Pentecost Ni kichi gingtute ading in chiamteh tham leh loptak ni poimoh mahmah ahi. Pathian in Kha toh kisai genseng vuallouh hamphatna leh thilpiakte hon pia hi. Thukhun Lui hun toh kibanglou in gingtute sung a tengden ding a hon sungluah, thaunilh, chiamteh, baptis, makaih leh sinsak ban ah Kha thilpiak tampitak hon pia hi. Khasiangthou nasep gending tampi omte lak ah Kha thilpiak toh kisai saulou suikhawm leng i chi hi.

GENCHETNA:
Kha thilpiak- charisma tuh mihing in aphulouh Pathian apan deihsakna thawnpiak ahi. Jesu Khrist pumpi lamtouhna ding Pathian in hihtheihna chi tuamtuam 19tak Saptuamte a kepsakte genna ahi. Pianken siamna kisinsiamnate leng Pathian apan thilpiak himahleh Kha thilpiak toh kibanglou hi.

KHA THILPIAK KIHAWM DAN:
1. Kha thilpiak tuamtuamte misiangthoute thopna ding, Khrist pumpi lamtouhna ding a piak ahi (Ephesa 4: 12 – 13).

2. Pathian in hoih a sak bang a zalentak a a hawm ahi. Hiai ah Pathian a mithumte a kigolh kha vek uhi (1Kor. 12: 4 -11, 18; 8: 6).

3. Gingtute Kha thilpiak khatbek neilou omlou in, thilpiak tengteng tangvek leng omlou hi (1Kor. 12: 12-27; 1Pet. 4: 10).

4. Thilpiak tang pen in a phattuampih sang in midangte hamphatna ding a piak ahi (1Kor. 12: 7; 1Pet. 4: 10).

5. Kha thilpiakte Pathian thupina leh pahtawina ding a piak ahi (1Pet. 4: 10-11; Rom. 14: 12; 2Kor. 5: 9-10).

KHA THILPIAK ZONKHIAK DING:
Kha thilpiakte zonsuah leh zatkhiat ding ahi. Mi pawlkhat in thilpiak tang zenpi zang hetlou hiam ahi ding bang a zang zoulou omthei hi. Huaiziak in Kha thilpiakte zonsuahna dia theihtuak khenkhat hiaite ahi.

1. Laisiangthou gen Kha thilpiak tuamtuamte thei masa inla, zang sin (test) in (Rom. 12:6-8; 1Kor. 12: 8-11, 28-30; Eph. 4: 11; 1Pet. 4: 11).

2. Na thilpiak tante hon theisak ding in Toupa ngen inla, zatsiam theihna ngen in (Jak. 1: 5).

3. Toupa’n veina (burden) honpiakte leh nang a hon lamet hi a na theihte sem sin in. Midang in nang vei bang a veikhalou thei ahi (1Kor. 12: 31).

4. Nasep chiang a nuam na sakte (comfortable) leh midangten leng vualzawlna tang uh hi-a na theihte; nang-le-nang, Laisiangthou leh Pathian misiangthoute dong in namkip (approved) in (2Tim. 1: 5-7).

5. Pianken siamna (talent) leng Toupa hon piak mah ahihziak in huaite toh kinaite hi ut mahmah hi. Tuate zongkhia inla kisinbeh (polish) in (2Tim 2: 15, 21).

KHA THILPIAK ZATDAN:
Kha thilpiak toh kisai theihsiamvek zoh vual hikei mahleh theihlouh luat ziak a Toupa Jesu Khrist pumpi lamtou dia kisalai in tokbuai gawp khaktheih ahihman in theihtawpsuah a sut a sin ding ahi. Pathian in tup kichiantak leh lamet chiangtak nei a Kha thilpiak tuamtuamte a Saptuamte lak ah hawm ahihman in a zatdan ah pilvangtak a zat kisam hi.

1. Kha thilpiakte himhim Toupa saptuam lamtouhna ding ahi chih phawk gige ding ahi. Kuahiam mimal, pawlpi leh saptuam lamtou khalou a lainiam, tokbuai leh phelzak ding lungsim toh zangdia khemna tuh melma pa apan ahi. Hiai bang khemna apan vualzou ding Kha a dim gige poimoh mahmah hi (Eph 5: 18-21).

2. Toupa’n Kha thilpiak ei ahonpiak sang a midang a piakte lunggulh a en mawk theih ahi. Toupa’n ei toh kituak dia hon telsak leh deihsakna hon piakte kipaktak a san theih khamitna ahi. Khrist pumpi lamtouhna ding in thilpiak khat peuhpeuh athupi leh poimoh tuam hiam, aneu leh poimohlou tuam omtuanlou ahi. Toupa’n akizatna mun a poimoh chiat ding a hon piak ahi (1Kor. 12: 12 – 31).

3. Kha thilpiak tuamtuam tampi lak ah ei thilpiak tan bangbang midangte’n tang veklou uhi. Gingtute’n eimah thilpiak tan lam chiat i ngaih poimoh lam hitangpi hi. Himahleh ei tanbang tangsamloute ading in ei ngaihkhawk tuk in hon ngaihkhawk pih zoulou ding uhi. Huaiziak in Toupa pumpi lamtouh ding tha-it luatna lam ah alang-alang mohsa, phului a nohbuai gawp i hihleh khalam piching nailou hikha ding i hi (Jak. 3: 16-18).

4. Kha thilpiak i tan pen zang a eimah kilamtouh sawm i hihleh hon petu hon piak nasan hilou hi. I thilpiak tante midangte leh Toupa saptuamte lamtouhna ding a Toupa’n hon piak ahi. Huchi kawm in midangte ading a i zatkhiak tam peuh leh eilam ah Toupa vualzawlna leng atamsem hong luanglut ding ahi (Nas. 9: 36 – 10: 48).

5. Toupa’n ama thupina ding a hoih a sak bang a thilpiak tuamtuam hon piak lai in hiai thilpiakte zang a thupina kilakkhak ding lauhuai hi. Thumna dawnna, thugen, lasak leh nasepkhiak tuamtuamte eimah hatna a thilhih i sak khak ding lauhuai mahmah hi. Hon petu Toupa’n alakkik theih kia hilou in athangpaihna tuahkhak ding lauhuai mahmah hi (Nas. 12: 21-23).

THUKHUPNA:
Huai ziak in Toupa Saptuam lamtou a theihtawp suah a pangchiat i hihlai in i Khatan leh thilpiak tan kibanglou ahihman in ei tan leh awlmoh zawng kia enlou in midangte tan leng theihpih kizil ding ahi. Michih in amah sang in midang hoih sazaw henla Khrist in hon ngaihdam bang in kingaidam tuah chiat un a chih zuithei ding a Khalam pichin poimoh mahmah hi. Hiai theisiam leh zuithei ding in Toupa’n hon vualzawl hen.