1. I khawtâng a hiamgamtak leh mulkimna bei a kisoisaknate apan i bit zawkna ding leh i Pathian Laisiangthou in Romte 13:1-2; Tita 3:1 a hon phût bang in India Gam Pumpi a zat leh zuih dia i Gam Solkal in a bawl, INDIAN PENAL CODE (IPC) or INDIA’ DAN A GAWTNA, (IDG) zui ding a pan lameng ding in i kingen hi.
2. IPC kum 160 tak a upa hi hialta (2020-1860) hinapi a, zuih louhtheih a koih nilouh mawkdi hilou hial ahi chih thei chiat ni! Tulai a natna hii leng, Novel Coronavirus [Covid-19] apan taksa kikep bitna i poimohngaih ziak ua hiai tan i Gam Solkal Thupiakte, Janta Curfew, section 144 of Cr.P.C, Lockdown leh a dangdang chiamtehkham a thumang tak a i zuih uh thupi leh kipahhuai i sa hi. Tua bang in, kuapeuh in India Solkal Dan bawl IPC zui lehang taksa damna ban a khalam chidamna le hon tundi ahi chih i theihchiat a deihhuai mahmah hi.
3. I gam, India Solkal Dan zuidia i Pathian Laisiangthou in Romte 13:1-2; Titas 3:1 a hon hilhdan en mah dih: “Michih a tung ua vaihawmte thuthu in om hen. Pathian thu lou in kuamah vaihawm a om ngalkei ua; vaihawmmite Pathian seh ahi uh” (Romte 13:1). “Huaiziak in kuapeuh vaihawmmi sel Pathian seh kalh ahi; a selte’n amau tung ah vaihawmna a mu ding ahi” (Romte 13:2). “Vaihawmte leh thuneite nuai a kitahlut-a thumang ding leh thil hoih chiteng sem ding a mansa a om ding in sinsak in” (Titas 3:1).
4. Koi munpeuh a om ei singtang mite’n, i PUPA NGEINA DAN (PND) a, i khawtang a sualna, hiamgamtak a kithahnate, numei (numei naupang kum chinglou nasan) pawngsual a hih duhdahnate, leh sualna dang dangte i hih veng gige ualeh i khotang ua siatna khawk semsem hong tungtou nilouh ding ahi chih theihtuak petmah ahi! Tampi gen ngailou in, kuahiam migilou, sualtawpkhawk a sualte’n, IPC dungzui a gawtna a tuah dite uh pûmpelh sak dia i PND a sum kiliausak, khe-li-nei gan kiliausak, puandum, nampuan a hiamgam tak a thah a omte’ si-luang kikhuhsak lel chihte misual, sum leh pai a giautau louten bangmah a ngai hetlou hial di ahih dan uh i theih chiat tuak ahi. Huchilel a kigawt maimai hunsa nawnlou in a nuai a IPC dungzui a gawtna tuahtheihte apan in kuamah suaktasak nawn kei lehang, i khawtang ua hiamgamtak a sisan suah a sualna leh gitlouhnate bang chituk a hihkiam zou di ahia chih sûi a vei a i neih chiat uh deihhuai mahmah ahi. I Pathian Laisiangthou inle hon deihdan a, i gam Solkal Dan bawlte, IPC tel in, zui meng lehang manpha tak a i khotang sualdouna in gahsuah tuan lawtel di ahi.
5. IPC dungzui a, sualna i khotang hon hihbuai diak hihten gawtna a tuahtheih dite uh:
Tualthahna: Sihna tuak dia Gawtna or damsung suangkul tansakna. IPC Section 302.
