… Aman tuh a hehpihna thupitak bang zel in, misi lak a kipan Jesu Khrist Thohnawnna ziak in lametna hing mu ding in a hon suang nawn a. (1Pet 1:3)

Mi diktatte leh diktatloute thohnawnna a om ding chih Pathian lam ah ka lamen a… (Nas. 24:15)

… Jesu Khrist thohnawnna ziak in tuin nou hon hukheta hi… (1Pet 3:21)

Thupatna: Khrist thohnawnna in khelhman sihna zou a hinna thak i ngahna leh sihna zou a tangtawn a hing ding a taksa mahmah a thohnawnna lametna hon musak tuaktuak hi. Huaiziak in, Khrist ziak a sihna zou a hinna thak a hing miten Khrist thohnawn bang a thounawn ngei ding i hihna thuguk muanhuaitak a kem in hinpih chiat leng manpha mahmah ding hi. Hiai thuguk kemmiten i niteng hinkhua, i sep leh bawl, i pumpi ban ah i thuakna leh haksatna hunte ah kemtu Muanhuai i hih ding ahi.

Nasep Silbawl Tungtawn a Thohnawnna Thuguk Kemtu Muanhuai: Paul in “Thil bangkim hih kei a ding in a siang a, himahleh a hoihkim kholkei, bangmah sikha ding in ka kiphal kei” chi hi (1Kor 6:12). Tangtawn sihna apan hinna Khrist a tang a thounawnta miten i nasep silbawl dan etthaktuak hi. Thounawn hinkhua leh tangtawn hinna thuguk ngaihsaklou a sa hinna khual a khat peuhpeuh, tuahkhak bangbang sep in i sa hinna saltangsak in, i kha hinna subah thei hi. ‘Hiaite zaw ka sem thei kei, ka ginna toh a kituak kei’, chih theih i thuguk kep ading a muanhuaina ahi. I nasep hoih bang in lang mahleh Toupa ading hun awng omlou khop a sem i hihleh muanhuailouhna ahi. I nasep silbawlten Toupa toh hon ki gamlat saklouh ding ahi. Thuguk kem a i kingaih kawmkawm a i nasep dangten (sum zonna, louma, inkuan khosa etc) sikha a hon neihlouh ding ahi. Khrist in amah a Pathian thilgel, genkholh a om tangtun ding lungtup a nei in tua ding in leng kiman hi. Nang mimal leh na innsung a sung ading hoih kia en a nasepte Toupa ngaih in kihhuai leh midangte Khrist muhna ding dal ahih khak ding lauhuai mahmah hi. Paul in amah ading a poilou hinapi a unaute ading a pukna hithei thilte ka hih kei a chih bang in Khrist a thohnawnna lamen miten i nasep silbawlte enchian thak thei le ut huai mahmah hi.

Pumpi Kep Siangthouna Tungtawn a Thohnawnna Thuguk Kemtu Muanhuai: Jesu Khrist a thohnawn in a tuamna puante han ah nusia in si ngei nawnlou ding in thoukhia hi. Khelhna a si, Khrist Jesu a thounawn kichi miten khelhna ei a omte nusia a amah bang a si nawnlou ding a siangthoutak a i om ding ahi. Jesun, “Na siangthou ding uh ahi, kei ka siangthou ngal a…” chi hi. Aman a hon ngiat bang a muanhuaitak a lungsim, pumpi, neklehdawn kikep siangthou ding ahi. Khrist a lametna nei hisam, khelhna a tuam; ut teng ne a dawn kawm, mahni taksa ut bang a zang leh sawisa a i om in hon liahmang a, kipahna kinei theilou hi. Amah, Khrist a lametna nei mite; amah a siangthou bang a i sianthou ding ahi. Danial leh a lawmten kumpipa ann leh a dawn wine bang tang ding a hamphatna piak himahle uh, amau gilpi ngaihtuahlou in a Pathian uh mai a sianthouna thupi/poimohzaw a ngai a huaite a kihih thanghuai louh a tup chiltelna uh kemtu muanhuai hihna ahi. Pumpi kep siangthou ding thu donlou a muhteng ne a, tuahteng dawn i kep thuguk zulhzausanna ahih kia hilou in, i taksa ading mahmah in leng siatna ahi tampi om hi. Joseph in a pi chialna Pathian mai a khelhna leh siangthou lou ahi chih theiin a taikhiak san a thuakna omte a maituah zaw hi. Kuapeuh amah tung a lametna nei peuhmah amah a siangthou bang in a kihihsiangthou nak hi (1Johan 3:3).

Thuakna leh Haksatna Tungtawn a Thohnawnna Thuguk Kemtu Muanhuai: Gingtu pai masaten haksatna leh gimthuakna bangzahta maituah in si khop a bawl himahleuh Khrist ziak a a thohsansa uh khelhna a puk nawnlou in, sihna zou a thohnawnna lamen in hangsantak leh kimantak in a thuak uhi. Gilkial khak ding, neihlouh khak ding, tanlouh khak ding lau a hamphatna chia i delhdelhten i thuguk kep ah hon zulhzausak hilou a hiam chi ka hi. Meikuangpi a paih a om ding, sahang kulsung a khiak ding chihte maban in nei mahle uh a kep thuguk uah muanhuai uhi. Thuak khak ding, gilkial khak ding lauh luat ziak a mahni hihlouhna pi, a taktak a dinmun ut huailoupi khawng a hi ading kitam mahmah hi. Jakob in a u Esau muh ding ut leh lauh thuah a, a u lam zuana a pailai in zankhat Pathian toh kibuan khovak uhi. Buai leh haksatna i maituah ding a om chiang in lauhman a kizopna bawlpih maimah sang in Jakob bang in Pathian buan ni aman hon zohsak in hon khamuan ding hi.