Marka 11:1-11

Simtute Palm Sunday chibai. Hiai ni Jesu Khrist Jerusalem a lutna ni ahia, thupitak a pahtawina a tanni omsun ahi. Hiai ni’n Naupang ten khosung teng ah zingtung in Pathian phatna awging suah ua, huai in Pathian phattak, pahtawitak ahihna hon musak diak hi’n ka thei a kipahhuai mahmah hi. Jesu vualzou a Jerusalem a lut bang in i Khristian hinkhua ah vualzohna lampi chih toh kisai saulou houlim lehang i chi hi.

Jesu Kumpi dang toh kibang lou hi: Leitung kumpite khosung a lutdek chiang un, lenna hoihpen, gari hoih penpen, sakol hatpen, vengtu ding leng hoihpha pente telsek uhi. Jesu khopi sung a lut dia kisa in, a lutdek a Sabiltung akaisak a, huai a tuang in a lut hi. A transportation zat bangchi nasa a? Bang ziak a sabiltung a tuang a lut ahia? Jesun thil hat leh thupite a telkei a, kingainiam in, mite batphak ding ngimna in ganlak a leng hatlou deuh, thumang mahmah a tel hi. Silbiltung in kingaihniamna leh lemna a ensak hi. Jesun a kingaihniamna lampi tot a vualzohna lampi ahi. Nang vualzohna lampi tawnkha in na kithei hia?

Mipin Jesu pahtawi in kikou uh: Jesu gantung a tuang a hongpai tak in mipi kikou in thusam hoih taktak bawl in na om uhi, hiai te tengteng koi a kipan a hongpai zok mawk uh ahia, Jesun a nungzuite a sawl lai a mipi le om nailou hia, tulai a mobile phone a kisapna ding chihte lah om nailou dia, kintak a mipi hongpaikhawm theih mawk uh lamdang leh thupi hial hi. Mipi hong paite’n amau neihlam chiat hon thohkhawm ua; a puante uh lampi a phah in tumsing sawl tawikawm in hong kikou uh a, a kikou husa uh ngaih leh thupi ahi ding, Jerusalem khua thawn hial a chi a. Akhente adia bil-ap huai mahmah hikha thei hi. Hiai amipi kikoute kikouna ziak thil 2 om hi. Khatna- A thillamdang hihte ziak in, damloute damsak a, misi natawm kaithou ahihman in Amah phat in kikou uhi. Anihna- Romte khutnuai a kipan a suahtakna ngahsak ding (political freedom) lametna ziak in kikou uhi. Bang ziak teng hitaleh zong Jesu phat in kikou uhi. Nang bang ziak in Jesu pahtawina na pia a? Bang ziak in na kikou a?

Hiai kikou mite akhen midangte kikou ziak a kikou leng om maithei, a thu theichianloupi a mi’n ahih ziak a hih chih bang leng om khathei uhi. Huai bang in enleng mi Biakin kaizel hive un, i va kaisam kei dia chi a mihih dan vazui ve himhim sawm pawl om thei hi. Huchibang miten kipahna mulou ding uhi. Hiai Jesu phat a kikoute mah a kalnawn in “Jesu that un, Khailum un” chi’n kikou zel uhi. Lamdang maw! A lamet uh banglou Jesu a lamet dan ua omlouh chiang in thah mai hoihsa uh hizel ding hi. Lungsim kikhek thithe mai ki-omsek hi. Jesu pahtawi a kikou mite lampi tot a hoih mahmah lai in, a khente mi hihdan eng maimai a mite lampi totsa koppih sawm maimah i hih khak ding lauh huai hi. Nang Jesu pahtawina hinkhua zang in na kithei hia?

Jesu pahtawi a om hehsan uh: Jesu khopi sung a hong lut a pahtawina nasatak mai piak a om leh Pharisai leh laigelh mite, tulai pau leh saptuam makaite, heh ua Jesu kiang a va pai in thunei lua omtak in hiai mi kikoute daisak in, va chi gaga uhi. Jesun daihsak- malak ah “hiai mite kikou kei le uh leng suangnoute kikou lai ding uhi” na chihsan lel hi. Mihingten Pathian pahtawina i piak nop kei leh thilsiamten pe dia mansa hi uhi. Mihing ten i mohpuakna uh i sep buching ngeingei ding uh ahi.

