Pathian i kihumbitna leh i hatna, mangbat lai a huh pahpah pa a nai gige (Sam 46:1)

1. NATNA CHANGKANG TAK: Covid-19 kichi natna tuh Wuhan khopi, China a kipan ahi chih theihdan tangpi ahi.Khovel natna hii lengdang cholera hiam, malaria hiam, seasonal flu, smallpox leh hii leng dang om chiang in, khosak haksa mizawng leh dai kilkal mi kikem zoulou leh nek hoih ne zouloute a nuai nak pensek hi. Ahia, Covid-19 tuabang ahikei, natna changkang tak chileng genkhial lua kihilou ding hi. Manipur ading London ah hong kipan a, Mizoram ading Neitherland apan puaklut in om hi. Mi minthang celebrities, sportsmen, politicians leh mi hausa international flight a kivei phachiang te luh masa a, khovel a a thuak nakpente tuh gam changkang pen America, Italy, Spain, France, Germany leh a dangdang hi uhi. The greatest man on earth chia leitung in a theih Donald Trump leng Covid-19 douna ah pangbuai abangta hi; Toupa’n hatna pia hen! India in hydroxychloroquine a leisak louh ding lau in Non leisak kei ngeingei leh na thei ding chiin vau toh hon thuah zui ringawt hi, chimoh ahihdan hon ngaihtuah sak hi. Dangka leh dangkaeng in deih huaina a neita kei a, melhoihte kilawmna pakbang a vulkhinta, kimawl mite mawltual khakbit a om in, mahni bitna leh nekding kia lou ngaihtuah theih ahikei hi. Solomon in, bang teng bangmah lou a chih dinmun ah ki-om hi.

2. GALVAN, SIAMNA LEH HAUHNA OM ZE BEI HITA: Khovel ah, galvan hoihtak button khatvei mekmai a leitung kise gawp sak thei ding nei gam tampi omta hi, tua galvante target miss hetlou a a tupna mun kapkha chetchet thei ngen hi mahleuh, galvan toh kap theihlouh ding in coronavirus melpu in hongsuak daih a, khovel kigalvannate omze bei a suah vekta hi. Hiai natna hik sepaih thahat takte beih theihlouh bangchin i maituah ta dia le!! Mihingte siamna in a phaktawp tungta bang khop a changkang himahleh, hiai virus neuchik thahna ding a mukhe theikei ua, a bei uh a dong in a mangbang uh ahi. Khopi changkang pen the city that never sleeps chi a kigen New York khopi tuh; kha nih sung lelin kahna khopi leh nutsiat gamdai bangmai in a dai zikzik a. Paris khopi the center of romance chi a kigen tuh suangtuahna lel a suakta. Rome the eternal city ngeileng khovel thupina bangmah ahihlouh dan taklangtu lel a suak hi. Pathian vaihawm dan a lamdang lua! Nitum senglou gam kumpinu’n a pindan sungtawng akipan thu a gen maimah hi. Hiai natna mulkim huaitak maiah galvan, siamna leh hauhna in hon humbit zouta kei hi.

3. PANGKHAWM THEILOU LEITUNG GAMTE: Common enemy doukhawm ding a pankhawm sem apoimoh laitak a, pankhawm theihlouhna tuh thil mulkim huaitak ahi. Gam tuam leh gam tuam thupi leh hat hihding kidem a buaidet sang in, a siamna leh pilna tengteng uh sungkhawm in, mun khat ah kikum khawm in talsawn zen in ngaihtuah khawm hi leuh, a malmal a dou sang in phatuam zaw din gintak huai. Himahleh mihing pangkhawm dingte social distancing in hon khen gamla khinta, mahni bitna ding kia lou thildang ngaihtuah theih ahita kei hi. Tu’n WHO paidan transparency omlou sak ziak in America in kum teng a $ 400-500 million a piak gige kholsak miah mai hi. Khovel pangkhawm a polio, HIV/AIDS, SARS, Ebola ban ah leitung kial leh tak doukhawm ahih nung a hiai dinmun ki hilai. Tun America ki withdraw hita leh bangteng hon sukha dia chih gen haksapi a suakta. Toupa kianglou ko’h tai ding!!

4. PATHIAN AH MUANNA OM: Khovel in hihthei kisa mahleh, pang zoulou, puksia kihimai lou hiam! Leitung a doctor siamten siamna teng zang in pan a la ua, scientist ten beihpi suah mahleuh, a damna ding vaccine musuah louin Kibu un, kibu mang un chih mailouh dawnna (answer) dang a mu zoukei uhi. Khovel muhsuah tuh kibuk mang, kisel mang ding chih ahi. Jerusalem Post ah April 3, 2020 in David Friedman. US Ambassador to Israel in “Why did God choose a tiny virus to visit upon the earth” chih article na gelh khe hial hi. Pathian khut hongtang zek a khovel a buai mai ahi, Amah (Pathian) in hunta a chih chiang in hiai natna a bei ding hi (Isai 26:20). Pathian buan hun ahi. Sam gelhtu in “Pathian i kihumbitna leh i hatna, mangbat lai a huh pahpah pa a nai gige ahi” (Sam 46:1) a chih khamuan pih tamtak kiom ding hi. A ban ah, ‘leitung hong kidang in mualte tuipi sungpek ah kisuan mahleh i lau kei ding uh’ a chi hi, huan ‘a tuite ging honhon in, phul butbut mahleh i lau tuansam kei ding uh’ (Sam 46: 23) a chi behlap hi. Huai tuh mual leh tang in bitna leh muanna hon ensak thei hi. Huai ziak in, leitung kilamdang in, mihingte’n siatna tawpkhawk tuak in, leitung maikaih apan bitna leh muanna suanmang in om hial mahleh, i laukei ding uh, sepaihte Toupa i kiang uah a om a; Jakob Pathian i inn sang ahi (Sam 46: 7, 11) a chi hi. Unau it aw, tuni in na lungkham hia? Pathian i kihumbitna ahi, Aman hon ompih gige ahihdan chiklai peuh a phawk gige ding ahi. I kihumbitna Pathian in khamuanna leh bitna hon pia hen. Amen.