(Contend for the faith)
“Deihtakte aw, i kikop hotdamna thu na kiang ua gelh teitei ka tuplai in, misiangthoute kiang a ginna khatvei kepsak a om thu a, phatuamngai tak a humbit a pang ding a hon hanthawn ding in, na kiang ua laigelh a kiphamoh chih ka na thei hi” (Jude 3).

Thumasa: Juda laikhak Thu-up sinsakna dik hum ding a patau dak ahi. Saptuam a sinsakna diklou Pathian thutak demna leh kaihkoina a om chiang in misiangthoute kiang a ginna kepsak a om humbit ding a pankhawm hun ahi. Juda in a laikhak a gelh teitei a sawm, ‘Kikop hotdamna thu’ ahi. Himahleh ginna kaihkoina leh puksanna a hong tung hi. Tanchin hoih honpuak zalenna sa a dia lemtanna a zang, mimal leh heutu a hong om ziak in a thugelh sawm khawlsan in ginna hum ding in laithon a gelh hi (Jude 4). Huai bang in tulai in leng a guk a lutte ahi saptuam subuai theite.

I. SAPTUAM A GUKLUTTE: Saptuam omsa polam apan guklut nasepna hunsawtpi akipan om ahita hi. Juda laikhak hun AD 68-70 kikal vela pan na omta ahi. Saptuam chih thumal sappau a ‘church’ apan teisawn ahi. Sappau a church Grik thumal, ‘ekklesia’ apan teisawn ahi a, a khiakna, ‘pawlpi khat, sapkhiak a om’, ‘sapkhiak a omte’ chihna ahi. Thukhun thak ah saptuam i chih Pathian in khovel apan a sapkhiak a Jesu Khrist thuneihna nuai a ki-uk khawmte genna ahi (Eph 1.22-23). Saptuam in thu-up, Dan leh dun, sum leh pai, Inn leh lou ah leng zuih dingdan a kichian a neih ziak in pawlkhat saptuam sung a om ngaplou polam akipan saptuam guklut a om uhi.

II. JUDA HUN A SAPTUAM A GUKLUTTE: Pathian thutak kaihkoina Eden huan a kipanta ahi. Setan in Pathian thu kaikoi (twisted) Pathian thumanlouhna ah Evi a khempuk hi (Gen 3.1-6). Hiai mah tuni tan a Setan nasepdan ahi. Thutak tampi lak a mal khat kaihkoi sinsakna diklou mite chindan ahi. Juda in ‘aguk alut’ chihna thumal ‘crept unnoticed’ chih a poimoh ahi. A paubul Gk. ah, ‘pareisduo’ chih a kizang a, huai in a gen tuh ‘tupna gilou toh kitholhlut’ chihna ahi. Aguk agal a om chihna sang in saptuam thuneih khum phaklouh dia khosate genna ahi.

Sinsakna Dikloute: Juda in mimal leh pawlmin kuamah a genkei a, a sinsakna uh lauhuai thu a gen hi. Mimal leh pawlmin genkei mahleh a hun et in Gnosticism pawlte sinsakna zuite genna hiam Nikol pawlte gen hi ding a gintak ahi (Kil 2.6,15). Nasepte laibu ah Nikol Upa sagih sehna a telpha, Antiok mi, Juda phungkai a om hi (Nas 6.5). Amah makaihna pawl kibawl, a tawp a sinsakna diklou a lutte genna a kichi hi. Nikol minkhiakna, ‘mipite zoutu’ chihna ahi a, Balaam pawl toh kibang hi ding a sut ahi. A ziak tuh, Balaam min khiakna leng ‘mipite zoutu’ chihna ahi. Amau Pathian thu mah zang a Laisiangthou sinsakna hilou amau deihdan zui ding a mipite pikoina ahi.

(i) Saptuam paipi khingsa, deihkhop lou, Laisiangthou kisinsakna leh thugente sang a mimal a heutute thuneih khumlouh a, zaulen, saptuam toh kikim a om utna, Nikol pawl sinsakna ahi. Saptuam toh pangkhawm lou in nasepna (ministries), vaisaina leh sum leh pai saina a maldin utna paikhelhna khat ahi. Hehpihna hun beikuan ah i nasepna, thugen leh sinsaknate Lasiangthou toh a kituak hiam chih kivel ni. Jesu’n, “Lei leh van a mang dia, ka thute zaw a mangkei ding” a chi hi (Matt 24.35; Mk 13.31; Lk 21.33). Saptuam paipi zuilou, mimal a pawl dinkhiak a tawpna ah sinsakna diklou ah lut baihlam ahi.

