Text- Gen.4:9; 1Tim.5:8

Tukha thupi dia kitel ‘Mihinpihte Kemtu Muanhuai’ chih thu houlim theihna lemtang hon pia i biak Pathian leh heutute tung a kipahthu gen in, semtute itna chibai ka hon buk hi. Kemtu genchetna dia Genesis a thilsiam thu pansan louh tuh puan-ak angkilh tungnungpen kilhkhelh, anuai lamte kilh dik a phatuam nawn lou toh tehkak ahi. A neitu Pathian in kep leh etkol dia hon piakte kia kem kihilel ahi chih mangngilh louh ding ahi.

I. Mihinpihte Kuate Ahi Ua?
Greek mipil Aristotle in, “Mihing tuh a kilawikhawm ganhing ahi” achi hi. Mihingte khat-le-khat kidontuah a khosa khawm dia Pathian bawl i hi uh. Midangte phawkna tellou a mahni kia kibuaipih tuh Pathian geldan hilou hi. I thupi a ‘Mihinpihte’ chih thumal pansan in anuai ate sawkkha bik leng i chi hi:

1. Mahni Inkuanpihte: Pathian in mihingte kipawlkhawmna dia a bawlkhiak masak pen tuh inkuan ahi. Hiai inkuan a kilawikhawmte mimal chiat mohpuakna Laisiangthou ah kichiantak a taklat ahi.

1.1. Tate Kepna: Nu leh pa tampite hihkhelh leh khonung khitui luanna tuh tate a hun tak a kep louh ahi. Sum-le-pai zonna leh mahni zalen ut ziak a tate kep louh a kuankhiak leh vakkhiak san. A hun ma a kizalensak ziak a zalen hun ding tak a kol-awk phing theih ahi. Tate thunun zohlouh ziak a ‘ka ta ahi nawnkei’ chi a kisuksiang leng a buching kei. A zuau ngeilou Laisiangthou sinsakna bang a ‘a paina ding lampi a naupang chil’ tuh vualzawlna leh tawldamna ahi [Pau 22:6]. Thil dang teng sang in tate kepna ngai poimoh masa zaw ni.

1.2. Nulepa Kepna: Laisiangthou thupiak ‘nulepa thuman leh zahtak’ ding in chiangtan a neikei a, a damsung uh leh ta hih sung uh uap ahi. Mahni kitoudelhthei, sepna neithei, zi leh ta neita chih ziak a hiai apan suahtak theih a hikei. A tek leh sih dong ua kep ding, kipah sak, nuamsak sak ding tate mohpuak ahi [Pau.23:22,25]. Nutek-patek te mawl leh trop sa, kihbawl, kem nuamlou, intuamsan chihte Pathian thupiak bohsiatna ban ah hamsia toh kizui ahi [Pau.20:20; 30:17]. Tuisik apan khoiliantu nu leh pa simmoh, kem nuamlou tapa; nu leh pa dia zot ngoihngoih kem utlou, ‘nu’ leh ‘pa’ chi a le sam utlou mou tuh hamse thuak ding, a tuh bangbang attu ahi ding [Gal.6;7]. Na don dan kep dan mah nang tungtu ding chih ahi.

1.3. Sanggamte Kepna: Kaina in a sanggampa Abel a thah nung a Pathian apan dotna poimoh hong om “Na nau Abel kaw om ahia?” chih a dawnna tuh - “Ka thei kei: ka nau donpa ka hi ahia?” chih himahleh Pathian in a tung a gawtna a kikhiam sak kei [Gen.4:9]. Mahni pianpih leh mihinpihte tung a lungput leh gamtat diklou neih louh ding deih in Paul in Korinthte kiang ah- “Ka hong chiang in bangchihiam in kitainate, kihazatnate, hehnate, kilangkhennate, kigennate, kihuaukhumnate, kingaihlet luatnate, buainate a hong om kha ding… thil sianglou hihte, kingaihte, hukte ching a kisik tuanlou mi tampite ka kah kha ding e, chih, lau kei ve” a chi hi [2Kor.12:20]. Peter in “Atawppen in, na vek un lungsim mun khat in om unla, kilainat tuah unla, thunuailut in om un,” a chi hi [1Peter:3:8]. Paul in Timothy kiang ah “Himahleh kuapeuh in amah mite ading a ngaihtuah sak kei a, a ma innkuante khol houh a ngaihtuahsak keileh, ginna tuh a zuausan a, ginglou mi sa’ng in a gilou zaw ahi” a chi hi [1 Timothi:5:8]. Sanggamte itna diktak a it ding, kiniamkhiakna lungtang lakkhe ding a thupiak i hi.

