“… na sapum uh, na sung ua om Pathian apan a na muh uh, Kha Siangthou temple ahi chih na thei kei ua hia? Noumau a leng na hi kei uhi.” (1Korinth 6:19).

Thupatna: Khovel buaina tampi kal a “Mahni pumpi kemtu muanhuai” chih thupi gelh thei dia hun manpha hon pia, Pa Pathian leh KTZ Editorial board tung ah kipahthu ka gen hi. Hiai thupi mi tengteng adia poimoh ahi a, himahleh Jesu Khrist sisan a leisa Pathian teenna mi hitate ading bikdeuh in i gen ding.

I. I PUMPI PATHIAN TENNA TEMPLE AHI – (I Kor 6: 19 -20)

Paul in, “… na sapum uh, na sung ua om, Pathian apan a na muh uh, Kha Siangthou temple ahi, chih na thei kei ua hia? Noumau a leng na hikei uhi. Noute man a leisa na hihman un, na pumpi uh leh na kha Pathian a mah in, Pathian pahtawi un” chi hi. Pathian in A Tapa Jesu Khrist sisan a hon leisa i hihman un gingtute setan a hiam, ei mimal a hiam i hinawn kei uhi. Jesu Khrist i hondampa ding a i pomkhit nung in, i pumpi leh i Kha hon neitu kikhekta a, hon neitu Pathian a hihman in amah deihna bang a “I pumpi leh Kha kemtu muanhuai” hih ding i mohpuak ahi.

Mihingte nangawn in mihing bawlsa thilte iit leh duattak in i kem ua, i van khenkhatte bang, a hon petu, ahihkeileh a bawltu zir a ngaina leh deihthohtak a i kephoih bang i omsak zomah hi. Tuabang mah in, i taksa pumpi pathiante Pathian, kumpite Kumpipa’ hon bawl i hi ua, hon bawltu leh hon neitu Pathian ziak a i pumpi ngaipoimoh leh ngaisang a muanhuaitak a i kephoih ding ahi. Tua ban ah, khelhna ziak a si a mangthang ding i hihlai a, a Tapa Jesu Khrist a a hon leite i hihman un, i pumpi thildang tengteng sang a i kephoih a i kepbit sem ding uh ahi. Jesu Khrist hondampa a i pom ni a kipan in Pathian a’ i hita ua, hon neitu a tuam dungzui in i hinkhua ah chituamna omta hi. Aziak tuh, Pathian Kha Siangthou tenna temple i hihziak un ei ut dandan a i pumpi zang nawnlou in, hon neitupa deihna bang a omding a i taksa pumpi kemtu muanhuai hih ding gingtute mohpuak ahi hi.

II. I PUMPI KEP SIANGTHOU DING AHI

1. Taksa pumpi chidamna i kephoih ding ahi- I taksa pumpi chidamlou a i nat leh sat hun a pumpi chidamna i kep theihtawp a kep leh etkol ding i mohpuak ahi. Mi khenkhatten, a damlouh nikhua un doctor ki etsak, doctor dot leh damdawi nek ngaisalou khop in Pathian muang kichi ua, “Pathian kiang a damna ngen a thum i vele, damdawi i nek zel in Pathian muanglou i hikei dia” chi hial bang leng om hi. Pathian hon hihdam ding a muanhuai lou chi i hikei a, a muanhuai tham a, himahleh, i gen utpen zaw Pathian in ei tung a mohpuakna hon piak pen hihlou a, Pathian muang chih topmai leng Pathian deihna na hi vek khollou khathei hi. Jesu’n “Mi damtheite’n doctor a kiphamoh kei ua, mi dam theiloute’n a kiphamoh zaw uh chi hi (Matt 9:12; Mark 2:17)”. Huai ziak in, i taksapum chidamna etkolna leh kepna toh kisai in Pathian in eilam a i hih ding mohpuakna hon pia a, huaipen i hihtheih tan a i hihtuh i taksapum kepna toh kisai a kemtu muanhuai i hihna ahi hi.

Nek leh dawn a kikep di – I taksa pumpi damtheihna dia poimoh, gilkial leh dangtak hun a tha leh zung adia phatuam dingte ahitheitan a poimoh ngaih a limsak ding ahi. Huaimah tuh i sapum chidamna kepna ding a i mohpuak ahi.

Korinthte kiang a Paul laikhak ah “…na nek uhiam, na dawn uhiam, na hihpeuhmah uh Pathian thupina ding ngen in hih un chi hi (I Kor 10:31),”. I nek-le-dawn, i tep-le-muam tampite ei taksa hon suse thei ban a, i taksa a dia phattuamna om kholloute zaw limsa mah-le-hangle ei adia hoihlou ahih ban ah, Pathian thupina ding leng hikhalou ahihman in, tua bangte hih teitei louh hoihzaw ding hi.

Thessalonikate kiang a Paul laikhak ah “… lemna Pathian ngei in nou hon hihsiangthou sipsip hen; na kha uh, na lungsim uleh na pumpi uh, i Toupa Jesu Khrist hongpai chiang in gensiat bei in, humbit in omsuak sipsip hen” chi hi (I Thess 5:23).

