Thupatna:
Simtute KUMTHAK CHIBAI. Tukum thupi ding a Heututen “KEMTU MUANHUAI” chih hon telna uah hoih in thupi ka sa a, kum lui thupi toh leng kihiang sa in kipahhuai mahmah hi. Kemtu i chih chiang in banghiam ei’ a hilou kuahiam in deihsak a hon kepsak, kuahiam in muang a hon etkolsak chihna lam a kawk thei hi. Midang neihsa kemtu chihna ahimai hi. I Pathian in ei a hilou himahleh, ei a dan a hon zatsak/kepsak thil tampi omman in hamphat huai mahmah hi.

Kemtu Muanhuai hih theihna ding a poimoh masa tuh -
1. Kizopna hoihtak neih: Kepna na hon petu theihchetna poimoh mahmah ban ah, amah toh kizopna hoihtak neih poimoh hi. A hon kemsaktu ding toh kizopna hoihtak na neih kei leh hiai na na sem theikei ding. Hiai a kalbi masa pen ahi a, hiai na zohleh adang teng a nuam ding hi.

2. Ginomna: Hiai Ginomna lou in i nasep ding ah i lohching kei ding hi. Ginomna hoihtak a na letkip zoh nakleh kalbi nihna zou na hi ding hi.

3. Kipumpiakna: Hiai leng a poimoh mahmah khat ahi nawn hi. Mi kuapeuh kipumpiakna tellou in a nasepna ah a lohching theikei ding. Hun tamdeuh piak a ngaihna mun a pengap ding, sep ding mun a thanuamtak a sep ding. Kipumpiakna in lohchinna leng hon tun ding hi, kalbi thumna zoh ahi nawnta.

4. Mahni kimuanngamna: Kemtu Muanhuai hi ding a seh leh lamet na hihna ah Mahni kimuan ngamna neih poimoh hi. Kineukoih lawzen a omlouh a, kisang koih lawzen amidangte simmoh hituan lou in Toupan hon piak bangbang kem a, don a, enkai ding a kimuanngamna neih ding ahi. Kalbi lina zoh hita.

Kemtu Muanhuai chih na ngaihtuah chiang in hiai a nuai ate thei in –

I. Bangkim Siamtu leh Neitu Pathian ahi. (Gen. 1 & Sam 24:1)
(a) Lei leh van siamtu leh neitu ahi. (Gen. 1:1)

(b) Leitung leh a sung a thilom tengteng neitu ahi (Sam 24:1-2)

(c) Dangka leh Dangkaeng Pathian’ a ahi (Hag 2:8)

(d) Ganhing chiteng Pathian bawl ahi (Sam 50:10-12)

(e) Hamphatna Petu Pathian ahi (Diut. 8:18)

II. Pathian in Mihingte Kemtu a hon seh i hi.
(a) Thilsiamte tung a thunei dia seh i hi (Gen. 1:27)
(b) I hinna toh kisai tengteng Amah hon piak ahi (Nas. 17:25)
(c) I pumpi kepna aleng mohpua i hi (I Kor. 6:19-20)
(d) I neih leh lamte Pathian hon piak/kepsak i hi (Jak 1:17; Sam 8:6-8; Rom. 14:7-8)

III. Mihingte Kemtu lel i hi chih i kitheih ding ahi
(a) Pathian kiang ah i tanchin (account) pechiat ding i hi (Rom. 14:12)
(b) Kepsak a i om tengteng tanchin (account) pechiat ding i hi (Lk 16:2)
(c) Pathian deihdan a kep ding ahi (Exd. 23:19; Sam 96:8; Mal. 3:10)

IV. Kemtu Muanhuai hih ding ahi (IICor. 8:1-5)
(a) Mimal haksatnate suanlam chinglou (2Kor. 9:2)
(b) Lungsim a kimanna poimoh (2Kor. 8:3)
(c) Pathian kiang a Nasepna kipiakna ahi (2Kor. 8:5) “Pathian deihlam in amau mahmah Toupa kiang ah leh kou kiang ah a kipe masa phot ua.”