Tualthah Sawmna: Kum 10 sungkul tansakna hiam, hihliam ahihleh Damsung suangkul tansakna. IPC Section 307
Numei Pawngsualna: A tompen a kum 7 suangkul tansakna or Damsung suangkul tansakna. IPC Section 376
Mi Van or Sum suhna: Damsung suangkul tansakna or Gimthuak tak a kum 10 Suangkul tansakna. IPC Section 394
6. IPC dungzui a mulkimna bei a khelhna, tualthahna leh a dang dang hihte tuahdi Gawtna a a tung a kigente, i PND a sum tamlou hiam, gan khelinei hiam, puandum, nam puan chihte kipiak a hihveng a, i kingaihdam mawk sek un i khotang ua hiamgamna hihpung hulhul a, kuamah in akituahpih IPC dungzui a gawtna muhdi, tuahdi lauhna himhim neilou chih haih vuallouh ahita.
7. I biak Pa Pathian in i Gam Solkal’ thu mang dia hon seh kalh a, Pathian’ vaihawmna tuahdi mahni kibawl i hihdan sûi in hiai anuaiate thei thak in zuî pah ni:
Ei ngaihdam batlouh sualna ngaihdam sawm nawn kei ni. ‘IPC in ka zuihdi bang gen ahia chih ka theikei’ chih mai a i tuahdi pumpelh hetlou di i hi chih theih hunta ahi. Dan theihlouh paulam chinglou ahi chih Indian Jurisprudence in “Ignorance of law is not an excuse” sawtpek apan chita eive!
India Solkal Dan bawl IPC palsat kia hilou a, ei Kristiante hihdi hilou ahi chih Romte 13:1-2; Tita 3:1 a i muhte nelhsiah hetlouh di ahi.
8. Pathian’ Thu leh IPC kikalh hi hetlou a hihman a zuih louhtheihlouh ahihdan i mi-i-sate lak a a thei nailoute adin (thumanlouh ziak hilou a) a kintheipen a, a poimoh bang bang panla in, achii (seed) tuh meng ni! Huchia a kintheipen a pan i lak meng keileh, mulkimna neilou misual, a ut hunhun a, lauhneilou a gamtatsakna tuntu hihkhak theihna ahi! Gentehna in, numei pawngsual (rape) di khop a sual in IPC dungzui a damsung hiam, kum 10 hiam, kum 7 suangkultaang dia gawtna tuakdi ahihlai a, PND pansan a kiliausak lel in mulkimna bei a, a tatsiatna ban hihthei dia khahzan a, a tan vuallouhpi zalenna piakna ahihdan i theih uh hun lawta ahi! Kum zabi 21na a om khin thamta i hihdan kithei thak ni!
9. Sual i douna ah mahni deihtêlna a sia-le-pha theihna zang-a thupûkna bawlkhialte i awlmoh ditan, i koih ditan thûktak a ngaihtuah ngai mahmah ahi. Sualna tawpkhawk a buaisegawpte’n IPC dungzui a akituahpih gawtna a tandite uh pûmpelh thei dia i deihsak a, bangchik chianghiam a, a lâinat diakte’ thumpihna ziak in hong kibawl thak theithou inte chi bang i om zenzen leh, i theihtuak tuh hiai ahi:
Eden huan a Adam leh Evi in a deihtelna uh zangkhial ua, thupûkna bawlkhial ua, Pathian phallouh theigah a nek deklai ua, Pathian in a khut uh valen hetlou ahi!
Kua dang hilou i Toupa Jesu’n leng Juda Iskariot, A nungzuite lak a khat hinapi, deihtelna zangkhial a, Amah mansaktu hih sawm a, a sia-le-pha theihna zangkhial a thupûkna a bawl, A thil hihtheihna-a khêk lamdangsak hetlou ahi!
Pathian mizat mahmah, Warren W. Wiersbe in Devotional book, “A daily Walk through the Psalms” a, 9th May ah hichi a hon hilh: “the most costly thing in the world — our sin — required the payment of Jesus’ blood to redeem us.” Khovel a thil mantampen khelhna apan eite tatkhiakna dia Jesu’ sisan poimoh, chih! Khelhna tawm mansak lua, ngainêp lua i hih nawnlouh poimoh mahmah ta ahi!