Peter laikhak ah “Nou hon sampa a siangthou bang in nou leng na tatdan tengteng uah hong siangthou un; Noute na siangthou ding uh ahi, kei ka siangthou ngal a” chi hi (I Pet 1:15,16).

Laisiangthou i et chiang in gingtute Pathian tenna inn, Pathian hing Temple i hi ua, ei a ompa leh tengpa siangthou lua ahihman in, ei duhduh ne a dawn ding in hon phal lou hi. Amah bang a Siangthou ding in Toupa’n a tenna mite hon deih hi. Huai ziak in, i nek leh dawn ah i pumpi kep siangthou ding nang leh kei mohpuak ahi.

2. Taksa pumpi kep siangthou ding - I mel leh puam a hoih a, i piandan a fuh ziak a Pathian pahtak loh kihilou a, eite hon siamtu Pa Pathian in amah deihdan leh amah lungkimna bangtak a hon bawl i taksapum siangthoutak a kem leh zuun ding in mohpuakna hon pia a, huai mohpuakna hon piak pen Toupa deihna bang a i sep chiang in tuamah Pathian pahtak lam hi zaw hi. I Toupa Pathian siangthou lua ahihman in, Siangthouna lah Pathian hihnate lak a khat ahi ngal a. Anung i zuih, i kumpipa leh Toupa’n amah bang a siangthou ding in hon phut hi. Pathian dungsun a amah bang a i om theihna ding a poimohte lak a khat tuh i taksapum kepsiangthou ding ahi.

3. Silh leh ten siangthoutak a kep di – I silh leh ten neih sunsunte siangthoutak a kep tuh Toupa deihlam ahi. Silh-le-ten analh leh hoih mantam pipi i neihte hoih in etlawm mahmah in, i biakna kikhopna munte leng kilawmsak tuan mahmah hi. Silh-le-ten etlawm leh hoihte a manphat mahmah lai in, a lehlam ah i silh-le-ten hoih leh etlawm mantam pipi i silh a i teen te’n a nei leh neilou kal hon kikhen sak khathei hi. Huaichu ahi dingsa ei vele i chikha maithei, adik mah leng ahi. I gen utpen zaw i Pathian biakna munte leh i khawmpina munte ah silh-le-ten hoih neih zohlouh ziak a zumhuaisa a i biakna hun leh munte a telngamlou bang i lak ah a om kha diam chih hon ngaihtuahsak hi. Puan hoih leh mantam silhlouh ding i chihna hilou hi. Tuabang silh leh ten i neihte’n Pathian mel a liahkha diam! I kicheinate’n midangte Pathian lam apan a gamla sak deuhdeuh kha diam chih pilvanhuai i chihna ahi. Toupa’n i silh leh teente siangthou ding in deih hi, amah lah a siangthou ngal a.

III. MIHINGTE NASEM DING A BAWL I HI, THADAH LOUH DING AHI (Eph 4:28; 5:16).

“Guta in gu nawn kei hen; tasam kiang a piak ding a neih theihna ding in, a khut a thilhoih sem in gim zaw hen” (Eph 4:28).

Paul in hindan lui a gen “guktak” ahi a, hindan thak a gen “nasep” ding ahi. I changtel ah “Guta in gu nawn kei hen; a khut a thil hoih sem in gimzaw hen” chi hi. Jesu Khrist hondampa a pom a Pathian ta i hih a Pathian tenna temple i hihnung a i om dingdan a Paul in a gen tuh guktak tawpsan kia a hun lou in, nasep pat ding chih ahi. “Guta in gu nawn kei hen; tasam kiang a piak ding a neih theihna ding in, a khut a thil hoih sem in gimzaw hen” chih piangthakte hihna ding a a gen ahi.

Nasep toh kisai Bible a i muhdan en ni:

Gen 3: 17, 23 ah “… Na damsung teng in gimtak a sem in a gah na neta ding,” chi in Pathian in Adam a lakkhiakna lei let ding in Eden huan a pan sawlkhia hi.

Matt 10: 10; Luke 10:7 ah “Nasem mi tuh loh mutak ahi” chi hi.

2Thess 3:10 in “Kuapeuh in nna a sepnop kei leh a nek leng ne kei hen” chi hi.

Laisiangthou gen bang in Pathian’ tate ading in thadah lou a eimah khut ngei a nasep ding i mohpuak ahi. Damlouhna ziak a nasem theilou i hih kei nak leh, Pathian tate ading in ei inkuan sung ading kia hilou in, midangte taksapna tanpha i panpihtheihna ding in Pathian hon piak i tha-le-zungte zang in na i sem ding uhi.

Thukhitna: I changtel in a gen bang in, Jesu Khrist gingtute Pathian Kha Siangthou tenna temple i hih ziak in ei a tengpa siangthou lua ahihman in, eite leng siangthou ding in hon deih hi. Huai ziak in, Toupa deihna bang a eimah pumpi i kepsiangthou theihna ding in i nek, i dawn, i tep, i muam, i silh-i ten-te ah Pathian min thupina ding i tup leh ngim ahih ding ahi. Huan, taksa chidamna ding a kikep siangthou ding eimah mohpuak ahihman in, tua mohpuakna semthei chiat ding in Pathian in hon vualzawl hen. 