna thupi takte i thuk sam theihna ding. Na hoih sem ding a siam mah leng i hih ziak un theihtawp in pan la chiat ni.

TUP LEH NGIM NEI IN:- Hipi thupitak in hon nuai a, mi tampiten a hinna manpha takte uh a tan nung ua, kumthak, hun thak a pilut a om michih ten, bang i tum un bang i ngim ua ? Pilna leh siamna zongtuten, sepna bawlna zongtuten, sum leh pai zongtuten, inma louma ngaihtuah tuten ngaihtuah na thuk tak apan gel veng veng in, mahni aituam mai hilou, tangpi tangta damna ding, insak inkhang toh dam khawmna ding tup leh ngim in nei ni. Inkuan vai ah- insung na leh vanzat poimoh bang bang te khawng, inkuan biakna tunding ngai leh puahphat ngaite, biakna leh thilpiak, sawm a khat leh mimal missionary vakna, genthei panpihna dia neih bang bang phal tak a piak. Tuate ban ah gam vaihawmte, nam heutute, saptuam makaite, leh khovel pumpi a missionaryte ading a thumtu a pan ding chihte khawng leh adang gen khak louh hoih pipi om theite tup leh ngim in nei thei leng deih huai lua hi. Na tup a hoih peuh nak leh kuhkal tak in pang leng hon zoh pih ding Toupa i Pathian muanhuai lua hi.

NGAIHDAMNA:- Tukum i thupi pen leitung, vantung kilemsaktu, tangpi tangta poimoh, mihau milian kal a zong poimoh, mi zawng daikilkal ate ading a zong lian lua a neih vual louh hi tuan lou, thupoimoh leh kul mah mah khat hi. I tangtel i lak khiakna Ephesa laikhak pen Sawltak Paul in Rome khawpi a suangkulh atan sung mah a, a gelh hi a, Ephesa Saptuam mite lak a a pulak nop mah mah thil thum poimoh a sak mahmah te:-

1. Hehpihna ziak a ginna tung tawn a hotdam hi ding a Pathian sehkholh i hih dan bang,

2. Saptuam pen Khrist’ Saptuam hi a, Khrist tuh thil tengteng lutang ahihdan, Amah ziak a Pathian leh mihing kikal a kilemna hong om, huai mah in nam tengteng pumkhat a hon bawl ahihdan leh

3. Khristiante melmapa Diabol douna dia galvan muan huai pen Pathian’ thu leh Khasiangthou a dim dingte i hihna tuh a latsak nop mahmah thumte ahi uhi. Huaite ban a tua i gennop bik tuh 4:32 a

KIHEHPIH CHIAT: Inkuan u-le-nau, insak-inkhang ban ah mihinpihte kuapeuhmah kihehpih chiat di.

LAINATNA NEI IN OM UN: Hiai lainatna tuh itna leh hehpihna ban a panpihna pe ding a hon dingkhesaktu, hon kalsuansaktu, ban hon zaksaktu leh hon gamtang saktu tuh ahi. ‘Lainatna’ nei in om un chih thupiak a za mai hilou, a thei mai le hilou, a mu mai leng hisam lou in, hin pih sawmni.

KINGAIDAM TUAH CHIAT UN: Ngaihdam piomoh lou kuamah om lou, a lian leh a neu leng, heutu leh mipi leng kingaidam tuah ding a thupiak i hi uhi. Kingaihdamna dia zuih ding leh etton ding michih in akibang a i zat khawm ding model/condition hon kawkmuh tuh “PATHIAN IN KHRIST A NOU A HON NGAIHDAM BANG IN” chih ahihman in Pathian ngaihdamna tang nai louten bel thei ban lou ding, himahleh a tangsaten bel Jesu Khrist a Pathian in hon ngaihdam bang a midangte ngaidam tu a i pan ding tuh i Laisiangthou hon sinsak leh i biak Pathian hon lamet dan ahi.Tuabang a kingaidam tuah thei chiat ding in Pathian in michih hon vualzawl chiatta hen.