Articles | KTZ | EBC

    KTZ
    Article

    KHUA LEH VENG KEMTU MUANHUAI

    THUMAPI: October Kha Thupi “Khua leh Veng Kemtu Muanhuai” pansan a thugenna (sermon) a gelhkhiak tungtawn a nei ding a hamphatna hon pia Pa Pathian leh heutute tung a kipahthu ka gen masa hi.

    John F. Kennedy in January 20, 1961 a America President 35na dinmun len ding a kichiamna a neih hun in Maktaduai khat vel mipi paikhawmte kiang ah “America in bang hon hihsak thei chi kei unla, ken America ading in bang ka hih thei chi zaw un” chi’n chouna bawl hi. Khua leh veng kemtu muanhuai hihna ding in tua bang lungput neih ngai hi. Pathian in huai ding a hon lamen ahihdan zawlnei Jeremia in Babulon gam a saltang Judate kiang a alaikhak ah gen hi (Jeremia 29). Hiai laikhak a ‘Khua leh Veng Kemtu Muanhuai’ hihna ding hong kigente saulou in enkhawm ni.

    I. BABULON AH KHOSA UN: Khua leh Veng Kemtu Muanhuai hihna ding a poimoh masa tuh khomun a khosakna ahi. ‘Khosakna’ in zapi huam thei hi. Huaiziak in, abulpi leh poimohpen hi a theih thil nih i en ding.

    1. Inn lam un: I singtang gamte i et chiang in kikhual mahmah a khosa i tam het kei ding hi. Gam luahtu ding mahmah leng kidaih zou nailou i himaithei hi. Laisiangthou in gam neitu leh a petu Pathian ahihdan gen a (Nas. 17:26; Levi. 25:23), a luahtu ding nam bawlpa Pathian mah ahihdan gennawn hi (Nas.17:26). Pathian in tenna mun ding inn leh lou a hon piakte tung a kemtu muanhuai hiding in hon lamen hi. Ahi a, tenna gam, khua leh veng nuamsa theilou, lungkimna himhim neilou, bangkim a vaihawmte nial, kim leh kiangte toh kilem theilou in na om maimah hia?

    Zawlnei Jeremia in saltangte kiang ah “Inn lam unla, huai ah teng un, huan bawl unla, a gah ne un” chi hi (Jer. 29:5). Inn leh lou in khua leh tui hihna honpia a, hon inteksak hi. Huaiziak in, Babulon saltanna mun a Judate intek tak a om theihna ding un inn lam leh huan bawl ngai hi. Inn leh lou neihlouhna mun a intek haksa hi. Huai ban ah, khua leh veng hihna neilou in kemtu hihna tang theilou hi. Omna mun a kaang tak a i khosak laiteng intek theilou ding chihna ahi. Huchi bang mite khua leh tui ading in dongkholh suak thei hi.

    2. Innkuan bawl un: “Zi nei unla, tanute tapate nei un; na tapate uh zi neisak unla, na tanute uh pasal neisak unla, tanu tapa a neih theihna ding un; huai ah hong pung unla, kiam lam nawt kei un” (Jer. 29:5-6). Innlam ding leh innkuan bawl ding thu Genesis a Pathian in mihingte a vualzawlna ahi. “Chi tampi suang ding in hong pung unla, lei luahdim un” (Gen. 1:28) a chi hi. Hiai a vualzawlna thugentu Pathian ahi. Innkuan bawlpa Amah ahi a, khang bawlpa Amah ahi (Nas. 17:26). Tenna inn leh loute, khua leh vengte luahtu ding omlou a manthat theih ahi chih phawk ni.

    Judate saltanna Pathian akipan ahi (‘Babulon sal dia ka pisaksate’ Jer 29:4). Huaiziak in, saltangte amanthat uh Pathian in deihlouh hi. Israelte Aigupta gam alut un innkuan tawmchik mi 70 lel apha uhi (Gen. 46:26-27). Aigupta akipan ahong pawtkhiak un pasal vuak 600,000 pha uhi (Exo. 12:37). Tua bang in, Babulon a saltang Judate leng suan leh pak nei a pung di’n Pathian in deih hi. Huchi’n huai mun tuh lam phumna leh laigui phumna hong suak ding a, gam, khua leh veng itna hong om thei ding hi. Huai akipan in a kepna leh zuunna hong kipan thei ding hi. 

    II. BABULON HOIHNA DING ZONG UN: Khua leh Veng Kemtu Muanhuai hihna ding a poimoh nawn tuh ‘Khopi hoihna ding zon’ ahi. Gingtu khat ziak a kim leh kiangte vualzawl a om ding tuh Toupa deih ahi. 

