“Kei belamchingpa hoih ka hi; Belamchingpa hoih in a belamte adi’n a hinna a pia hi… Pa in a hon theihleh ken Pa ka theih bang in kei a ka thei hi, kei a inleng a hon thei hi.” (Johan 10:11,15)

Thupatna: Pathian in heutute tungtawn a deihsakna a hon piak man in amasa in Pathian tung leh deihsakna hon petute tung ah kipahthu gen in thupina leh pahtawina Amah ka pia ahi. Tukum i thupi KEMTU MUANHUAI chih in kuahiam hihna leh dinmun sangzaw neite kia gen hilou in, michih a neu a lian hon huam vek hi. Kemtu i hihna tampi om a, tuate ah muanhuai ding a kihanthawn hizaw i hi. Tua bang a kepna na i sepna ah bangchi bangte muanhuai kichi a, a muanhuaite bangchi bang hi uh hiam chih i theihna ding in Jesu Khrist in amah kigenna thumal Belamchingpa hoih hihna a na gen pansan in i sutkhawm ding uh.

I. Belamchingpa hoih in a belamte ading in a hinna a pia (Jn. 10:11) 

Belampu hoih in a belamte khualna leh itna ziak in a hinna pia hi. Belampu in amah lam akipan a a belamte ading a a piakkhiak theih thupi penpen a hinna ahi. “Mihing in a lawm adia a hinna a piak sang a itna thupi zaw kuaman a nei kei hi (Jn. 15:13). A belamte ading a bangkim thuak leh tan kingam, a belamte bitna leh damna ding ahih phot leh amah lam ah siit neilou in kipia hi. Belampu hoih a belamte ma a pai in lamdik leh tang ah pi hi. Amau ading a lauhuai omte, tuklup theihna kensia leh guamsia ban ah melma gamsa lauhuai lak ah paipihlou in a bitna ding uh lampi totpih a, a vah leh taina ding mun uah pi hi. Tua bang belampu hoih in, a belamte’ itna a tang ding a, a belamte’n nuam a sa ding uhi. Himahleh, Belampu hingal a belamte ading a a hun neihte pekhe ngamlou, a neih - a lam leng seng ngamlou, tha-le-zung leng thoh ngamlou, haksatna hun a taisia a, anuam lampi kia zong belampu tuh a belamte ading in belhtak chinglou ding hi.

II. Belamchingpa hoih in a belamte taisan ngeilou (Jn. 10:12-13)
Belampu hoih in a belamte hun teng in koimun peuh ah a kiang ua ompih gige ahi chihna ahi. A belamte munkhat a nusia a, amah ut leh deihdan a vakmangsan ngeilou chih genna ahi. I Laisiangthou in belampu hoih leh hoihlou a gen a, belampu hoih in a belamte awlmoh in a it a, belampu hoihlou in a belamte a it kei a chi hi. Haksatna leh lauhuaina mun ah belampu taklou/hoihlou in a belamte nusia in a taimangsan hi. Laisiangthou in “Kiloh, belamchingpa tak hilou… ngia hong pai a muh in belamte a taisan a, huan ngia in belamte a kei a, huchiin belamte a hihdalh hi… belamte ading a deihsakna himhim a neihlouh ziak in a taimang hi” a chi hi. Belamchingpa hoih in a belamte bangteng tung leh leng taisan ngeilou in, a poimoh leh taksapte uh pia ding in a mansa a a kiang ua om gige ahi. Tua bang belampu hoih kepna nuai ah belamte bit leh khamuang uhi.

III. Belamchingpa hoih in a belamte a thei hi (Jn. 10:15)
Belamchingpa hoih in amah belamte a thei a, a min un a sam chiat a, a pizel hi a chi hi. Bangchiklai peuh in koimun ah om le uh leng amah belamte ahihleh hihlouh theitum, haih ngeilou chihna ahi. Hiai ah thei a chihna in a mel a a theihtup kia leng hilou in, a belamte hihna leh dinmun teng theisuak vek chihna ahi. A hatna uleh hatlouhna, a taksap uleh poimohte, a dam leh damlouh theihpih vek chih gen ahi. Tua in amaugel kikal kizopna hoihtak om ahi chih a hon musak hi. Tua bang a kitheihtuahna, kizopna leh kitanauna omtheihna ding in hun leh tha tampi ngai ding hi. Belampu in a belamte hihna leh dinmun salam leh khalam a a theihtel theihna ding in amah a belamte lak ah a va om a, tua kia hilou in amau toh akisuk khaktam uh poimoh ding hi. Paul in “Judate kiang ah Judami bang in ka om a, dan nuai a omte kiang ah dan nuai a om bang in ka om hi, tamsem ka lak theihna ding in” (1 Korinth. 9:20) a chi hi. Huchi’n a hihna uh leh poimohte uh a hunhun in a thei ding a, khalam dangtak leh gilkial ahih uh thei in a poimoh bang un khalam ann leh tui kiningching pethei ding hi. I Toupa Jesu leng Pathian gam tanchinhoih gen leh damloute hihdam a kholian leh khoneute tawnkual a a zinsung in mipite “chingtu neilou belamte bang a gimthuak leh dalh a om in a mu a, a lainat mahmah hi” (Matt. 9:36) chi hi. Belampu in a belamte agal a a-etthoh leh ahihna uleh taksapte uh muphalou leh theihpih banlou ding hi. Belamte dinmun leh hihna thei banlou belampu tuh belampu hoih hilou ding hi. Tua bang belampu in a belamte khalam leh salamtaksapna hukha lou ding a, alak uah kialna leh taksapna tung ding hi.

IV. Belamchingpa hoih a belamte’n a thei uhi (Jn. 10:3-4, 15)
Belampu hoih in a belamte a theih mai kia hilou in, a belamte’n leng amah thei uhi. A belamte’n amah thei uh ahihna kilatna a sap chiang a a aw leng za a theitum uh ahi. “Belamte’n a aw a za uh, aman belamte a min un a sam chiat a, a pikhia zel hi… a ma uh a kai a, belamte’n amah a zuizel uh, a aw a thei uhi. Midang zaw a zui kei ding uh…midangte aw a theihlouh ziak un” (Jn. 10:3-5). Midangte lak a leng theituam uh, haihlou uh chihna ahi. A pu uh muantak, belhtak, kingaknatak ahihna thei uh hi ding ahi chih a hon ngaihtuah sak hi. Haksatna leh lauhuaina hun leh mun a taisan ngeilou ahi chih thei a zui uh hi ding hi. Muanhuai i sak mite zuih ding kithalawp huai in khamuan huai hi. Huaiziak in kemtu i hihna ah i kepte’n muanhuai hi a ahontheih hun chiang un hon nungzuih ding kithalawp ding uhi.

Thukhitna: Kemtu Muanhuai chih toh kisai in Belampu hoih hihna apan in i en a, belampu hoih in a belamte dinmun a theihpih ban ah a belamte’n leng a pu uh midangte toh a theikak ua, tua kia hilou in, a belamte ading in a hinna tanpha a pekhe ngam hi, tua in a muanhuaina a hon musak hi. Tua ahihman in eimah mimal kingaihtuah leng Pathian in bangbang kep ding a hon pia a? Tua a hon kepsakte bang chibang in i kem a? I kepdan ah hon kemsaktu’n muanhuai honsa na diam? I kepte’n leng zuih ding in muanhuai hon sa ding uam? Hiai dotna-te eimah mimal kidong kawm in, Kemtu Muanhuai hitheichiat ding a panla a theihtawp suah ding in Toupa min in i kingen hi. Simtute tengteng Toupa’n hon vualzawl hen.