Ephesa-te 2:10 “Thil hoih hih ding in Khrist Jesu ah siam a om in, amah khutsuak i hi ngal ua; huai thil hoih hih tuh i khosakdan ding in Pathian in a bawlkhol ahi.”

Koimun peuh a om ka tuailai pihte i Toupa leh Hondampa Jesu Khrist min in Itna Chibai ka hon buk hi.

Thupatna: Pathian in khovel ah mihing a siamte khelhna a alut uh toh kiton in Amah kiang a kik theihna ding in ‘Adam a sam a, a kiang ah, kaw om na hia?’ chi’n a zong/sam in nna a sem a. Tuni tan in a sem lellel a khovel omlai teng tua nna mah sem toutou lai ding ahi. Tua nasepna a nang leng hiai leitung a na damsung teng tua nasepna a tel ding in hon deih in hamphatna kong liantak hon hon sak hi. Hiai mohpuakna Khamangthang mat leh Tanchinhoih puanzakna pen na MISSIONS ahi. Pathian in ei gingtu omsa lak a a nasepna leh Khovel a ginglou mite lak a Tanchinhoih puanzakna nasep te nei tuaktuak ding a a hon deih na hi. Pathian in hiai nasepna pen na hinkhua a mohpuakna nga hon gawtte lak a nasepna hiang khat ahi.

Missions kichi Latin pau a kila khia a gen noptak ahih leh ‘sawlkhia’ chihna ahi. Gingtu khat na hihleh hiai khovel a tua Tanchinhoih puangkhia leh na mihinpihte lak a theihpihtu khat hiding a sawl na hi. Jesu’n “Pa’n Kei hon sawl bang in, Ken leng noute ka hon sawl hi” a na chi hi. Jesu’n leitung a hongpaina san a thei chiang mahmah a, kum 12 ahih in a Pa nasep maban sun zom ding ahihdan a gen a, kum 21 nunglam in Kross a a sih in Ama mohpuakna leh nasep ding a hongpaina san “Zoh ahita” a na chi hi. Jesu’n khovel a a len lai a a nasep pen tua nang leh ken sutzop ding, a ziak Amah tatsa leh nungzuite A taksa leh pumpi a kizomte i hihman uh ahi. Aman a taksa mahmah a a nasep pen en khalam a i sutzop ding uh ahi.

Pathian in mihingte Setan sal a kipan pikhia a Amah toh kizopna leh kipumkhatna neih nawn ding a tup nga huai tuh: Pathian it ding, Pathian Inkuan a mikhat hiding, Pathian bang a om ding, Pathian nna sem ding leh midangte kiang a a tanchin hilh ding ahi. Khatvei Pathian ta i hih nung Pathian in midangte a kiang a pitung ding a eite hon zang hizaw ahi. Kros a hon tan in huchia huai tatna leh Amah tanchin puangzak dia hon sawlkhia ahi.

I. MISSION A POIMOHNA

Na hinkhua a Pathian thiltup na sepsuah pen Pathian Thupina piakna chikhat ahi. Laisiangthou in hiai nasepna poimoh ahihdan mun tamtak ah ana taklang hi.

1. Tua leitung a na mission pen Jesu missions sutzopna ahi.

Jesu nungzui khat na hih leh Jesu’n huai nasep a pat pen na sutzop ding na mohpuakna ahi. Jesun Amah kiang ahong pai ding kia hilou in Amah a dia kalsuan ding a leng hon chial ahi. Hiai Mission poimoh law mahmah ahih man in Jesu mahmah in leng nga vei, gendan chi nga leh Laisiangthou bu nga te ah ana gen tuantuan hi. Hiai mohpuakna piak a omna pen chiangtak a Bang hun in, Koisan ah, Bangziak in chih leh Bangchi bang in chihte theihchiang poimoh mahmah ding hi.

