Khovel khangthu ah mihing tampi sihna tan tun buaina leh haksatna huaisetaktak muh ding na om sek hi. Himahleh, khovel pumpi sukha leh khekzou khop buaina kichi pen a gige thil ahi kei a, omzel mahleh ngeina seh theih buaina ahi kei hi. Hiai bang khovel pumpi khawng ban buaina kichi pen alet leh neu dan kibang lou ding hi. Gal lam ah en leng, ei khang ah September 11, 2011 a America a thiltung pen galdouna in a sukkhak hunkhop om mahleh, hiai gal in khovel pumpi huam lou hi. Ahi a, hiai ziak a gamkhat leh gamkhat kikawmtuahna, kithuzakna, kisumdawnna leh lam tuamtuam ah bel khovel sukha tham hi. Hiai toh teh in, a kizom chihtheih ding a khovel galpi nih (World War I & II) omte’n ahihleh naksem in khovel pumpi sukha in khengzou hi.

Natna lam ah en leng, khovel khangthu ah natna hileng ziak a tampi sihna gen ding hunkhop na om hi. Rome Lemna (Pax Romana) mitsak leh a lalgam niamkiak sak zoukhop a kigen Antonine Plague (AD 165-180), Rome Lalgam sung ah hiai ziak a misi nuai 50 vel hi a kigen ahi. Byzantine Lalgam niamhiakna bultumtu hi a kigen, hiai lalgam kumpipa mintam a ki-phuak Justinian Plague (541-542), hiai ah khovel mi za-a-sawm (10%) bang si kichi hi. Europe gam khengzou a kigen Black death (1346-1353) leng huaise mahmah a kigen ahi a, Europe gam pumpi milip za-a-sawmnga (50%) bang a kiamsak zou kichi hi. Tua dan hial a huaisia hikei mahleh kum zabi 20 leh 21na ah leng Spanish Flu (1918-1920), Asian Flu (1957-1958), H1NI Swine Flu (2009-2010), Ebola (2014-2016), tutan a omtou lai AIDS (1981 apan) leh Zika Virus (2015 apan) chihte a kigen deuh ahi.

Bible sung i et leh, mihing khangthu ah khovel pumpi sukha buaina chiamteh ding muh in om hi. Eden Huan ah, khovel a mihingte kipatna (nupa masa) Adam leh Evi apan ettouh in, Noah khang ah leitung a inkuan khat a mi giat chihlouh mihing tengteng sihna tuichim om thu kimu hi. Babel insang kilamna ah leng mite paukhat zang a kithuzak a nasemte, pau kitheituahlou ding a apau uh suklamdang sak in om a, a nasep uh sunzom thei lou in leitung tengteng ah dalhsak in a om uhi. Hiaite ban ah, mimal khat (Abraham) apan inkuan khat, inkuan khat apan namtel khat tangthu Thukhun Lui tawpna tan ah om hi. Hiai sung ah, namtel Israel-te leh a melmate lak ah a honpi a natna, sihna, kidouna leh salmat a omna chihte om toutou a, Thukhun Lui laibu tawp dong muhtheih in om hi.

Hiai a tung a Bible sung leh polam a galdouna leh natnate, a kipatna sui leng gen ding om chiat ding hi. Himahleh, Bible sung a chiang mahmah a kigelh natna tuntu sihna leh huai sihna mahmah kipatna a om hi. Hiai in, khovel sukha kia hilou in a hoihlou lam ah tehpih ding omlou khop in khekzou mahmah hi. Hiai in mi tengteng a hoihlou lam in sukha: Pathian toh kimelmakna leh kikhenna (khalam sihna), taksa sihna leh tangtawn sihna (sih nihna, meidil pen) tun hi. Lam tuamtuam ah khovel in hiaite damna ding zong hi. Khamuang thei lou/thawmhau chihte thoihdamna ding, sihna tun natna beisak ding leh sakhuana a tangtawn vai sukkhak sawm in khovel kalsuan hi. Himahleh, tulel a i thiltuah COVID-19 in mihing panlakna lohsam ahihna langsak mahmah hi!

Eden Huan a hong kipan huai Adam khelhna in mi tengteng sukha a, sihna ding natna mihing teng in kipianpih hi. Hiai pianpih Eden natna pen niteng hinkhua a khelhnate ah kilatkhiakna (symptoms) muhlouh-theihlouh in om hi. Hiai natna test-na vanzat Pathian Dan thupiakte zang a chitaktak a kivelte ading in khelhna natna ah ka positive kei chi thei ki-om lou hi. Positive chihlel leng dahhuai ahihlai in, hiai khelhna/natna pen a veite a sihpih (fatality rate) tam mahmah chih hilou in, za-a-za (100%) si chih ahi! A dahhuai semlai ahihleh, tangtawn sihna tan ahi. Hiai Eden natna pen mihingte’n a damna ding bawlkhe nailou chih hilou in, bawlkhe thei lou ding chi ahi! Bawlkhe thei bang hileh leng aman tam mahmah ahihman in, aman pezou ding omlou himhim ding hi!

