Thumasa: Thu tamlou leh saulou genna di hun manpha leh hamphatna hon pia Pathian leh heutute tung ah kipahthu ka gen hi. Kum khat a khatvei PATE NIPINI chih a hong om khak Pa tengteng adin a kipahhuai leh ngaihsang huai NI ahih toh kiton in a haise lawmlawm lou PATE adi’n kingaihtuahna hun poimoh tak ahi. Pa mahmah zaw.... Pathian in “PA” a ngaipoimoh a, poimoh le a sa a, hinna nei mihing lak ah “PA” amah batpih in thuneihna sangtak leh goltak toh thuah in a bawl masapen hi. (Gen. 1:26-27)

Adang teng sang a Pathian batna nei, a kipahpih leh anaineh penpen “PA” mah a na hi den hi. Pathian khutsuak a gimnam “PA” tuni a nipoimoh tak nei a “PATENI” i chih a “PA” i chih pen a hihna- dinmun sanglua lianlua leh poimoh lua uh a, zong ngaihsang huai leh zahtaak huai mahmah uhi. PATE Pathian koihna tan theilou a- Pahtawi lou, zahtaak lou, simmoh leh thaang bawl peuhmahte khanggui leh sep-le-bawl leh heina peuh ah lamzang lou, ziik suaklou, a kichai haklou dite hi uh a, tua lam manoh a paipai hi zawmah uhi (Pau. 20:20; Diut.27:16; Matt. 15:4; Pau. 23:22).

Thusawm (Deihthusaam): PAPA omkei leh (a dam nawnlou hiam, dam napi a tunia thil leh vai tuamtuam ziak hiam, amah pumpi kithuzohlouh ziak khawng a (PA neina pi-a) omkhawm kha theilou, omkhawm kha hile zong gen hakpi, zumhuai leh mualphouhuaipi, hehhuai leh iplahhuai hiam, khasiathuai khawng a PATENI zat teemtuam theih) zangkhawm dia kilamen in: PA eii, nang haksatna tampi mah toh Tuni/Tuhun tantan hon kem hon enkol a, hon makaih tou den chin a, tua hun laite kou/ken mangngilh lou, zi/nunu mah in zong hih di, gen di tampi om ding.

Papa hoihlouhna, chitlouhna, iplahhuai simna omkhak zenzen lele tuate genlou zaw in, PAPA hoihna, ngaihsang huainate, pahtakhuainate, pilhuai saknate, hat saknate, ettonhuai saknate, sum leh hun zeek siam saknate leh amah toh kisai a ahoihlam peuhmahte, zahna kam khumtak toh iailou hial in innkuan kikhopna ah HUNLEM i bawl chiat di ua Pakkhi ki-ohsak, van thil kipiak liangluang chihte khawng sang in - Hun manphatak Innkuan in zangkhawm siausiau chiat thei le zaw, Deihthusam huai...!! PAPA MAHMAH ZAW.

Nidang deuh in: Pateni a kizat chiang in Pate hoihlouhna, chitlouhna, iplah huainate khawng leh PA toh kisai mohsakna, kouna leh salhnate toh lunglel sim a vuallel dimdem in a taw zelh i tung suk sak a kingaise hial khop a thadahna lompi toh Pate Nipini a kizat ton om lainite khawng in thathou tak a dinkhiak ding lunggulh ban nawnlou, a khen te’n smart simtak a zou i kisak hun mah bang hi.

Tutung in: Pate aa’ dia kithalawp huai chilphul huai bang zawzen a ngaklahhuai tettet leh Pate nipini zatkhak louh ding ngaingam lou, ihmu thei lou zen a “BANG AHIA PA IN KA BUAIPIH NILOUH” ka dinmun bang ahia oi... chi a Pate Nipini manpha leh gahsuah tak a muhtheih lam leh muhtheihlouh lam a vualzawlna don/ngah chiat a hihna ding in Programme bawlte, akizang kha ding mite leh a zal zou ding mipite, adeuh khol in “PATE mahmah hiai PATE NIPINI zang chiat ding in lam-en tak a kingen hi chiat hang.

PA Nang bang buaipih e? (Pau. 14:12, 16:25):

i) Papa- Nang pawt khiak veu sek nuam na sa a- Na kongkhak na kantak chiang a na Inn sung a kipan a ‘Aw’ in “Pa ei, Nang bang buaipih e?” chih zatheilou leh ngaikhelou a na pawt khiak sek pen nang aa’ din lauhuai ahita! Na inn sung in nang hon poimoh ahi, Papa nang tellou in zaw na Inn-sung thawmhau lua eive!!

ii) Tulaitak a na hihna leh na lampi tot dik a kilawm hi in na thei a, Lamzang leh lohching thou na hi kha maithei a, tutak in tua dan in kilang mahleh dendeuh chiah lampi tawpna pen sihna, manthatna ahih dan Laisiangthou in hon hilh hi.

iii) Tua na awlmoh- na ngaihpoimoh mahmah khenkhatte, Nang tellou a hithei pawl om thou hi. Na inn sung bel nang tellou a hitheilou leh thawmhau, gam dai-gamkeu bang ahi.

