Thumasa: Gintaklouhpi’n khovel pumpi Covid-19 hipi’n hon nuai ek a, khosakna ban ah biakna tanpha naktak in hon sukha hi. Hiai bang hun haksa ah leng Toupa hehpihna ziak in innkuan biakna, mimal biakna leh thumnate zalentak a i neih theih ban uah, laigelh leh TV/Internet tungtawn a Pathian thu genthei leh ngaikhe thei zel lai i hihman un kipahhuai i sa petmah hi. Tua ahihman in, tu’n leng hiai KTZ deihthohhuai tungtawn in “Pate Poimohna leh Manphatna” chih ngaihtuah lehang i chi hi.

I theihsa bang un June 21, 2020 “Pate Ni” a zat ding a saptuam in i sehsa ahi. Khovel mun tuamtuam a “Pate Ni” kizat pat dan tomkim: June 19, 1910 a Sonora Smart Dodd in Spokane, Washington a honpat, 1966 a US President Lyndon B. Johnson in kum teng June Pathianni Thumna “Pate Ni” a zat ding a a na puankhiak, 1972 a US President Richard Nixon in US pumpi a Public Holiday khat dia hon namkip, chih ahi. Mun atuam dungzui in tuni a Pate Ni zatdan kibang vek kei mahleh, achil in hiai ni tuh Pate pahtawina hun a kizang ahihtuak hi.

I theihsa bang un khovel ah Pa tamtak a om hi. Pa hoih mahmah, Noah bang a innkuan limsak leh humbittu ban a, midangte adia vualzawlna tuntu Pa tamtak a omlai in, innkuan limsak lou, Siampu Eli bang a tate enkol taktak lou (1Sam. 2:22 - 29; 3:13), innkuan leh midangte adia siatna tuntu Pa tamtak om zel ahihman in pate pilvan apoimoh mahmah hi. Huai ziak in tuni a Pate kingaihtuah thak a, innkuan humbittu, innkuan leh midangte adia vualzawlna tuntu “Manphatna leh Poimohna liantak nei vek” i hihdan phawk a panlak chiat ding apoimoh mahmah hi. Tua ahihman in kuapeuh in Pate poimohna leh manphatna phawk a pan i lak chiat ding deihna in anuai ah “Pate Poimohna leh Manphatna” chi nih leh mohpuakna leh manphatna sepkhiat theihdan lahna 2/3 lel ka hon taklang hi:

1. Pate tuh innkuan suangtu leh innkuan a lupen ahi uhi. Tua ahihman in, Pa omlouhna innkuan tuh bukimlou, taksap hau, dengdel leh midang in zong simmoh utse uhi. Hiaiziak tak a Pa tuh innkuan adia Kumpi na kichi ahi. Ahihleh tuni a pate, i innkuan chiat uah vaihawmtu, humbittu leh innkuan sunuamtu in i pangchiat na uhia? Tuabang hilou a innkuan subuaitu, patausak gige leh siatna tuntu i hih maimah leh poi mahmah ding ahihman in Pate kivelchian thak chiat ni.

2. Pate tuh innkuan (nu-le-pa tekte tel a zi leh tate-tute) adia vualzawlna leh, alehlam a hamsia leng hithei ahi uhi. Joseph, a innkuante leh a pianna pa Jakob ading in vualzawlna a hi a, a pa lungmuangtak in a si sak hi (Gen. 45: 13; 49: 29 – 50: 3). Noah in Shem leh Japheth a vualzawlna leh Ham a hamsiatna bangbang a tangtung chiat hi (Gen. 9: 25 – 27). Pa manphatna leh poimohna thei in Jakob leh Esau a pa uh mai-et a kituh ua, Jakob in tang masa ahihman in Esau khasia in a kapkhe loihloih hi (Gen. 27: 27 – 40). Huai ziak in, pate kivelchian thak chiat ni. I innkuante kep dan, i nu-leh-patekte bawl dan, i zi leh tate etkol dan velchian thak ni. Inn sung a zi leh tate tung a i kampau zat zongsatte khawng ngaihtuah lehang, zukham leh hehlungpi toh zi leh tate hansan a hamsiat zialzial i hikha ding uh! Pilvang mahmah ni. I zi leh tate tung a i gamtat leh kampaute, amau adia vualzawlna ahih kei leh hamsia na hi thei ahi chih theihchian a poimoh mahmah hi.

