Koute zaw Khrist nasemte leh Pathian thuguk kemte bang in mi’n hon thei uhen. Hiai ah kempa mi muanhuai hih akiphamoh ahi. – 1Korinthte 4: 1-2
THUMAL GENCHETNA:
Saptuam in Kum Thupi dia atel Kemtu Muanhuai chih tukum sutkhawm ding i hihna ah lunglut huai i sa hi. Thukhun thak Laisiangthou ah Kemtu- oikonomeo/oikonomos/oikonomia (Gr) - insung kem, enkai, zeek, vaihawm, gelkhawl chih thumal 20 vei kimu hi cf. Luka 12: 42; 16: 1-4; Rom 16: 23; 1Kor 4: 1-2; 9: 17; Gal 4: 2; Eph. 1: 10; 3: 2, 9; Kol. 1: 25; 1Tim. 1: 4; Tita 1: 7; 1Pet. 4: 10. Muanhuai – pistos (Gr) – muanhuai, ginom, kingakna taak i chih in kemtu manphatna gen kha hi. Kemtu hihna ding in pilna-siamna, navakna leh thil tuamtuam poimoh om mahleh a poimoh pen tuh muanhuaina, ginomna ahi (1Kor.1:17; 7: 25; Kol. 1:7; 4: 7)
KEMTU LEH NEITU:
Kemtu leh Neitu in kibatlouhna tampi nei hi. Hiai kibatlouhnate thei in eimah hihna pel gamgi kan louh poimoh hi. Mi tamtak kemtu hizen napi a neitu kisa om ua huai in thil tamtak suse kha sek hi. Kemtu leh Neitu kibatlouhna hiaite ahi.
1. Thuneitu leh Thumangtu: Neitu in a neih-le-lamte tung ah thuneihna tawp a nei hi. Kemtu in a neitu deihdan a kep ding a mohpuakna ahi a, amah mimal deihdan in akaikawi thei kei hi (Matt. 25: 14)
2. Thupetu leh Thusaangtu: Neitu in hoih asak bangtak a semkhe ding in kemtute thupiak theihna thuneihna anei hi. Kemtu in thupiak ahihbang bang sepkhiak ding a mohpuakna ahi. Mimal deihtelna leh lemgelna piak ahikei hi (Matt. 25: 15- 18)
3. Dongtu leh Dawngtu: Neitu in a kepsak mite kiang ah neih-le-lam tungtang a-ut hunhun in a dong thei hi. Kemtu mohpuakna ahihleh dot ahih hunhun a genchet theih ding ahi. Huaiziak in a kigin gige poimoh hi (Matt. 25: 19-25)
4. Avek leh Akhen: Neitu in a neih-le-lam tengteng tung ah thu a nei a, kemtu in ahihleh amah kiang a kepsak a omte tung kia ah mohpuakna anei hi. A mohpuakna pel lam va awlmohluat ziak in phat aloh tuankei a, iplah in a-om zosop hi (Matt. 25: 26-29).
5. Det leh Detlou: Neih-le-lam, gou-le-gamte tengteng neitu a ahi gige hi. Kemtu chu a pu a lungtun keileh chiklaipeuh a khektheih ahi. Huaiziak in kemtu in apu mitmei veng gige in a pu muanna a ngah ding kisam hi (Matt. 25:30).
KEMTU MUANHUAI HIHNA DING:
Kemtu Muanhuai hihna ding a poimoh tuh Aneitu i hihlouh lam kitheih ahi. Ei’ a hilou pi kineisak a eimah thu leh deihdan a i zat i zeek chiang in kemtu muanhuailou i hih ban ah susetu kisuak thei hi. Mihingten leng ei-a i chihte tung ah ei phalna tellou a midang hong kigolh luat chiang in thuakhak i sa chiat hi. Huai mah bang in Pathian in leng Amah adia asiamte mi kuahiam ana kineisak tuam lua om ding phal bikbek lou hi.
“Toupa ka hi; huai ka min ahi: Ka thupina midang kiang ah Ka pekei ding a, phat ka lohna leng milim bawltawmte kiang ah Ka pesam kei ding” Isai 42: 8.
“Amah ah bangkim siam ahi. Van a omte, lei a omte, muhtheihte, muhtheihlouhte, mangtutphahte, thuneihnate, bangkim Amah siam, Amah ading mah a siam ahi” Kol 1: 16; Rom 11: 36.
THUKHUPNA:
Thiltamtak i siam i bawl leng hilou napi ei’ a sa a kineihsak khak omthei hi. I kha, hinna leh pumpi Toupa’n Amah batpih dia Ama khut ngei a hon bawl ahihman in ei’ a himawk lou hi (Gen 1: 26-27; 2: 7, 21-22; Ekl. 12: 7). Tua ban ah inn-le-lou, neih-le-lam, veng-le-pam, pau-le-ham, dinmun, mohpuakna leh gam leitangte Pathian in i etkol ding a hon kepsakte ahi (Gen. 1: 28-30; 2: 15). Eite a neitu hilou in Toupa thilsiamte kemtu leh enkaitu ding a mohpuakna piak a omte i hi. Pathian deihdan zong kawm a ittak leh duattak a kem dia lamette i hi.
Hiaite theilou a eimah thuthu a i zeek khakleh Toupa lung hihlouhna maituah khak theih hi. Tua thamlou in a ut hunhun a i kepte ei khut apan lakhia in midang mi muanhuai zaw kiang ah pethei gige ahi (Gen. 49: 3-4; Kil. 2: 5). Tuni a ka inn – ka lou, ka khua-ka tui i chihte nidang in ei chih bangbang midang in leng ana chi ngeita a, tunung in leng midang in eimah bang in hon chi ding uhi (Ekl. 1: 9-11; 2: 21).
Huaiziak in i kum thupi uh ahih bang in Toupan muanhuai honsa a i kep ding a hon piak neih-le-lam, sing-le-lou, zu-le-va, tagah meithaite leh thilsiam tuamtuamte duattak leh gin omtak a kep kizil thak ni. Nidang a vasa ham leh gamsa chi tuamtuamten i gam lawi ding uh bang ta hi. Tu a om sunte bek duattak a kep kizil thak poimoh mahmah hi. Ban ah i hinna leh sapum leng Pathian in hon piak leh A tenna temple ahihlam theithak ni. Eimah ut thu a hinna kilak hiam pumpi suksiat theihna ding thuneihna neilou i hi. Duattak leh siangthoutak a kep ding i mohpuakna ahi. Kemtu muanhuai hi ding in Toupan hon vualzawl hen.