iv) Tulai tak a na Inn sung omdan nang na mawk uitei (over smart) luat ziak ahi pen mai. Na zong satsa tampite Pa chinhuai tak in tawpsan/ kidek inla na Inn uah omtam zawta in. Pathian in na sungkuante toh nuamtak a na omkhawm na di ua a hon piak ahi. Inn-gua hah lou a gam-gua hah “PA” hinilouh kha thei na hi aw.

v) Hun manpha tak - Innkhat a Papen in Innkuante tellou a Hotel khat a Nupi kimaiphiat - thausim khat in kam khum tak a hon et-tang simna mun a lawm-le-vual tam sim-te toh nui-la-bang kap-la-bang a houlimna in masawn, paizang mahmah London tantan gen kha pha zawzen. Tua chi bang-te nuamsim le zong na Inn sung in nang hon poimoh, Hotel-te nang tel lou a zong a na hithei lawthou uh ahi aw... Na innsung bel nang tellou a hitheilou, nguntak in ngaihtuah mahdih! Thutung thupawt na vaihawm di in nang hon ngak ahi. A nuamteng le ahoih hi veklou, ahoih teng le a kipahhuai hi vek lou, a kipahhuai teng le a dik hi vek lou hi.

II. Innkuan mah zaw (Is: 38:1-22; 2Kum. 20:1-11; 2Kor. 32:24-26):

Kumpi Hezekia a pa ching mahmah a, a hihna leh a hoihna Pathian ma ah gen giapgiap ngam mai hi. Na ma a thutak leh lungtang hoihkim pu ka hihdan leh na mitmuh a thilhoih ka hih zel dan na thei chi hi. Pathian inle tuate thei lumlet mahmah kawm in Hezekia aw... Na natna apan dam mualsuah zou lou ding na hita mai a si di na hita “Na Innkuan omdan ding geel fel in” chi maimah hi. Hoihna, thutakna, gin-omnate leh chihtaknate Pakta in ngai thupi mahleh – Innkuan mahmah zaw” chituntun mah a na hi denkei ve aw...” Tua bang in Nangle hat sawtnawnlou maithei, sihak nawnlou khathei na hi. Na Inn kuan Pathian toh pang in en zui zelzel in.

Pathian in Pa’ mah zaw ngaipoimoh a, poimoh sa mahmah hi. A hoihna leh hihna lungkimpih in damtaak mah na hi chi in a dam saksak mawk kei a, a innsung deih thusam huai nailou hi ding hi ven. Tua ziak mah in kum 15 hun pe lai hi. “Nangle hun hon pelailai ahi.” Na hinkhua in a angngat lam kheng/khekta in. Innsung nu leh naute’n bawl fel uh hen a chimai kei a, amah a pa mahmah khut tung ah nga hi. Pathian inle “PA” mah zaw muang in a na thulak mahmah ahi. Zi leh taten le “PA” pen neumuh/musit kei unla simmoh sam lou in thu laak mahmah un aw. A ziak Pathian seh leh Amah a kipan mah ahih ziak in.

III. PAPA a thulaakte mah zaw... Gen. 6-10 sung ah Noah dam lai hun a mite omdan kisia, bolhloh, Pathian mahmah inle kisia sa lua, gilou uh salua, a lungput himhim uh zong kisia kichim zaak gawp, duaisanlou akisia chih hon hilh hi. Tulai hun toh le kilamdang ngellou ding bang hi. Noah hun sung bel BC 429 sung tan ahi a, tulai eite hun bel AD 2020 hi teihtoihta hi. Mite hinkhua kise petmah a om, Pathian lam nga a thudon hiam limsak a, lauhna himhim omlou, Pathian om lamlam le phawk a ngaihtuah khetellou uh. Hiamgam, zautat, thaangtat, ngongtat leh paktat gawp vek uhi. Pathian nangawn heh a thangpai in a thilbawlte ziak a kisik hial khop a a omlai in Noah in Pathian hehpihna mu in ngah hi. A heh mahmah lai a, A hehpihna ngah, a paching in a etton huai telmai.

Mite omlouh dan chiin dan, gamtat louh dan tak in Noah paching mahmah pa pen in Pathian gingta leh taksang in a thugente zui a semsuah din Innkuan ah thu kikum uh hita ding hi. Innkuan mi 8 in Innkuan kikhopna ah Papa makaih in genkhawmta uh hi ding. Papa gen hi ven chiin kuamah in nial hetlou, Tapa pil leh siamna neite in zong athu ngaikhia a zui ding in kiman uh himai hi. Moute leh zi in zong zahtaak a thutak a sim in thulaak mahmah uhi. A hunthu leh A Nna, a thu leh a vai himhim zong mawlhuai, haihuai lam nehzaw ding bang mahleh a pa uh Pathian’ thutunna ahihdan a full in pom vek thei uhi.

