Thupatna: Khovel buaina leh haksatna lak a tukum 2020 a dia Christmas hunnuam leh manpha muthei dia damna hon pia i biak Pathian minphat in, simtute naungek Jesu Kris min in chibai.

Tutung in “Michih a dia tanchinhoih kipahhuai…” Lk 2:10 a Angelten hong tangkoupih thu saulou sutkhawm le uthuaisa in THUPI ding in kon tel hi. Hiai thu ka sim chiang a ka lungsim a dotna hong omzel tuh- Bang ziak a Jesu’ pian vansawltak Angelte hichi lawmlawm a kipak ahi ua? Bang thuguk om hi ding ahia chih ahi.

Christmas tuh December 25 ni nuamtak a zatding chih mai ahi kei a, Santa Claus ziak, Innte, singkungte leh Biakinte kilawmtak a cheini, Malls khawng a van discount ziak kia leng ahi kei a; lathak, puanthak leh thilthak kipiaktuah (gift exchange) ziak leng ahi sam kei hi. Kris mikhialte hondam dia hong kisuk-awngni, Pathian tapa mihing hong suahni, Pathian leh mikhialte kigawmnawn na dia LEMNA tanchinhoih hong puakni ahi. Huaiziak in, Jesu Kris hong pian michih adia thukipahhuai ahih dan saulou in enni.

Pathian thupina leitung a hong kiknawn (Rom 3:23)

Christmas ni, leitung mikhialte lak a Pathian thupina hong kiknawn ni ahi. Jawlnei Isai in “Huaiziak in TOUPA mahmah in chiamtehna nou a honpe ding; ngai un, nungak siangthou khat a gai ding a, tapa a nei ding a, a min ‘IMMANUEL’ a sa ding uh” (Is 6:14) a chi hi. IMMANUEL tuh ‘I kiang ah Pathian a om” chihna ahi. Leitung ah ni thupi tampi om a, tuate lak a Christmas a thupina leh a chituamna tuh Pathian thupina in a nutsiatsa mihingte, itna leh hehpihna toh hongveh a hong zonkhiak a, a thupina i tanvuallouh a sianthouna leh a dikna toh hong thopnawn theihna dia i lak a hong lutnawn ni leh i lak ua ahong ten nonna ni ahi. Jawlnei Hosia ah “Ka mite na hi kei uh” chih a a omna mun uah, hichi ahi ding a, “Pathian hing tate na hi uh” a kiang ua chih ahi ding hi. ‘Huan lei ah kei din amah ka tuh ding a; chitna tanglounu tung ah chitna ka musak ding; ka mite hiloute kiang ah, “Ka mite na hi uh” ka chi ding a; amau, “Ka Pathian na hi” a hon chi ding uhi’ a chih a tangtunna ahi (Hos 1:10, 2:23).

Sawltak Paul in, Rome saptuamte a laikhakna ah ‘Mi tengteng in thil a hihkhelh ua, Pathian thupina a tan zohlouh nung in” chi in gen hi. Eden a thumanlouhna khelhna a puk a Pathian kiheisante i hi. Huaiziak a Pathian in i hin nawn khak dilau in Eden a pan hon nohdokte i hi (Gen 3:24). Huai omdan tuh Pathian apan khenkhiak a om a khalam a site i hi uhi. Huchih lai in, Pathian in a itna tawpnei lou a hon it in, a tapa Jesu tungtawn a tatna ding lampi hon bawlsak in, a thupina hong silhsak nawn hi (Luke 15:22-24, Is 43:25). Tanchinhoih Johan in “A tung in thu a om, Thu tuh Pathian kiang ah a om, Thu tuh Pathian ahi. Huai thu tuh sa a hong suak a, eite lak ah ahong tengta hi, eiten a THUPINA i mu uh, Pa in tapa tang a neihsun thupina ngei…” 1:1; 14a a chi hi. Pa thupina Kris Jesu tungtawn a silhsak in i om nawn hi. Hiai ziak in ahi Paul in Rome mite kiang ah “…tun ah zaw Kris Jesu a omte ading in siamlouh tansakna himhim a omta kei hi” 8:1 a chih. La in “Ka chitna Toupa, ka hoihna Jesu, nang kia na hi e ka hatna leh pahna” huai tuh phulouh hehpihna i ngahnawnna genna ahi.

Henkol sut dia hong pai (KRIS).

