“Kristian khedapbawlpa’n a nna a sep chiang in khedapte’ tung ah kross neuchik a koih siuhseuh kei a, himahleh khedap hoih taktak a bawlkhia hi, aziakbel, siamneeltak a nnasepna te Pathian’ lunglutna ahihziak in.” - Martin Luther

THUPATNA: Bill kichi mi khat a om a, college a a kai sung in Khristian hong suak hi. Ni khat, Biakinn khat ah kikhawm ding in a kuan hi. Mi dim vekta ahih man in a tutna ding muzou lou hi. Tutna ding zong in a nunglam apat in awl awl in paisuk a, kikhomte’n en riauriau lel uhi. Pulpit lam naih mahmah ta himahleh a tutna ding a muzou tuankei hi. Huchi in, tuanglai a carpet tung ah tusuk hi.
Hiai in kikhawmte lungsim a sunuamkei a, lah kuamah a pau kei uhi. Hiai bang a a omlai un, anung vual lam apan Saptuam Upa khat kum a leng upa mahmah ta chiangkhun khun kawm in awl in pulpit lam manoh in a pai hi. Hiai Saptuam Upa pa ahihleh kum sawm-giat ding mi ahi a, a sam leng kang gai vek ta hi. Hat nawnlou ahih man in awlawl in tangvalpa kiang lam manoh in a pai zel hi. Pastor in a thugen lai khawl hial in ana ngak a, Biakinn sung ah a chiangkhun in tuangtung a sut ging loungal zak ding omlou in dai sipsip hi. Biakinn a kikhawm teng in amah a en vek ua, bang hih ding a huai lam zuan a pai hiam chih lah a dong ngam omlou in a dai sipsip uhi.

A chiangkhun tuangtung ah ngasuk in Bill kiang ah awl in tusuk hi. Huchi in a khut khat Bill liang ah nga in, Bill kia tulou in ava tutpih hi. Pastor in awl in thugen hon pan nawn a, hichi in hon gen hi: “Tuni a ka thugen na theivek nawn kei ding uhi. Himahleh tuni a na thilmuh uh na mangngilh nawn kei ding uhi. Na hindan uh pilvang un. Mikhenkhat-te’ ading a a sim uh Bible hi ding na hi” chih teng gen in thugen zou hi.

Tu kha i Toupa Jesu Khrist eite tan ding a hong pianna theihgigena hun zang ding a i kisak lai in, Jesu Khrist tungtawn a hihna manpha i ngah uh kembittu muanhuai toh kisai enkhawm leng i chi hi. Tukum in lam tuamtuam a kemtu muanhuai i hihna ding thu i genta ua, i hamphatpih chiat ngei leng i lamen hi. Huchih lai in hihna kitheilou leng hilou himahleh hihna ngeingaihlou i hi duam chih theih ding in i om uhi. Khristian hi ngal himahleh Khristian-te om ding bang a omlou chih thumal thugentute apan zak in om mun mahmah hi. I omdan mite’n hon sim gige uh ahih man in i omdan apan in bang thu i genkhe tampen dia? Mite’n i khopi a gen chiang un a lungsim ah bang a dawk masa pen dia?

HIHNA KITHEIHCHIAN POIMOH
Gingtu masate amau a kigen chiang un unaute, nungzuite, gingtute, ahihkeileh misiangthoute chih bang in kigen zel uhi. Amau leh amau kisap nading in Khristian chih zanglou uhi. Himahleh ginglou mite’n amaute Khristian chi in chiamteh uhi. Khristian chih thumal bang hun a kizangpan hiam chih theih hilou hi. Lai Siangthou a i muh dan in Antiok khua a gingtute Khristian chi in kiminloh masapen uhi (Nas. 11:26). Huai hun lai in Khristian chih thumal gingtute lak ah kizang tamlou hihtuak hi. Lai Siangthou ah mun thum kia ah Khristian chih thumal kimu hi (Nas. 11:26; 26:28, leh 1 Pet. 4:16).