(ii) Nikol pawlte paikhelhna siangthouna neilou ua, Jesu Khrist a zalenna i neihsa sa a lemtanna in a zang uhi. Pathian hehpihna kaikoi in kha leh kha kingai, mi-zi, mi-pasal chih omlou, kha in a kingaihsakte kitenna chih omselou a nupa bang in a om uhi. A sinsakna uah, “Dan hun beita, utut a zalen i hita uh. Pumpi, a khialsa bangmah a zattak lou, kha ahi a poimoh a chi uhi. Pumpi a khelhna kisemte’n kha sukhalou ahi” chi in numei-pasal kal khelhna a mi a lutthuk zoh peuhleh Pathian hehpihna tamsem ngah a chi uhi. Ephesa leh Pergamos saptuam a omte ahi (Eph 2.6, 16).

(iii) Pathian Hehpihna Zangkhialte: Juda hun a sinsakna dikloute leh tuni tan a heutu dikloute, ‘pathianlimsaklou’ a kichi hi. Hiai thumal Gk. ah ‘asebes’ ahi a, saptuam masa (church fathers) te’n pathian gingtalou (atheists) leh paikhialte (heretics)te genna a a zat uh kammal ahi. Hehpihna ‘zangkhial’ chih ‘Pathian hehpihna sautna noptalna suaksak’ chihna ahi. Sunglama Pathian launa neilou, polam a Pathian laupen bang a omna ahi (2 Tim 3.5).

Saptuam makai, numei-pasalna a paktat, poisak neiloute sinsaktu dikloute ahi uhi. Mimal a siangthouna deihlou hilounapi in amau a utna omte thunun ding in Khasiangthou apan thahatna leh vualzohna neilou chihna ahi. Saptuam sung ah hiai bang heutu kiselgu om ahi. Mipi mai a zahlakna tawp a tuah un leng lungsim tak a khelhna leh utna gilou tawpsan ding in a lungtang uh a kisik theikei uhi. Nang a om sa leh a utna ‘hihlum in’ (mortify) Paul in a chi hi (Kol 3.5).

III. SINSAKNA DIKLOUTE THEIHNA: I gam ah thugentu leh sinsak nuam a tam a, sinsakna diklou a lutkhak ding a pilvanhuai sem hi. Thugen leh sinsakte Laisiangthou toh kituak leh kituakloute sut a, a dik lampi a mite pi ding saptuamte mohpuak ahi. Thugenmite’n “Theology dik, amun diklou a genkhak” pilvanhuai sem ahi (Matt 2.2). Priscilla leh Aquila in Apollos kiang ah Pathian lampi thu kichian sem a a hilh bang in sinsakna dikloute bawldik ding ahi (Nas 18.26). Tuhun a sinsakna diklou anuai a kigente apan saptuam hum a dou ding ahi:

(i) Pathian Ginlouhna: Sinsakna dikloute theihna masapen tuh a Pathian pomdan uh ahi. Pa Pathian, bangkim hihthei, lei leh van siampa kitheihmoh bawl a, lei leh a sung a omte amau a om, thilsiam dang akipan kisiamsawn a sinsakna un Genesis 1 nialna ahi. Pathian a mi thumte, Pa, Tapa, leh Khasiangthou nialna Laisiangthou sinsak kalhna ahi (Sam 14.1).

(ii) Pathian Thu kaihkawina: Pathian thu kaihkawina Setan sepdan ahi. Eden huan ah Pathian in Singgah na nek ding uh ahikei, na nek ni un na si ding uh a chih, Gul in numei kiang ah, “Si zenzen lou e. Na nek ni ua pat na mit uh a hong vak dia, a hoih leh a sia thei in pathiante na hong bang ding uh, chih Pathian in thei kilkel eive,” a chi hi (Gen 3-5). Sinsakna dikloute’n Pathian thu amau hamphatna ding in a kaikawi uhi (1 Tim 6.5). Midang thuzohna ding in Bible genlouh a gensak uhi.

(iii) Jesu Khrist Pathianna nialna: Johan in, “Hiai ah Pathian Kha na thei ding uh, bang kha peuh Jesu Khrist sa in a hongpai chih gum Pathian akipan ahi. Bang kha peuh Jesu gumlou Pathian akipan ahi kei; huai tuh Khrist doumi kha, hongpai ding na zak uh ahi; tuin khovel ah a om khinta hi.” (1 Jn 4.2-3). Jesu Khrist Pathianna tapa ahi chih gingloumi sang a zuauthei a om kei hi. Jesu gingta lou in Pa Pathian leng a sang tuankei uhi (1 Jn 2.22-23). Polam muhtheih ah Jesu Khrist nasempa bang in a om ua, amau hamphatna ding a zon uh ahi (Jude 4b).

(iv) Hotdamna thu a sinsakna: (a) Mimal hi in pawlpi hitaleh hotdamna thu sinsakna a ‘Pawl a hotdamna om’ chite sinsakna diklou ahi. Hotdamna saptuam a ahikei a, Hotdamna Toupa a ahi (Jon 2.9). “Jesu Khrist kia ah hotdamna a om a, hondam ding min dang a omkei” a chi hi (Nas 4.12). Jesu Khrist kia lampi, thutak leh hinna, Pa kiang zotna lampi omsun ahi (Jn 14.6; Eph 2.8).

