Tungnung pen ah Pathian thupi henla, leitung a a kipahpih mahmah mihingte lakah lemthu leng hen, a chi uhi. Luka 2:14
Ni 05-11-2020 zan ahi a, New Lamka a BAZAR INDIA ten a innkong mai leh asung teng (Disco Light) vak in a chei phengphung uhi. Ka inkuan wattsapp uah ka kapkhia a, huchiin, ka tate laka khat in “Khristian lou te tata” chih a hon gelh hi. Ka lungsim akhoih in a thaksak a, Khrismas decoration dana abawl uh ahimah de aw? Electric vak a kizat nung in chu Biakin teng ah Electric zang in Khristmas decoration chi in mawitaktak in a kicheita phengphung hi. Electric a tunma a , Biakinn chei dia loulam a zouzam pak leh daivel a tlangsam pakte pua a a kichei lai bang in le mawi kisa thou chu hi a. Huaibang a i cheite in Pathian thupipen hen a chi hia? Zing ka thou a, lamlian dung teng ah Second hand puan ana kizalh dim phengphung mai! Khovel sumlepai leh damsung khosakna di buai a buai a kiom laiin leh, Covid-19 galhang anai deuhdeuh laiin khovel Hondampa omsun, Jesu Khrist pian champha hongtung di ana hita mai aka le!
Belamchingten gamdai a belam a chin lai un, zanlai in Toupa Angel a kiang uah va kilak in, akim avel teng uh, Toupa thupina vak in a tanvak phengphung mai! Ngamlekhat a huchitela vak lamdang leh roupi in a tatvak tak in, alau hial uh. Lau leh ling a aom laiun, Angel in a kiang uah, Laukei unla, ngai un, michih aa ding in Tanchinhoih kipahhuai mahmah kon tut ahi. Tuniin, nou ading in David khua ah Hondampa a piangta. Amah Khrist Toupa ahi. Hiai nou aa dingi n chiamtehna ding ahi, Naungek puanduang a kituam gan anpiakna kuang sung a lum na va muding uh hi. Hiai bang thu a zak un a lungsim uh van a-khai abang ngei di, gen dituan leng theilou in a kientuah khiukheu ngei du le. Huchihlai mah in, ngamlekhat in Van mipite ahong omkhawm guih uh, ta deuhdeuh aw, chihmai dia lungsim thawmhau a a omlai un, Pathian phatnala a honsa uhi. Asiam un ahing petmah din ka ngaihtuah. Ei biakinn a Khristmas nipini zing a Tuailai Pawl ten lapawl a sak uh a siamsiam utoh, huaite sang a siamzaw laitham hitel di uh hi. A lasak uh: Tungnung pen ah Pathian thupi (pen) henla, leitunga a kipahpih mahmah mihingte lakah lemthu leng hen, chi uhi. Hiai naungek piang, leitung naungek bang himailou, Tungnung pen ah Pathian thupi hen, chihla a zak un a om maimai thei nawnkei ua, Bethlehem a naungek leh a nu Mari leh a pa Joseph toh vamu in, chibai a vabuk ua, a kiklam uh a hindan angeina uh kikhek in, Pathian pahtawi leh phatkawm in a kikta uh. Hallelujah!
Khrismas lopna programme kumdang a bang in i bawl diam? chih i gen theikei. Himahleh, michih in amah lungsung ah a kisakkholh akul hi. Biakin kilawmtak a i chei mawi ah Pathian a thupi diam? Biakinn a sermon siamtak i ngaih laiin leh i gen laiin, kou bangchu, ahihkeileh, kei bangchu, chiin thupina Jesu i lehpel kha hia? Lapawl leh la a lenkhawmna a siamtak a la i sak laiin, Pathian a thupipen diam? Tukum khristmas chu nuam ka sa lua ua, a Jesu lamlam leng ka phawk kei uh i chi mai hia? Gan lianpi gou a, meh limtak i bawl a i neklai in, Thupipen kua ahi mah a? Zan a lasa a lenkhawm nuamtak a zannih zanthum i zanhah laiin, Pathian a thupipen in i koih hia? Na bula naichik a na tutpih maw? Na tung a thupipen kingaihtuah a hun e.