Thupiak gol ah Jesun, “Huan, a kiang uah, Khovel tengteng ah pai unla, thilsiam tengteng kiang ah Tanchin Hoih hilh un. A gingta a baptisma tang tuh hotdam in a om ding ua; gingtalou tuh siamlouh tang in a om ding uh” a chi (Mark 16:15). Hiai thupiak michih kiang a piak ahi, Pastor te kia hilou, Missionary te kia leng hisam lou ahi. Hiai Jesu a pan thupiak gol ahih toh tel (choose) ding dang omlou a sep leh zuih ding a kipia ahi. Pathian inkuan sung mikhat na hih a ahihleh hiai nasepna pen a loutheilou a sep ding, semlou a om in Pathian thuman louhna chikhat ahi.

Pathian in na kim na kiang a ginglou mi omte tung a hiai mohpuakna hon piak ahihlam ana ngeingaih lou na hih khakleh na mohpuakna nang tung liauliau a a koih ahi. Laisiangthou in “Mi gilou kiang a ka thu, Na si mahmah ding ahi, ka chih a, huai mi gilou a hinna hum ding a a gitlouhna lampi paisan ding a vauna na neih louh a, vauna thu leng na hilh sam louh a, huai mi gitlouhna a a sih leh a sisan moh nang lak ah kon sik ngeingei ding hi”(Ezk. 3:18). Nang Gingtu khat na hihna kua hiam khat honna thei mahmah omkha ding ahihman in Jesu tanchin na hilh ding nang mohpuakna ahi.

2. Mission nasepna hun lemtang leh hun manphatak ahi.

Hiai nasepna a mohpuakna pen lian mahmah ahih lailai in Pathian in hon zat theih hamphat huai mahmah ahi. Paul in “Himahleh, bangkim Pathian kiang a kipan a pawt ahi a; aman Khrist ziak in amah toh kituak in hon bawl a, kituahna nasepna a honpia hi” (2Kor. 5:18). Hiai nasepna in hamphatna chi nih hon piak om hi, Pathian toh nasem khawm leh Amah adia theihpihtu ahi. A Kumpi gam lamtouhna ding a semkhawm leh pangkhawm i hi. Jesu’n i hotdamna hon hihkip sak in a inkuan ah hon guanglut in, Khasiangthou in hon thuam a, a palai ding a hon zang lai hamphat huai mahmah ahi.

3. Na Mission Khantawn a dia chiamteh tak nei Nasep ahi.

Midangte tangtawn mun ding gen sak a nasem na hihman in nasep dangteng sang in manpha zaw hi. Na nasep bel a beini om ding ahi, himahleh na Missions nasepna a gah in beini neilou a omden ding ahihman in manpha ahi.

Huaiziak a hiai nasep pen a kin leh poimoh ahi. Laisiangthou in “hun na neih sung un a tamthei pen sem un,” (Eph. 5:16). “khua hong vak ding a kua mah in a sep theihlouh hun hongtung ding ahi” (Rom. 13:12) chi hi. Dak in ngak neilou a paipai ahihman in, zingchiang chi a tutmuang a om hun hilou ahi. Nikhat ni chiang in i nasep gahte ziak in van mun a tuate toh a lopna hun nuam zang ding i hihman in kithalawp huai in ngaklah huai mahmah ahi.

Hiai i chih chiang in tua na nasep lel pen tawp a damsung ading a Missionnary in hong pang in chi hilou i hi. Pathian in na omna mun peuh a na hihna bangbang toh a tanchin puangzak leh a nasem ding a hon deih ahi. Sinlai naupang leh tuailai, sinsaktu, Dawrkai leh office nasem na hi maithei; koimun peuh ah bang nna peuh sem mahle chin tuate mah pansan in na lawm leh vual seppihte niteng a na kisukkhak mite kiang a tanchin puanzak theih gige ding a hun lem piak leh tuate mah chiamteh tak nei ahi.