2. Mahni Chi-le-sate:
Pathian in minam khat a honbawl bang in ‘Salam’ leh ‘Khalam’ kivaipuakna i nei uhi. A koi zawsam ah leng kemtu mohpuak tuh kithutuahna leh kilemna omsak ding ahi. Laisiangthou in lemna pen ‘zon’ leh ‘delh’ ding a chi [Sam 34:14]. Lemna dia Paul sinsakna tuh mahni lam a mohzaw, a zangzaw a panngapna ahi [1Kor.6:7]. Solomon thukhenna ah nu diktak a zangzaw-a pan a ngap ziak in naungek hinna humbit ahi [1Kum.3:16-28]. Jesu’n ‘lalgam leh inkuan amah kidou mangthang ding; Setan amah a kidou leh a gam dingkhe lou ding’ achi hi [Luk.11:17,18]. Tungnun leh thuneih kituhna tuh Pathian melsesaktu leh chi-le-nam khendalhtu dia Setan vanzat ahihman in mangthang dia kideih i hih kei leh kingaihtuah hun ahita.

Leon Lionni in Thankik tangthu hiai bang in a gelh hi: “Ganhing peuhmah in mahni zia kikhengtheilou a neih lai un Thankikten ze-tumta neilou in a khosakna mun zil in ze tuamtuam nei uhi. Hiai kithumunlouhna vei leh puaknat-a nei lawmtaten- ‘I pianzia ei khek theih hikei mahleh mun khat ah om in om khawm peuhmah le’ng; i san leh san khawm a, i vom leh vom khawm ding hang a, ze kibang nei ding hihang’ chi in omkhawm ding in thupukna a bawl uh achi hi. Pawl phuh tam, heutu pum hauh sang in omkhawm dan siam a, pilkhawm leh haikhawm diamdiam tuh pilvai in lukhawng neizaw ding ahi.

3. Meithai, Genthei leh Tagahte:
Hiai gentheihna ziak leh amaute tung a gingtute mohpuakna Laisiangthou in hiai bang in a gen:

3.1. A taksap leh poimoh uh ngaihtuah sak ding: Hiai mite limsaklouh tuh ginna zuausanna leh ginglou mi sa’ng a gitlouh zawkna ahi [1 Timothi 5:8]. Jakob in thilhih in a zuihlouh khamitna tuh ginna si, dawite ginna banglek neihna ahi chi hi [Jak.3:17,19].

3.2. A koltanna ua pan suahtak sak ding: Nek-le-dawn piak, silh-le-ten got, inn a ompih ding ahi. Hiai tuh a pawlang a khamitna, an-ngawlna, lam leh kah tam, Halleluiah chih zihzeh sang a Pathian deihzawk ahi [Isai 58:6,7,10].

3.3. Thadah leh tatsiat man a hivek kei: Zawnna leh gentheihnate khovel a om gige dia Pathian seh ahi [Diu.15:11; Mk.14:7], amaute bang chi’n i kem ua chih khalam dinmun tehna dia Pathian thilgel ahi. Jesu’n gentheite’ nek-le-dawn, silh-le-ten piak; a damlouh hun leh haksat hun ua veh, a taksp uh got tuh Amah tung a hih in akoih [Mat.25:35,36]. Hiai omdan tuh mi mitmuh a ngolh tam, dawk tam sang a genthei tagahte kiang a piakkhiak tam Pathian kipahpih hizaw chihna ahi.

