THUMASA: Khristian Thukizakna… tuni in a min lel in leng lungtang hon lawng dan tuam ka sa hi. Gingtute ading liauliau a thukizakna hon neisak i biak Pa Pathian min i phat hi. Kha teng a a thutak luikhiat ding leh gingtute kalsuanna kizaksak ding hon pe gige i hondampa Jesu min i phat hi. Biakna hunte ngeina bang a zangtheilou a i omlai tanpha a leng hiai Thukizakna tungtawn a a na hon semsak lai ahihman in hampha i hihdan i phawk thakthak hi. Kum khat a khatvei saptuam in naupangte ading bik a hunseh tuam i bawl uh, Naupangte Ni, hong tung nawnta a, Toupa min ka phat hi. Saptuamte’n biakin ah i zangthei diam chih tuhun in i gen theikei a, himahleh i omna mun peuh ah Toupa’n manphatak a a hon zatsak ngei ding ka lamen hi.

Kum 2020 sung saptuamte zatdia Pathian in thupi a hon piak “Kemtu Muanhuai” chih ahi a, hiai mah pansan in saulou kikum khawm le uthuai ka sa hi. Naupangte Ni ading bik a article ahih lailai in, naupangte’ sim ding in ka hon gelh tuam kei a, nu-leh-pa leh sinsaktute sim ding in ka hon gelhzaw hi. Tua ban ah, thupi toh kisai in heutute apan laigelh hoih leh hing taktakte i na simkhinta a, huaiziak in saupi i gelh kei ding a, zuih leh zop theih dia i lamette a Laisiangthou pansan in i taklang zaw ding hi.

BCD: Khrist Tanchinhoih Kemtu Muanhuai

BCD lamsau Baptist Children Department ahi. BCD chih a gin chiang in i lungsim ah “naupangte” chih a ompah zel a, a dik lailai in a huap lianzaw tham hi. Naupang department ahi a, kum 18 tan a huap hi. Tuaban ah, amaute lak ah sem ding in sinsaktu i nei a, amaute ban ah naupangte nu-leh-pate leng aloutheilou in a huapkha hi. Huchi ahihman in, BCD i chih chiang in “naupangte” chih kia in genkim zoulou hi. Amaute ngaih poimohna a bawl ahi a, i ngaih poimohna “semkhetute” a poimoh pen hong suak uhi. Aziak bel, naupangte kemtu ding sinsaktute omkei leh BCD omtheilou ding hi. Naupangte Khrist khebul a pi a Khrist batna a khansakna ding a kibawl ahihman in, naupangte pen i louma hizaw ua sinsaktute a louna semte kisuak hi. Mihing lam ah et in, BCD dinsan sinsaktute liangkou ah kinga ahi chi lehang chi khial din i kigingta kei hi. Huchi ahihlai in, BCD dinsan i bawltawm ahikei a, i Heutulian Jesu Khrist thupiak i zuihna ahizaw hi. Tuabangteng ahihman in “Kemtu Muanhuai” chih thupi i zak chiang in Sinsaktute leh Nu-leh-pate’n eilam mah i ki-et masak poimoh hi. Naupangte Khrist Tanchinhoih kemtu muanhuai hi dia i sinsakna ah a sinsaktute’n huai dinmun len ngal i hi uhi. Hiai mah ngaih poimoh pen a nei in Korinthte kiang a Paul laikhak khatna bung 3 sung pansan in kiveelthakna ding saulou i en suk ding.

