Thupatna:

Pathian in Mosi kiang ah “Pharo lungtang ka khauhsak ding” a chi (Eks. 4:21b). Pharo lungtang khauh mahmahsa Pathian in a thilhihtheihna leh tungnunna a muhsakna ding a hihkhauh sem ding ahihdan gen ahi. Pharo lungtang khauh dan Eksodas laibu ah 12vei kigenkha a, huaite lak ah amasa 6vei Amah leh Amah kikhauhsak ahi; a nanung 6vei mah Toupa’n a khauhsak ahi. Laisiangthou a kigelhdan tak en ni.

Pharo lungtang a khauh 

(Pharoah’s heart was hard) 

1. “Pharo in a lungtang a khauhsak a” (Eks. 7:13). Mosi leh Aron Aigupta kumpipa Pharo mai ah a ding uh a Toupa thupiak bang in a chiangkhun uh gul suaksak uhi. Aigupta mitkhial dawitawite’n leng a chiangkhun uh gul a suaksak sam uhi. Himahleh Aron chiangkhun in amau chiangkhunte a valhkhin vek hi. Huchibang a thil omdan a muh in Pharo a heh mahmah a a lungtang a khauhsak hi.

2. “Pharo lungtang a khauh a” (Eks. 7:22). Aigupta gam a lui tuite sisan suakvek a gawtna a tuahlai un Aigupta mipite, tui dawn ding tasam in buai petmah in a buaigawp uhi. Pharo in huai thil lamdang leh mipite buaidan mu mahleh a lungtang a hihkhauh a Mosi leh Aron thugen a ngaikhe nuamkei hi. 

3. Pharo in a lungtang a khauhsak a” (Eks. 8:15). Aigupta gam in Ukeng a gawtna a maituah tak in Pharo in Mosi leh Aron a samsak a Kei leh ka mite Ukeng apan ka bitna ding un Pathian kiang ah hon thumsak un a chi. Ukeng tengteng lakmang ahihtak in buaina vengta, himahleh Pharo in a tung a zangta chih a theih in a lungtang a khauhsak a, amaute thu a ngaikhe kei hi.

4. “Pharo in a lungtang a khauhsak a” (Eks. 8:19). Pathian in Mosi a houpih a Aron kiang ah gen in, na chiang lik inla leivui sat in a chi. Leivui tengteng hik a suaksak a, Aigupta mi tengteng in hik a gawtna a tuak uhi. Huchih lai in Aigupta mitkhial dawitawiten, hiai zaw Pathian khutzung ahi chi in a lau mahmah uhi. Himahleh Pharo in a lungtang a khauhsak lai a amaute a ngaikhe kei hi. 

5. “Pharo in a lungtang a khauhsak a” (Eks. 8:32). Pharo in Mosi leh Aron-te thugen a ngaihkhiak noplouh ziak in Aigupta gam pumpi ah thou honpi lungkhamhuai tak in a hong dimta hi. Pharo in Mosi kiang ah kon paisak ding hi, kei ading in hon ngetsak un a chi nawn hi. Mosi a thum a Toupa’n a thumna dawng in thou honpite a lamangta hi. Himahleh hiai hun inleng Pharo in alungtang a khauhsak a a paisak nuam kei hi.

6. “Pharo lungtang a khauh a” (Eks. 9:7). Pharo in Israelte Aigupta a kipan a pawtsak noplouh ziak in Bawng honte, Sakol honte, Sangawngsau honte tung ah sihna a tung hi. Huchihlai in, Israelte gantate’n a thuak hetkei uh a, Aiguptate gan honte kia’n thuak uhi. Himahleh Pharo lungtang a khauh a mite a paisak nuam kei hi.

Toupa’n Pharo lungtang khauhsak 

(Lord hardened Pharoah’s heart)

7. “TOUPA’N Pharo lungtang a khauh sak a” (Eks. 9:12). Toupa thu bang in Mosi Pharo mai a ding in a khut dim in vut a la a vanlam ah a theh hi. Mitung leh satung ah meimatum in a hong dimta hi. Meimatum ziak in mitkhial dawitawite Mosi ma ah a ding theita kei uhi. Huchi in Toupa’n Pharo lungtang a khauhsak a amaute thu a ngaikhe nuam kei lai hi.

8. “Pharo lungtang TOUPA’N a khauhsak” (Eks. 9:35). Toupa thu bang in Mosi in vanlam ah a khut a zankhia a mi leh sa leh Aigupta gam tengteng a haichite tung ah gial akia hi. Aiguptate’n gialpi a gawtna namenlou a thuak uhi. Toupa’n Pharo leh a sikhate lungtang a khauhsak a Mosi leh Aron thu a ngaikhe kei uhi.

9. “TOUPA’N Pharo lungtang a khauhsak a” (Eks. 10:20) Aigupta gam in Khaukhup a gawtna a thuak lai un leimai tengteng a tuam ziak un gamteng a mialzou hial hi. Huchi bang gawtna a thuaklai un Toupa’n Pharo lungtang akhauhsak a Israel suante gam akipan a paisak nuam kei hi.

10. “TOUPA’N Pharo lungtang a khauhsak a” (Eks. 10:27). Mosi in vanlam a a khutliktou a a thum lai in gam sung a Aigupta mite omna mun teng mial bikbekna in atuam hi. Huchi a khomial a gawtna a thuak lai un Toupa’n Pharo lungtang a khauhsak a amaute a paisak nuam kei lai hi.

11. “TOUPA’N Pharo lungtang a khauhsak a” (Eks. 11:10). Mosi in Aigupta gam a piang masa mihing leh gantate sihna ding thu a gen lai in Toupa’n Pharo lungtang akhauhsak a a ngaikhe nuam kei hi. Himahleh, Pathian khut thuakzou nawnlou ahiding a zankim lai in Mosi leh Aron kiang ah Aigupta a kipan pawtsak ding thupiak a bawl hi (Eks. 12:31).

12. “TOUPA’N Aigupta kumpipa Pharo lungtang a khauhsak a” (Eks. 14:8). Israelte’n Aigupta gam a pawtsan nung un Baal Zephon mun a Tuipisan kiang ah buaigawp uh ahi chih Pharo in a theihtak in delhzui pah hi. Toupa’n a lungtang a khauhsak a sepaih hon thupitak toh Kangtalai hoihpen 600 leh Aigupta gam a Kangtalai om tengteng a heutu chiat uh tonpih in a delhta uhi. Pharo kingakna sepaih muanhuai tengteng tuipisan in a valhmang vek a, Pharo kiang a report pe ding kuamah a omta kei uhi. Pharo bang achiphet diam aw chih theihnop huai mahleh a tanchin kigen nawnlou hi. 

Thukhitna leh Sinlai: 

Tukum May kha vel in COVID-19 natna hipi hong leng in India hon nawk pan a, i lau mahmah mai a i lungtang a zulzou hi. Pathian nei i hi chi in i thum a chiklaipeuh a zahngai gige Pathian in hon kembit hi. Tuni chiang in, natna i thuak khaklouh ziak leh i sih hiallouh ziak a Pharo mahbang a i lungput ngeimah lungput a nei nawn a Pathian poimoh lou bang a om khak ding a lauhuai mahmah hi. Huai ahi Pharo lungtang khauhdan velchetna i neih in a tup pipen. Toupa’n mi kisatheite a dou a mi kingaineute bel hehpihna a penak chih mangngilh kei ni. Pharo bang a Toupa’n lungtang khauhsem leh patau theilou lungtang a hon piak louhna ding in kiniamkhiak in Toupa i zuan ding uh aw.