“Koute zaw Khrist nasemte leh Pathian’ thuguk kemte bang in mi’n hon thei uhen,” (1Kor. 4:1).

“Mihinpihte Kemtu Muanhuai” chih thupi nei a, article gelhthei dia Pathian in hon pii ziak in Pathian’ tung ah kipahthu ka gen masa hi.

Gelh dia mohpuakna piak a ka om bang in, 1. Banglam hiam chiat ah i mihinpihte tung ah mohpuakna kineichiat ahihdan, 2. Genthei, tagah, panpihngaite kitheihmohbawl louh ding leh 3. Mimal hamphatna himahleh midangte’ adia siatna eg. Khamtheih zuak leh chiing, kinelhsiahna chihte khelhna ahihdan saulou in kikum leng i chi hi.

1. Banglam hiam ah mihinpihte tung ah mohpuakna kineichiat hi: Johan 3:16 ah, “Pathian in khovel a it mahmah a a Tapa tang neihsun a pia hi,” chi hi. Eden apan khelhna ziak a si a mangthang i hihlai in, tangtawn hinna i neihna ding in Pathian in a Tapa neihsun Jesu Khrist i sik leh tang a hon sihsak ziak in tangtawn hinna i neithei hi. Pathian in tangtawn hinna hon piak pen eimah kia in neih a kepbit ding hilou in, midangte’ kiang a taklang a piaksawn i mohpuak ahi hi. Hiai itna thilpiak thupi penpen nei a Pathian’ thuguk kem (piangthak) i hihleh, eima’ innsung mite lak a kep leh don ngaite eima’ mohpuak ahihdan i theihthak kul hi. Aziak bel, Laisiangthou in, “…kuapeuh in amah mite ading a ngaihtuahsak keia, amah innkuante kholhouh, a limsak kei leh; ginna a zuausan a, ginglou mi sang in a sezaw hi,” (1 Tim. 5:8) chitel hi. Huaiziak in, innsung a mihinpihte’ salam leh khalam dinmun tanpha i mohpuakna ahihdan kimangngilh saklou in, amaute’n sa leh kha ah damna kichian a nei uh hiam chih kemtu (a piangthakte’n) i theihchian poimoh hi.

Huan, ‘mihinpihte’ i chihchiang in, innkim, innkiangte kia hilou in, i mihinpih aneu-alian, ateek-akhang, mizawng-mihau, mipil-mimawl, mihoih-hoihlou, mifel-mifellou leh mi tengteng huamkha ahihna ah, amaute’ salam leh khalam tungtang ah i mohpuakna lian petmah hi. Lev. 19:33,34 ah, “…gamdang mi na gam ua teeng sam a om uhleh bawlse kei un…. Noumau na ki-it bang un it un…” chi hi. Piangthak, Pathian’ thuguk kem i hih aleh, innsung leh vengsung mite kia hilou in, pautuam, mundang leh gamdang (piangthakloute) it ding a thupiak i hi uhi. I itna in a huamkhak dingte ahihleh, mihoih, mihau, mipil leh mi kizente kia hilou hi.

2. Genthei, tagah leh panpihngaite kitheihmoh-bawl louh: Genthei leh panpihngaite kitheihmoh bawl baihlam mahmah ahi dia, amaute nelhsiah in omkhasek uhi. Mother Teresa in, “Zawnna kichi mihingte’n i piankhiakpih ahikei, (zawnna toh kuamah piangkhawm lou) nang leh ken i mihinpihte tung a i sepding bangtak a i seplouh ziak a zawnna hong om ahi,” ana chitop! Khristiante adi’n kisuanlahhuai in zumhuai zawzen hi. I gam, Khristian gam kichi zenmah ah, ahau leh a zawngte kikal kigamla hiaihiai in, kideidanna in gamkek hiaihiai hi. Laisiangthou in kipanpih tuah a kitungding tuah dia hon sinsakte nelhsiahlou i kisaklai in, nasatak in i nelhsiahta uh! Huai i chihna ziak ahihleh, azawngte’n leitawi di (tanaute lak nasan ah) muzoulou ua, ahau leh ahau, anei leh aneite kileitawi tuahna gam hita ahihman in. Tua kia hilou, Pathian in tagah-genthei leh meithaite khotuah in, sorkalte tungtawn in amaute’ tan ding thil tuamtuam pia in, Job Card bang, Anganwadi tungtawn a naupangte’ dawn leh nek ding tuamtuam pia hi. Huaite khawng naupangte’n tangkim khollou in Vaite dawr leh hotel bawlte kiang tungpawl om gige maimah! Tua ban ah, meithaite adia Housing Scheme’ langva chihte hong tungzel mahleh, meithai leh mizawngte kiang tungbanlou zel! Sorkal’ buhpang sawkbanlou leh azawngte ading in BPL tawn in thil hong paizel mahleh, anei leh haute’n tang ua, a zawng leh gentheite’n tangbanlou zel uhi. Eh! Saptuam lama Dorka-te saia anntangpham nangawn a haksate sang in a hauzawte’n sum neizaw uh ahihman in lathei/lazou zawzel uh (bat theihlouh ahih ban ah, batdit haksa sapawl leh bat ngaihsaklou pawl om i hih chia…) chih hitel veh!