Himahleh, “Archimedes’ Eureka!” sang a EURIKA! EURIKA! zaw a om hi! Huai tuh, Pathian in leitung a mite mangthang vek mai ding a hon it hi. A it ziak in, mihing in a bawlkhiak theihlouh leh a leizoh ngeilouh ding dembei Pathian sisan luang in a Tapa Jesu Khrist Kalvari Kross ah a hinna pia in ei damna ding in hon peta hi! Halleluiah! Pathian in aman tam mahmah a eite damna ding a hon bawlsak ziak in, khelhnate kisik a thildang teng sang a Jesu Khrist telzaw mite ading in a thawn in ginna a san theih ding in dam-teitei-na a om hi.

Hiai damna thu mei-ek neng khat 1910 in Manipur sim gam ah hong tu a, “Pathian thilhihtheihna” ahih bang in, lamdangtak in kum tamlou sung in gammang kang bang a hat leh kin in hon nawk in hon zou hi. Hiai ban bel khangthu kikhek ahimai hi. Gallu lak ding zong mite apan Khamangthang zong mite i hong hi hi!

Tulel a khovel pumpi sukha leh khekzou ding natna COVID-19 damna ding mukhetu in pang leng “Eureka!” chih tan a kikou a khawl bang hileng, khovel ban a Siamtu’n hon siamtan lou ding ahi chih gintak haksa lou hi. 2 Kumpipate 7:9 a, gal ziak a Samaria a kial huaisetak a tunlai a, phak lite’n Pathian nasep a Aramte’ giahphual a nekseng louh ding amuh khiak ua, amau kipahna leh kivakna tan hitheilou chih a theih un, “…i hihdik hetkei. Tuni tanchin kipahhuai tun ni ahi a, ei i daihdide ua; khovak i ngak uleh gawtna i tuak ding uh. Huaiziak in, kisa ni, kumpipa inkawte i va hilh ding uh” a chi uhi. Hiai sangmah a chihtuakzaw om in a muhtheih hi. Ahihleh, Eden natna ziak a sihna apan damna ding thuguk thei leh nei i hi ka hia? Khovel a mi tengteng sih-ngeingei-na ding natna in a bop lai a, a damna pen thei leh nei hi leng bang i loh dia? A thawn a hawmtheih ding, i theih leh neih Jesu a damna pen bang i loh a??? I Toupa Jesu Khrist kivenna dia phatuam dia i gintak muktuamna, khutsilna, kikawmtuahlouhna chih thute kia ahikei a, a DAMNA ding TANGTAWN A DAM TAKTAK nading ahi.

Hiai tan a, “Bang i loh dia?” chih a zoh theih mai ding banglou khop in, i hamphatna tan uh lianlua ahihman in MOH-puakna (hi! MOH i chih ahi) toh kizui ahihna genlouh theihlouh a omlai hi. Bible polam khovel pumpi sukha leh khengzou khangthute ah leng tua i gen ding a dikna om dingsa ahi. Himahleh a dik chih theihchetsa Bible sung a te i etleh, siatna hong tungte toh kisai kha loutheilou theihtuak a om hi. Huai tuh, Pathian deihdan zuihlouhna ziak a siatna tungsek ahi. Adam leh Evi tungtang ah Pathian batna nei a bawl, leitung luah dim a Pathian thupina tankhe ding chih ahihlai in amau “Pathiante dan a om (like god” ding lunggulh in neklouh ding theigah a ne uhi. Noah hun ah Pathian in mihingte a bawl kisik a lunggim chih khop in mihing in Pathian deihlouh khelhna na khoih hi. Babel insang lamna ah, Pathian in amah thupina taklang dia khovel luahsuak dia a mihing bawl te’n Pathian deihdan hilou in amau minthan ding buaipih in munkhat a omkhawm ding thusawm nei uhi. Huchi bang in, Israelte pukna leng, tua bang mah in Pathian deihdan zuilou a pathian dangte naihsan chih ban ah, namdangte adia vualzawlna hih ding Pathian deihdan a zuihlouhna uh toh kisai ahi (Deut. 29:24-28; Amos 3:2). Huailou in, Toupa’n a thu ah i pilvanna ding in hiai thu na gelhlai hi. Na nna sem nuamlou nam leh gam a mangthang ding uhi...” (Is 60:12).

COVID-19 damna thuguk kemtu in pangleng hamphatna leh mohpuakna lianpi ahi ding hi. Mi tengteng sihpih ding natna damna ding thuguk Jesu Khrist (Col 1:27; Efe 1:9,10) huai kemte i hi. Hiai thuguk ei lak a theihsak a omta pen, midangte lak a puak ding Pathian apan THUPIAK GOL ahi. Hiai thuguk muanhuaitak a kep ding chih khenlam ah muanhuaitak a kemtu a Toupa’n a hon muh ding kisam ahi (1 Kor 4:1-4). Hiai thuguk i neihna, i hinpihna leh i puanzakna in mimal, inkuan leh nam sukhalou thei lou ding ahi. I mission: Khrist thuguk kemtu muanhuai hi a Toupa’n hon muhte hithei ding in hon vualzawl chiat hen!