(v) Khelhna Kisikna tellou hotdamna: Life-word Missionte’n, Hotdamna ding in “Khrist in khelhnate hon ngaidam chih phawkguih ding” a chi uhi. Pianthakna ah “khelhna kiphawkna, kisikna, leh ginna tellou” a chi uhi. “Laisiangthou in khelh ngaihdamna ding a kisik masak ding chih gen khalou” a chi uhi. Hiai sinsakna diklou kiselgu ahi. Khelhna kisikna leh tawpsanna lou a hotdamna sinsak Pathian thu kalhna ahi. Kisikna Johan leh Jesu thugen poimoh masa ahi uhi (Matt 3.2; 4.17; Mk 1.15). (Hiaite sim in: Luk 24.47; Nas 2.38; 11. 18; 17.30; 20.21).

(vi) Singthousakna Tellou Pianthakna: Piangthakte hinkhua poimohpen Siangthousakna ahi (Rom 6.3-11; 1 Pet 1.15-16). Hiai hinkhua damsung ading hiam, Toupa hongpai ma tan ading ahi. Life-Word Missionte’n hiai a gintak louh ziak un hoihna leh sianthouna gensam mahle uh a guk a kingaihna a bualkawm in saptuam ah a kihel thei uhi. Hiaite sinsakna lauhuai ahi.

IV. Sinsakna diklou apan kihumbitna: I saptuam in a buaipih, ‘Sinsakna diklou’ chi a Evangelical-te’n a koihte uh sang in eisung a om kawm a pawltuam satnakte ahizaw uhi. Jude in ‘ginna hum in’ a chih ‘Contend for the faith’ in saptuam humbit ding leh Sinsakna dikloute dal ding a sinsakna dik zang a thuhilh ding ahi. Saptuamte kihumbitna (defensive) leh sinsakna diklou maituah (offensive) ding ahi. Hiai anuai a thute pansan in sinsakna dikloute apan kiveng in a dik i sinsak thei ding uhi:

(i) Saptuam Polammi apan kivenna: I saptuam in paidan a neihsa, polammi thugen nuam, saptuam lai tawiloute pulpit zatsak louh chih lenkip thak ni (Nas 18.27). Ei saptuam mi pawl dang, min dang toh nasemte chial pilvan sem saptuam damna ding ahi. Saptuam a om, saptuammite lak a a guk-agal a lut a, sum leh pai huhna deihte leh saptuam paipi dem nakte saptuam subuaite ahi. Pastor leh Local Upa Committee in saptuam a gup leh baihlamtak in Saptuam i vengbit ding hi.

(ii) Laisiangthou Kaikoimite apan kivenna: Saptuam ah Laisiangthou kaihkoi ching heutu leh makai hunsawtpi apan a om hi. Sinsakna diklou theih nung a dai dide a om amau khelhna a kihelna ahi (2 Jn 10-11). Saptuam liamsak thei leh mite lungbuaisak thute genlouh saptuam damna ahi. Paul in, “Dotna haihuai, khangthu suina, kiselna, dan thu a kilaina nungngatsan in; Ginna tuam neimi zaw khatvei nihvei hilh nung in deih ken” a chi hi (Tita 3.9-10).

(iii) Tanchin hoih gen in: Saptuam kemte’n Tanchin hoih, thugin Siangthou mah gen ni. Kiselna tunthei thute, tangthu leh khangthu suizohlouh peuh buaipihlou in lungtang siangthou leh sialehpha theihna siang leh ginna taktak akipan a pawt itna gen ni (1 Tim 1.4-5). Paul mah in, “Tanchin hoih genkei leng ka tunggik ding ahi ngal a” a chi hial hi (1 Kor 9.16b). Sinsakna diklou douna hoihpen zaw Tanchin hoih thutak gen leh sinsak ahi.

Thukhitna: Saptuam a sinsakna leh paidan tuam nei mi zat a, a nung a bawlphat sang in amaute leh a sinsak uapan Pathian saptuam humbit ding ahi. Heutu dikloute a thugen uh diklou vek hisam lou ahi. Tuipi a long sesak a a sung a tuangte mangthang sakte suang lauhuai mun khat a kiphumgu phutkhak ziak ahi. Sinsakna dikloute’n Bible thumal khat hiam tang khat a kaihkawi uh saptuam pumpi siatpih theih ahihziak in pilvang ni. Johan in siksaktu dikloute na inn uah tungsak kei unla, paukam hoih in kha kei un. Paukam hoih a khami a thil hihkhelh uah a pang a chi hi (2 Jn 9-10). Sinsakna diklou apan Saptuam ginna humbit leh amaute zou ding in Toupa’n hon vualzawl hen.