    1. Thumsak un- “Sal dia k’on tansakna khopi hoihna ding zong unla, TOUPA kiang ah ngetsak un” (Jer. 29:7). Babulon galmuanna leh hoihna ding in, kumpi leh vaihawmtute ading a thumsak zel mipite mohpuak ahi. Sum-le-pai, pilna-le-siamna leh sepaih thahatna ahi masa kei a, thumna ahi apoimoh.

    Manila, Philippines a Bible ka zillai in Christ Commission Fellowship (CCF) Biakin ah ka kikhawm hi. Etton leh zuih ding a hoih Saptuamte’n kikhop hun teng in gamsung makaite min leh hihna mahmah lou in thumsak gige uhi. Khotang vaihawmtu leh nam heutute chitlouhna na gen zah in amaute ading in na thumsak hia? Khotang siatna tangkoupih a gengen i hi maithei, alang khat ah khotang heutute, vaihawmtute ading a thum ding zah a ithumsak zohlouh ziak a hiaitan tung hi khathei ahi (1Tim. 2:1-2). Na mimal thumna ah bangzahvei na ngetsakta? Na saptuam un amaute ading bik ‘thumsakna hun’ na bawl uh hia? Daniel niteng in thumvei thum gige hi (Dan. 6:10). Gamsung vaihawmtute ading in thum mahmah ding ahi a hon chisak hi. Khua leh veng galmuang a, ahoih ding na deih leh thumsak in. Kumpi Esther hun lai in, thumna leh anngawlna ziak in Judate thahgamna dia thilgel kilumlet in gamsung ah galmuanna om hi. Thumna in thilhih thei hi.

    2. Thudiklou nawlkhin un: Tulai khovel duhamna leh angmasialna in dim hi. Mahni hamphatna leh sum muhna ding ahih leh midang in thuak le uh leng poisalou, khua leh veng hoihna ding ngaihtuahna himhim omlou, mi leh sa, khua leh tui zuak ngam i hita uh.

    Pathian deihdan tuh vaihawmte thuthu a om ding chih ahi. ‘Nebukadnezzar hakkol paw nuamlou leh a na sem nuamlou nam leh lalna gam namsau leh kial leh hipi a gawt ding’ chih Pathian deihdan ahi. Alang khat ah, zawlnei taklou ten “Babulon kumpipa nna na sem kei ding uh” chi’n mipite zaknop ding thu gen uhi (Jer. 27:8-11; 14:14). Pathian thu toh kikalh peuhmah adiklou ahi a, khelhna ahi. Babulon saltanna ah nasemtu hoih leh kemtu muanhuai, ginom hih ding Toupa hon deihdan ahi. Khua leh veng hoihna leh akhanna ding mohpuak kinei chiat hi.

    Babulon gam a saltangte lak a tuailai Daniel leh alawm thumte’n Babulon solkar ah dinmun poimoh tak len in nna a sem uhi. Tulai pau in Babulon Administrative Service (BAS) siamna leh hihna sang penpen dinmun ahi. Nehemia leng kumpipa nasem in a om “Kei bel kumpipa nou tawipa ka hi” a chi. Pathian in pilna apiakte tungtawn in amaute’n Babulon hoihna ding zong in ginom tak in nna a sem uhi. Tua bang a nna a sep lai un golhguknate nungngatsan in diktatlouhna himhim thei phalou uhi. A ginna uh, a Pathian thu awina uh sukha thei thilte ah gam vaihawmtute tung a vaihawmtu Pathian deihdan a zui uhi. Thudiklou himhim nawlkhin in, Toupa ading in a muanhuai uhi. Gamsung hoihna ding a kalsuanna i chih hiaite ahi- Thudiklou nawlkhinna. Pathian in sianglou a chihte ‘sianglou’ na chihpih ngam hia? ‘Diklou’ a chihte diklou na chihpih ngam hia?

    THUKHITNA: Israelte Babulon a omden ding ahi kei uh. A lunggulh mahmah uh gam Jerusalem a kum 70 achin chiang a kiknawn ngei ding uh ahih dan thuchiam om hi (Jer. 29:10-11). Tua bang in, nang leng hiai khovel a om den ding na hi kei, khualzin, vangam lam manoh a pai na hi. Tua bang lametna na nei hia? ‘Jesu a lametna nei peuhmah amah a siangthou bang in a kihihsiangthou hi’ (1 Jn 3:3; 1 Peter 2:11-12) a chi. Na omna, na tenna leh na khosakna mun Jesu hongpai nawn ding ngak a na omna mun ahi. Tua mun ah bangchi’n na om a? Hinkhua siangthou, kim leh kiang adia vualzawlna ban ah khua leh veng Kemtu Muanhuai hih ding tuh Toupa’n na tung a mohpuakna a hon piak ahi. Muanhuai tham in na om hia? Kivelthak in! Pathian ading a muanhuai tham leh khua-le-veng kemtu muanhuai hithei ding in Toupa’n hon vualzawl hen.