Thumapi: Tukha Nute’ Nipini leh Dorcas’ Day chi a Ni poimohtak kumdang bang a i zatzel NI damtak a hon musak i biak Pa Pathian leh Hondampa Jesu Khrist min manpha in KTZ simtute tengteng itna chibai k’on buk hi. Hipi Coronavirus ziak in khovel pumpi buai in ei saptuam biaknate nidang bang in Biakin ah kikhawm thei lou in ommah le’ng Nute’ mohpuakna beituanlou ahi chih mangngilh kei ni. Laisiangthou in kisinsakna mun masapen leh a thupipen tuh insung ahi a, huai a sinsaktu hihna thawnpiak masa Pathian in hon piak numeite ‘NU’ hihna ahi hi. Tuni a ‘NU’ a na hitate, Pathian vualzawlna talenaute ban ah eimah pasalte chiat leh inkuante kemtu i hih ka gingta hi. Tu kum zabi 21na ah numei tampite’n insung khosak haksatna, lungngaihnate i tuah chiang in Nu hih zaw haksa lua e! ka chinzou kei chi a lunglelh vungvung hun omthei hi. Himahleh Nu hi ding a hon bawl a vualzawlna hon petu’n khovel a sapna sang pen a hon sam a amah deihbang a muanhuaitak a inkuan hon bawlsakte kem ding in hon sep ahi chih phawk thak ni.

I. Pasalte kepna ah muanhuai ding: Pathian in pasal amah kia a a om hoih a saklouh ziak in amah panpihtu ding in numei Evi a bawl hi. Pasalte bukimlouhna, fellouhnate leh a poimohna ua panpih a kithuahpih ding in numeite hamphatna piak i hi. Huaiziak in mahni pasalte thuthu a om a kingainiam leh thunuailuttak in Pathian thu bang a kem a manglukhu khuksak ding tuh numeite hih ding dan ahi. Zumna leh siatgawpna tuntu Nu hihkhak ding lauhuai mahmah hi. (Pau.21:4). ‘Zite aw, Toupa ah a kilawm hun bangzel in noumau pasalte kiang ah kingainiam un’ (Kol.3:18) chi’n a gen hi. Zite pasalte kiang a kingaihniam ding ahihna ziak tuh Khrist in dinmun hon piak leh amah mitmuh a kilawm ahi. I society sung ah kingaihniamna i chih chiang in ngaihdan nuamlou leh mite sang a niamkoihna dan kisakna bang omthei hi. Himahleh kingaihniamna i Laisiangthou in a gen utpen tuh niamzaw leh muhsitna hilou in tung a thuneitu om, ‘Sepaih ginom in a pu ading a muanhuaitak a gal a dou bang in’ zite’n a pasalte uh thunuai ah kingainiamtak in a poimoh bangbang uh sepsak ding a kiman in a om ding uh chihna ahi. Pathian in zi leh pasal a hon siam in, hoihtak a a hong khosak theihna ding un zite omdingdan leh pasalte’n zite a it ding thu uh thupiak hoihtak pia hi. Huan ‘Kingaihniamna’ in zite pasalte sang a simmohhuai zaw leh niamzaw uh chihna hituan lou hi. Aziak tuh i Laisiangthou in Jesu Khrist ah na vek un pumkhat na hi uh chi’n chiangtak in hon hilh hi. ‘Huai ah tuh Juda mi a omthei kei a, Grik mi leng a omthei kei; huai ah tuh bawi a omthei kei a, bawi louleng a om thei kei; huai ah tuh pasal leh numei leng a omthei kei hi. Khrist Jesu ah na vek un sa pumkhat na hingal ua’ (Kol.3:18). Khrist ah pumkhat i hihhang in pasalte kiang a kiniamkhiak ding thupiak pen seplouh ding chihna a hikei hi. ‘… sa a na heutute uh thu bangkim ah mang un, mihing hih kipak lelte bang a mit nnasem hilou in, lungtang sakhat a Toupa kihta kawm in. Na hih peuhmah uh, mihing ading bang a hihlou in, Toupa ading bang a hih in, kilawptak in hih un’(Kol.3:22) a chi hi.