Amasa in, kuapeuh naupang kemtu leh sinsaktu dinmun len in Khrist toh kizopna dik, Khros a kizopna neih a poimoh hi. Tua kia hilou in, khalam a piching; nawitui a vak ngai hinawnlou a midangte khalam nawitui a vak thei hidia kichiil a poimoh hi (ref. 1 Kor. 3:1-2). Huchi ahihkei leh zaw naupangte ading in kipalpaihna i hi kha ding hi. Tua ban ah, semkhawm i hih man in lungsim munkhat a om a poimoh hi. Innsung hi in naupang Sandeskul hitaleh, Khrist ah i tup a kibat ding ahi. Khat in hiai lam buaipih a, khat in huailam buaipih a; sinsaktu khat in hichilamte poimoh sa a, khat in huchilamte poimoh sa in, i ngaih poimoh chiat buaipih a naupangte i pi leh bel i dinsan sepkkhiat naksang in naupangte i pibuai zaw kha ding. Ahi, kitaitehna tuamtuam te leng a poimoh a, kisinsakna tuamtuamte leng a poimoh hi. Himahleh, i dinsan a kikhek ngeikei a, i hih khempeuh in i dinsan a kawkkhak/a sepkhak teitei ding ahizaw hi. Paul in a gen bang in Nasemmi, noumau hon gingta sakmi lel eive ua, huai leng Toupa’n a piak bangzel in ahi. Ken ka suan a, Apollos in tui in a vak a, himahleh Pathian in a khangsak hi. Huchi in a khangsakpa Pathian kia loungal, a suanpa lah bangmah ahi kei a, tui a vakpa leng bangmah ahi tuankei hi (1 Kor 3:5-7). A gennop a chiang mahmah a, huai sang-a chiangzaw khat bel a sep uh leh a dinsan uh ahi. Mi tuamtuam himahle uh tup leh dinsan kibang nei in a semkhawm uh chih Paul thugelh apan i muthei hi – tua bel midangte Khrist Tanchinhoih gintak sak ding ahi. Naupangte i kepna uah ei bang i chi ua? Koute Pathian na seppihte ka hi ua, noute Pathian louma na hi ua, Pathian’ inlam leng na hi uhi (1 Kor 3:9) chi in Paul toh i genkhawm thei diam? Tuabang ahihman in, tuni in i sepdan i velthak ding uh- Suangphum lepkhitsa loungal suangphum dang kuamah in a lem theita kei ua, huai suangphum tuh Jesu Khrist ahi (1 Kor 3:11). A poimoh zaw dang a omkei! Ki bulphuhna ding dikzaw leh masa zaw leng a omkei! Aziak bel Paul in a gennawn bang in Michih nasep a hong lang ding hi; ni in hihlang ding ahi ngal a, mei a a kilak ding ziak in; mei ngeingei in michih nasep bangchibang ahia chih a enchiang ding hi (1 Kor 3:13). Unaute, damsung hun tomchik ahi; sawtpi dam ut mah lehang khang khat ban damthei tuanlou i hi. Huai ziak in, Pa Pathian in mohpuakna hon piak; a Tanchinhoih Kemtu hihna muanhuaitak a semkhe ding in hanchiam thak ni. Adangte zaw Toupa’n a hon saisak mahmah ding (ref. Matt. 6:33)

Huai ban ah, Pathian a i hi uh. Khatveivei leitung a piangkhia khat in tup leh ngim kichiantak neih ding ahihdan ngaihtuah louh theihlouh in a om hi. Tua kia hilou in, i pumpi mahmah leng eimah adia kibawl, siamna leh pilna zonna ding, sepsuahna ding leh khantouhna ding kia bang in ngaihtuahna a om baih mahmah hi. Tuni in hon bawltu’n hon bawlna san veelthak lehang i chi hi. Pathian tempul na hih uh leh Pathian Kha noumau sung ah a teng gige chih na theikei ua hia? Kuapeuh in Pathian tempul a hihsiat leh Pathian in huai mi a hihse ding; Pathian tempul a siangthou ngal a, huai tempul noumau na hi uhi (1 Kor 3:16). Naupang Kemtute ading in hiai theihchet leh pomkip a loutheilou ahi. Eite’n i pumpi Pathian tempul a hihna pomlou a; mahni deihdan a i zatleh zaw i kep naupangte a suakta samkei ding uh. Amaute’n i hinkhua mahmah enton uh ahihman in; Pathian tempul, Pathian tenna te bang a khosa ding in i kihanthawn uhi. Tua ban ah, i pumpi tung ah Pathian thuneihna i piak ding uh ahi. Huchilou in zaw kemtu muanhuai i hi theikei ding. Ei theihna leh pilna, khovel in a hon piak leh sinsak siamnate suang in leng a gamna septheih hilou ahi. Mihing’ pilna lel a naupangte i kep leh amau leng tua mah a ngaisang ding ua, khalam thilte sang in salam thilte ah a lunglut zaw kha ding uh. Na lak ua kuapeuh hiai khovel a pil a kisak leh, a hongpil theihna ding in mihai hongsuak hen. Hiai khovel pilna Pathian ngaihdan in haina ahi (1 Kor 3:18-19). A gennop zaw khovel pilna bangmah dia zattheihlouh ahi chih ahikei a; Pathian muanhuaina leh Amah pilna ah kingak ding chih ahizaw hi. Huchi hileh, kuamah in a gamna sepna ah ki-otsakna ding, kisuanna ding a neikei ding hi. Eite’n bang i muang zaw ua? Naupangte kepna ah kua theihna leh pilna i suang ua? Kua minletna ding leh kipahna ding in kal i suan ua? Huai ziak in kuamah in mihingte suang kei uhen; bangkim nou a ahi vekta ngal a… Avek in nou a ahivek hi; noumau leng Khrist a na hi ua; Khrist leng Pathian a ahi (1 Kor 3:21-23). Unaute, bangkim ah mihing pilna sang in Pathian muang masa zaw lehang i hihdik ngeingei ding. 1 Korinthte bung 3 sung pansan a saulou i gente mimal hinkhua chiat ah zom in zui lehang, Toupa hon deih bang in Khrist Nasemte leh a Thuguk Kemtu muanhuai te i hithei ding uhi.