10. I Toupa Jesu toh kilhden a, A khut taklam a ompa dinmun en dih! A gam Solkal’ Dan ua, a kituahpih gawtna a tuah apan hutkhiakna dia, a Pupa’ dân-le-dûn pansan a suahtaksak mawk sawm in suaktasak thei hile uh, i Toupa Jesu toh kilhden khawm-a om theilou dia, A kiang zek a, a khelh ngaihdamna ngenthei dia hamphatna tang hetlou di ahihdan chiang lua hi!
11. “Ei kia hahpan in bangmah phatuam kenteh” chi i hi maithei! Mi giloute khutlum thuakte’ hehnepna leh zangnadopna (compensation) dia sum leh van, kiliausak a, khelhna tawpkhawk nelhsiah a ngaihdam mawkten, i khotang a sualna bengdai hetlou a bengdai ngeilou di ahi chih thei a, vei a nei chiat ding in i kingen thakthak hi. Huaiziak in, sualna tawpkhawk hihte’n IPC nungzui a, a kituahpih gawtna a muh theihna ding ua, hiamgamna thuaktu sik-leh-tang a kuapeuh in Policete, Law Enforcing Authorityte kiang a, a kintheipen a va theihsak (report) ding ahi chih i kitheihsak ngeingei ding ahi. Gawtna a kituahpih piak a omte, a ut dândân ua sualna hihthei nawnlou dia hentang a koih a omdi kia hilou ua, gawtna a muh bang uh tuahkhak di lauhna ziak a migilou dang hong om thei zelte hihlauhna tuh sualdouna manpha, sawtpi daihdi, sum a lei vuallouh leh midangte adia vualzawlna hihtheihna ahi.
12. Huchibang a khawtâng hoihna leh bitna di deihna ziak a, mahni hamphatna di PND dungzui hiam, indongta’ vai hiam, i minam a tuam dungzui a i Pupa’ Dân-le-Dûn tuamtuam dungzui a, a muh theih dite uh khahsuah poisa lou a, mi gilou-salouten IPC dungzui a, a kituahpih uh gawtna piak a a om uh hoihsa zawte i hehnepna uleh kipahpihna uh, i minam tuamtuam ua Civil Society Organisations tuamtuamte makaih in panpihna a nuai a bang hiam, a hih keileh, i kaihkhawm theih dandan uh piak ding in kithukim thei lehang deihhuai mahmah hi:
Sual Douna Thohlawm (SDT) min in nêkzonna a sepna neiten, i kha khat loh (one month pay) sum ua pan 1% (za-a-khat) apan a tunglam, i kiphal dandan uh piak chiat di chi lehang or,
I minam sung ua milip in Rs.10/- (Cheng sawm) apan atunglam i phal dandan piak chiat di or,
Baihlam zawsem a hihdan a om hiam chih enkaidi “Study Team” poimoh sakna a omleh bawl ding chih.
Hichidan a hihtheih tantan kuapeuh in i piak nop uh i lamet theihna tuh: migilou-saloute hiamgamna khutlum chiklaipeuh a tuak theichiat i hihdan uh theihna leh panpih thei dia vualzawlna i tante manphatak a zatna ahi chih hilh ngailou a theichiat dia kilametna ziak ahi.
13. Mun tuamtuam a, i minam Saptuam Pawlpi tuamtuamte kiphuhkhiak, kum 100 val pha hialta a tamzaw i hihlai ua, i melmapa Setan in, i biak Pa Pathian toh i kigamlatna hon tunthei sualnate, khelhnate a hon kaihpaih sawm tawntung ahihdan haih vuallouh a, khawk semsem ding hi! Huaiziak in i khawtang a sualna tuamtuamte i douna ah i Toupa Pathian hon deih leh ngiat, Romte 13:1-2, Tita 3:1 a i muh bang un, i Gam Vaihawmten India Gam pumpi a, sual douna ding a mi tengteng zuihdia IPC a bawl uh ei-le-ei deihtelna kipia a, zuihlouh theih a koihnawn hetlouh di ahi chih thei chiat a, a kintheipen a zûi ding in Pathian’ min in i kingen ngûtngût ahi.