Deut. 24:17 ah, “Gamdang mi leh tagahte a tan ding uh suhsak kei unla; meithai puansilh lai leng a bat (a leibat) khamna ding in laksak kei un,” chi hi. I kampau leh i thilhih dan khawng uh kuahiam mi gentheite leh tagahte adia khasiatna ding khop leh kingaihsiatna behlaptu a hihkhak ding lauhuai lua hi. Bible in, “A zawngte kah zalou ding a bilhum peuhmah, akah hun a om ding a, kuaman bil dohlou ding hi,” (Pau. 21:13) chitel hi. I Khristian hinkhua ki-etchianna ding leh kivelphatna ding tam mahmah maw? Genthei tasamte toh kisai in Bible in, “Na neih nakleh na innveng kiang ah: Hong paikik in, zingchiang in hon pia ning, chi in sawlkik ken,” (Pau. 3:28) chilai hi. Dr. Alfred in, “Midangte ngaihsakna nei hetloute tuh khovel a haksatna neilianpente ahi. Midangte’ lohsapsekna leng huchibang mite’ ziak ana hi,” chihial hi. Pau.3:29 in, “Na innveng in nang hon muang a na kiang a teeng ahihman in, khasetak in koihke’n,” chi hi. Kingaituahthak in, kivelchian ni, i mihinpih i innvengte khawng ei ziak in khasetak in a omkha ding chih kivenhuai thamlou in, mihinpih genthei-tagah, meithai leh a zawngte beidotna limsakkhalou i na hihleh, i tu leh ta khang a kapte limsaklouh a a-om maimah ding mulkimhuai hi. I Pathian phulak siam Pathian ahihman in i pilvang ding uh aw. Bible in, “A zawngte hehpih mi in Toupa leitawisak ahi a, Aman dinkik teitei ding hi,” (Pau. 19:17) chi. Bangzahvei Toupa i leitawisakta a? Pathian’ hon ditkik ding in mi gentheite kiang ah bangzah i hawmzakta ale? “Ka gil a kial in nek ding n’on pia ua, ka dang atak in dawn ding n’on pia ua…Hiai ka unau neupente tung a na hih uh ka tung a hih na hi uh,” (Matt. 25:35-40) hon chi dingpa toh khatvei ni chiang in i kimaituah teitei ding uhi. Mi genthei-tagah leh meithaite kemtu ding in muang mahmah in Toupa’n nang leh kei A thuguk hon kemsak a, amaute eite mohpuakna a hihdan mangngilh keihial ni.

3. Mimal hamphatnate midangte adia siatna hitheite: Tuhun chiang in khelhna i chihte leng om nawnlou abang maimahta! Gam khenkhat adia khelhna lianpi i chihte, gam khenkhat in khelhna in ngailou zel ahihna uah, khelhna chih leng omlou bang zawzenta hi. Huchihlai in eite’ ki-etna/kitehna di’n innvengte hiam, seppihte hiam, lawm-le-vualte hiam hilou in, Bible kitehna dia i zat ding uh poimoh mahmah hi. I mihinpihte’ toh i kiteh leh zaw i dik gige dia, kitehkhial i hi ding.

I gam ah, mimal hamphatna ding ahih nakleh, midangte’n siatloh in sihloh zawzen in inn-gampih hialle uh leng poisakna omloukhop in gingtu kichite lak ah Pathian lauhlouhna uang mahmah hi. Khosak zangkhaina ding zon ziak a khamtheih zuak, Kanni leibawl chihte khelhna a leng ngailou i hitamai uhi! Hiai i thilchinte’ ziak in i khosakna a hong zangkhai zawdeuh leng a hikhathei. Himahleh, ngaihtuah saudeuh dia poimoh ahihleh, i thilhih in i mihinpih mi bangzah pa leh nu neilou in a koihta a! Meithai tagah-genthei bangzah kibehlapsaktu i hi a? Ingam-lougam bangzah i omta a? Ka thilhih in ka innsung leh ka khang paizel ding ka tu leh ta bangchituk in hon sukha dia? Zangkhai zawdeuh a khosak utna leh sum-le-pai delh ziak in, mite hinkhua i suksiatsak in khang bangzahtan adaih dia? chihte khawng suut vengveng poimoh hinatel e maw! Hiai thilhihna a sum a ana pang a apung delhte leng kingaihtuah vengveng ni, mite’ haksatna panpih a, a buainate panpihtu a kikoih a, a sumpung (amet) mu le i hikhathei, i thuak ding uh kibang veve ding hiveh! I thilhih ana siatpihte thukhat hileh, ei, midangte adia siatna lampi sialtute’n mailam a agah i at ding leng ngaihtuah detdet kul in poimoh hi.

Huaiziak in, i saptuamsung mi hingal a hiaibang thilhih chingte kingaihtuah hun hi. Saptuam in dan leh dun aneihte nelhsiahlou in, saptuam’ tungtawn a Pathian’ aw za a kingaihtuah hun mahmah ta hi. Huan, saptuam in leng hiai thilhoihlou hihte nelhsiah a etliamthoh a ensan mailou in, Mihinpihte Kemtu Muanhuai i hih theihna ding leh, Pathian’ thuguk kemte’ mohpuakna ahihman in chimtaklou in a thilchinte uh khelhna thupitak ahihdan itna toh theisak in, thu hilh hiat-hiat ni.

Thukhitna: Mihinpihte tung a i mohpuakna, Genthei tagah panpihngaite tung a i mohpuakna leh Mimal hamphatna, midangte’ adia siatnate khelhna ahihdan tamlou bukimloutak a i taklatte, simtute’n ngaihtuah a, kivelthakna a zangthei di’n Toupa’n hon vualzawl hen aw. Amen!