Thumanna (obedience) kichi Genesis laibu akipan Kilakna laibu tan ah a poimohdan kimuthei hi. Pathian in mihingte a hon bawlna san ‘Amah lauhdan siam ding leh a thupiakte zuih (thuman) ding ahi (Ekli 12:13). Thupiak Sawmte (Exo.20) apat in leng Pathian in a thupiak zuih leh man ding ngai poimoh mahmah ahihdan muh theih in om hi. Diuteronomi 11:26-28 ah tomchik in gen leng ‘Na thuman uh leh vualzawl a om ding’ ‘Na thuman kei uh leh bel hamsiat a om ding’ chih kimu hi. Gingtute ading a ‘Thumanna’ kichi Thukhun thak ah i Toupa Jesu Khrist hinkhua tungtawn ah muh ding, sin ding leh sepsuah ding ahihdan kimu hi (Luka 22:42; Phi.2:8). Thuman ahoih a, himahleh ‘kua thu man ding? chih Khristian piangthak kichite ading in kidot tuak mahmah hi. Thumanna kichi amah kia in a hoih bukim kei a, i thumanna mi pen ah adik leh a diklouh, ahoih leh ahoihlouh a kinga zaw ding hi. Pathian in kuadang, thildangteng sang in amah thuman ding leh zahtak ding ahon ngiat masa pen hi. Tua ziak hinteh Sawltak Peter in mihingte thuman sang in Pathian thuman ahoih zaw ana chih (Nasepte 4:19; 5:29). Hiai ah Peter leh sawltakte dinmun tulaitak in eilam a thil-tung hi leh mi tampiten ‘Heutute thuman ding’ ‘Heutute chih dandan zuih ding’ ‘heutute zahtak ding’ ‘heutute demlouh ding’ ‘thukhel, phengphi’ kichi ngeingei ding hi. Hiai muntak ah Peter leh sawltak dangte a khelpan, phengphi ahi kei uh, ban ah heutute kalh ding himhim a gamtat sawm leng ahi kei uhi. Thuman ding leh zahtak masak ding leh lauh masak ding Pathian leh a thu siangthou ahihdan amuh chet luat ziak uh ahi zaw hi. Thuman ahoih a himahleh Pathian thu toh kituakloute ah zaw Pathian thu mah (Bible) mang teitei zaw ni. Jesu’n sapum that a kha that theiloute kihta kei unla, Gehenna a kha leh sapum hihmang theipa kihta zaw un chi hi (Mat.10:28). Kua thu i mang zel a? I lauhte thu hilou hiam? Pathian i lauh masak pen leh amah thu mah man masak pen ding ahi. Laisiangthou ah Pathian Thumanna a kichi bang zah hiam sauloulou in i en suk ding –Jesu’n thumang ding in hon sam: Na hon it uh leh Ka thupiakte na zui ding uhi (John 14:15). A nungzuite i hihna ah amah i it leh a thupiakte i zuih (thuman) ding ahi.

Pathian in a thumang mite vuaksuak saklou (Gen.22:18). Ka thu na man ziak in na suan ah khovel a chichih vualzawl in a om ding uh chi in a sikha Abraham a thuman ziak in Pathian in vualzawl hi. Exodus 19:5 ah Israelte kiang ah Pathian in ka aw na man taktak ua, ka thukhun na zuih taktak uh leh, lei tengteng kei a ahihziak in mite sang in kei ading in gou tuambik na hi ding uhi chi hi. Pathian thumanna in Amah i itna chiansak hi (1Jhn 5:2-3). Hiai ah Pathian tate in itna ah Pathian i it a, a thupiakte i zui chih i thei uhi. Pathian i itna hiai ahi, a thupiakte i zuihna ah; a thupiakte a haksa ngal kei a. Piangthak lah tam deuhdeuh himahleh a thupiak zuih sawm lah tawm mahmah mai. Kithoihna sang in thuman a hoih zaw (1Sam.15:22). Toupa’n Toupa thuzuih a kipahpih bang in haltum thillatte leh kithoihnate a kipahpih ahia? Ngai in, kithoihna sang in a thuman a hoih zaw a, belamtal thau sang in a thuman a hoih zaw hi. Thilpiak sawm-a-khat, missionary vakna, building leh infrastructure, power leh galvan leh mihing thahatnate ah Pathian akipak masa kei. Khristiante tung ah Pathian kipahna masa penpen a thuman, a thupiakte zuih ahi. Pathian kipahna masa leh kipahna sangpen a thutak a om ahi chih i Laisiangthou ah chiangtak in Pathian in hon hilh hi (3John 4). Pathian kipahna masa leh kipahna sangpen a thu-piakte zuih (thuman) ahihleh i Khristianna kiveltuak tampi om ding hi. Mimal ah hi in a Pawlpi (Saptuam leh Organisation tuamtuam) in Pathian thu i mang hia? A Laisiangthou ah i ding kip hia? Huai thutak i gum ngam hia? Diktatna leh siangthouna toh i sem in i kalsuan hiam? Pathian thuman ding i ngai poimoh masa hia? I vaihawmdante, i thilgeldante leh i thilsaidante Laisiangthou toh kituak mah hiam chihte ki-et kul hi. Khovel in thupi hon sa in, hon kipahpih in khut hon bet khum mahleh Pathian lak a i mohpuakna masa a thuman ding, a thupiakte zuih ding pen i fail khak in zaw poi mahmah ding hi. Thumanna vualzawlna, thumanlouhna hamsia ahihleh i gam i nam, i saptuam in i maban ah koi lam ah i puk ding a chih kingaihtuah huai mahmah hi. Pathian thumang lou, Pathian laulou in zaw mimal hi in a pawlpi ah i mangthang ding uhi. Pathian laulou a, a thupiakte zuilou nam zaw nam vangsia, nam hamsiat leh nam mangthang hiding hi. Hih leng hikhinta houh i hi hia? Ahih kei leh huai lam manoh houh i hita hia? Pathian thupiakte zui in a thu manna lam ah kipanthak ni (2Kro 7:14). Kisathei in om kei ni, kingaihniam a hunta, kisik a i sulhei leh ngaihdamna i tang ding. A liamma’n i zuan meng ding uhi.