Bangziak a mite’n Khristian chi a sam uh hi ding hiam chih toh kisai in gendan tuamtuam omthei mahleh gingtu masate’n a zuihpa uh Khrist’ sinsakna zui kia hilou in midangte leng Khrist’ sinsakna zui ding a chial a, A tanchin a tangkoupih ziak uh hiding hi. Tuaziak in Khrist nungzuite (Khrist-ian) chih a sap leh theih in a om uhi.

Huchihlai in, Khristian chih thumal bulsut in kuate Khristian hi uhiam chih dawnna bawl ding hile hang, khatna ah, Jesu Khrist Pathian ahi chih pom a, a sinsaknate zui ding a kipe mite genna ahi. Saptuam pawlpi khat a minkhumna in Khristian hon suaksaklou hi. Huai kia leng hilou in Khristian innkuan a pan khankhiakna in Khristian hon suaksaklou hi. Lai Siangthou in sa dan a piang in tangtawn gam luah theilou ding a, Pathian Kumpi gam lutna ding in kha a piang ngai ahi chi in hon hilh hi (Johan 3:5-6). CS Lewis in a laibu Mere Christianity ah hiai bang in gen hi, “Jesu Khrist a ginna i chih chiang in Khrist deihdan leh Khrist sinsakna bang a om tupna ahi,” chi hi. Aban a gen zelna ah mi i muante sinsakna kizui ut a; mi i gintaklouhte sinsakna kizui utlou hi. Huaiziak in Khrist a ding a na kipiak taktak leh A’ thu sinsakna teng zui ding a kimansa a na om ding ahi chi hi.

Nihna ah, Khristiante ahih leh satan lalgam apan Pathian lalgam a lut mite genna ahi. Mi Khristian ahih ma in satan lalgam a om in satan deihdan in khosa uhi. Himahleh Khristian a hong suah chiang in Pathian’ Kumpi lalgam khua-leh-tui hihna neita ahih man in, Pathian deihna bang in khosata hi (Eph. 2:1-10). Khovel paidan ah leng gam khat khua-leh-tui hihna i neih chiang in i tenna gamte dan zuih ngai hi. Tua bang mah in Pathian Kumpi lalgam khua-leh-tui hihna i neih chiang in Pathian deihdan a khosa ding a lamette kihita hi. Pathian deihdan Lai Siangthou ah kichiantak in kimu thei hi. Soren Kierkegaard in Provocations: Spiritual Writings of Kierkegaard ah, “Lai Siangthou kichi theihsiamlouh ding a theihhaksa hilou ahi. Himaleh, ei Khristian-te migen hakpi i hi ua, Lai Siangthou i sim chiang un eilam a zuih ding kisam tampi om ahihdan i theih tel luat man un theisiam theilou bang in i kilimbawlna zel uhi,” chi in gelh hi.

JAKOB HINKHUA APAN SINLAI
Lai Siangthou a hihna kitheihmoh bawl a hinkhua zang i muh theih ahihleh Esau leh Jakob-te unau ahi. Esau in u hihna ngaineu in annbak khat in zuak hi (Gen. 25: 27-34). Genesis bung 27 na ah Jakob in apa Isak khem in a u’ vualzawlna a suhsak thu i mu thei hi. A u’ vualzawlna a tan theih ah ahih kul hi. A u gamlak a sakhi man ding a a kuan kal in Jakob a pa kiang ah va pai in “Esau ka hi” va kichi hi (Gen. 27:19). Vualzawlna a deih man in a hihnalou gen in a u’ vualzawlna laksak hi. Hiai bang a a thilhih Esau in a theih in a pute kholam ah Jakob taimang hi.