II. Tate adia kemtu muanhuai hi ding: A hoihzaw hiam a sia hiam hitaleh khangsawn hong omzel ding ah mihing bawl leh lemdiktu tuh Nute ahi. Huaiziak in Pathian vualzawlna tate Toupa’n honpiakte kemtu muanhuai hihding tup a neih tuh numei hihna ah nasep thupipen leh sangpen ahi. Pathian in tuabang semkhethei ding in ‘NUTE’ ah hihtheihna thupi leh kichiantak, lungkimtak a semsuahthei ding in hatna pia in thuam hi. Tulai khovel leh khang i etchiang in, NU tampite’n tate kepna nelhsiah in, ngaihsak louhna leh mahni nopsakna kia zong in nuamsiip bawl ua, Nu hihna pen a hinkhua uh nawngkaisak leh a nopsakna uh daltu bang in ngai uhi. Huaiziak in tanu tapa tampite etkol hoihlouh ziak a khamtheih, guihtheih a bual a suakta zoulou in om ua, insung maitam chimsia hi. Pathian in tupnei a hon siamna san ngaihtuah in inkuan kichimsate tungding thakding, ta neu nei leh khang hong kipan thak dingte nute’n ei angsung a pom in amaute bit leh khamuangtak a om ding in muanhuaina toh Pathian deihna bang a kemding in hamphatna tungtuan hon pia ahi chih phawk in pan lading in i kingen hi.

1. Salam kikepna ah: Siam leh pilpen hihziak hilou in tate’ niteng poimoh salam ah nek ding an limtak sa damtheihna ding, puansilh nikten, bitna ding inlum ban ah amau taksa hong khan dungzui a a kikep dingdan uh sinsak ding Nu mohpuak ahi. Huan siamna pilna, insung leh khotang a om dingdan tanpha in poimoh sakte hilh in tate kikem hi. Sum-le-pai, tha-le-zung sen a ngaih leh seng in theihtawpsuah in tate kepna ah i kisuuk hi. Ahi ding mah ahi. Himahleh salam kikepna kia huntawk lou in a khalam uh Pathian deihna leh Tangtawn hinna ngahna ding a makaih leh kep ding Toupa deihdan ahi. Tuabang a i kep keileh Pathian lungtuak khalou thei i hi. Paul in Timothy kiang ah, ‘Himahleh kuapeuh in a mite ading a ngaihtuahsak kei a, ama inkuante khol houh a ngaihtuahsak keileh, ginna a zuausan a, ginglou mi sang in a gilou zaw hi’ a chi hi (1 Tim.5:8).

2. Khalam kikepna ah: ‘Ngai in tate tuh Toupa lak a i goutan ahi ua, gil a gah kipahman a hon piak ahi’ (Sam 127:3). Tate ading in NU hihna pen thuktak in kemtu hihna ahi chih na ngaihtuah ngei hia? Ei a neitu hilou in i tate neitu taktak Pathian ahi chih leh ei deih dandan a tate kem thei lou ding, a neitu Pathian’ deihna bang a kep ding ahihdan theih poimoh mahmah hi. Amaute kem ding in Nute hiai mohpuakna poimoh leh kul petmah Pathian in i liangkou ah hon nga hi. Mi kuahiam in inn hoih leh thupi, lian leh kilawmtak, a sung leh pua kilawmtak a honzep chiang in, a bawlkhetu hihtheihna leh ngaihtuahnate bang kingaisang mahmah hi. Ahihhang in Nute aw, ngaihtuah mahdih uh! Pathian in eite mohpuakna hon piak pen mihing bawl ding, hotdamna lampi hilh ding, a kha uh Tangtawn nopna mun a pii ding hitel hi a, Thupi lua eive! Mawk tut maimai ding i hidiam? Hannah, Pathian in tapa a piak Samuel in nawinek a tawp masiah inn ah ompih in sinsakna pia hi. A nawinek a tawp in a damsung teng Toupa in a om ding in lan hi (I Sam 1: 22,28). Hannah bang in muanhuai a hon seppa Pathian muang in a deihna bang a theihtawp suah in tate manpha leh gahsuah ngei ding in Toupa hatna suang in pang ni. Amah mi muanhuai in a nna semding in hontel ta ngal a, a hon hihhat ding a hon lohching sak lai ding hi. “A hon hihhatpa Khrist Jesu i Toupa kiang ah kipahthu ka gen hi, muanhuai a hon sak a, a nnasempa dia a hon chihtak ziak in” (ITim.1:12).