4. Na Mission na hinkhua a tup hon musak ding ahi.

William James in hichi in a chi, “Hinkhua a hoih leh manpha pen a zat in gah thupitak leh manphatak hon musak ding ahi.” Pathian kumpigam kia a omden ding chih thudik ahi. Huchilou thildang tengteng bel a mangthang ding ahi. Huaiziak a hinkhua a tup kichian nei a i hin ding, Biakna hinkhua nei a hin ding, Pathian gam nasem leh lei a na hinsan pen semsuah ding, huai tunung a omden ding gah hoihtak a suah ding chih ahi. Pathian in hon piak nna pen na sep buchin/kuitung lou a thil dang a lohching mahmah na hih lai a le Pathian mitmuh a lohsam hi veve na hi. Khovel a mitampi hilou in na kisukkhak pih leh kisai khak pih mite kiang a thugen huai dia Pathian hon koih na hi hi. Mi khat lel nang ziak a vangam a om ding hileh leng na hinkhua in thil thupi leh manphatak sem khia na hihman in manpha diak suak hi.

II. NA MISSION SEPSUAH NA DING A AMAN PIAK DING POIMOH BANG

Na mission sepsuahna ding in na ut leh geeldan pen na nutsiat a Pathian in nang a thiltup pen a sep suahna ding a na kipiak poimoh mahmah ahi. Na ut dandan a hinkhua zang a hiai mah Pathian in kei a thiltup ahi chih om thei ngeingei lou ding ahi. Jesu kampau bang a “Kei thu hilou in Nang thu hihen” chih theih poimoh ahi. Na hinkhua tup leh ngim, leh kalsuan dingdan bangkim na geel in Toupa hiai bang huai bang ka ut a hon lohching/vualzawl in chia thum theih tham ahi. Himahleh mahni angsung khual lua in midang a dia hing kha lou a om khak pen Pathian in hon sawlna leh siam a omna san sepsuah louhna leh Pathian hon deihna bang a hinkhua zatlouhna chi khat ahihmanin poi mahmah ding hi. Tua sang in Toupa khamangthang khat bek na kiang tun lou in ka hinna la mahmah ken chia thum ding, tua bang a nang leh na gam ading a vanzat ding in kong kipia, hon vualzawl in chia thum ding ahi. LST in “Na hihna bangbang in Toupa kiang ah a vanzat manpha ding in kipia in, a ban Aman hih na ding ahi chih om hi.” Na hinkhua a Pathian thiltup pen semsuah ding a na kipiak a ahih nakleh bangteng hongtung zong leh Pathian apan a vualzawlna simseng louh in hon zui ngeingei ding ahi, a poimoh masa eilam a kipiak khiak ngamna ahi.

III. KHATVEI LAI JESU DI’N

Unau, tuni in Pathian in hun manphatak hon bawlsak leh piak lai in hiai hun pen hamphatna a la in hun i neih sun pen a manpha pen in i zang thei diam? Lakik thei leng maw chih la phuaktu in hun kikhelsa lakik thei in na kiang ah Khamangthang khat bek hon tun leng a chih lai in nang tua bang chih kullou a tua hun neilai na hih man in khatvei Jesu di’n na hon kipan thak diam? Jesu’n Laisiangthou a mi a hihdam chiang in a thu vaikhak i muh chuh ‘pai inla Pathian in nang dia thil lamdang hon hihsak va gen in’ chih hi gige ahi. Tutpih mai leh lungkim pih mailou in midang te kianga na damna thu va gen pih ding na mohpuakna ahi. Khatvei lai Jesu di’n na hihtheih bangbang, thumna maw? Thilpiak ah? Ahi’h keileh nang leng tua nasem ding a kipumpiak a kuan thei leh tangkou pih thei na hi. Aw tuailai na hatlai nite midangte ading a zang ding in Toupa min in i kichial hi. Simtute tengteng Pathian in hon vualzawl chiatta hen.