A pute khua a kum 20 a om sung in Pathian in Jakob ompih a vualzawl hi. Himahleh huai ah leng omden theilou in innlam zuan a lampi a a pai lai un Esau toh kituak ding chih a hon thei hi. A u toh kituah ding lau in amah kia in huai zan hun zang hi. Huchi in, huai zan mah in Pathian toh kibuan uhi (Gen. 32: 22-32). Jakob in vualzawlna a ngen a, Pathian in “Na min bang ahia?” chi in dong a. Hiai hun ah “Esau ka hi,” kichi nawnlou in, “Jakob” chi in dawng hi. Pathian in vualzawl a, amin leng Israel chi in kheksak hi.

I tulai Khristian hinkhua toh kituak mahmah sak in a om hi. Khrist apan i tan uh i hihna mangngilh leh ngeingaihlou a leilam nopsakna leh vualzawlna delh a paikhak theih ahih dan mutheih in a om hi. CS Lewis in a laibu The weight of Glory, and the Other Addresses ah hiai bang in a gelh hi: “I Toupa i itna uh leh Amah a ding a i kipiakna uh Amah ngaih in neu mahmah hi. Eite’n lungsim kimkhat lel pu in Pathian i it ua, Aman a tultheilou nopsakna a hon chiam lai in eite’n khovel nopsakna lel delh in i tai uhi. Kilungkim baih thei lua hi,” chi hi. David Platt in a laibu Radical: Taking Back Your Faith from the American Dream ah Khrist a ding a kipiakna kichi thubaih hingeilou ahih dan gen in, “…. Hausakna, lungnopnna, damtheihna ana hi gige lou a, Khrist thumang ding a kipiakna zaw bangkim tanna ahi,” chi hi. Himahleh Pathian a ding a muanhuaite’n Khrist ah kipahman ngah ding uhi.

THUKHITNA
Henri J.M. Nouwen in “Kum bangtan hiam a kipan in hinkhua a khemna lianpen kichi lochinna hiam, minthan utna hiam, thuneihna leh hausakna hilou in hihna ngeingaihlouhna ahi,” chi hi. Mahatma Gandhi in Khristian-te hinkhua a et chiang in Khrist omdan leh sinsakna toh kibanglou salua ahih man in Khrist sinsakna hoih sa mahleh, Khristian suah ding utlou kichi hi. Aman hiai bang in gen kichi hi “Khristian-te omdan leh Khrist sinsakna kibanglou ahih man in, Khrist deih mahleng Khristiante ka deihkei hi,” chi hi. Khalam hat gige kichi thil hitheilou hikei mahleh khalam a bah hun om thei zel hi. Billy Graham in, “Khristian hinkhua ah hat gige kichi thil haksapi ahi. Kei mahmah leng lunglel tak a ka om hun a om zel hi. Pathian kiang a mittui toh ‘Pathian aw, hon ngaidam in’ ahih kei leh ‘Hon panpih in’ ka chih hun tam mahmah hi,” chi hi. Khristian hinkhua a poimoh mahmah ahihleh khalam a bah i hih lam kitheih leh huai apan thohkhiak theih ahi. Lai Siangthou in “Huailou in, tu bang hun ahia chih na thei ua, ihmu khanloh a hun mahmahta chih na thei uhi. Tun zaw i gintak tunglai sang in i hotdamna a nai zawta ngal a. Zan a bei dekdekta a, khua a vak dekta hi; huaiziak in mial a thilhihte paikhia in vak thuam in i kithuam ding uh” (Rom. 13:11-12) chi hi. Max Lucado, thugen minthang leh laigelhtu, in, “Pathian in na khualzinna anuam ding hon chilou hi, himahleh a tawpna manpha ding hon chi zaw hi,” chi hi. Huaiziak in, i om dan leh Khrist Tanchin Hoih a kituak (Phil. 1:27) na hiam chih kivel chiat a, Jesu Khrist tungtawn a hihna i ngah uh kembittu muanhuai hithei ding in Toupa’n hon vualzawl chiat hen