Inkuante toh sawttak kimutheiloute, khrismas zang a tua muntuam a om tetoh i kimuh khawm a, programme i zat laiin kua a alianpen? Kua a athupipen? Pathian thupina i pia hia? Hulaiin khristmas suanlam a, inlam chimaini, koimun peuh hilele, kimukhawm dia kinaihkhawm in, Biakin le mulou, saptuamte Programme leng zanglou, theilou, aituam a programme zang gai maileng om a baihlam tel. Hichibang miten zaw, tungnungpen ah Pathian thupi hen i chi kei top di uh.
Hiai hun laitak a kisalah, Kumpi Herod leng amah sanga lalzaw di leh thupizaw di a om uh deihlou in, huchih hunlai a naungek piang pasal kumnih chiang nuailam teng a thatsak a, chethei leh hihfuh kisa mahleh, Kumpi Jesu a that zoukei!! Hallelujah!! Amah tung ah Pathian khut a hong tu a, sawtlou chik nung in, Laisiangthou in hichin agen: Herod in thupina Pathian a piaklouh man in, Toupa Vansawltak khat in ama tung ah khut a kha guih a, hut in a nelum ta hi. Nas 12:23. Pathian vualzawlna i tante, i ne a, i dawn a, thei napi in ihih teitei a, ka neihsa ahi, ne in dawn leng leng, a neloute leh a dawnloute sang in ka hoihzaw i chi kha di e, pilvang ni! I gil apan in hon nesetu di a pawtthei gige hi.
Kumpi Ahasuera hunlai in a miliante laka kikoihsang leh kikoihlian tak a om a, Haman ahi. Kumpipa maipha zong in Amah kaisanna di leh a lalna di, a thuneihna di kia buaipih in, a gamsung ua Judate teng thahna di a gel a, kumpipa phalna in a phuang hi. Thupai kisa in, Mordekai khailupna di chiin, ama inkong ah tong sawmnga a sang khuam a phuh hi. Himahleh, tua khuam aphuh ah kumpipan amah a khailum maimah hi. Esther 7:10. Sorkar ah hiam, Society leh pawl khatpeuh ah, heutu leh thunei a i pan khak hun in Pathian thupi hen i chi kha zel thei hia? Ahuchih keileh Haman tan bang i tang kha thei hi.
Pathian mizat, kuapeuhte, fimkhurtak leh pilvang tak a paukam leh gamtat ah, Toupa deihlam bang ahia chia kiniamkhiak tak a, Toupa nasep hun ahi. Kisathei in tua i septe a a vualzawlna kha leh sa a i muhte in hon kisatheisak in, ‘Ka’ chih lungput abaih mai sek di. Vaihawmna tutphah a tut hun in Toupa deihdan ngak a zon sang in ka deihdan, ka hoihsak dan chih a baihlam thei, Pilvan a ngai. Chialpina a i thugen Toupa kha in zang a, miten khelh kiphawkna aneih ua, kha a halhna atan zungzung lai un, Tungnung pen ah Pathian thupi hen chilou a, thupina khuk khak baihlam tak di ahi. Pathian mizat Mosi ngei leng Israel mite tui ngen a a phun lai un, Pathian in mipite kaikhawm unla, mipite mitmuh in suangpi houpih/thupia inla, aman tui a pawtkhe sak dia, mite leh gan ten a dawn ding uh, a chi. Himahleh, Mosi in, nou mihelhatte aw, hiai suangpi apan tui konpiak uh kul hia? a chi hi. Mosi in a ban a zak a, suangpi nihvei asat a, tui ahong pawt. Kisimna 2:8-10. Pathian in Mosi leh Aron kiang ah, Non gintak louh ua, Israel suante mitmuh a non pahtawi ding zah a non pahtawi louh ziak un, hiai omkhawmte ka piak gam ah na pilut kei ding uh, a chi hi. Kisimna 2:12.
I sep i bawl teng leh i gamtatna bangteng ah i neih-i lam teng leh i hihna teng ah Pathian thupi hen chizel din Toupa kha in simtute hon vualzawl hen.
Tungnungpen ah thupi hen aw(2),
Chin semgua ging lawmnou toh
Lemleng hen chin zawi awi uh.
Amen