Pharisai leh Laigelhmiten Jesu a hehsan ua a tai uh a theih louh man uh ahi. Sahkhua mi law mahmah napi a huai sahkhua neitupa Jesu pahtawi khalou ua, amau theihdan a pai maimahte ahihziak un buai huai uhi. En leng i sahkhua mitna midangte demna ding, septheih i neih sun te midangte demna ding bang a i zat leh Pathian pahtak kiloh lou hial ding hi. Mi dangte hih dem a, midangte soisel nilouh na hih leh vualzohna lampi na tawn kha nai kei chihna ahi. Vualzohna lampi zaw mahni kimuh niamna mahni sang a Khrist koih letzawkna ahi. Huai lampi tawn in na kithei hia?

Jesu kumpipan itna leh lainatna liantak nei: Jesu khopi sung a lut, mipin bohnoinoi, hiai kan a kipahtawina leh tawisanna omnawn ding hia chih ding khop in om, himahleh sawtlou chik in Jerusalem a kahkhum maimah hi. Kumpi kap na mungei uhia? Kumpi’n a mite thuakna lainatpih a kahpih om ngei diam? Jesun lainat in athuak ding uh amauten theilou uh a denchiang mah a hiai khopi se ding ahi chi’n kahkhum hi. Hiai bang a itna leh lainatna nei kumpi dang omlou ding hi. Na inkuan sung kisia, nang mimal hinkhua kisiate ah Jesun hon kahkhum ahi chih phawk in. Jesun mi a it bang a enleng midangte itna neih a, mihuatna te paimang zaw le vualzohna lampi tawnkha kihi ding hi. Unau na lampi Jesu toh na paikhawmna pen vualzohna lampi din na zangthei hia? A road to victory na chi thei diam? Bangteng ah na vuallel a? Bangteng ah vualzohna na mu a? Koi mun a i vualzohna lampi?

A ganta Sabiltung: Hiai ganta zat in kingaihniamna a gen a, lemna thu leng a genkha hi. Lemna tanchin hoih na khe ua bun in a chih bang in Jesun kilemna, kituahna ding deih in hongpai a, Jesu nei na hih leh mite toh na kituak hia? Midang na huatna omkha hia? Kivelpha thak in. Jesu kiang a ganta hongtun leh ganta a zual in a zual a, kuamah tuan ngei nailouhna himahleh Jesu a tuang thei a, ganta kitunglou in, nuakselou hi. Mi Jesu kiang hongtun chiang un amau hihna teng bei a, Jesu hihna koppih in nuamsa in, a kiang ah om ut uhi. Nang leng Jesu kiang na zualta hia?

Jesu gantung ah hong tuang in huai gan tungtawn in pahtawi in om hi. Nang tungtawn in Jesu pahtawi in a om khata hia? Jesu nang tungtawn a pahtawi ahih theihna din Jesu kiang ah na kipia khata hia? Jesu vanzat a pankhak hamphat huai in kipahhuai mahmah hi. Nang ah Jesu pahtawi a om a, i Pathian in thupina a tan ding a deihhuai leh a ut huai pen ahi. Ei ziak bang a i Pathian gensiat leh kousiat a om khak ding lauh huai lua hi.

Khristian vualzou hinkhua a i hintheihna ding in eimah a belh khelhnate koih mang in, i ma ua kitaitehna ding om ah kuhkaltak in tai lehang, bah i kichih lai in leng i kiang ah Toupa om gige ding a, hon huh ding hi. Jesu tuanna ganta pauthei leh huai ni in bang a genta phet dia aw maw. A kipak mah di chi aw. Nang leng na tung a thiltungte ngaihtuah mah dih na kipahna ding tampi na muh ka lamen hi. Vualzohna lampi tawn theizel din Toupan hon vualzawl hen.