A tung a i thupi kitaklang, Paul in Rome gingtute lak a a laikhak ahi a, michih in a tung a vaihawmte thuthu a man ding ahi, a chihna tuk ahi. Hiai thupiak pen akim-akiang enlou leh, a hunlai a thil omdan ngaihtuah lou a i sim chiang in, ‘vaihawmte’n dikloutak a vai ahawm chiang un hiam, mi giloutak ahih ua leleeng, athu uh man thou thou ding ahi,’ chihna hileh kilawm! Huchidan a sinsak leh khia leeng a omtham ding uh. Kristiante mah lak apan vaihawmtu gilou leh dikloutakte’n leeng, hiai Bible chang kingakna dia zang omtham ding hi. Himahleh, Bible thute khawng agelh hunlai a thil omdan ngaihtuahlou a, mahni deihdan a a na kaihkawi mai ding ahi keia, a hunlai thil omdan ngaihtuah kawm a, bangziak a kigelh ahihiam, chih sui masak sek ahoih hi. Romte 13:1-7 thu leeng a kigelh hunlai a thil omdan ngaihtuah kawm a sim leh khiak kiphamoh hi. Rome laithawn bangchik kum a kigelh chih theihchet hikei mahleh, AD 56 vela gelh hidin’n misiamte’n gingta uhi. Sawltak Paul in, gam tuamtuam leh mun tuamtuam a fankual nung in, Spain gam leh Rome khopi a tawnkha naikei a, hiai mun nihte huai hunlaia dia minthang mahmah ahi uh. Rome khopi ah gingtu tamtak a meltheihsa leh theihnailouhte a om uh a, Spain gam a va zinkawm a Rome khopi a om gingtute vatot/kimuhpih a ut mahmah hi. Atup bang a vaphak theihlouh ziak in, Rome a gingtute lai a khakta hi. 

Thukhun Thak, kum zabi khatna hunlai in, Rome lalgam sung ah sila (slave) tamtak om uhi. Maktaduai 60 khawng bang omdi’n gen uhi. Gingtu masate lak a tamtak leeng sila (slave) hi uhi. Tanchin hoih ziak a suahtakna thak a ngah uh a tak a zatsawm in, a pute uh lak ah kiphin in hel le uh, buaihuai mahmah ding, amau ading ngial in leeng hoih kenteh. Tamtak in a thuakloh ngei ding ua, tamkuam in leeng sihloh ding uhi. Huchibang bouruak kal a om ahihziak un, sila neih/hih pen hoih kei mahleh, a pute uh thuthu-a a omtakdih phot mai uh amau adi’n a hoihpen hi. Huailai hun bouruak leh a tung ua thil hong tungtheite a muhchetluat man in, Paul-in, a pute uh thu mang ding in ahilh hi. Hiai thu Paul in Philemon kiang a a laithon apan in leeng a chiang mah mah hi. Philemon sila taimang, Onesima pen Paul kiang a hong tun in, aman Kristian a na suaksak a, mihoih leh mantheih mahmah hong suak a, Paul in leeng a kiang a om gige di’n deih mahleh, huchi a a na kepnilouh pen thildik hi-a a theihlouh ziak in, tomchik sung ah, Paul-in Onesima tungtang a Philemon toh a kidawnna uh i muthei hi. Rom 13:1-7 ah, Paul in Kristiante a tung ua vaihawmtute thuthu a om dia ahilh lai in, huai hun dinmun toh kituak a a gen ahi chih a chiang mai ding e. Tulai dinmun adi’n vaihawmna diklou leh vaihawmtu sualtakte leeng sawisel leh nialkalh selou a, a thu uh angial-angan a pawngpaw manpah toptop (blind obedience) ding hilou chih i phawk ahoih. Kristian mimal chihte’n vaihawmna diklou i kalh /doungam a ngai a, akul bangzel a i sawisel ngam le a siang hi. Gam vaihawmtute’n gam adia thilhoih lou leh siatna ding ahih ua leh, saptuam tanpha in leeng a soiselngam a, a zuihlouh ngam ding ahi. A doungam a, lamdik a kawkmuh ngam ding ahi. A dik hetlou hinapi, thei gegu kawm a, vaihawmtute thu ahih ziak lel-a zuihpah pen kristiante’ om dingdan hilou hi. Kristiante bel, vaihawmna diklou subei ding leh bawlhoih di’n a kipei zaw ding uhi. Huchibang thil diklou leh hoihlou a paisuak teitei leleeng kitelna (election) hiam, vanzat dang zang in vaihawmtu hoihlou paihkhiak atup ding uh ahi. Khovel mun khenkhat ngial ah houh, thagum zang a bei pawl leeng a om hial hi. Saptuam kizomkhawm pawl lak a lianpen WCC in leeng dikloutak a vaihawmtute a sawisel sek a, vaihawmna diklou doutute sum in leeng a huhsek hi. India gamsung mahmah ah leeng nam niamzaw siikden a om Dalit namte dopkang leh dika tanvou atan theihna ding un ‘Dalit Theology’ a hong piang a, Kerela state a ngamantute leh Bangalore-a Bonded labourer-te dinmun bawlhoih leh dopkangna ding in Catholic siampute a hahpan mahmah uhi. Kidoupi II na hunlai in, German gam ah pastor khat Bonhoeffer kichi, Hitler paihkhiak sawmpawl ah kihel a, himahleh a thiltup uh a lohsap ziak in mat in om a, hihlupte lak ah telkha hi. Philippines gam ah president Ferdinand Marcos te nupa-in, kum 1965-1986 sung in huhamtak in vaihawm uh a, a gam mipi’n nasatak in thuak uhi. Atawp atawp in Catholic siampu minthang mahmah, Cardinal Sin makaihna in gam mipi kiphin uh a, huhamtak a vaihawm, Marcos-te nupa paikhiak in om uh. Philippines’ mipi’n kum tamtak nung in suahtakna ngah uh a, Cardinal Sin pen ‘Divine Commander-in-chief of Philippines’ hihna lukhu khusak uhi. Kum 1989 a Eastern Europe communist kulhpi a hong chipsiatna leeng, Hungary Reformed (Calvinist) Church Pastor Laszlo Tokes hahpan leh makaihna ziak ahi. Amah Romania singtang khota Timisora a teeng, 1952 kum a piang ahi. Hiai thiltung in a hinkhiak leuleu ahihleh, ‘Germany wall’ chipsiatna ahi bok. Anung in, huaipa pen vaihawmna innpi (European Parliament) ah member dia guan hi a, kum 2010-2012 sung Vice-President 12-te laka khat di’n guan in om hi. Atung a i taaklatte apan in sintheih ahihleh, adik-atang genlou a, gam leh nam, mipite’ siatna dia vai ahawm chiang un, saptuam in leeng dalngam ding chih ahi. A dalngam mai hilou in, bawlhoih ding a akipeingam ding ahi. Huai ahih ngamkei leh a nasepna ‘Prophetic Ministry’ ah a semhoih kei chihna hi ding hi. I gamsung mahmah bang ah leeng Romania gam a mi hangsan Laszlo Tokes bangbang ahong tawmkhiak poimoh hun om kha thei hi. Ahun tungta leeng ahi mahna! Rom 13:1-7 thu pen apawng api a solkal thuman zel ding chihna hilou in, adik-atang a vaihawmloute na-nana, mipi leh saptuam in doudalngam kiphamoh hi.