Pathian leh mihing hon khentu lianpen KHELHNA ahi. Mihing ten Pathian i naihtheih louhna ding un, Pathian lam ah a sianthouna in hon dal a, eilak a hong omtheih louhna ding in i Khelhna leh thulimlouhna in dal hi (Is 59:1,2). Mihingten khophawk leh khophawklou a khelhna i khoihkhakten Pathian sukha hi (Sam 51:4). Aman a thuak dan hichin gen hi “Gilead a singnai damdawi omlou hia? Huai ah hihdammi a om ka hia? Bang dia ka mite, ka tanu damtheilou ahia?” a chi hi (Jer 8:22). Huan A thuaknat dan a genna in “Ka lu tui hi in, ka mitkhitui tuinak hi le aw, ka mi, ka tanu thahte ading in a sun a zan in ka kap ding” chi hi (Jer 9:1). Tate gitlouhna leh thulimlouhna Nu leh Pa ten i thuaknat bang in, mihingte khelhna Pathian in thuakna mahmah hi. Huaiziak in a damna ding lampi hiai bang in hon gelsak hi. Jawlnei Isai in “Kei, kei mahmah, kei mah leh keimah ziak lel a, na tatlekna uh nulmangpa ka hi; na khelhnate uleng ka thei gige nawnta kei ding” a chi hi (Is 43:25). Hotdam a i om theihna ding in Pathian in a hih di teng hon hihsak in, Ginna a san din hon luikhia a, huchia a gingta a Jesu hondampa a pomte Khawlna ah hon lutpih hi (Heb 4) a chi hi. Hiai mah ahi Sawltak Paul in Rome mite kiang ah “Khrist bel a gingta peuhmahte adin diktatna a muh theihna ding un DAN tawpna ahi” (Rom 10:4) a chih. Hih ding leh hihlouh ding DAN sung ah i awk hi. Huai apan suahtakna ding in ei ah hoihna leh chitna a om kei (Rom 7:13-25). Suahtak tum a i pan zohpeuh leh i thulimlouhna a dawk deuhdeuh hi (Lk 18:9-14). Mihingte hoihna pen leng puanse nin bang phet ahi Toupan hon chi hi (Is 64:6). Hiai hihsiangna ding in Ganta sisan a kiching kei a; sahbon leh ta-ngal in a silsiangthei kei hi (Heb 10:4, Jer 2:22). I hoihna leh dikna in gen anei kei (Rom 9:31) Siampu lianpen ten leng Toupa lungkimna ding in hihtheih a neikei uhi. Huaiziak in, Hebrute kiang a laikhak gelhtu in “Huchi in naupangte sa leh sisan tangte ahih chiat ziak un, amah ngei in huai bangmah a tangsam hi; a sihna a sihna thuneipa, Diabol, a hih manthat theihna ding leh, Sih kihtak ziak a damsung sikha a omte tengteng a suahtaksak theihna ding in” chi hi (2:14). Tangtawn sihna a koltangte sutkhe ding leh tankhe ding in, Kris in a thupina teng suah khiak a Bethlehem gan inn hongtel a ngai hi (Phi 2:6-11). Hebrai in “…ei mah bang a lam tuamtuam a khemna tuaksa, khelh bel khiallou i nei…” (4:15) a chi hi. Tangtawn sihna apan hon sut ding, khelhna neilou, hoih bukim i poimoh uh, Amah (KRIS) ah i mu uhi. Hiai ahi Paul in Korinthte kiang a laikhak 1:30na “…Kris tuh i pilna bang, i diktatna bang, i sianthouna bang, i tatna bang hi din a bawlta…” a chihna ziak. Romemite kiang a laikhak 8:1, 33-34 ah leng “…tun ah zaw Kris Jesu a omte ading in siamlouh tansakna himhim a omta kei hi. Pathian mitelte kuan a hia a hek ding? Siamtangsakpa Pathian ahi ngal a. Kuan ahia siamlouh tangsak ding? Sipen Khrist Jesu ahi ngal a…” a chi nawn hi. Kris a suahtakna i ngah a, dik, hoih leh siangthou a pom i hihtheihna ding in ei sik in sing a hamsia hong thuak in, dan hamsia apan hon tankheta hi (Gal 3:13a). Kris tuh sal apan i suahtakna diktak a hong hita hi (Jn 8:36). Amah (Kris) ahi DAN tawpna, i tatlekna tengteng hon ngaidamtu leh batna lai thupiak a gelh i tung ua om eimah hon dou gigete Kros a kilhlum a, hon lakmangsak a, a sisan a hon nulmangsak tu (Kol 2:14). Hiai ziak khawng ahi di Sawltak Paul in “…a suang peuhmah in Toupa suang hen” a chih (1Kor 13:1). Hiai ding a hong kipiakni CHRISTMAS ei gingtute ading in thupi in, manpha hi.

Thukhitna:
Khial a si a, mangthang ding i hih lai in, Toupa Pathian in i khelh thuphatawina ding in a tapa Jesu Kris hon pia hi (Rome 3:25). Mihingte tanchin sia neite i hi. Piandan a Pathian thangpaihna nuai a piangte, hinkhua a buaite i hi uh. I hinkhua paisa bawlthak ut mah lehang hih theih i nei nawn kei. Hiaite tengteng bawlthak leh siamthak di in Toupan a tapa hon sawl hi. Ama ziak in NGAIHDAMNA LEH SIAMTANSAKNA i ngahta hi. Hiai itna ziak a thilthawnpiak i ngah kan a thupi leh kipahhuai om nawnlou ding hi. Toupan hon it ziak in a tapa hon peta; en Amah bang i pethuk dia? Toupan nang tektek hon deih hi. Simtu teng Toupan hon vualzawl chiat hen.