Aban ah, Pate’n innkuante (nu-le-pa tekte, zi-le-tate leh tute) i vualzawl theih dan 2/3 khawng i taklang lai ding hi. Innkuante adia thumsak gige ding, Pastor leh Upate thumsakna zong ngaih poimoh sak ding ban ah, atak a i hihtheih tampi omlai ahi chih mangngilh louh ding ahi. Tuate:

1. Omze-neitak a sukkhak zel ding ahi (meaningful touch). Pate’n innkuante i it chiat hi. Tua itna atak a sutlat zel apoimoh hi. Tuabang a itna suklat theihna khat tuh omze-neitaka sukkhak zel ahi (Gen. 27: 27; 48: 13, 14). Nu-le-pa tekte’n zong itna toh omze-neitak a sukkhak nuamsa a kipahpih mahmah uh ahi. Tuabang in zi-le-tate leh tute, avangkim in omze-neitakin itna toh a khut u hiam, a lu u hiam zut/sukkhak sak lehang nuamsa a lungkim mahmah ding ua, amau adia vualzawlna, chidam ludamna suak pah ding ahi. Pichin nung, zi leh pasal neih nung a zong omze-neitak a sukkhak hihtheih lai ahi.

2. Kampha toh thuchah manpha pipi genpih ding ahi (spoken message of high values). Thil hitheilou dingpi genpih or haiphat ding chihna hilou in, thil thupi leh hithei dingte genpih a hasuan zel ding ahi. Thu hoih la hoihte genpih a, amau hoihna leh siamnate uh phawkpih a kipahpih dan siam ding ahi. A hatlouhnate uleh lohsap/hihkhelhte uh gengen louh ding ahi. I lungtang a veite leh awlmohnate genkhiat dan siam apoimoh mahmah hi (Pau. 12: 18; 15: 4; 18: 21). Tate tute it lou hilou napi’n, a genkhiat dan i siam louh chiang a amau theisiam lou uh, heh uh, khasia uh, kingaise khanak uh ahizaw hi (Eph. 6:4; Kol. 3: 21).

3. Tunung adia thilhoih chituam limlahna (picturing a special future). Pa in i tate tute tunung ding muhkholh apoimoh hi (Gen. 27:28, 29). Tunung chia hiai bang, huai bang hong hile uh chih i duhthusamte theihsiam sak ding ahi. Etsakna: Billy Graham bang a Pathian thugen minthang, Nightingale bang a Nurse itna hau, Mosi bang a nam leh gam ittu makai etc. Pathian toh thil bangkim hithei ahihdan hilh a, tup lian leh lungsim liantak nei ding a hanthawn zel ding ahi.

Thukhitna: Tuni a innkuan leh khotang a buaina tamtakte koia hong kipan leh bangziak ahi ding? Pate’n i poimohna leh manphatnate theisiam lou hiam, semlou hiam, Pathian deih dana sem kha lou i hihziak hikha ding hi. Khotang hoihna ding, gam leh nam masawnna ding, saptuam a halhna hongtunna ding in Pate’n i poimohna leh manphatna phawk thak a, Pathian deih dan-a innkuan kepna a pan i lak thak uh apoimoh hi. Tuabang ding in Jesu Khrist neih masak apoimoh a, aban ah Pathian gam leh A diktatna zon masak gige ding leh, i hinkhua leh innkuan kep dan Pathian dan toh akituah ngei ngei ding ahi. Tua ahihman in, hun paisa a i hihkhelhte kisik in Toupa kiang zuan ni. David in, “Pathian aw, keimah ah lungtang siangthou tak siam inla; ka sung ah kha diktak siam thak nawn in” (Sam 51: 10) a chih bang in, Pathian kiang ah thum chiat ni. Toupa’n hon vualzawl chiat hen!