Eite zaw khami sim kichi gouh lehang le kithulak khukkhak om hetlou, Papa bang a neupen mah bang a om Innkuan om kha thei leh kilawm. Mite vai leh nunzia banglou tak a Paching mahmah Noah leh a Inn-kuanten mite/khote vai toh ei Nna kibang loulua chi a kizumpih hiam nuamlou, mi bat huailou chi dan a kithadah suah a, a pa uh mohsa souhsouh hetlou in, a pa uh chih dandan in Nna a semkhawm seuhseuh uh a, a Ni a sim-le hilellou, akha le hisamlou akum a sim kum za val lamlam haihuai hiam mibatlouhhuai chidan a, kiphunsan maimah lou in pilhuailam a la in a pa uh thu pen - Pathian thu chi a thumangtak in a semsem mai uhi.

A pa uh “Paching” Inn sung mite it a, insung a lunglut, khamtheih hihlou buaina bawllou, 24hrs a houpih leh muh theih gige kia thamlou a, numei dang toh le gen banglou, a inn a hun tamzaw om a kithuah neel mahmah uh le hi ding, mite leh Pathian inle paakta hi ding in uphuai hi. Tua a nasep pen uh amau aa’ ding mahmah ahihdan le theitel mahmah uh hi ding a PAPA ua kipan mah in. Tuaban ah kiim-kiang, thil omdan leh, a tulai khovel uh mite nuntak zia le mu in theitel mahmah unteh. Hun haksa sihna manthatna hong tung ding chihte zong chiangtak in theitel mahmah ding uh, Pathian thei in zong lau in maivil mahmah hi ding uhi. Tua hunlai a a khovel uh khovel mithuai tak a, alomlom a a omlaitak a Pa Ginom, Paching mahmah Pathian kihta leh lau Pathian toh omkhawm, tonkhawm Papa neite inkuan nuamsa leh hampha na maizen uh e aw. Eipawl le Ginom, Pathian lau leh kihta- Pathian nei kichih bawl a, khamidan kineih a khamite omdan a om hinapi- Inkuante leh khotang hitaleh a kuapeuh in le thulaak ngellou sim, mite’n a lungsim ua tawpsan uh ahihlam kiphawk khelou vaiteng a lunglut a uitei vilvel (oversmart) gouh hang a, tua ziak khawng mah ale Innsung leh apawlam nna leh vaite ahi ding bangtak a hitheilou nengnung maimah hive aw.

IV. Muhtheih louhpa a muh ziak un Heb. 11:24-27

1) Israel pen May 14, 1948 in amau-le-amau ki-uk in gam khat hong hita ua, a makai pa uh David Ben in Prime Minister ding in laisiam (Physics lam a Nobel Prize ngah pa) Albert Einstein deih leh muang in Lam-etna toh a houpihpah leh, aman keipen Pathian in Prime Minister ding hon chilou, tua mun kei mun ding hilou chi in nialpah hi. Pa khenkhatte’n i mun di leh dilou le thei mumal lou, thilteng, Nna teng, vaiteng a lunglut gaivek peuhtel hang a, adik leh hoih ahi khin vek dia hia oi...! Pilna, siamna neihna leh hatna tengte khawng a mun di chiat uah omleu PACHIN huai in kinavak leh thoveng tuan mahmah ding hi.

2) Mi kipezou khat CV John hih ut, maitam sapna bawl zenpeuh kuamah in thu don a limsak mahmah lou chih kiza kha ngei hi ve aw. Tua bang dan deuh khat “Sana bawl pa kiang hoh in ka vabawl sak a, a phelkhiak siuhseuh dante, a bulh nawn dante ka en en a baihlam sa in a siam mahmah a, haksa sa hetlou hi. Kenle ka ngap thoh a ka van hoih laipi haksa sapipi in ka phelta maizen a, ka bulh nawn chiang in a kilhna 5/6 bang hong val mawk a khente a ngatna di lam thei buai leh amun di uh theih zoh nawn louh lehbulh, thahat thu a khetkip top himai khawng, zat theih nawn louh a seloupi, a sia suak himaimah e, chih ahih pa gen ka za kha ngei hi.

Pachingten ahihtheih leh theihlouh a kithei uh a, eima/ei aa’ di leh dilou theih poimoh mahmah chiat hi hang. Bangteng hileh Pa teng in i Head Office i Inn ahi chih pomkip phot in tua na awlmoh mahmah (Nna leh vai) te nang lou a le a na hithei un chin, na Inn sung pen nang lou a hitheilou ahi. Tua i chih hang in nna leh vai dangdangte lunglut louh di leh awlmoh louh di chi lampang kihilou hi, theih siampah lamen hang.

3) DL Mody in thil ka muh leh theih tengteng lak ah “TANCHIN HOIH” ahoih pen hi chi hi.

4) Richard Umbrand (Rev.) nasa tak a soisak leh gelgawt ahih lai in leng “Hon sawite sang in ka kipak zaw” chi hi.

Mite muh bangbang leh neih bangbang mu-a nei ding in simtute leh PATE NIPI NI zangtute tengteng Pathian in salam-khalam ah hon vualzawl chiat hen!!