V. Kepsak a i omte bangbang ahia?
(a) I Pumpi mahmah ahi (1Kor. 3:16-17).
(b) Hun- nikhat a dakkal 24 i zatna, manphaa zat ding ahi. (Sam 90:12; Eph. 5:16; Kol. 4:5).
(c) Nasep hoih kisepsak tuah ding ahi (I Pet. 4:10).
(d) Tangthupha (Gospel) kepsak aom i hi (Matt.28:19-20)
(e) Saptuam kepna na (Nas. 20:28; Tita 1:7)
(f) Inkuan kepna na (Pau. 29:17; Eph. 6:1-4)

VI. Sum leh Pai, Neih leh Lam kepna (Pau. 3:9-10)
(a) Dangka leh Dangkaengte Toupa’ a ahi. (Hagg. 2:8)
(b) Sum leh Pai muhtheihna hon pepa Amah ahi (Diut. 8:18)
(c) Vantung a gou khol ding in hon hilh (Matt. 6:19-20)
(d) Mihaute’n leng thilhoihhih a hauh ding ahi (1Tim. 6:17-19)

Behlap noplaite:
Hun: Hiai pen i pian akipan i sih ni tanpha adia a manbei dia hon kepsak/zatsak ahi. Hauhman, thuneihman, thahatman chihte in hun sukiam in susau thei tuan lou a, miteng ading in ni khat hun bichiam hon bawlsak kibang vek hi. Pathian vaihawmsiam maw? Hiai hun kemtu dia Pathian in mohpuakna hon piak bang na chi kep a, Ama deihdan a kem in na kithei hia? A hun neitu Pathian a kipak diam?

Tuhun, hun poimohpen ahi (2Kor.6:2): Tuhun in tunung ding bawl a, tuhun tunung a ding a suan theih louh ahihman in Pathian in “tuhun mahmah a sem a kipan ding in hon lamen hi.” Tu hun na kikhelsak leh denchiang chih in na hunteng a bei ding a, bangmah na sem khe mankei ding hi. Pathian in hon kepsak ‘hun’ na zat bangbang in ni tawpni chiang in thu khensak na hi ding (Is.49:8; 55:6; Sam 69:13). Hun, thilmanpha ahi.

Toupan kum thak ah hon pilut a, tukum nang mimal hunzat kemtu ding in mohpuakna hon pia nawn hi. Bangchin na kepsawm a chih eimau mohpuak chiat ahi. Toupa hoih hina tel e maw! A kumtawn in i kemkha diam, alailak ah i hunkep atawp diam i theikei, himahleh, i kep hunsung ginom, siangthou leh diktat in kep i sawm ding uh.

Inkuan a kemtu Hihna: Nu leh Pa dinmun a dingte ading in Inkuan kep ding Pathian in hon pia a, mohpuakna liantak mai i tang hi. Hiai inkuan kepna kuamah kiang ah na pesawn thei kei, nuam in nuamta keileh nang kep ding ahi mai hi. Toupan na kepsiam leh siamlouh huntawp ah hon donglai kha ding.

Inkuan kepna ah Pathian deihna bang in na kemkha hiam, kemtu muanhuai hi’n na kithei hia? Noah inkuan kepdan etton tak mahmah, A long bawlna, a zoh a longsung a lut leh pawt dan uh. Papen in makaih a, a tate, a moute chi a hi diandian a pai uh.. kemsiam maw! Inkuan kepna ah kei kasiam, ka lohching kichi a kisuang ngam ding i om kholkei maithei, himahleh Pathian deihdan a kem a kithei a, a kempa leng lungkim, kep a omte leng lungkim chihchiang in inkuan kepna lohching ahi i chi thei hi.