4. Gamdang Mite:
Jesu Khrist ziak in nam dang leh pau tuam i chihte toh inkuan khat i hita uhi. Dantheimi’ dotna ‘…ka inveng kua ahia?’ chih Jesu’n dawnna a piaksak tuh ‘A hehpihpa’ chih ahi [Luk.10:29,37]. Laisiangthou in gamdang mite it ding leh simmoh lou di’n hon thuhilh [Diu.10:19; 24:14]. Office, nekzonna leh siamsinna munte a kisukkhakpih nam dang leh ginglou mite tung a itna leh hoihna latsak tuh mihinpihte kemtu muanhuai hihna ahi. Zawlnei Jeremiah in Babulon a saltangte a laikhak ah- ‘inn lam a teng ding, huan bawl a agah ne ding, zi leh pasal nei a tate nei ding, ban ah a saltanna khopi uh hoihna ding zong ding’ in a thuhilh hi. Aziak tuh amah hoihna ziak a amau leng hoihna mu ding chih ahi.

Pathian hehpihna toh khua-le-tui taisan a nam tuam, gam tuam, pau tuam leh sahkhaw tuam te lak a siamsin leh nek zong tampi i omta. I va khosakna khopi leh a mite hoihna ding a va gamtat ding tuh Pathian thupiak ahi. [Kum tamlou paita a Patricia Mukhim, Shillong Times Editor in ‘Manipur mite ziak a Shillong khopi bolhloh leh trop ahi’ chih a gelh thu zak nuam hilou hi].

II. Kemtu Muanhuai’ Poimohna
Kemtu muanhuai ‘hih’ a poimoh zahzah in ‘neih’ leng a kiphamoh hi. Honkemtu dia sum-le-pai, milian-milal, hiamhei-galvan neih Pathian deihlam ahikei a, hamse thuakna ding lel ahizaw [Jer.17:5-8]. Naupangte sinlaibu ah- “Kumpi khat a Zawng khoizual in Gul gunei lauhuai tak apan a hotkhiak leh kipaklua in amah vengtu ding in koih hi. A khawnbawlten awi kei mahle uh ‘ka hinna humbittu’ chi in sel zoulou uhi. Ni khat Kumpipa’ ihmu a ven lai in thou khat in va boh nakkhem a, hawlkhe sek mahleh hawlkhe zoulou hi. A pu subuai ahihman in thangpai mahmah a, namsau a huai thou a ban ek leh a pu a banlum kha!” chih ahi. Hauhsakna, sum-le-pai, milian-milal, hiamhei-galvan chihte hon kemtu leh humbittu ding i sak kal in hon susetu, siatna leh manthatna a honpiluttu suak thei gige uhi. Amah sang a muanzawk neih Pathian in zadah ahihman in kivelphat ding ahi [1Tim.6:9].

Thukhitna: Nang hon kemtu in kua na nei a? Nang deihdan hangsan tak a genkhe ngamlou leh gum ngamlou di khop a na maivil, Biakin kai, Pathian’ gam nasep, Missions nasep leh thilpiak chihte thudon manlou zen a na buaipih tuh nang hon kemtu dia na neih ahi.

- Na sum-le-pai muhna midang siatna tuntu leh khasiatna ahikha hia?
- Na sum-le-pai zatna ah na pianpih sanggam khasiat velvulna omkha diam?
- Na neih-le-lam Pathian apan vualzawlna, Amah hon kepsak na chi ngam diam?
- Nang ziak a khamuang leh tongkhong lou a khosa ka hi chi ding meithai, tagah leh genthei bangzah om dia?
- Na tekpi-tekpu kep bang un na tu leh tate’n hon kem leh na lung a kim diam?
- Na kep leh etkol mite’n kemtu muanhuai hon chi di uam?
- Pathian hon sehna leh deihna bang kemtu hi in na kithei hia?

Mahni adi kia a hing hilou a mihinpihte kemtu muanhuai hi ding in Toupa’n semtute hon houpih chiat hen aw.