III. Inkuan sung mite leh tanau lainate lak a kemtu muanhuai hi ding. Khristian nu hihna ah insung mite: ni-le-gang, teekpi-teekpute ban ah polam zawdeuh a tanau-laina, inkim-inkiangte lak ah kemtu muanhuai hihna latsak ding mohpuakna kinei hi. Hiaibang nna thupi semkhe ding in Nute’n pan i lakna ding point nih i en ding:

1. Hun zatkhawm: Thil tuamtuam – mobile phone, TV programme, Internet leh adg. hon hihbuai theite koihkhia a nupen in insung mite Pathian min a kithuahkhawm in, a nuam leh haksa thiltuahte genkhawmna hun zatpih ding ahi. Hiai bang a hun i zatkhawm chiang in khat-le-khat ki-itna leh kingaihnatna pungsak hi. ‘Ngai in, unaute kituak diamdiam a omkhawm anak hoih in anuam mahmah hi’ (Sam 133:1). Insung, vangam naipen suahsaktheihna lampi ahi.

2. Nna kisepsaktuah: Insung mite’n mahni septheih nasep i nei chiat hi. Tuate sep ding dan lemsiam a nang’ nna ahi chihtuam omlou a taimatak a mahni sep ding khat peuhpeuh thasiallou a sep ding ahi. Numei fel leh kizen in hatna a a kawnggak in a inkuanpihte ading nek-le-tak, silh-le-ten a poimoh bangkim uh khotuah in a sem hi. Nu kia in sem a tate om maimai sak hiam teekpi-teekpu hatnawnloute khut a ngak a a hatlaite mawk om a mi sepsa ne ding lel a hin louh ding ahi. Inkuante pangkhawm (team) a nasemkhawm diamdiam a amau nna di chiat Nu pen in kamhoih kampha toh geel a vai hawmsiam poimoh mahmah ding hi. Mihing pilna in tuate banlou ding a, Pathian akipan pilna, theihsiamna a thopna toh hihtheih ding hi. Numei Toupa laudan siam Khrist hatna masuan a om mi in a bantha hatsak in insung mite nna kisepsak tuahna makaih a vualzawlna tampi tun in kem hi (Pau.31:17). Hiaibang a inkuansung a muanhuaina a hong latkhiak chiang in, inkim le kiang a tanau laina leh invengte tan in a hon mu ua, Pathian vualzawlna tang in amaute toh Khrist itna hinpih in khat-le-khat kilamtou thei hi.

Thukhitna: Niteng khosakna ding ngaihtuah a Nute inn om manlou phial a tate kep ding bang a leng kem manlou a i omlai in ei gam kia hilou khovel pumpi’n a buaipih COVID 19 Corona virus ziak in mahni inlum chiat ah eimah pasalte, tate leh inkuanpihte toh inn a kikhum a omlouh theihlouh-na hun hong tung guih a, hamphatna a la in hiai dinmun a hon koih i biak Pathian in vualzawlna hon piak amaute toh i kikepna ah muanhuaina langsak gige ni. Anuam gige kholkei ding himahleh haksatna a hong tun hun in leng Toupa’n ei hoih zawkna ding lampi hon gelsak ding a, a thusehte hon sinsak zel ding hi. ‘Na thusehte ka zil theihna ding a hih haksat a ka om a hoih hi’ (Sam 119:71). ‘Pathian in a itte, ama’n a seh bang a a sapte adin, a hoihna ding un bangkim in a sepsak chiat chih i thei hi’ (Romte 8:28). Toupa’n insung manpha hon bawlsak Nu hihna a muanhuaitak a kemthei ding in simtute hon vualzawl hen.