Sum (Money): Sum omlou in khosakna neihtheih ahikei chih i thei. Himahleh, sum pen Pathian akipan mah ahia, kepsak a i omna zahzah a muanhuai leh ginom ding a lamet leh deihte i hi. Hon kemsaktun na muanhuaina hiam chin niteng in hon dong kholkei maithei, himahleh na ginomna hon dotni om kha ding, I neihsa tung a lungkimlou a, aban deihbeh na in hon kemsakpa tung a lung kimlouhna, helna bawl kisuak ahih man in ei toh kituak dia hon kepsakna tung ah lungkimdan kisin poimoh hi. Sum leh pai muhkhiat theihna hon pepa lah Pathian ahi ngal a …

Sum leh pai Pathian in hon kepsakte ah sawm-a-khat hi’n, Missionary thohlawm hitaleh ei a kemtu’n i itmawk ding hilou a i piak teitei ding thil ahi. I saptuam a member-ten sawm-a-khat pia chiat hilehang tuasang in nasepna thupi zawsem lai ding hi.

Pathian neihsa kemtu muanhuai leh gahsuah hihna dia a kibulphuhna lite:

1. Thumna: Khristian tengteng tawp lou a thum dia thupiak leh lamet ahi (1Thess. 5:17-18).

Hotdamte’ thumna tuh khalam adia Nakna ahi. Mihing chidam minute khat in 20 vei khawng a nak hi. Khalam a ahiding bangtak a nak gigete chidam, khang, thahat leh gahsuah uhi. ‘Midiktat thumna in thil thupitak a hih zel’ chih thu dik leh poimoh ahi (Jakob 5:16).

# Khristian hinkhua laigil (heartbeat) Thumna ahih man in, Pathian neihsa kemtu thummi chidam in thahat gige hi (1 Tm.2:1-5,13,16).

2. Laisiangthou sim limsak: Khristian tengteng Pathian thu, khalam nawitui, bangmah toh kihel lou, lunggulh gige dia lamet ahi (1 Pet.2:2).

#Laisiangthou thutak, bangmah toh hellouh, hotdamte ading a khalam Ann ahi. Niteng a sim gige Pathian neihsak kem mi, khalam ah chidam, khang, piching leh gahsuah gige hi (v.2; 2 Tm.3:16; Sm.1:1-3).

3. Biakna limsak: Biakna Pathian kiang a toukaina ahi (Is. 6:1-9; 40: 25; Rm. 1:21). Biakna Pathian kiang a kipahthu genna ahi a (Diut. 32:3,4; Sm. 45:1; 23:5; 100:1ff.; 98:1-8), Biakna in Pathian toh mimal hon kinaisak in, Amah batna ah hon khangsak hi (2Kor. 3:18).

# Saptuam biakna, mimal biakna leh inkuan biakna limsak gigete Pathian neihsak kemtu lohching leh gahsuah ahi uhi.

4. Thilpiak limsak: Thilpiak kipatna Pathian ahi (Jn.1:1-5,14; 3:16; Rm.5:6-8; Philp. 2:7-8; Is.53:10):

Mihingte itna ziak in Pathian in a tapa tang neihsun hon pia hi. Jesu’n nang adia a hinna a piak siang sipsip bang in na bangkim pephal dia lamet na hi.

# Ginna a mi minthang tampite’n – In-le-lou, leitung nopsaknate, a hinna uh tanpih tham Khrist ahihdan theichian uhi (Heb.11:13-16,32-39)

Thukhitna: I Laisiangthou sung ah Toupa neihsa kemtu (Steward) lohching mahmah tamtak i mu hi. Pathian neihsa kemtu Khristian gahsuah leh Toupa sikha phatuam hi ding in thilbangkim a Toupa kihtakna leh amah a muanna ngak gige poimoh hi. Toupa’n “Ka Sikha muanhuai, na pu kipahna ah lut in” a chih sikha hi ding in i kideihsak hi. Pathian neihsa kemtu muanhuai leh pahtak loh hichiat ding in Aman hon vualzawlta hen!